Sa Tabang sa Bibliya, Nasuklan Niya ang Tentasyon

Daghan kaayong tentasyon sa kalibotan karon. Ang pagsunod sa mga sukdanan sa Bibliya dili sayon. Pananglitan, tingali lisod sundon ang tambag sa Bibliya: “Kalagiw gikan sa pakighilawas.”—1 Corinto 6:18.

Usa sa mga Saksi ni Jehova, nga atong tawgon nga Sebastian, nagtrabaho sa usa ka kompaniya sa Scandinavia didto sa Polandia. Kinahanglang manlimbasog siya pag-ayo sa paghupot sa iyang integridad.

Si Sebastian nailhan sa iyang mga kauban sa trabaho ingong usa sa mga Saksi ni Jehova. Agig pagpabili sa iyang kakugi ug maayong panggawi, gihatagan siya sa iyang mga superbisor ug daghang pribilehiyo. Apan, nasayran niya sa ulahi nga kini nga mga pribilehiyo naglakip sa pagtambong sa mga miting sa negosyo diin dunay kuwestiyonableng mga kalingawan.

Wala madugay, nagduhaduha si Sebastian. “Ang akong superbisor nasayod nga ako usa sa mga Saksi ni Jehova. Mao kanay hinungdan nga siya may pagsalig ug may kompiyansa nako. Kon dili ko motambong sa mga miting, mawad-an kog trabaho, nga lisod kaayong pangitaon. Unsa kaha kon igo ra kong motan-aw sa mga kalingawan?”

Apan duna pay ipabuhat kang Sebastian. Siya maoy motaganag mga babaye nga mugbog lupad alang sa langyawng mga kliyente aron ikauban nila magabii. Unsay iyang himoon?

Si Sebastian midesisyon sa pagpahinumdom sa iyang superbisor sa iyang binase-sa-Bibliya nga hunahuna bahin sa imoralidad. Sa wala madugay, nakita ni Sebastian nga kining trabahoa dili angay kaniya ug nga sa ngadtongadto kinahanglan siyang mohawa sa iyang trabaho. Nakakita siya ug bag-ong trabaho nga menos ug suweldo apan layo sa imoral nga mga tentasyon. Karon hinlo na ang iyang tanlag.

Unsay imong himoon kon pugson ka sa paghimo o pag-uyon sa imoral nga mga buhat? Andam ka bang mohimog dakong kausaban? Mao kana ang gihimo ni Jose sa kakaraanan, sumala sa gitaho sa Genesis 39:7-12.