Ang Pagkaneyutral Makapugong ba sa Pagpakitag Kristohanong Gugma?

ANG pagka-Kristohanon naglakip dili lamang sa pagbasa sa Bibliya, pag-ampo, ug pagkantag mga awit sa pagdayeg sa Diyos kada Dominggo. Kini naglakip sa mga buhat alang sa Diyos ug sa katawhan. Ang Bibliya nag-ingon: “Maghigugmaay kita, dili pinaagi sa pulong ni sa dila, kondili sa buhat ug sa kamatuoran.” (1 Juan 3:18) Si Jesus adunay sinserong kabalaka sa uban, ug ang mga Kristohanon buot mosundog kaniya. Giagda ni apostol Pablo ang mga isigkamagtutuo nga ‘kanunayng mapuliki diha sa buluhaton sa Ginoo.’ (1 Corinto 15:58) Apan unsa ang buluhaton sa Ginoo? Naglakip ba kini sa pagpaningkamot nga usbon ang gobyerno alang sa kaayohan sa mga kabos ug mga dinaogdaog? Mao ba kanay gibuhat ni Jesus?

 Bisan pag si Jesus giawhag nga moapil sa politikanhong mga kalihokan ug nga may dapigan, siya midumili. Gibalibaran niya ang gitanyag ni Satanas nga gahom ibabaw sa tanang gingharian sa kalibotan, wala siya moapil sa panaglantugi bahin sa pagbayad ug buhis, ug mipahawa siya sa dihang buot siyang himoong hari sa usa ka organisadong kalihokan. (Mateo 4:8-10; 22:17-21; Juan 6:15) Apan ang iyang pagkaneyutral wala makapugong kaniya sa pagbuhat alang sa kaayohan sa uban.

Gisentro ni Jesus ang iyang pagtagad sa butang nga makahatag ug malungtarong kaayohan sa uban. Bisan tuod ang pagpakaon niya sa lima ka libo ug pagpang-ayo sa mga masakiton naghatag ug temporaryong kahupayan alang sa pipila, ang iyang pagpanudlo nagtaganag dumalayong mga panalangin sa tanang katawhan. Si Jesus nailhan, dili ingong organisador sa mga buhat sa kaluoy, kondili isip “ang Magtutudlo” lamang. (Mateo 26:18; Marcos 5:35; Juan 11:28) Siya miingon: “Tungod niini ako gipakatawo, ug tungod niini ako mianhi sa kalibotan, aron ako magpamatuod sa kamatuoran.”—Juan 18:37.

Pagwali sa Butang nga Mas Maayo kay sa Politika

Ang kamatuoran nga gitudlo ni Jesus dili usa ka politikanhong teoriya. Hinunoa, ang kamatuoran nasentro sa Gingharian nga siya mismo ang mahimong Hari. (Lucas 4:43) Kini nga Gingharian maoy langitnong kagamhanan, ug kini ang mopuli sa tanang tawhanong administrasyon ug mohatag ug malungtarong kalinaw sa katawhan. (Isaias 9:6, 7; 11:9; Daniel 2:44) Busa, kini mao lamang ang matuod nga paglaom sa katawhan. Dili ba mas mahigugmaon nga ipahayag kanang seguradong paglaom sa umaabot kay sa dasigon ang katawhan sa pagsalig sa mga tawo aron mohatag ug seguradong kaugmaon? Ang Bibliya nag-ingon: “Ayaw ibutang ang inyong pagsalig sa mga hamili, ni sa anak sa yutan-ong tawo, nga kaniya walay kaluwasan. Mogula ang iyang espiritu, mobalik siya sa iyang yuta; nianang adlawa mahanaw ang iyang mga hunahuna. Malipayon siya nga ang Diyos ni Jacob maoy iyang panabang, kansang paglaom anaa kang Jehova nga iyang Diyos.” (Salmo 146:3-5) Busa inay sugoon ang iyang mga tinun-an nga iwali ang usa ka maayong paagi sa pag-organisar sa mga kagamhanan, sila gitudloan ni Jesus nga iwali ang “maayong balita sa gingharian.”—Mateo 10:6, 7; 24:14.

Busa, kini mao ang “buluhaton sa Ginoo” nga gisugo nga ipabuhat sa Kristohanong mga magwawali. Tungod kay ang mga sakop sa Gingharian sa Diyos gibaoran nga maghigugmaay sa usag usa, ang Gingharian molampos sa pagwagtang sa kakabos pinaagi sa pag-apod-apod sa kahinguhaan sa katawhan sa balanseng paagi. (Salmo 72:8, 12, 13) Kini mao ang maayong balita ug angay gayong iwali.

Karong adlawa, ang mga Saksi ni Jehova organisado alang niining “buluhaton sa Ginoo” diha sa 235 ka nasod. Uyon sa sugo ni Jesus, sila matinahoron sa tanang kagamhanan. (Mateo 22:21) Apan sila nagsunod usab niining mga pulonga nga iyang gisulti ngadto sa iyang mga sumusunod: “Kamo dili man bahin sa kalibotan, apan gipili ko kamo gikan sa kalibotan.”—Juan 15:19.

Ang pipila nga tigwali bahin sa politika mihunong na sa pagwali human makatuon ug maayo sa Bibliya. Usa ka Italyanong politiko nga membro sa Catholic Action, nga usa ka organisasyong kontrolado sa simbahan, miingon: “Misulod ako sa politika, kay naghunahuna nga ang usa ka tawo angayng makiglangkit nga aktibo sa politikanhon ug sosyal nga kaugmaran sa katilingban.” Human sa pagluwat isip alkalde sa siyudad aron magwali sa Gingharian sa Diyos isip usa sa mga Saksi ni Jehova,  iyang gipatin-aw kon nganong mapakyas ang mga paningkamot sa sinserong mga tawo sa politika. “Ang kahimtang karon sa kalibotan naingon, dili tungod kay ang desenteng mga tawo wala mosulay sa pagpauswag sa sosyal nga mga kahimtang, kondili, hinunoa, ang sinserong mga paningkamot sa pipila ka tawo napakyas tungod sa pagkadaotan sa kadaghanan.”

Ang dili pag-apil sa politika aron iwali ang bugtong matuod nga paglaom alang sa katawhan dili makapugong sa matuod nga mga Kristohanon gikan sa pagtabang sa uban sa praktikal nga mga paagi. Kadtong ilang gitabangan nga mahimong mga sakop sa Gingharian sa Diyos nakakat-on sa pag-usob sa makadaot nga mga tinamdan, pagtahod sa awtoridad, pagpauswag sa ilang pamilyahanong kinabuhi, ug pagbaton ug timbang nga panglantaw bahin sa materyal nga bahandi. Labi pang hinungdanon, ang mga Saksi ni Jehova motabang sa mga tawo sa pagpahimulos ug suod nga relasyon uban sa Diyos.

Ang mga magwawali sa Gingharian sa Diyos makahatag ug kaayohan sa katilingban nga ilang gipuy-an. Apan labaw pa niana, gitultolan nila ang katawhan sa pagsalig sa usa ka kagamhanan nga tinuod ug modalag permanenteng kalinaw sa tanan nga nahigugma sa Diyos. Ingong resulta sa ilang pagkaneyutral, ang maong mga Kristohanon may kagawasan sa paghatag sa labing malungtaron ug praktikal nga tabang nga mabatonan karon.

[Kahon/Hulagway sa panid 7]

Gikan sa Pagpamolitika Ngadto sa Pagwali sa Gingharian sa Diyos

Samtangbata pa, si Átila nakakat-on bahin sa liberation theology gikan sa iyang mga kura paroko sa Belém, Brazil. Siya nahimuot sa pagpamati nga ang katawhan mahigawas sa kataposan sa pagpanglupig ug siya mianib sa usa ka aktibistang pundok, diin siya nakakat-on sa pag-organisar ug mga martsa sa pagprotesta ug sa mga kampanya bahin sa dili pagsunod sa mga balaod sa gobyerno isip pagprotesta.

Apan si Átila nahimuot usab nga motudlo sa mga anak sa maong pundok, nga gigamit ang usa ka libro nga gihatag kaniya, ang Pagpatalinghog sa Dakong Magtutudlo. a Naghisgot kana bahin sa maayong panggawi ug pagsunod sa mga awtoridad. Tungod niadto si Átila natingala kon nganong kadtong nagsuportar sa liberation theology wala magsunod sa hataas nga mga sukdanan ni Jesus bahin sa moralidad ug kon nganong ang pipila malimot sa gilupigan nga mga tawo sa dihang sila diha na sa gahom. Mibulag siya sa pundok. Sa ulahi, ang mga Saksi ni Jehova nanuktok sa iyang pultahan ug nakigsulti kaniya bahin sa Gingharian sa Diyos. Sa wala madugay siya nagtuon na sa Bibliya ug nakakat-on bahin sa matuod nga kasulbaran sa pagpanglupig sa katawhan.

Samtang nagtuon na siyag Bibliya, si Átila miatender sa usa ka seminar sa Katoliko bahin sa pagtuo ug politika. “Kini sila maoy duha ka lahing paagi sa paglantaw sa samang kahimtang,” saysay pa sa mga instruktor. Miatender usab siya sa usa ka tigom sa Kingdom Hall. Pagkadakog kalainan! Sa usa ka bahin, walay nagsigarilyo, nag-inom, o malaw-ayng mga pangomedya. Mihukom siya nga mokuyog kanila sa ilang pagsangyaw, ug sa wala madugay siya nabawtismohan. Karon siya nakasabot kon nganong ang liberation theology dili mao ang matuod nga kasulbaran sa mga suliran sa mga kabos.

[Footnote]

[Mga hulagway sa panid 6]

Ang pagkaneyutral sa Kristohanong mga ministro dili makapugong kanila sa pagtabang sa uban