Nahinumdom Ka Ba?

Nalingaw ka ba sa pagbasa sa di pa dugayng mga gula sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

• Unsay nagpakita nga si Jesus adunay mga igsoong lalaki ug babaye?

Ang Bibliya mismo nag-ingon niini diha sa Mateo 13:55, 56 ug Marcos 6:3. Ang Gregong pulong (adelphos) nga gigamit sa maong mga bersikulo nagpaila ug “usa ka matang sa pisikal o legal nga relasyon [ug] nagpasabot lamang ug bug-os nga pagkamanagsoon o igsoon sa amahan o sa inahan lamang.” (The Catholic Biblical Quarterly, Enero 1992)—12/15, panid 3.

• Unsang lahi nga dagway sa gubat ang makita karon, ug unsa ang kanunayng mga hinungdan niini?

Sa di pa dugayng katuigan, ang mga gubat nga mihampak sa katawhan kasagaran maoy mga giyera-sibil—mga gubat tali sa nagkontrahanayng mga grupo sa mga lungsoranon diha sa samang nasod. Ang etniko ug tribonhong pagdumtanay, mga kalainan sa relihiyon, inhustisya, ug politikanhong kagubot maoy mga hinungdan. Ang laing hinungdan mao ang kahakog sa gahom ug salapi.—1/1, mga panid 3-4.

• Giunsa nato pagkasayod nga dili tuyo ni Jesus nga sumaysumayon sa mga Kristohanon ang mga pulong diha sa modelong pag-ampo?

Gihatag ni Jesus kining modelo sa pag-ampo didto sa iyang Wali sa Bukid. Mga 18 ka bulan human niana, gisubli niya ang hinungdanong mga punto sa iyang unang instruksiyon bahin sa pag-ampo. (Mateo 6:9-13; Lucas 11:1-4) Dayag dinhi ang kamatuoran nga wala niya kana sublia nga pulong por pulong, nga nagpaila nga wala siya maghatag ug rituwal nga pag-ampo nga sumaysumayon.—2/1, panid 8.

• Human sa Lunop, diin makaplagi sa salampati ang dahon sa olibo nga iyang gidala ngadto sa arka?

Wala kita mahibalo sa kaparat o temperatura sa mga tubig sa lunop. Apan ang mga kahoyng olibo nailhan nga manalingsing pag-usab bisan human putla. Busa ang ubang mga kahoy lagmit nabuhi latas sa lunop ug nanalingsing human niadto.—2/15, panid 31.

• Panahon sa giyera-sibil sa Nigeria, sa dihang may gihimong barikada ang Biafra, giunsa sa mga Saksi ni Jehova sa maong dapit pagkadawat ug espirituwal nga pagkaon?

Usa ka alagad sa gobyerno ang naasayn ngadto sa usa ka opisina sa Uropa ug ang lain naasayn ngadto sa usa ka tugpahanan sa Biafra. Silang duha maoy mga Saksi. Gidawat nila ang peligrosong tahas sa paghatod ug espirituwal nga pagkaon ngadto sa Biafra, sa ingon nagtabang sa daghang igsoon hangtod nahuman ang gubat sa 1970.—3/1, panid 27.

• Unsay nalampos sa Kalinaw sa Westphalia, ug sa unsang paagi nalangkit ang relihiyon?

Ang Repormasyon nagbahin sa Balaang Romanhong Imperyo ngadto sa tulo ka relihiyon—Katoliko, Lutherano, ug Calvinista. Ang Unyon sa Protestante ug ang Liga Katolika naporma sayo sa ika-17ng siglo. Dayon mitungha ang usa ka relihiyosong panag-away sa Bohemia ug nahimo kadtong usa ka internasyonal nga pag-ilogay sa gahom. Ang Katoliko ug Protestante nga mga magmamando nag-indigay aron mohawod sa politika ug aron makaangkon ug komersiyal nga ganansiya. Sa kataposan, ang panaghisgot bahin sa pakigdait gihimo sa Alemang probinsiya sa Westphalia. Human sa halos lima ka tuig, ang Tratado sa Westphalia gipirmahan sa 1648, nga nagtapos sa Katloan ka Tuig nga Gubat ug nagtimaan sa pagkahimugso sa modernong Uropa ingong usa ka kontinente sa independenteng mga estado.—3/15, mga panid 20-3.

• Unsay kahulogan sa marka, o ngalan, sa “mapintas nga mananap”—ang numerong 666?

Kini nga marka gihisgotan sa Pinadayag 13:16-18. Ang mananap nagtumong sa pagmando sa tawo, ug ang pagbaton sa mananap ug “usa ka numero sa tawo” nagpaila nga ang mga kagamhanan nagbanaag sa makasasalang kahimtang sa tawo. Ang 6 dugangag 60 dugangag 600 nagpakita nga kini bug-os nga nakulangan sumala sa panan-aw sa Diyos. Kadtong nakabaton niini nga marka naghatag ug masimbahong pasidungog sa politikanhong Estado, o midangop niini alang sa kaluwasan.—4/1, mga panid 4-7.