Ginatuman ba ang Kabubut-on sa Diyos?

“Matuman unta ang imong kabubut-on, maingon sa langit, mao man usab sa yuta.”—Mateo 6:10.

SI Julio ug Christina nalisang nga nagtan-aw samtang ang upat sa ilang mga anak nangasunog hangtod namatay. Ang ilang nagparking nga awto gibanggaan sa hubog nga drayber, ug misilaob kini. Ang ikalimang anak, si Marcos, naluwas gikan sa maong pagsilaob, apan nasunog ang iyang lawas, nga permanenteng nakapamaot sa iyang hitsura. Siya maoy nuybe anyos. Hilabihan ang kasubo sa iyang amahan. Gihupay niya ang iyang kaugalingon ug ang iyang pamilya pinaagi ning mga pulonga: “Pagbuot kini sa Diyos, angay kitang mahibalo nga ang maayo, daotan, ang tanan pagbuot sa Diyos.”

Sa dihang mahitabo ang makalilisang nga hitabo nga sama niini, daghan ang mosanong sa samang paagi. ‘Kon ang Diyos gamhanan sa tanan ug may pagtagad kanato,’ sila mangatarongan, ‘ang nahitabo maoy alang gayod sa atong kaayohan sa usa ka paagi, bisan pag lisod tingali sabton kana.’ Mouyon ka ba niana?

Ang pagtuo nga bisag unsa pay mahitabo, maayo man o daotan, maoy pagbuot sa Diyos subsob nga gipasukad sa mga pulong ni Jesus diha sa gitawag nga Pag-ampo sa Ginoo, nga gikutlo sa ibabaw. Ang kabubut-on sa Diyos ginatuman sa langit, dili ba? Sa pag-ampo nga ‘Matuman unta ang imong kabubut-on dinhi sa yuta,’ wala ba kita mouyon nga ang bisan unsang mahitabo dinhi sa yuta maoy kabubut-on sa Diyos?

Daghan ang nagduhaduha bahin niining maong ideya. Alang kanila, gilarawan niini ang Diyos ingong dili-matinagdanon sa mga pagbati sa iyang tawhanong mga linalang. ‘Ngano god nga ang usa ka mahigugmaong Diyos buot mang mopahamtang ug makalilisang nga butang ngadto sa inosenteng mga tawo?’ sila mangutana. ‘Kon duna man tingaliy leksiyon nga angayng makat-onan, unsa kaha ang maong leksiyon?’ Lagmit mao kanay imong pagbati.

Mahitungod niini, ang igsoon ni Jesus sa inahan, ang tinun-ang si Santiago, misulat: “Sa dihang pagasulayon, dili siya angay moingon: ‘Ako gisulayan sa Diyos.’ Kay ang Diyos dili masulayan sa daotang mga butang ni siya mosulay kang bisan kinsa.” (Santiago 1:13) Ang Diyos dili mao ang tuboran sa daotan. Busa, dayag nga dili pagbuot sa Diyos ang tanang nahitabo sa yuta karon. Ang Kasulatan naghisgot usab sa kabubut-on sa tawo, kabubut-on sa mga nasod, ug kabubut-on pa gani sa Yawa. (Juan 1:13; 2 Timoteo 2:26; 1 Pedro 4:3) Mouyon ka ba nga ang nahitabo sa pamilya ni Julio ug Christina dili gayod kabubut-on sa usa ka mahigugmaong langitnong Amahan?

Busa, unsa gayoy gipasabot ni Jesus sa dihang iyang gitudloan ang iyang mga tinun-an sa pag-ampo: “Matuman unta ang imong kabubut-on”? Usa ba lamang kadto ka hangyo nga unta mointerbener ang Diyos sa linaing mga kahimtang, o si Jesus nagtudlo ba kanato sa pag-ampo alang sa usa ka butang mga mas hinungdanon ug mas maayo, usa ka kausaban nga malaoman natong tanan? Susihon pa natog dugang kon unsay giingon sa Bibliya.

[Picture Credit Lines sa panid 3]

Car: Dominique Faget-STF/AFP/Getty Images; child: FAO photo/B. Imevbore