Ang Katahom sa Kalalangan ni Jehova

‘Ikaw Labi Pang Mahimayaon Kay sa mga Bukid’

ANG pagsud-ong sa pagsubang sa adlaw gikan sa taluktok sa Mount Fuji maoy dili-makalimtang kasinatian. Ang pulahog-kolor nga adlaw mogimaw sa kapunawpunawan, nga nagdan-ag sa puting niyebe ug sa abohon nga batong laba. Samtang mosugod na usab ang laing adlaw, ang klaro nga anino sa bukid dali rang mokanap sa daghang kilometro ibabaw sa kabungtoran ug kawalogan.

Sama sa Mount Fuji—nga kaniadto gisulat diha sa mga karakter nga nagkahulogang “walay katumbas”—ang habog nga mga bukid makapahingangha gayod kanato. Aw, gamay ra kaayo kita kon itandi sa ka dagko niini! Habog kaayo ang mga bukid nga tungod niana daghang tawo ang nagtuo nga ang kinahabogang mga bukid, nga sagad nasalipdan sa gabon ug mga panganod, mao ang pinuy-anan sa mga diyos.

Ang bugtong Diyos nga tinuod nga gidayeg sa mga taluktok sa bukid mao ang batid nga Maglalalang niini, si Jehova. Siya lamang “ang Mag-uumol sa kabukiran.” (Amos 4:13) Halos ikaupat nga bahin sa kalibotan maoy kabukiran, ug sa dihang gilalang sa Diyos ang atong planeta, iyang gipahiluna ang mga puwersa nga sa ngadtongadto nagpatunghag talagsaong mga taluktok ug mga kutay sa kabukiran. (Salmo 95:4) Pananglitan, gituohan nga ang mga kutay sa kabukiran sa Himalayas ug sa Andes namugna pinaagi sa puwersadong mga pagtay-og sa ilalom sa yuta ug pinaagi sa paglihok sa mga lut-od sa taklap sa yuta.

Kitang mga tawo wala makasabot sa bug-os kon sa unsang paagi ug kon nganong milungtad ang kabukiran. Sa pagkatinuod, kita dili arang makatubag sa mga pangutanang gisukna ngadto sa matarong nga si Job: “Diin ka man sa pagtukod ko [si Jehova] sa kalibotan? . . . Unsa may giugbokan sa mga suksokanang patongan niini?”—Job 38:4-6.

Apan, kita nahibalo nga ang atong kinabuhi nagdepende sa kabukiran. Kini gitawag ug mga tuboran sa tubig sa kinaiyahan, sanglit ang tubig sa tanang dagkong mga suba naggikan man sa mga tubod sa kabukiran ug katunga sa katawhan sa yuta nagdepende sa kabukiran alang sa tubig. (Salmo 104:13) Sumala pa sa magasing New Scientist, “unom sa 20 ka pangunang kalan-on nga mga tanom sa kalibotan naggikan sa kabukiran.” Ilalom sa balanseng kahimtang sa ekolohiya sa gisaad nga bag-ong kalibotan sa Diyos, “aduna unyay dagayang lugas sa ibabaw sa yuta; sa tumoy sa kabukiran adunay pagsugwak.”—Salmo 72:16; 2 Pedro 3:13.

Alang sa daghan, ang paghisgot ug kabukiran makapahinumdom kanila sa Alps sa Uropa. Kining mga bukira, nga naglakip sa Mount Civetta nga gipakita dinhi, maoy usa ka talagsaong pamatuod sa Maglalalang niini. (Salmo 98:8) Gidayeg niini si Jehova, ang usa nga “lig-ong nagatukod sa mga bukid pinaagi sa iyang gahom.”—Salmo 65:6. a

Makapahingangha gayod ang katahom sa Alps, uban sa punog-yelo nga mga taluktok ug mga tagaytay niini, punog-niyebe nga mga bakilid, mga walog ug mga lanaw, ug kabalilihan niini. Si Haring David nag-ila kang Jehova nga mao “ang Usa nga nagapaturok sa lunhawng mga balili diha sa kabukiran.”—Salmo 147:8.

Ang habog nga mga kutay sa kabukiran—sama niining mga bukid sa Guilin, China—dili tingali sama ka nindot sa Alps, apan kini may talagsaong katahom. Ubay sa Li River, ang daghang laray sa nanuybo nga mga bungtod  nga anapog makapahingangha sa mga bisita tungod sa katahom niini. Ang pagtan-aw sa tin-aw nga tubig nga nagadagayday niining gabonong kabungtoran mahimong magpahinumdom sa usa sa giingon sa salmista: “Nagapadala siya [si Jehova] ug mga tubod ngadto sa mga bul-oganang walog; sa taliwala sa kabukiran sila nagaagos.”—Salmo 104:10.

Kita mahingangha gayod sa kabukiran tungod kay kita nag-ila niini ingong matahom nga bahin sa mahigugmaong tagana sa Maglalalang alang sa kaayohan ug kalipayan sa katawhan. Apan, bisan unsa pa kini ka makapahingangha, ang kabukiran dili gayod makatupong sa pagkamahimayaon ni Jehova. Siya “labi [pa gayong] mahimayaon kay sa mga bukid.”—Salmo 76:4.

[Footnote]

[Kahon/Hulagway sa panid 9]

Ang diyes porsiyento sa populasyon sa kalibotan nagpuyo diha sa bukirong mga dapit. Apan kana dili dakong babag alang niadtong nagmantala sa maayong balita sa Gingharian sa Diyos. Kining maong Kristohanon nga mga ministro puliki kaayo diha sa daghang habog nga mga rehiyon. Ug “pagkatahom ibabaw sa kabukiran sa mga tiil sa usa nga nagdalag maayong balita, ang usa nga nagmantalag pakigdait, ang usa nga nagdalag maayong balita sa butang nga mas maayo, ang usa nga nagmantalag kaluwasan!”—Isaias 52:7.

“Ang hatag-as nga kabukiran maoy alang sa mga kanding sa bukid,” miawit ang salmista. (Salmo 104:18) Ang mga kanding sa bukid, sama sa dagkog-sungay nga Nubian ibex, nalakip sa dili daling matumba nga mga mananap sa kabukiran. Kini maglakawlakaw diha sa hiktin kaayong mga ngilit sa pangpang nga morag lisod maagian. Ang ibex nasangkapan pag-ayo aron mabuhi diha sa dili-maabot nga mga dapit. Sa bahin, kini maoy tungod sa pagkahimo sa mga kuko niini. Ang kang-a sa kuko moinat depende sa gibug-aton sa kanding, nga tungod niana ang maong mananap lig-ong makahawid sa dihang kini nagtindog o naglakaw diha sa hiktin nga mga ngilit sa pangpang. Ang ibex maoy usa gayod ka obra-maestra nga disenyo!

[Hulagway sa panid 9]

Mount Fuji, Honshu, Japan