Sa Dihang ang Kabubut-on sa Diyos Matuman Dinhi sa Yuta

SA DIHANG gitudloan ni Jesus ang iyang mga tinun-an sa pag-ampo, “Matuman unta ang imong kabubut-on, maingon sa langit, mao man usab sa yuta,” siya nagsulti ingong usa nga nagkinabuhi na sa langit uban sa Amahan. (Mateo 6:10; Juan 1:18; 3:13; 8:42) Sa una-tawhanong paglungtad ni Jesus, iyang naeksperyensiyahan ang panahon sa dihang ang tanang butang nga nahitabo sa langit ug yuta maoy kaharmonya sa kabubut-on sa Diyos. Kadto maoy makapahimuot nga mga panahon sa kalamposan ug katagbawan.—Proverbio 8:27-31.

Ang unang gilalang sa Diyos mao ang espiritung mga linalang, “mga manulonda niya, nga gamhanan sa kusog, nga nagatuman sa iyang pulong.” Sila maoy “iyang mga alagad, nga nagabuhat sa iyang kabubut-on.” (Salmo 103:20, 21) Aduna bay kagawasan sa pagpahayag ug pagpili ang matag manulonda? Oo, ug sa dihang gilalang ang yuta, kining maong “mga anak sa Diyos misinggit sa pagdayeg.” (Job 38:7) Ang ilang pagdayeg nagbanaag sa personal nga kalipay sa kon unsay katuyoan sa Diyos, ug miuyon sila sa iyang kabubut-on.

Human malalang ang yuta, ang Diyos nag-andam niini aron kapuy-an sa mga tawo ug sa kataposan naglalang sa unang lalaki ug babaye. (Genesis, kapitulo 1) Takos ba usab kining dayegon? Ang inspiradong asoy nag-ingon: “Human niana nakita sa Diyos ang tanan nga iyang gibuhat ug, tan-awa! kadto maayo kaayo,” oo, walay-ikasaway, hingpit.—Genesis 1:31.

Unsa bay kabubut-on sa Diyos alang sa atong unang mga ginikanan ug sa ilang mga kaliwat? Sumala sa Genesis 1:28, kadto usab maoy maayo kaayo: “Ang Diyos nagpanalangin kanila ug ang Diyos miingon kanila: ‘Magmabungahon ug magdaghan kamo ug pun-a ang yuta ug gamhi kini, ug pagabut-i ang mga isda sa dagat ug ang nagalupad nga mga linalang sa kalangitan ug ang matag buhing linalang nga nagalihok diha sa yuta.’” Aron matuman ang maong talagsaong sugo, ang atong unang mga ginikanan kinahanglang padayong mabuhi—sa walay kataposan—ug mao man usab ang ilang mga kaliwat. Walay timailhan sa katalagman, inhustisya, kagul-anan, o kamatayon.

Kadto maoy panahon sa dihang ang kabubut-on sa Diyos ginatuman sa langit ug sa yuta. Kadtong motuman sa iyang kabubut-on makakaplag ug tumang kalipay sa pagbuhat niana. Unsay nakaapan?

Mitungha ang usa ka wala-damhang hagit batok sa kabubut-on sa Diyos. Apan, kini dili kay dili masulbad. Bisan pa niana, kini nakahatag ug taas nga yugto sa kagul-anan nga nakapatunghag hilabihang kalibog bahin sa kabubut-on sa Diyos alang sa katawhan. Kitang tanan nasugamak ning maong kagul-anan. Unsa ang maong hagit?

Ang Kabubut-on sa Diyos Panahon sa Rebelyon

Ang usa sa espirituhanong “mga anak sa Diyos” nakakitag kahigayonan sa pagbalda sa kabubut-on sa Diyos alang sa katawhan, nga ang iyang tuyo mao ang pagkuhag mga kaayohan alang sa iyang kaugalingon. Sa dihang kining maong espiritung linalang nagsigeg hunahuna sa maong kahigayonan, kini nahimong mas posible ug mas madanihon. (Santiago 1:14, 15) Nangatarongan tingali siya nga kon siya lang untay paminawon sa unang tawhanong magtiayon inay ang Diyos, nan ang Diyos mapugos sa pagtugot nga may kaindig sa pagkasoberano. Mahimong gihunahuna  niya nga dili sila patyon sa Diyos, tungod kay nagkahulogan kana nga mapakyas ang katuyoan sa Diyos. Basig usbon pa gani ni Jehova nga Diyos ang iyang katuyoan, nga magdawat sa posisyon ning maong espiritung anak nga mao nay gisunod karon sa Iyang tawhanong linalang. Sa tukma, ang maong rebelde sa ulahi gitawag ug Satanas, nga sa ato pa, “Magsusupak.”—Job 1:6.

Milihok sumala sa iyang tinguha, giduol ni Satanas ang babaye. Giawhag niya ang babaye sa pagsalikway sa kabubut-on sa Diyos ug mahimong independente sa moral, nga nag-ingon: “Dili gayod kamo mamatay. . . . Kamo mahisama sa Diyos, nga mahibalo sa maayo ug sa daotan.” (Genesis 3:1-5) Para sa babaye, kadto maoy usa ka butang nga makahatag kaniyag kagawasan, ug siya nagtuo nga kadto moresulta ug mas maayong paagi sa pagkinabuhi. Sa ulahi, iyang gikombinsir ang iyang bana sa pagduyog kaniya.—Genesis 3:6.

Dili kini ang kabubut-on sa Diyos alang sa magtiayon. Kadto maoy ilang kabubut-on. Ug kini magpahinabog malaglagong mga sangpotanan. Giingnan na silang daan sa Diyos nga ang maong dalan motultol ngadto sa ilang kamatayon. (Genesis 3:3) Sila wala lalanga nga magmaindependente sa Diyos ug mahimong malamposon. (Jeremias 10:23) Gawas pa, sila mahimong dili-hingpit, ug ang pagkadili-hingpit ug kamatayon mapasa na karon ngadto sa ilang mga kaliwat. (Roma 5:12) Dili mahimong balihon ni Satanas kining maong mga epekto.

Kini bang maong mga kaugmaran makapausab sa katuyoan, o kabubut-on, sa Diyos alang sa mga tawo ug sa yuta hangtod sa hangtod? Dili. (Isaias 55:9-11) Apan kini nagpatungha ug mga isyu nga kinahanglang husayon: Ang katawhan ba “mahisama sa Diyos, nga mahibalo sa maayo ug sa daotan,” sumala sa gipangangkon ni Satanas? Sa ato pa, kon hatagan lamang ug igong panahon, makahukom ba kita sa kaugalingon kon unsay husto ug sayop, makaayo ug makadaot, diha sa tanang bahin sa kinabuhi? Ang Diyos ba takos sa bug-os nga pagkamasinugtanon, nga ang iyang paagi sa pagmando mao ang labing maayo? Takos bang tumanon sa bug-os ang iyang kabubut-on? Unsay imong tubag?

Dunay usa lamang ka paagi sa paghusay niining mga isyuha atubangan sa tanang intelihenteng linalang: Tugotan kadtong nagtinguhag independensiya sa pagsulay sa pagkinabuhing malamposon nga bulag sa Diyos. Ang pagpatay lamang kanila dili makasulbad sa mga isyu nga gipatungha. Ang paghatag sa tawhanong rasa ug igong panahon maghusay sa mga butang tungod kay ang mga resulta mahimong tin-aw. Gipaila sa Diyos nga iyang husayon ang mga butang niining paagiha sa dihang giingnan niya ang babaye nga siya makabaton ug mga anak. Sa ingon, magsugod ang tawhanong pamilya. Tungod niini, kita buhi karon!—Genesis 3:16, 20.

Apan, wala kini magpasabot nga ang Diyos magtugot sa mga tawo ug sa rebelyosong espirituhanong mga anak sa paghimo sa tanan nga ilang gusto. Ang Diyos wala moluwat sa iyang pagkasoberano, ug wala niya isalikway ang iyang katuyoan. (Salmo 83:18) Gitin-aw niya kini pinaagi sa pagtagna nga sa ngadtongadto malaglag ang tighulhog sa rebelyon ug mapapas ang tanang daotang mga epekto. (Genesis 3:15) Busa, sukad sa sinugdanan, ang tawhanong pamilya gisaaran ug kahupayan.

Sa kasamtangan, ang atong unang ginikanan wala na magpasakop sa pagmando sa Diyos ug gidahig nila ang ilang umaabot nga mga kaliwat. Aron mapugngan sa Diyos ang tanang daotang sangpotanan sa ilang desisyon, kinahanglang ipatuman niya ang iyang kabubut-on diha kanila sa tanang higayon. Apan kini maoy sama ra gayod sa dili pagtugot nga masulayan ang independensiya.

 Siyempre, ang mga tawo makapili sa pagmando sa Diyos. Makakat-on sila kon unsay kabubut-on sa Diyos alang sa katawhan niining yugtoa ug makapahiuyon niana kutob sa maarangan. (Salmo 143:10) Bisan pa niana, sila dili mahigawas sa mga problema hangtod ang isyu bahin sa bug-os nga independensiya sa katawhan dili pa masulbad.

Ang mga epekto sa personal nga pagpili nahimong tin-aw sa sayong bahin sa tawhanong kasaysayan. Ang panganay nga anak sa tawhanong pamilya, si Cain, nagpatay sa iyang igsoon nga si Abel tungod kay “daotan ang iyang mga buhat, apan kadtong sa iyang igsoon maoy matarong.” (1 Juan 3:12) Dili kadto kabubut-on sa Diyos, tungod kay gipasidan-an sa Diyos si Cain ug sa ulahi gisilotan siya. (Genesis 4:3-12) Gipili ni Cain ang moral nga independensiya nga gitanyag ni Satanas; sa ingon siya “naggikan sa usa nga daotan.” Ang uban mihimo usab niana.

Sulod sa kapin sa 1,500 ka tuig sa tawhanong kasaysayan, “ang yuta nadaot sa panan-aw sa matuod nga Diyos ug ang yuta napuno sa kapintasan.” (Genesis 6:11) Kinahanglang molihok dayon siya aron mapreserbar ang yuta batok sa pagkadaot. Ang Diyos milihok pinaagi sa pagpahinabog tibuok-globong lunop ug pagpanalipod sa bugtong matarong nga pamilya nga buhi pa niadtong tungora—si Noe, iyang asawa, iyang mga anak lalaki, ug ilang mga asawa. (Genesis 7:1) Kitang tanan maoy ilang mga kaliwat.

Sulod sa tawhanong kasaysayan sukad niadto, ang Diyos nagtagana ug giya alang niadtong sinserong nagtinguha nga masayran ang iyang kabubut-on. Iyang giinspirar ang maunongong mga lalaki sa pagrekord sa mga mensahe nga iyang gihatag alang kang bisan kinsa nga modangop kaniya alang sa giya. Kining maong mga mensahe girekord diha sa Bibliya. (2 Timoteo 3:16) Mahigugmaon niyang gitugotan ang matinumanong mga tawo nga makabaton ug usa ka relasyon uban kaniya, nga mahimo pa ganing iyang mga higala. (Isaias 41:8) Ug siya naghatag kanilag kusog nga ilang gikinahanglan aron maantos ang malisod nga mga pagsulay nga nasinatian sa katawhan sulod niining libolibo ka tuig nga pag-independente. (Salmo 46:1; Filipos 4:13) Pagkadako sa atong pagpasalamat tungod niining tanan!

“Matuman Unta ang Imong Kabubut-on”—sa Bug-os

Ang nahimo na sa Diyos hangtod karon dili pa mao ang kabug-osan sa iyang kabubut-on alang sa katawhan. Ang Kristohanong apostol nga si Pedro nagsulat: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magpuyo ang pagkamatarong.” (2 Pedro 3:13) Kining maong simbolikong pinulongan nagtumong sa bag-ong nagamando nga awtoridad ibabaw sa katawhan ug sa usa ka bag-ong tawhanong katilingban ilalom sa maong kagamhanan.

Naggamit ug klarong pinulongan, si manalagnang Daniel nagsulat: “Sa mga adlaw nianang mga haria ang Diyos sa langit magatukod ug usa ka gingharian nga dili gayod malumpag. . . . Kini magadugmok ug magatapos niining tanang gingharian, ug kini mobarog hangtod sa panahong walay tino.” (Daniel 2:44) Kining maong propesiya nagtagna sa kataposan sa dili na matul-id nga sistema sa mga butang karon ug pagapulihan kini sa Gingharian, o kagamhanan, sa Diyos. Pagkamaayong balita kana! May adlaw ra nga ang paggubatay ug kahakog nga nagpuno niining kalibotana karon sa kapintasan ug nagpameligro na usab sa pagdaot sa yuta dili na mahinumdoman pa.

Kanus-a mahitabo kining mga butanga? Ang mga tinun-an ni Jesus nangutana: “Kanus-a man mahitabo kining mga butanga, ug unsa man unya ang ilhanan sa imong presensiya ug sa kataposan sa sistema sa mga butang?” Ingong bahin sa iyang tubag, si Jesus nag-ingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.”—Mateo 24:3, 14.

Nahibalo na gayod ang publiko nga kining buluhatong pagwali ginahimo na karon sa tibuok kalibotan. Lagmit nakita na nimo kini diha sa inyong dapit. Sa iyang librong These Also Believe, si Propesor Charles S. Braden misulat: “Literal nga gilukop sa mga Saksi ni Jehova ang yuta sa ilang pagpamatuod. . . . Walay laing relihiyosong grupo sa kalibotan ang nagpakitag labawng kasibot ug pagkamalahutayon diha sa pagsulay sa pagsangyaw sa maayong balita sa Gingharian kay sa mga Saksi ni Jehova.” Ang mga Saksi aktibong nagawali  niining maayong balita diha sa kapin sa 230 ka nasod ug sa duolag 400 ka pinulongan. Kining gitagnang buluhaton wala sukad mapalampos sa tibuok-yutang gilapdon. Kini maoy usa sa daghang mga ebidensiya nga duol na ang panahon nga pulihan sa maong Gingharian ang tawhanong mga kagamhanan.

Ang Gingharian nga giingon ni Jesus nga igawali mao gihapon ang Gingharian nga iyang gitudlo nga iampo diha sa iyang modelong pag-ampo: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:10) Oo, ang maong Gingharian mao ang ahensiya nga gamiton sa Diyos sa pagtuman sa iyang katuyoan, sa iyang kabubut-on, alang sa katawhan ug sa yuta.

Unsay kahulogan niana? Tugoting motubag ang Pinadayag 21:3, 4: “Nadungog ko ang usa ka makusog nga tingog gikan sa trono nga nag-ingon: ‘Tan-awa! Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang mga katawhan. Ug ang Diyos makig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.’” Unya ang kabubut-on sa Diyos bug-os na gayong matuman dinhi sa yuta ug didto sa langit. a Dili ba nimo gustong mahimong bahin niana?

[Footnote]

[Hulagway sa panid 5]

Ang pagkaindependente gikan sa Diyos mopatunghag kaalaotan