Usa ka Kasaulogan nga Nagaapektar Kanimo

SAMTANG dinhi pa sa yuta, gisugdan ni Jesu-Kristo ang usa ka kasaulogan nga naghimaya sa Diyos. Mao lamang kini ang relihiyosong seremonyas nga iyang direktang gisugo nga pagasaulogon sa iyang mga sumusunod. Kini mao ang Panihapon sa Ginoo, nga nailhan usab nga Kataposang Panihapon.

Handurawa nga usa ka sa nakasaksi sa mga hitabo nga misangpot nianang okasyona. Si Jesus ug ang iyang mga apostoles nagtipon sa lawak sa taas diha sa Jerusalem sa pagsaulog sa Hudiyohanong Paskuwa. Human na sila mangaon sa naandang pagkaon sa Paskuwa, nga may sinugba nga karne sa karnero, pait nga mga utanon, tinapay nga walay lebadura, ug pula nga bino. Ang mabudhion nga si apostol Judas Iskariote gipagawas na sa lawak ug sa dili madugay magbudhi sa iyang Agalon. (Mateo 26:17-25; Juan 13:21, 26-30) Ang kauban ra ni Jesus mao ang iyang 11 ka matinumanong mga apostoles. Usa kanila si Mateo.

Sumala pa sa asoy ni Mateo nga nakasaksi mismo, kini ang paagi nga gisugdan ni Jesus ang Panihapon sa Ginoo: “Si Jesus nagkuhag tinapay [nga walay lebadura] ug, human makapasalamat, siya nagpikaspikas niini ug, naghatag niini sa mga tinun-an, siya miingon: ‘Pagkuha kamo, kaon. Kini nagkahulogan sa akong lawas.’ Unya, siya nagkuhag usa ka kopa [sa bino] ug, human makapasalamat, siya naghatag niini kanila, nga nag-ingon: ‘Inom kamo gikan niini, kamong tanan; kay kini nagkahulogan sa akong “dugo sa pakigsaad,” nga igabubo alang sa daghan sa kapasayloan sa mga sala.’”—Mateo 26:26-28.

Nganong gisugdan ni Jesus ang Panihapon sa Ginoo? Sa dihang gisaulog kini, nganong migamit siya ug tinapay nga walay lebadura ug pula nga bino? Ang tanan bang mga sumusunod ni Kristo angay moambit niini nga mga emblema? Kapila kining maong panihapon himoon? Ug kini ba adunay kahulogan kanimo?