Liberia—Pag-uswag sa Gingharian Bisan pa sa Gubat

ANG sibil nga gubat nagpadayon sa Liberia sulod na sa kapin sa usa ka dekada. Sa tungatunga sa 2003, ang mga rebelde nakiggubat aron makasulod sa kaulohang siyudad, ang Monrovia. Daghan sa mga Saksi ni Jehova ang napugos sa pagbiya sa ilang mga balay, usahay sa makadaghang higayon. Ang mga kabtangan kanunayng gipangawat.

Ikasubo, panahon sa paggubatay diha sa kaulohan, libolibong tawo ang nangamatay. Lakip kanila ang duha ka Saksi, usa ka brader ug usa ka sister. Sa unsang paagi gisagubang sa mga igsoon ang kalisdanan, ug unsay nahimo sa pagtabang kanila?

Tabang Alang Niadtong Nanginahanglan

Nianang panahon sa krisis, ang sangang buhatan sa mga Saksi ni Jehova sa Liberia nag-organisar ug tabang alang niadtong nanginahanglan. Gitagana ang pagkaon, hinungdanong mga gamit sa balay, ug tambal. Sa panahon nga ang mga rebelde maoy nagkontrolar sa pantalan, nihit ang pagkaon. Nalantaw nang daan sa sangang buhatan kining maong hitabo busa sila adunay mga abiyo alang sa duha ka libong Saksi nga nangalagiw ngadto sa mga Kingdom Hall sa tibuok siyudad. Girasyon sa mga igsoon ang pagkaon aron dili mahurot ang abiyo hangtod buksan pag-usab ang pantalan. Ang mga sangang buhatan sa Belgium ug Sierra Leone nagpadalag mga tambal pinaagi sa ayroplano, ug ang mga sangang buhatan sa Britanya ug Pransiya nagpadalag sinina pinaagi sa barko.

Bisan pa sa malisod nga kahimtang, ang atong mga igsoon positibo ug malipayon gihapon. Ang komento sa usa nga katulo mibiya sa iyang balay maoy susama sa kadaghanan. Siya miingon: “Mao kini ang mga kahimtang nga atong gisangyaw; kita nagkinabuhi na sa kataposang mga adlaw.”

Sanong Ngadto sa Maayong Balita

Bisan pa sa tibuok-nasod nga kagubot, ang mga Saksi aduna gihapoy maayo kaayong mga resulta diha sa kanataran. Dihay kinatas-ang ihap nga 3,879 ka magmamantala sa Gingharian sa Enero 2003, ug sa Pebrero sila nagdumala ug 15,227 ka panagtuon sa Bibliya sa balay.

Ang mga tawo dali rang mosanong sa maayong balita. Adunay pananglitan niini gikan sa usa ka baryo sa habagatan-sidlakang bahin sa nasod. Ang usa ka kongregasyon nagplano nga magsaulog sa Memoryal sa kamatayon ni Kristo didto sa dakong baryo sa Bewahn, nga nahimutang mga lima-ka-oras nga pagbaktas gikan sa ilang kasagarang gitigoman. Sa wala pa mangadto ang mga igsoon sa baryo aron sa pagdapit sa mga tawo ngadto sa Memoryal, usa ka imbitasyon ang gihatag ngadto sa mayor sa Bewahn. Sa nadawat niya kini, iyang gikuha ang iyang Bibliya, giadto niya ang mga taga-baryo, ug gibasa ang teksto nga gipakita diha sa imbitasyon, nga nagdasig kanila sa pagtambong sa Memoryal. Busa pag-abot sa mga magmamantala, ilang nahibal-an nga ang ilang buluhaton nahimo na diay alang kanila! Ang mayor, uban sa iyang duha ka anak ug duha ka asawa, mitambong sa Memoryal. Tanantanan, 27 ka tawo ang nanambong. Sukad niadto, ang mayor mibiya na sa Methodist Church, misugod sa pagtuon uban sa  mga Saksi, ug mitanyag ug yuta nga katukoran sa Kingdom Hall.

Kausaban sa Tinamdan

Ang panggawi sa atong mga igsoon epektibo usab sa pagbag-o sa panglantaw sa pipila ka magsusupak sa kamatuoran. Tagda ang pananglitan sa usa ka tawo nga ginganlag Opoku. Usa ka espesyal payunir nga ministro ang nakahimamat kaniya diha sa pagsangyaw sa kanataran ug mitanyag kaniya sa magasing Bantayanang Torre. Si Opoku interesado sa usa ka artikulo diha sa magasin apan walay kuwarta. Nga nagsaysay nga wala kadtoy bayad, gibilin sa payunir ang magasin kaniya ug mihimo ang payunir ug kahikayan nga duawon siya pag-usab. Sa pagbalikduaw, si Opoku nangutana sa payunir: “Nakaila ka ba nako? Kadaghanang tawo sa lungsod sa Harper nakaila nako. Kaniadto akong gipalagpot ang mga anak sa mga Saksi gikan sa eskuylahan!” Dayon iyang gisaysay nga siya mao ang prinsipal sa usa ka hayskul sa maong lungsod ug nga iyang gilutos ang mga anak sa mga Saksi ni Jehova tungod sa dili pagsaludar sa bandera.

Apan, tulo ka pananglitan sa Kristohanong gugma nga gipasundayag sa mga Saksi ni Jehova ang nagtukmod kang Opoku sa pagsusi pag-usab sa iyang tinamdan. Una, nakita niya nga ang mga Saksi nag-atiman sa usa ka espirituwal nga igsoon nga grabeng nasakit. Gihikay pa gani nila nga siya matambalan didto sa kasikbit nga nasod. Si Opoku nagtuo nga ang brader nga masakiton maoy “dakong tawo” taliwala sa mga Saksi apan iyang nahibaloan nga ang brader maoy ordinaryo lamang nga Saksi. Ikaduha, sa katuigan sa 1990, si Opoku maoy usa ka kagiw sa Côte d’Ivoire. Usa ka adlaw niana sa dihang giuhaw siya, mipalit siyag tubig gikan sa usa ka batan-ong lalaki. Dako ang kuwarta ni Opoku, ug walay ikasukli ang batan-ong lalaki, busa iya na lang gihatag kang Opoku ang tubig. Sa dihang gitunol niya kang Opoku ang tubig, ang batan-ong lalaki nangutana: “Sa imong hunahuna moabot pa kaha ang panahon sa dihang ang mga tawo nga sama kanimo ug kanako maghinatagay sa usag usa nga dili na magpabayad?” Nagtuo si Opoku nga ang batan-on maoy usa ka Saksi ni Jehova, ug gikompirmar kana sa Saksi. Nakadayeg siya sa pagkamahinatagon ug kalulot nga gipakita niining maong brader. Sa kataposan, ang pagkaandam sa espesyal payunir nga mohatag kaniya sa magasin nakakombinsir kang Opoku nga sayop ang iyang panglantaw sa mga Saksi ug nga kinahanglang bag-ohon niya ang iyang tinamdan. Siya miuswag sa espirituwal ug karon usa na ka dili-bawtismadong magmamantala.

Bisan tuod ang mga igsoon sa Liberia padayong nag-atubang ug malisod nga mga kahimtang, sila nagsalig sa Diyos ug matinumanong nagmantala sa maayong balita bahin sa mas maayong mga kahimtang ilalom sa matarong nga pagmando sa Gingharian sa Diyos. Dili gayod kalimtan ni Jehova ang ilang paghago ug ang gugma nga ilang gipakita alang sa iyang ngalan.—Hebreohanon 6:10.

[Mga mapa sa panid 30]

(Alang sa aktuwal nga pagkahan-ay, tan-awa ang publikasyon)

MONROVIA

[Mga hulagway sa panid 31]

Sa mga panahon sa krisis, ang katawhan ni Jehova nagtaganag espirituwal ug materyal nga tabang alang niadtong nanginahanglan