Mga Pangutana Gikan sa mga Magbabasa

Sanglit ang mga Levihanon walay panulondon sa karaang Israel, sa unsang paagi ang Levihanon nga si Hanamel nakabaligya ug usa ka uma ngadto sa iyang Levihanong ig-agaw nga si Jeremias, sumala sa gipakita sa Jeremias 32:7?

Maylabot sa mga Levihanon, giingnan ni Jehova si Aaron: “Ikaw dili makabaton ug panulondon, ug ikaw walay maangkong bahin sa ilang [sa Israel] taliwala.” (Numeros 18:20) Bisan pa niana, ang mga Levihanon gihatagag 48 ka siyudad lakip na ang mga sibsibanan niini, nga nahimutang sa tibuok Yutang Saad. Ang yutang natawhan ni Jeremias mao ang Anatot, usa sa mga siyudad nga gihatag ngadto sa “mga anak ni Aaron, ang mga saserdote.”—Josue 21:13-19; Numeros 35:1-8; 1 Cronicas 6:54, 60.

Sa Levitico 25:32-34, atong makaplagan nga si Jehova naghatag ug tinong mga instruksiyon bahin sa “katungod sa paglukat” sa propiedad nga gipanag-iya sa mga Levihanon. Dayag nga ang matag Levihanong mga pamilya adunay mga katungod sa panulondon bahin sa pagpanag-iya, paggamit, ug pagbaligya sa tinong mga pahat sa yuta. Siyempre naglakip kadto sa pagbaligya ug paglukat sa propiedad. a Sa daghang kahimtang, ang mga Levihanon nanag-iya ug naggamit sa propiedad sa mga paagi nga sama sa mga Israelinhon sa ubang mga tribo.

Lagmit, ang pagpanag-iya sa maong Levihanong propiedad gipasa ingon nga panulondon sa pamilya. Apan, bahin sa “katungod sa paglukat,” ang mga transaksiyon gitugot tali sa mga Levihanon lamang. Dugang pa, maorag ang pagbaligya ug ang paglukat ug yuta mapadapat lamang sa propiedad diha sa mga siyudad, kay “ang yuta nga sibsibanan sa ilang mga siyudad” dili ikabaligya kay “ilaha kini hangtod sa panahong walay tino.”—Levitico 25:32, 34.

Busa ang uma nga gilukat ni Jeremias gikan kang Hanamel lagmit ingon niadto ug kahimtang nga kadto ikapasa pinaagi sa paglukat. Kadto mahimong nahimutang diha lamang sa siyudad. Gipamatud-an mismo ni Jehova nga “ang uma” nga gihisgotan dinhi iya ni Hanamel ug si Jeremias adunay “katungod sa paglukat.” (Jeremias 32:6, 7) Gigamit ni Jehova kining maong transaksiyon sa simbolikong paagi aron palig-onon ang iyang saad nga ang mga Israelinhon mobalik aron kuhaon pag-usab ang ilang panulondon sa yuta human sa usa ka yugto sa pagkadestiyero didto sa Babilonya.—Jeremias 32:13-15.

Walay timailhan nga nagpakitang napanag-iya ni Hanamel ang propiedad sa Anatot sa dili maayong paagi. Walay nagpaila nga iyang gilapas ang balaod ni Jehova sa pag-agni kang Jeremias nga paliton ang maong uma sa Anatot o kaha si Jeremias dili-hustong naggamit sa iyang katungod sa pagpalit pag-usab sa maong uma.—Jeremias 32:8-15.

[Footnote]