666—Dili Lamang Usa ka Misteryo

“Walay si bisan kinsa nga makapalit o makabaligya gawas sa tawo nga nakabaton sa marka, ang ngalan sa mapintas nga mananap o ang numero sa iyang ngalan. Gikinahanglan niini ang kaalam: Ipakuwenta sa may kinaadman ang numero sa mapintas nga mananap, kay kini maoy usa ka numero sa tawo; ug ang iyang numero unom ka gatos ug kan-umag-unom.”—Pinadayag 13:17, 18.

PIPILA ra ka ulohan sa Bibliya ang nakaaghat ug dakong kaikag ug kabalaka nga sama sa tagna bahin sa misteryosong marka, o ngalan, sa “mapintas nga mananap”—ang numerong 666. Sa telebisyon ug sa Internet, maingon man sa mga pelikula, mga libro, ug mga magasin, ang marka sa mananap maoy sentro sa way-kataposang pagbanabana.

Ang pipila nagtuo nga ang 666 maoy marka sa antikristo diha sa Bibliya. Ang uban nag-ingon nga kini nagpasabot sa usa ka porma sa pinugos nga pagpaila sa kaugalingon, sama sa usa ka patik o sa gilubong-sa-lawas nga microchip nga may digital code nga magpaila sa tawo ingong usa ka alagad sa mananap. Samtang ang uban nagtuo nga ang 666 mao ang marka sa Katolikong papado. Pinaagi sa pag-ilis ug Romanhong mga numero alang sa mga letra sa porma sa opisyal nga titulo sa papa, ang Vicarius Filii Dei (Kapuli sa Anak sa Diyos), ug ang pagmaniobra ug diyutay sa mga numero, ilang nakuwenta ang 666. Nangangkon usab ang uban nga ang samang numero makuwenta gikan sa Latin nga ngalan sa Romanong Emperador nga si Diocletian ug gikan sa Hebreohanong bersiyon sa ngalan ni Nero Cesar. a

Kining hinanduraw ug minaomao nga mga interpretasyon, hinunoa, lahi ra kaayo sa giingon sa Bibliya bahin sa marka sa mananap, sama sa atong makita sa mosunod nga artikulo. Gibutyag sa Bibliya nga kadtong namarkahan makaagom sa kapungot sa Diyos sa dihang iyang laglagon ang presenteng sistema sa mga butang. (Pinadayag 14:9-11; 19:20) Busa, ang pagsabot sa kahulogan sa 666 maoy pagsulbad dili lamang sa usa ka makaiikag nga misteryo. Ikalipay, si Jehova nga Diyos, ang personipikasyon sa gugma ug Tinubdan sa espirituwal nga kahayag, wala maghikaw sa iyang mga alagad sa kahibalo maylabot niining hinungdanong butang.—2 Timoteo 3:16; 1 Juan 1:5; 4:8.

[Footnote]