Ang Katawhan sa Diyos Kinahanglang Mahigugma sa Kalulot
Ang Katawhan sa Diyos Kinahanglang Mahigugma sa Kalulot
“Unsa ba ang gipangayo ni Jehova kanimo kondili ang pagbuhat sa hustisya ug ang paghigugma sa kalulot ug ang paglakaw nga makasaranganon uban sa imong Diyos?”—MIQUEAS 6:8.
1, 2. (a) Nganong dili kita matingala nga si Jehova nagdahom nga ang iyang katawhan magpakita ug kalulot? (b) Unsang mga pangutana mahitungod sa kalulot ang takos natong tagdon?
SI Jehova maoy Diyos sa kalulot. (Roma 2:4; 11:22) Lagmit mapasalamaton gayod sa kalulot sa Diyos ang unang magtiayon nga si Adan ug Eva! Sa tanaman sa Eden, gilibotan sila sa makitang mga linalang nga naghatag ug pamatuod sa kalulot sa Diyos ngadto sa mga tawo, kinsa adunay kapasidad sa pagtagamtam niana. Ug ang Diyos padayong nagmaluloton sa tanan, bisan ngadto sa dili mapasalamaton ug daotan nga mga tawo.
2 Tungod kay gihimo sa larawan sa Diyos, ang mga tawo adunay katakos sa pagsumbalik-silaw sa diyosnong mga hiyas. (Genesis 1:26) Dili ikatingala nga si Jehova nagdahom nga kita magpakita ug kalulot. Sumala sa giingon sa Miqueas 6:8, ang katawhan sa Diyos kinahanglang ‘mahigugma sa kalulot.’ Apan unsa ang kalulot? Sa unsang paagi nalangkit kini sa ubang diyosnong mga hiyas? Tungod kay ang mga tawo makahimo man sa pagpasundayag ug kalulot, nganong ang kalibotan usa man ka mapig-oton ug mapintas nga dapit? Nganong kita ingong mga Kristohanon maningkamot sa pagpakita ug kalulot diha sa atong mga pakiglabot sa uban?
Unsa ang Kalulot?
3. Unsaon nimo paghubit ang kalulot?
3 Ang kalulot gipasundayag pinaagi sa pagpakita ug aktibong interes sa kaayohan sa uban. Gipakita kini pinaagi sa matinabangong mga buhat ug mahunahunaong mga pulong. Ang pagkahimong maluloton nagpasabot usab ug paghimog maayo inay kay mobuhat ug bisan unsa nga makadaot. Ang malulotong tawo mahigalaon, malumo, mabination, ug mapuangoron. Siya mahinatagon, mahunahunaon sa uban. Si apostol Pablo nagtambag sa mga Kristohanon: “Isul-ob ninyo ang malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob.” (Colosas 3:12) Nan, ang kalulot maoy bahin sa mahulagwayong besti sa tanang tinuod nga mga Kristohanon.
4. Sa unsang paagi si Jehova nanguna sa pagpakitag kalulot ngadto sa katawhan?
4 Si Jehova nga Diyos nanguna sa pagpakitag kalulot. Sumala sa giingon ni Pablo, “sa dihang gipadayag ang kalulot ug ang gugma alang sa tawo sa atong Manluluwas, ang Diyos,” nga “kita iyang giluwas pinaagi sa paghugas nga nagdala kanato sa kinabuhi ug sa paghimo kanatong bag-o pinaagi sa balaang espiritu.” (Tito 3:4, 5) Ang Diyos ‘naghugas,’ o naghinlo, sa dinihogang mga Kristohanon diha sa dugo ni Jesus, nga nagpadapat sa bili sa halad lukat ni Kristo alang kanila. Sila usab gibag-o pinaagi sa balaang espiritu, nga nahimong “bag-ong linalang” ingong inanak-sa-espiritu nga mga anak sa Diyos. (2 Corinto 5:17) Dugang pa, ang kalulot ug gugma sa Diyos gipaabot ngadto sa “dakong panon,” kinsa ‘naglaba sa ilang tag-as nga mga besti ug nagpaputi niini sa dugo sa Kordero.’—Pinadayag 7:9, 14; 1 Juan 2:1, 2.
5. Nganong kadtong giagak sa espiritu sa Diyos angayng magpakita usab ug kalulot?
5 Ang kalulot maoy bahin usab sa bunga sa balaang espiritu o aktibong gahom sa Diyos. Si Pablo nag-ingon: “Ang bunga sa espiritu mao ang gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon. Batok sa maong mga butang walay balaod.” (Galacia 5:22, 23) Busa, dili ba kadtong giagak sa espiritu sa Diyos angay usab nga magpakitag kalulot ngadto sa uban?
Ang Matuod nga Kalulot Dili Kahuyangan
6. Kanus-a nga ang kalulot usa ka kahuyangan, ug ngano?
6 Ang ubang mga tawo nag-isip sa kalulot ingong kahuyangan. Ilang gibati nga ang usa ka tawo kinahanglan nga mahimong estrikto, bastos pa gani usahay, aron ang uban makakita sa iyang kalig-on. Apan, sa pagkatinuod, nagkinahanglag kalig-on ang pagkahimong tinuod nga maluloton ug paglikay sa pagpakitag sayop nga kalulot. Tungod kay ang tinuod nga kalulot maoy bahin sa bunga sa espiritu sa Diyos, dili kini usa ka huyang, mokompromiso nga tinamdan ngadto sa sayop nga panggawi. Sa laing bahin, ang sayop nga kalulot maoy usa ka kahuyangan nga magpahinabo sa usa sa pagkonsentir sa sayop.
7. (a) Sa unsang paagi si Eli napamatud-ang konsentidor? (b) Nganong ang mga ansiyano kinahanglang magbantay batok sa pagpakitag sayop nga kalulot?
7 Tagda, pananglitan, ang hataas nga saserdote sa Israel nga si Eli. Nagpabaya siya sa iyang pagdisiplina sa iyang mga anak nga lalaki nga si Hopni ug Pinehas, kinsa nag-alagad ingong mga saserdote diha sa tabernakulo. Tungod kay dili pa sila kontento sa bahin sa usa ka halad nga maoy ilang pahat sumala sa Balaod sa Diyos, magsugo silag ulipon nga mangayog karne gikan sa naghalad sa dili pa sunogon ang tambok diha sa halaran. Ang mga anak ni Eli may imoral usab nga pakigsekso sa mga babaye nga nag-alagad diha sa entrada sa tabernakulo. Apan, inay palagpoton si Hopni ug Pinehas gikan sa katungdanan, gibadlong lamang silag diyutay ni Eli. (1 Samuel 2:12-29) Mao diay nga “ang pulong gikan kang Jehova talagsa ra niadtong mga adlawa”! (1 Samuel 3:1) Ang Kristohanong mga ansiyano kinahanglang mag-amping nga dili mahaylo sa pagpakita ug sayop nga kalulot ngadto sa mga mamumuhat ug daotan kinsa makapameligro sa espirituwalidad sa kongregasyon. Ang tinuod nga kalulot dili magpakabuta sa mga pulong ug buhat nga nagalapas sa mga sukdanan sa Diyos.
8. Sa unsang paagi si Jesus nagpakita ug tinuod nga kalulot?
8 Ang atong Ehemplo, si Jesu-Kristo, wala gayod magpasundayag ug sayop nga kalulot. Siya mao ang kinamaayohang panig-ingnan sa tinuod nga kalulot. Pananglitan, ‘siya naluoy sa katawhan tungod kay sila pinanitan ug nagkatibuagsa sama sa mga karnero nga walay magbalantay.’ Ang matinud-anog-kasingkasing nga mga tawo wala magpanuko sa pagduol kang Jesus, nga nagdala pa gani sa ilang gagmayng mga bata ngadto kaniya. Hunahunaa lang ang kalulot ug pagkamabination nga iyang gipasundayag sa dihang “iyang gikugos ang mga bata ug gipanalanginan sila.” (Mateo 9:36; Marcos 10:13-16) Bisan tuod maluloton si Jesus, siya dili-mokompromiso kon unsay matarong sa panan-aw sa iyang langitnong Amahan. Wala gayod konsentiha ni Jesus ang daotan; nabatonan niya ang hinatag-sa-Diyos nga kaisog sa pagsaway sa salingkapaw nga relihiyosong mga lider. Sumala sa giingon sa Mateo 23:13-26, makadaghan niyang gisublisubli ang pahayag: “Alaot kamo, mga eskriba ug mga Pariseo, mga salingkapaw!”
Kalulot ug ang Ubang mga Hiyas sa Diyos
9. Sa unsang paagi ang kalulot nalangkit sa hataas-nga-pailob ug pagkamaayo?
9 Ang kalulot nalangkit sa uban pang mga hiyas nga gipatungha sa espiritu sa Diyos. Kini gilista tali sa “hataas-nga-pailob” ug sa “pagkamaayo.” Sa pagkatinuod, ang tawo nga nagaugmad sa kalulot magpasundayag sa maong hiyas pinaagi sa pagbaton ug hataas-nga-pailob. Siya mapailobon bisan sa mga dili maluloton. Ang kalulot nalangkit sa pagkamaayo sa pagkaagi nga kini subsob nga gipasundayag diha sa matinabangong mga buhat alang sa uban. Usahay, ang Gregong pulong nga gigamit diha sa Bibliya alang sa “kalulot” mahimong hubaron ingong “pagkamaayo.” Ang pagpasundayag niining maong kinaiya taliwala sa unang mga Kristohanon nakapahibulong gayod sa mga pagano nga sila, sumala ni Tertullian, nagtawag sa mga sumusunod ni Jesus ingong ‘mga tawo nga gilangkoban sa kalulot.’
10. Sa unsang paagi nalambigit ang kalulot ug gugma?
10 Dunay kalambigitan tali sa kalulot ug gugma. Mahitungod sa iyang mga sumusunod, si Jesus miingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Ug mahitungod niining maong gugma, si Pablo miingon: “Ang gugma hataas-ug-pailob ug maluloton.” (1 Corinto 13:4) Ang kalulot nalambigit usab sa gugma diha sa pulong nga “mahigugmaong-kalulot,” nga subsob nga gigamit sa Kasulatan. Kini maoy kalulot nga naggikan sa maunongong gugma. Ang Hebreohanong berbo nga gihubad ug “mahigugmaong-kalulot” naglakip ug labaw pa kay sa malumong pagbati. Kini maoy kalulot nga mahigugmaong motapot sa usa ka butang hangtod nga ang katuyoan niini maylabot nianang butanga matuman. Ang mahigugmaong-kalulot, o maunongong gugma, ni Jehova gipasundayag sa lainlaing mga paagi. Pananglitan, makita kini diha sa iyang mga buhat sa pagluwas ug pagpanalipod.—Salmo 6:4; 40:11; 143:12.
11. Unsang pasalig ang gihatag kanato sa mahigugmaong-kalulot sa Diyos?
11 Ang mahigugmaong-kalulot ni Jehova nagdani sa mga tawo ngadto kaniya. (Jeremias 31:3) Sa dihang ang matinumanong mga alagad sa Diyos nagkinahanglag kaluwasan o tabang, sila nahibalo nga ang iyang mahigugmaong-kalulot sa pagkatinuod maoy maunongong gugma. Dili kini mopakyas kanila. Busa, sila makaampo nga masaligon, sama sa salmista kinsa miingon: “Kon bahin kanako, sa imong mahigugmaong-kalulot ako misalig; magmalipayon unta ang akong kasingkasing diha sa imong kaluwasan.” (Salmo 13:5) Tungod kay ang gugma sa Diyos maunongon man, ang iyang mga alagad bug-os nga makasalig kaniya. Gipasaligan sila niini: “Si Jehova dili motalikod sa iyang katawhan, ni mobiya siya sa iyang panulondon.”—Salmo 94:14.
Nganong Mabangis Kaayo ang Kalibotan?
12. Kanus-a ug sa unsang paagi nga ang madaogdaogong pagmando nagsugod?
12 Ang tubag niining pangutanaha adunay kalabotan sa nahitabo sa tanaman sa Eden. Sa sayong bahin sa tawhanong kasaysayan, usa ka espiritung linalang nga nahimong hakog ug mapahitas-on nagsugod ug usa ka laraw nga mahimong magmamando sa kalibotan. Tungod sa iyang laraw, siya nahimo gayong “magmamando niining kalibotana,” sa pagkatinuod usa ka madaogdaogon kaayong magmamando. (Juan 12:31) Siya nailhan ingong Satanas nga Yawa, ang pangunang magsusupak sa Diyos ug sa tawo. (Juan 8:44; Pinadayag 12:9) Ang iyang hakog nga laraw nga magtukod ug pagmando nga katumbas sa malulotong pagmando ni Jehova nayagyag wala madugay human gilalang si Eva. Busa, ang daotang pagmando nagsugod sa dihang si Adan misugod pagsubay sa dalan sa pagkaindependente gikan sa pagmando sa Diyos, nga bug-os nga nagsalikway sa Iyang kalulot. (Genesis 3:1-6) Imbes tinuod nga magmando sa ilang kaugalingon, si Adan ug Eva sa pagkatinuod nailalom sa hakog ug mapasigarbohong impluwensiya sa Yawa, ug nahimong mga sakop sa iyang pagmando.
13-15. (a) Unsa ang pipila ka sangpotanan sa pagsalikway sa matarong nga pagmando ni Jehova? (b) Ngano man nga kining kalibotana usa ka mapig-otong dapit?
13 Tagda ang pipila ka sangpotanan. Si Adan ug Eva gipapahawa gikan sa maong luna sa yuta nga paraiso kanhi. Ang ilang situwasyon nausab gikan sa pagpuyo diha sa lunhaw nga parke diin dali ra silang makakuha ug makapahimsog nga mga tanom ug prutas ngadto sa malisod nga situwasyon sa gawas sa tanaman sa Eden. Ang Diyos miingon kang Adan: “Tungod kay namati ka sa tingog sa imong asawa ug mikaon gikan sa kahoy nga labot niini ako nagsugo kanimo, ‘Dili ka gayod mokaon gikan niini,’ tinunglo ang yuta tungod kanimo. Sa kasakit ikaw magakaon sa abot niini sa tanang adlaw sa imong kinabuhi. Ug kini magpatubo alang kanimo ug mga sampinit ug mga kudyapa.” Ang tunglo nga gipahayag batok sa yuta nagpasabot nga lisod na kanang tikaron. Ang mga epekto sa tinunglo nga yuta, uban sa mga sampinit ug mga kudyapa niini, nabatyagan gayod pag-ayo sa mga kaliwat ni Adan nga ang amahan ni Noe nga si Lamek naghisgot bahin sa ‘kasakit sa ilang mga kamot gumikan sa yuta nga gitunglo ni Jehova.’—Genesis 3:17-19; 5:29.
14 Ang kalinaw giilisan usab ni Adan ug Eva ug kasakit. Ang Diyos miingon kang Eva: “Dugangan ko pag-ayo ang kasakit sa imong pagmabdos; sa mga kaul-ol sa pagpanganak ikaw manganak ug mga anak, ug ang imong pangandoy maoy alang sa imong bana, ug siya magagahom kanimo.” Sa ulahi, si Cain, ang panganay ni Adan ug Eva, nakahimo sa mabangis nga buhat sa pagpatay sa iyang igsoon nga si Abel.—Genesis 3:16; 4:8.
15 “Ang tibuok kalibotan nailalom sa gahom sa usa nga daotan,” miingon si apostol Juan. (1 Juan 5:19) Sama sa magmamando niini, ang kalibotan karon nagpasundayag ug daotang mga taras nga naglakip sa kahakog ug garbo. Mao diay nga ang kalibotan mapig-ot ug mabangis kaayo! Apan dili kini magpadayon. Tinoon ni Jehova nga ang kalulot ug pagkamabination, imbes ang pagkamapig-oton ug kabangis, maglungtad ilalom sa iyang Gingharian.
Ilalom sa Gingharian sa Diyos ang Kalulot Padayong Ipakita
16. Nganong ang pagmando sa Diyos pinaagi kang Kristo Jesus pagatiman-an sa kalulot, ug nag-obligar kini kanato sa pagbuhat sa unsa?
16 Si Jehova ug ang tinudlo nga Hari sa Iyang Gingharian, si Kristo Jesus, nagbaod nga ang ilang mga ginsakpan maila tungod sa ilang kalulot. (Miqueas 6:8) Si Jesu-Kristo naghatag kanato ug pasiunang talan-awon kon sa unsang paagi ang administrasyon nga gipiyal kaniya sa iyang Amahan pagatiman-an sa kalulot. (Hebreohanon 1:3) Mamatikdan kini diha sa mga pulong ni Jesus nga nagyagyag sa bakak nga relihiyosong mga lider, kinsa nagdaogdaog sa mga tawo pinaagig bug-at nga mga palas-anon. Siya miingon: “Umari kanako, kamong tanang nabudlayan ug nabug-atan, ug ako magapalagsik kaninyo. Isangon diha kaninyo ang akong yugo ug magtuon gikan kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag. Kay ang akong yugo masayon ug ang akong luwan magaan.” (Mateo 11:28-30) Daghan kaayong yutan-on nga mga magmamando, relihiyoso o uban pa, ang nagpaluya sa mga tawo pinaagig makapabudlay nga mga palas-anon sa hilabihan ka daghang lagda ug mga obligasyon nga wala pabilhi. Apan, ang gikinahanglan ni Jesus sa iyang mga sumusunod magatagbaw sa ilang mga panginahanglan ug mga katakos. Usa gayod ka makaparepresko, maluloton nga yugo! Wala ba kita matukmod nga mahisama kaniya sa pagpakita ug kalulot ngadto sa uban?—Juan 13:15.
17, 18. Nganong makasalig kita nga kadtong magamando uban kang Kristo sa langit ug ang iyang yutan-ong mga hawas magpasundayag ug kalulot?
17 Ang talagsaong mga komento ni Jesus ngadto sa iyang mga apostoles nagpasiugda kon sa unsang paagi ang Gingharian sa Diyos lahi kaayo sa tawhanong pagmando. Ang Bibliya nag-ingon: “Dihay nahitabo usab nga mainit nga panaglalis sa ilang taliwala [sa mga tinun-an] bahin sa kon kinsa kanila ang labing dako. Apan siya miingon kanila: ‘Ang mga hari sa mga nasod mahariharion kanila, ug kadtong adunay awtoridad ibabaw kanila gitawag nga mga Tigpanalangin. Apan dili kamo angay nga manig-ingon niana. Kondili siya nga labing dako kaninyo mahimong sama sa kamanghoran, ug ang nagasilbi nga pangulo sama sa usa nga nagaalagad. Kay kinsa ba ang labaw, ang nagahirag sa lamesa o ang nagaalagad? Dili ba ang nagahirag sa lamesa? Apan ako ania sa inyong taliwala ingon nga usa nga nagaalagad.’”—Lucas 22:24-27.
18 Ang tawhanong mga magmamando nagtinguha sa pag-establisar sa ilang pagkalabaw pinaagi sa ‘pagharihari’ ibabaw sa katawhan ug pinaagi sa pagtinguha ug dagkong mga titulo, nga nagtuo nga ang maong mga titulo makapahimo kanilang labaw kay niadtong ilang gimandoan. Apan si Jesus miingon nga ang tinuod nga pagkalabaw naggikan sa pag-alagad sa uban—makugihon ug mapinadayonon nga pagpaningkamot sa pag-alagad sa uban. Kadtong tanan nga magamando uban kang Kristo sa langit o mag-alagad ingong iyang yutan-on nga mga hawas kinahanglang maningkamot sa pagsundog sa iyang panig-ingnan sa pagkamapainubsanon ug kalulot.
19, 20. (a) Sa unsang paagi gipaila ni Jesus ang gidak-on sa kalulot ni Jehova? (b) Sa unsang paagi kita makasundog kang Jehova sa pagpasundayag ug kalulot?
19 Susihon nato ang laing mahigugmaong tambag nga gihatag ni Jesus. Nagpakita sa gidak-on sa kalulot ni Jehova, si Jesus miingon: “Kon inyong higugmaon sila nga nahigugma kaninyo, unsay dungog niini kaninyo? Kay bisan ang mga makasasala nahigugma man niadtong nahigugma kanila. Ug kon himoon ninyo ang maayo niadtong nagahimog maayo kaninyo, sa pagkatinuod unsay dungog niini kaninyo? Bisan ang mga makasasala nagabuhat usab sa ingon. Lain pa, kon magpahulam kamo nga walay tubo niadtong gilaoman ninyo nga may madawat kamo, unsay dungog niini kaninyo? Bisan ang mga makasasala magapahulam nga walay tubo sa mga makasasala aron maulian sila sa samang kantidad. Sa kasukwahi, magpadayon sa paghigugma sa inyong mga kaaway ug sa paghimog maayo ug sa pagpahulam nga walay tubo, nga dili maglaom ug bisan unsang balos; ug dako unya ang inyong ganti, ug kamo mahimong mga anak sa Labing Hataas, tungod kay siya maluloton ngadto sa mga dili-mapasalamaton ug sa daotan. Magpadayon sa pagkamaluluy-on, maingon nga maluluy-on ang inyong Amahan.”—Lucas 6:32-36.
20 Ang diyosnong kalulot dili mahakogon. Wala kiniy pangayoon ug dahomon nga balos. Si Jehova malulotong “magapasubang sa iyang adlaw diha sa mga tawong daotan ug sa mga maayo ug magapaulan diha sa mga tawong matarong ug sa mga dili-matarong.” (Mateo 5:43-45; Buhat 14:16, 17) Agig pagsundog sa atong langitnong Amahan, dili lang kita maglikay sa pagdaot sa mga tawong dili-mapasalamaton kondili mobuhat usab kitag maayo kanila, bisan niadtong nakig-away kanato. Pinaagi sa pagpasundayag ug kalulot, atong gipakita kang Jehova ug kang Jesus nga kita nagtinguha sa pagkinabuhi ilalom sa Gingharian sa Diyos, sa dihang ang kalulot ug ang ubang diyosnong mga hiyas maglungtad diha sa tanang tawhanong mga relasyon.
Nganong Angay Kitang Magpakita ug Kalulot?
21, 22. Nganong angay kitang magpakita ug kalulot?
21 Alang sa usa ka tinuod nga Kristohanon, ang pagpasundayag ug kalulot ilabinang hinungdanon. Kini maoy pamatuod nga ang espiritu sa Diyos nagalihok dinhi kanato. Dugang pa, sa dihang kita nagpasundayag ug tinuod nga kalulot, atong gisundog si Jehova nga Diyos ug si Jesu-Kristo. Ang kalulot maoy kinahanglanon usab alang niadtong mahimong mga sakop sa Gingharian sa Diyos. Nan, kinahanglang higugmaon nato ang kalulot ug makakat-on sa pagpasundayag niana.
22 Unsa ang pipila ka praktikal nga mga paagi diin kita makapakita ug kalulot diha sa atong adlaw-adlaw nga kinabuhi? Ang sunod nga artikulo maghisgot niining ulohana.
Unsaon Nimo Pagtubag?
• Unsa ang kalulot?
• Nganong ang kalibotan usa ka mabangis ug mapig-oton nga dapit?
• Sa unsang paagi nahibaloan nato nga ang kalulot maglungtad ilalom sa pagmando sa Diyos?
• Nganong ang pagpakita ug kalulot hinungdanon alang niadtong nagtinguha sa pagpuyo ilalom sa Gingharian sa Diyos?
[Mga Pangutana sa Pagtuon]
[Hulagway sa panid 13]
Ang Kristohanong mga ansiyano maningkamot nga magmaluloton sa pagpakiglabot sa panon
[Hulagway sa panid 15]
Ang mahigugmaong kalulot ni Jehova dili magpakyas sa iyang mga alagad sa panahon sa kalisdanan
[Mga hulagway sa panid 16]
Si Jehova malulotong nagapasubang sa adlaw ug nagapaulan diha sa tanang tawo