Usa ka “Ulipon” nga Matinumanon ug Maalamon

“Kinsa ba gayod ang matinumanon ug maalamong ulipon nga gitudlo sa iyang agalon ibabaw sa iyang mga sulugoon sa panimalay?”—MATEO 24:45.

1, 2. Nganong hinungdanon nga kita makadawat ug regular nga suplay sa espirituwal nga pagkaon karon?

 SA Martes sa hapon, Nisan 11, 33 K.P., ang mga tinun-an ni Jesus nagpatungha ug pangutana nga adunay dakong kahulogan alang kanato karon. Sila nangutana kaniya: “Unsa man unya ang ilhanan sa imong presensiya ug sa kataposan sa sistema sa mga butang?” Sa pagtubag, si Jesus misulti ug talagsaong tagna. Naghisgot siya bahin sa magubot nga yugto sa mga gubat, kanihit sa pagkaon, linog, ug mga sakit. Ug kana mao lamay “sinugdanan sa mga kaul-ol sa kasakit.” Mograbe pa ang situwasyon. Pagkamakalilisang nga palaaboton!—Mateo 24:3, 7, 8, 15-22; Lucas 21:10, 11.

² Sukad sa 1914, ang dakong bahin sa tagna ni Jesus nangatuman. Ang “mga kaul-ol sa kasakit” bug-os nga midangat sa katawhan. Apan, ang matuod nga mga Kristohanon dili kinahanglang mahadlok. Si Jesus nagsaad nga iyang tagan-an sila ug makapalig-on nga espirituwal nga pagkaon. Tungod kay si Jesus anaa na karon sa langit, sa unsang paagi gihikay niya nga kita dinhi sa yuta makadawat sa atong suplay sa espirituwal nga pagkaon?

3. Unsang mga kahikayan ang gihimo ni Jesus aron kita makadawat ug “pagkaon sa hustong panahon”?

³ Gipunting ni Jesus mismo ang tubag sa maong pangutana. Samtang naghatag siya nianang dakong tagna, siya nangutana: “Kinsa ba gayod ang matinumanon ug maalamong ulipon nga gitudlo sa iyang agalon ibabaw sa iyang mga sulugoon sa panimalay, sa paghatag kanila sa ilang pagkaon sa hustong panahon?” Dayon miingon siya: “Malipayon kanang ulipona kon sa pag-abot sa iyang agalon makaplagan siya nga nagabuhat sa ingon! Sa pagkatinuod ako magaingon kaninyo, igatudlo niya siya ibabaw sa tanan niyang mga kabtangan.” (Mateo 24:45-47) Oo, adunay “ulipon” nga gitudlo sa pagtagana ug espirituwal nga pagkaon, usa ka “ulipon” nga matinumanon ug maalamon. Ang mao bang ulipon usa lamang ka indibiduwal, o lainlaing mga indibiduwal sa sunodsunod nga yugto sa panahon, o lain pa? Tungod kay ang matinumanong ulipon nagtagana sa gikinahanglan kaayong espirituwal nga pagkaon, makaayo kanato kon atong mahibaloan ang tubag.

Usa ka Indibiduwal o Usa ka Matang?

4. Sa unsang paagi nahibaloan nato nga “ang matinumanon ug maalamong ulipon” dili usa lamang ka tawo?

⁴ “Ang matinumanon ug maalamong ulipon” dili mahimong usa lamang ka tawo. Ngano man? Tungod kay ang maong ulipon nagsugod sa pagtagana ug espirituwal nga pagkaon sukad pa niadtong unang siglo, ug sumala kang Jesus, magabuhat gihapon niana ang maong ulipon sa dihang moabot ang Agalon sa 1914. Magpasabot kana nga ang usa ka indibiduwal matinumanong mag-alagad  sulod sa mga 1,900 ka tuig. Si Matusalem wala gani mabuhi ug ingon niana ka dugay!—Genesis 5:27.

5. Ipatin-aw kon nganong ang terminong “matinumanon ug maalamong ulipon” dili mapadapat sa matag indibiduwal nga Kristohanon.

⁵ Aw, ang termino ba nga “matinumanon ug maalamong ulipon” mapadapat sa katibuk-ang diwa sa matag Kristohanon? Tinuod nga ang tanang Kristohanon kinahanglang magmatinumanon ug magmaalamon; apan, klarong labaw pa niana ang anaa sa hunahuna ni Jesus sa dihang naghisgot siya bahin sa “matinumanon ug maalamong ulipon.” Sa unsang paagi nahibaloan nato kana? Tungod kay siya miingon nga ‘sa pag-abot sa agalon’ iyang itudlo ang maong ulipon “ibabaw sa tanan niyang mga kabtangan.” Mahimo ba nga ang matag indibiduwal nga Kristohanon itudlo ibabaw sa “tanan” nga kabtangan sa Ginoo? Imposible kana!

6. Sa unsang paagi ang nasod sa Israel angayng molihok ingong “alagad,” o “ulipon” sa Diyos?

⁶ Nan, ang bugtong makataronganong konklusyon mao nga si Jesus nagtawag sa usa ka grupo sa mga Kristohanon ingong “matinumanon ug maalamong ulipon.” Posible kaha nga nagtumong kini sa usa ka grupo sa mga ulipon? Oo. Pito ka gatos ka tuig una pa kang Kristo, gitawag ni Jehova ang tibuok nasod sa Israel ingong “akong mga saksi” ug “akong alagad nga akong gipili.” (Isaias 43:10) Ang matag membro sa nasod sa Israel sukad sa 1513 W.K.P., sa dihang gihatag ang Moisesnong Balaod, hangtod sa Pentekostes 33 K.P. maoy bahin niining alagad nga matang. Kadaghanang Israelinhon walay direktang bahin sa pagdumala sa mga kalihokan sa nasod o sa pag-organisar sa espirituwal nga programa sa pagpakaon. Gigamit ni Jehova ang mga hari, maghuhukom, manalagna, saserdote, ug mga Levihanon sa pagtuman sa maong mga tahas. Bisan pa niana, ingong nasod, ang Israel kinahanglang maghawas sa pagkasoberano ni Jehova ug mosugid sa iyang kadayeganan taliwala sa mga nasod. Ang matag Israelinhon kinahanglan nga mahimong saksi ni Jehova.—Deuteronomio 26:19; Isaias 43:21; Malaquias 2:7; Roma 3:1, 2.

Usa ka “Alagad” Gisalikway

7. Ngano man nga ang karaang nasod sa Israel nadiskuwalipikar ingong “alagad” sa Diyos?

⁷ Tungod kay ang Israel maoy “alagad” sa Diyos kasiglohan kanhi, mao ba usab kana ang ulipon nga gihisgotan ni Jesus? Dili, kay ikasubo nga ang karaang Israel wala magmatinumanon ni magmaalamon. Gisumaryo ni Pablo ang situwasyon sa dihang iyang gikutlo ang giingon ni Jehova ngadto sa nasod: “Ang ngalan sa Diyos gipasipalahan tungod kaninyo taliwala sa kanasoran.” (Roma 2:24) Sa pagkatinuod, ang Israel nakaabot sa kinapungkayan sa hataas nga kasaysayan sa pagrebelde pinaagi sa pagsalikway kang Jesus, ug nianang tungora gisalikway sila ni Jehova.—Mateo 21:42, 43.

8. Kanus-a gitudlo ang “alagad” nga mopuli sa Israel, ug ilalom sa unsang mga sirkumstansiya?

⁸ Kining maong pagkadili-matinumanon sa “alagad,” nga Israel, wala magpasabot nga ang matinumanong mga magsisimba dili na gayod makadawat pa ug suplay sa espirituwal nga pagkaon.Sa Pentekostes 33 K.P., 50 ka adlaw human sa pagkabanhaw ni Jesus, ang balaang espiritu gibubo nganha sa mga 120 sa iyang mga tinun-an diha sa itaas nga lawak sa Jerusalem. Nianang panahona, usa ka bag-ong nasod ang nahimugso. Haom nga ang pagkahimugso niini gipahibalo sa dihang ang mga membro niini maisogong nagsulti sa mga molupyo sa Jerusalem bahin “sa halangdong mga butang sa Diyos.” (Buhat 2:11) Busa, kanang bag-ong nasod, usa ka espirituwal nga nasod, nahimong “alagad” nga magpahayag sa himaya ni Jehova ngadto sa mga nasod ug magtagana ug pagkaon sa hustong panahon. (1 Pedro 2:9) Haom nga sa ulahi kini gitawag nga “Israel sa Diyos.”—Galacia 6:16.

9. (a) Kinsay naglangkob sa “matinumanon ug maalamong ulipon”? (b) Kinsa ang “mga sulugoon sa panimalay”?

 ⁹ Ang matag membro sa “Israel sa Diyos” maoy dedikado, bawtismado nga Kristohanon nga gidihogan sa balaang espiritu ug adunay langitnong paglaom. Busa, ang ekspresyon nga “matinumanon ug maalamong ulipon” nagtumong sa tanang membro nianang dinihogan nga espirituwal nga nasod ingong grupo dinhi sa yuta sa bisan unsang partikular nga panahon sukad sa 33 K.P. hangtod karon, maingon nga ang matag Israelinhon nga nabuhi sa bisan unsang panahon sukad sa 1513 W.K.P. hangtod sa Pentekostes 33 K.P. maoy bahin sa una-Kristohanong alagad nga matang. Apan, kinsa ang “mga sulugoon sa panimalay,” nga makadawat ug espirituwal nga pagkaon gikan sa maong ulipon? Sa unang siglo K.P., ang tanang Kristohanon adunay langitnong paglaom. Busa, ang mga sulugoon sa panimalay maoy dinihogan usab nga mga Kristohanon, nga giisip, dili ingong grupo, kondili ingong mga indibiduwal. Ang tanan, lakip na kadtong adunay responsableng mga katungdanan diha sa kongregasyon, nagkinahanglan ug espirituwal nga pagkaon gikan sa maong ulipon.—1 Corinto 12:12, 19-27; Hebreohanon 5:11-13; 2 Pedro 3:15, 16.

“Ngadto sa Matag Usa sa Iyang Buluhaton”

10, 11. Sa unsang paagi nahibaloan nato nga dili tanang membro sa ulipon nga matang ang adunay susamang tinudlong buluhaton?

¹⁰ Bisan tuod ang “Israel sa Diyos” mao ang matinumanon ug maalamong ulipon nga matang nga adunay tinudlong buluhaton, ang matag membro may personal usab nga mga responsibilidad. Giklaro kini diha sa mga pulong ni Jesus nga nasulat sa Marcos 13:34. Siya miingon: “Sama kini sa usa ka tawo nga nagapanaw sa halayo nga mibiya sa iyang balay ug mihatag ug awtoridad ngadto sa iyang mga ulipon, ngadto sa matag usa sa iyang buluhaton, ug nagsugo sa magbalantay sa pultahan nga magpadayon sa pagbantay.” Busa ang matag membro sa ulipon nga matang adunay tinudlong buluhaton—pagpalambo sa mga kabtangan ni Kristo dinhi sa yuta. Ang matag membro motuman niining maong tahas sumala sa iyang kaugalingong katakos ug mga kahigayonan.—Mateo 25:14, 15.

¹¹ Dugang pa, giingnan ni apostol Pedro ang dinihogang mga Kristohanon sa iyang adlaw: “Sumala sa nadawat nga gasa sa matag usa, gamita kini sa pag-alagad sa usag usa ingon nga maayong mga piniyalan sa dili-takos nga kalulot sa Diyos nga gipahayag sa nagkadaiyang paagi.” (1 Pedro 4:10) Busa, ang maong mga dinihogan adunay responsibilidad sa pag-alagad sa usag usa ginamit ang mga gasa nga gihatag sa Diyos kanila. Dugang pa, ang mga pulong ni Pedro nagpaila nga dili tanang Kristohanon ang adunay managsamang mga katakos, responsibilidad, o mga pribilehiyo. Apan, ang matag membro sa ulipon nga matang makatabang sa usa ka paagi sa pag-uswag sa espirituwal nga nasod. Sa unsang paagi?

12. Sa unsang paagi ang matag membro sa ulipon nga matang, lalaki ug babaye, makatabang sa kauswagan sa ulipon?

¹² Una, ang matag usa adunay responsibilidad nga mahimong saksi ni Jehova, nga magwali sa  maayong balita sa Gingharian. (Isaias 43:10-12; Mateo 24:14) Sa dayon na niyang saka sa langit, gisugo ni Jesus ang tanan niyang matinumanon nga mga tinun-an, lalaki ug babaye, nga mahimong mga magtutudlo. Siya miingon: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo. Ug, tan-awa! ako magauban kaninyo sa tanang adlaw hangtod sa kataposan sa sistema sa mga butang.”—Mateo 28:19, 20.

13. Unsang pribilehiyo ang natagamtam sa tanang dinihogan?

¹³ Sa dihang makaplagan ang bag-ong mga tinun-an, sila tudloan pag-ayo sa pagtuman sa tanang butang nga gisugo ni Kristo sa iyang mga tinun-an. Sa ngadtongadto, ang mga tawo nga mosanong nahimong kuwalipikado sa pagtudlo sa uban. Gitagana ang makapalig-ong espirituwal nga pagkaon ngadto sa mahimong mga membro sa ulipon nga matang diha sa daghang nasod. Ang tanang dinihogan nga mga Kristohanon, lalaki ug babaye, nakigbahin sa pagtuman sa sugo nga paghimog mga tinun-an. (Buhat 2:17, 18) Kining buluhatona magpadayon sukad sa panahon nga ang ulipon nagsugod sa buluhaton niini hangtod sa kataposan niining sistemaha sa mga butang.

14. Ngadto kang kinsa gidelegar ang pagpanudlo diha sa kongregasyon, ug unsay pagbati niana sa matinumanong dinihogan nga mga babaye?

¹⁴ Ang bag-ong nabawtismohan nga mga dinihogan nahimong bahin sa maong ulipon, ug bisan kinsa pay unang nagtudlo kanila, sila nakadawat usab ug instruksiyon gikan sa mga membro sa kongregasyon nga nakakab-ot sa Kasulatanhong mga kuwalipikasyon sa pag-alagad ingong mga ansiyano. (1 Timoteo 3:1-7; Tito 1:6-9) Sa ingon, kining tinudlong mga lalaki nakapribilehiyo sa pagtabang sa pag-uswag sa maong nasod sa linaing paagi. Ang matinumanon nga dinihogang mga Kristohanong babaye wala mayugot nga ang pagpanudlo diha sa kongregasyon gidelegar lamang ngadto sa Kristohanong mga lalaki. (1 Corinto 14:34, 35) Hinunoa, sila nalipay nga makabenepisyo gikan sa paghago sa lalaking mga membro sa kongregasyon ug mapasalamaton sa mga pribilehiyo nga bukas alang sa mga babaye, lakip na nianang pagdala ug makapalipayng balita ngadto sa uban. Ang masibotong dinihogan nga mga igsoong babaye karon nagpasundayag sa ingon nianang mapaubsanong tinamdan, sakop man sa mga dinihogan o dili ang tinudlong mga ansiyano.

15. Unsa ang usa sa pangunang mga tuboran sa espirituwal nga pagkaon sa unang siglo, ug kinsay nanguna sa pagtagana niana?

¹⁵ Ang hinungdanong espirituwal nga pagkaon nga gihatag sa unang siglo direktang gisulat sa mga apostoles ug sa ubang mga tinun-an nga nanguna sa buluhaton. Ang ilang mga sulat—ilabina ang nalakip sa 27 ka inspiradong mga basahon nga naglangkob sa Kristohanon Gregong Kasulatan—giapod-apod taliwala sa mga kongregasyon ug sa walay duhaduha maoy sukaranan sa pagpanudlo nga gihimo sa lokal nga mga ansiyano. Niining paagiha, ang mga hawas sa ulipon matinumanong nag-apod-apod ug dagayang espirituwal nga pagkaon ngadto sa sinserong mga Kristohanon. Ang unang-siglo nga ulipong matang nagmatinumanon sa gisugo kanila.

Ang “Ulipon” 19 ka Siglo sa Ulahi

16, 17. Sa unsang paagi ang ulipon nga matang napamatud-ang matinumanon sa pagtuman sa buluhaton niini sa mga katuigan hangtod sa 1914?

¹⁶ Komosta karon? Sa dihang ang presensiya ni Jesus nagsugod, sa 1914, nakakaplag ba siya ug grupo sa dinihogang mga Kristohanon nga matinumanong nagtagana ug pagkaon sa hustong panahon? Oo. Kining maong grupo klarong mailhan tungod sa maayong bunga nga gipatungha niini. (Mateo 7:20) Sukad niadto ang kasaysayan nagpamatuod nga husto kining maong panghinapos.

¹⁷ Pag-abot ni Jesus, mga 5,000 ka membro sa mga sulugoon sa panimalay ang puliki nga nagsangyaw sa kamatuoran sa Bibliya. Diyutay lamang ang mga mamumuo, apan gigamit sa ulipon ang daghang bag-ong mga paagi sa pagsangyaw sa maayong balita. (Mateo 9:38) Pananglitan, gihimo ang mga kahikayan nga ipatik ang mga sermon bahin sa mga topiko sa Bibliya diha sa duolan sa 2,000 ka mantalaan. Niining paagiha, ang kamatuoran sa Pulong sa Diyos nakaabot dayon sa tinagpulo ka libong mga magbabasa. Gawas pa, gihimo ang walo-ka-oras nga programa nga nagkombinar sa dekolor nga mga eslayd ug pelikula. Tungod niining bag-ong presentasyon,  ang mensahe sa Bibliya, gikan sa sinugdanan sa Paglalang ngadto sa kataposan sa Usa ka Libo ka Tuig nga Pagmando ni Kristo, nakita sa mga siyam ka milyong tawo diha sa tulo ka kontinente. Ang pinatik nga literatura maoy laing paagi nga gigamit. Pananglitan, sa 1914, mga 50,000 ka kopya niining magasina ang gipatik.

18. Kanus-a gitudlo ni Jesus ang ulipon ibabaw sa tanan niyang mga kabtangan, ug ngano?

¹⁸ Oo, sa dihang miabot ang Agalon, iyang nakaplagan ang iyang matinumanong ulipon nga makugihong nagpakaon sa mga sulugoon sa panimalay ug nagwali sa maayong balita. Mas dakong responsibilidad ang nagpaabot karon sa maong ulipon. Si Jesus miingon: “Sa pagkatinuod ako magaingon kaninyo, igatudlo niya siya ibabaw sa tanan niyang mga kabtangan.” (Mateo 24:47) Gihimo kini ni Jesus sa 1919, human makaagi ang ulipon ug yugto sa pagsulay. Apan, ngano man nga ang “matinumanon ug maalamong ulipon” nakadawat ug mas dakong mga responsibilidad? Tungod kay midaghan ang mga kabtangan sa Agalon. Si Jesus nahimong hari sa 1914.

19. Ipatin-aw kon sa unsang paagi giatiman ang espirituwal nga mga panginahanglan sa “dakong panon.”

¹⁹ Unsa ang mga kabtangan nga ibabaw niana ang bag-ong gipurongpurongan nga Agalon nagtudlo sa iyang matinumanong ulipon? Ang tanan Niyang espirituwal nga mga butang dinhi sa yuta. Pananglitan, duha ka dekada human sa pagkaentrono ni Kristo sa 1914, “usa ka dakong panon” sa “ubang mga karnero” ang nailhan. (Pinadayag 7:9; Juan 10:16) Kini sila, dili dinihogang mga membro sa “Israel sa Diyos,” kondili maoy sinserong mga lalaki ug babaye nga adunay yutan-ong paglaom, kinsa nahigugma kang Jehova ug buot nga moalagad kaniya sama sa gihimo sa mga dinihogan. Sa pagkatinuod, sila miingon sa “matinumanon ug maalamong ulipon”: “Mouban kami kaninyo, kay kami nakadungog nga ang Diyos nagauban kaninyo.” (Zacarias 8:23) Kining bag-ong nabawtismohan nga mga Kristohanon nakig-ambit sa samang dagayang espirituwal nga pagkaon nga nabatonan sa dinihogang mga sulugoon sa panimalay, ug sukad niadto ang duha ka matang parehong nakig-ambit niining espirituwal nga pagkaon. Pagkadakong panalangin kini alang sa mga membro sa “dakong panon”!

20. Unsay papel sa “dakong panon” sa pagpadaghan sa mga kabtangan sa Ginoo?

²⁰ Ang mga membro sa “dakong panon” malipayong miduyog sa dinihogang ulipon nga matang ingong mga magwawali sa maayong balita. Samtang sila nagsangyaw, ang mga kabtangan sa Agalon dinhi sa yuta midaghan, mao nga nadugangan ang mga responsibilidad sa “matinumanon ug maalamong ulipon.” Samtang nagkadaghan ang mga tawo nga gustong makakat-on sa kamatuoran, gikinahanglan ang gipadakong mga pasilidad sa pag-imprenta aron matagbaw ang panginahanglan ug literatura sa Bibliya. Ang mga sangang buhatan sa mga Saksi ni Jehova gitukod diha sa lainlaing mga nasod. Ang mga misyonaryo gipadala ngadto sa “kinalay-ang dapit sa yuta.” (Buhat 1:8) Gikan sa duolan sa lima ka libong dinihogan sa 1914, ang gidaghanon sa mga magdadayeg sa Diyos miuswag ngadto sa kapin sa unom ka milyon karon, nga ang kadaghanan kanila maoy sakop sa “dakong panon.” Oo, ang mga kabtangan sa Hari miuswag sa makadaghan sukad sa pagpurongpurong kaniya niadtong 1914!

21. Unsang duha ka sambingay ang atong tagdon sa atong sunod nga pagtuon?

²¹ Kining tanan nagpakita nga ang ulipon maoy ‘matinumanon ug maalamon.’ Human siya maghisgot bahin sa “matinumanon ug maalamong ulipon,” si Jesus naghatag ug duha ka sambingay nga nagpasiugda sa maong mga hiyas: ang sambingay sa maalamon ug buangbuang nga mga ulay ug ang sambingay sa mga talento. (Mateo 25:1-30) Naikag kita! Unsay kahulogan nianang maong mga sambingay alang kanato karon? Tubagon nato kanang pangutanaha sa sunod nga artikulo.

Unsay Imong Hunahuna?

• Kinsay naglangkob sa “matinumanon ug maalamong ulipon”?

• Kinsa ang “mga sulugoon sa panimalay”?

• Kanus-a gitudlo ang matinumanong ulipon ibabaw sa tanang kabtangan sa Ginoo, ug nganong nianang panahona?

• Kinsa ang mitabang sa pagpadaghan sa mga kabtangan sa Ginoo sa di pa dugayng mga dekada, ug sa unsang paagi?

[Mga Pangutana sa Pagtuon]

[Mga hulagway sa panid 10]

Ang unang-siglo nga ulipong matang nagmatinumanon sa gisugo kanila