Mga Pangutana Gikan sa mga Magbabasa

Unsa ang mga panghitabo nga narekord sa Exodo 4:24-26, ug kang kinsang kinabuhi ang nameligro?

Si Moises nagpaingon sa Ehipto uban sa iyang asawa nga si Zipora, ug sa iyang mga anak nga si Gersom ug Eliezer, sa dihang nahitabo ang mosunod: “Nahitabo didto sa dalan sa balay-abotanan nga si Jehova nakahibalag kaniya ug nagpadayon pagpangitag paagi sa pagpatay kaniya. Sa kataposan si Zipora nagkuhag santik ug nagputol sa yamis sa iyang anak nga lalaki ug kini iyang gipadapat sa iyang mga tiil ug miingon: ‘Tungod kay ikaw usa ka pamanhonon sa dugo alang kanako.’ Busa siya nagpalingkawas kaniya. Niadtong tungora si Zipora miingon: ‘Usa ka pamanhonon sa dugo,’ tungod sa pagtuli.” (Exodo 4:20, 24-26) Bisan tuod dili kaayo klaro ang asoy ug walay paagi nga matino ang kahulogan niini, ang Kasulatan naghatag ug katin-awan niining mga bersikuloha.

Ang asoy wala maghisgot sa espesipiko kon kang kinsang kinabuhi ang nameligro. Apan, may katarongang makahinapos kita nga wala kadto magtumong sa kinabuhi ni Moises, kay bag-o lang siyang nakadawat sa sugo sa Diyos sa pagpanguna sa mga Israelinhon pagawas sa Ehipto. (Exodo 3:10) Morag imposible nga sa pagpaingon niya aron sa pagtuman sa maong sugo, patyon na hinuon si Moises sa manulonda sa Diyos. Busa, mopatim-aw nga ang nameligro mao ang kinabuhi sa usa sa iyang mga anak. Ang balaod nga gihatag una pa niana kang Abraham bahin sa pagtuli nag-ingon: “Ang dili-tinuli nga lalaki nga dili magpatuli sa unod sa iyang yamis, kana nga kalag pagaputlon gikan sa iyang katawhan. Siya naglapas sa akong pakigsaad.” (Genesis 17:14) Malagmit nga wala matuli ni Moises ang iyang anak, ug busa ang bata nameligrong patyon sa manulonda ni Jehova.

Kang kinsang mga tiil ang nadapatan sa yamis sa anak ni Zipora sa dihang giputol niya kini sa tinguha nga matul-id ang mga butang? Kadto maoy iya sa manulonda ni Jehova kinsa may gahom sa pagpatay sa wala-matuling bata. Busa, may katarongan nga ipadapat ni Zipora ang yamis diha sa mga tiil sa manulonda, sa ingon nagpresentar niini ngadto kaniya ingong ebidensiya sa iyang pagsunod sa pakigsaad.

Ang giingon ni Zipora nga “ikaw usa ka pamanhonon sa dugo alang kanako” katingad-anan. Unsay gipaila niini bahin kaniya? Pinaagi sa pagsunod niya sa pakigsaad sa pagtuli, gipaila ni Zipora ang usa ka relasyon sa pakigsaad uban kang Jehova. Ang pakigsaad sa Balaod nga gihimo sa ulahi uban sa mga Israelinhon nagpakita nga diha sa relasyon sa pakigsaad, si Jehova maisip ingong bana ug ang iyang mga alagad ingong asawa. (Jeremias 31:32) Busa, sa pagtawag kang Jehova (pinaagi sa iyang hawas nga manulonda) nga “usa ka pamanhonon sa dugo,” maorag gipaila ni Zipora ang iyang pagpasakop sa mga kondisyon nianang maong pakigsaad. Kadto daw samag gidawat niya ang posisyon sa usa ka asawa diha sa pakigsaad sa pagtuli, nga si Jehova nga Diyos mao ang bana. Bisan unsa pay kahimtang, tungod sa iyang dihadihang pagsunod sa kinahanglanon sa Diyos, ang kinabuhi sa iyang anak wala na mameligro.