Maglinig-onay sa Usag Usa
Maglinig-onay sa Usag Usa
“Sila mismo nahimong makapalig-on nga tabang kanako.”—COLOSAS 4:11.
1, 2. (a) Bisan pa sa mga kapeligrohan, nganong ang mga higala ni Pablo miduaw kaniya sa prisohan?
PELIGROSO nga mahimong higala sa usa ka tawo nga nag-antos diha sa prisohan—bisan pag ang imong higala dili makataronganong napriso. Ang mga opisyal sa prisohan magduda tingali kanimo, nga magbantay sa tanan nimong lihok aron sa pagseguro nga dili ka makahimog krimen. Busa, nagkinahanglan ug kaisog ang pagpakigsulti kanunay sa imong higala ug pagduaw kaniya diha sa prisohan.
2 Bisan pa niana, mao gayod kanay gibuhat sa pipila ka higala ni apostol Pablo mga 1,900 ka tuig kanhi. Wala sila magpanuko sa pagduaw kang Pablo sa prisohan aron sa paghatag kaniyag gikinahanglang kahupayan ug pagdasig ug aron sa pagpalig-on kaniya sa espirituwal. Kinsa kining maunongong mga higala? Ug unsay atong makat-onan gikan sa ilang kaisog, pagkamaunongon, ug panaghigala?—Proverbio 17:17.
“Makapalig-on nga Tabang”
3, 4. (a) Kinsa ang lima sa mga higala ni Pablo, ug nahimo silang unsa ngadto kaniya? (b) Unsa ang “makapalig-on nga tabang”?
3 Mobalik kita ngadto sa mga tuig 60 K.P. Si apostol Pablo napriso didto sa Roma tungod sa bakak nga sumbong nga sedisyon. (Buhat 24:5; 25:11, 12) Gihisgotan ni Pablo ang lima ka Kristohanon nga nagpaluyo kaniya: Si Tiquico, ang iyang personal nga sinugo gikan sa distrito sa Asia ug “isigkaulipon diha sa Ginoo”; si Onesimo, usa ka “matinumanon ug hinigugmang igsoon” nga taga-Colosas; si Aristarko, usa ka Macedonianhon nga taga-Tesalonica ug kanhi “kaubang binihag” ni Pablo; si Marcos, ang ig-agaw sa misyonaryong kauban ni Pablo nga si Barnabas ug magsusulat sa Ebanghelyo nga nagdala sa iyang ngalan; ug si Justo, nga usa sa mga isigkamagbubuhat sa apostoles alang “sa gingharian sa Diyos.” Mao kiniy giingon ni Pablo bahin sa lima: “Sila mismo nahimong makapalig-on nga tabang kanako.”—Colosas 4:7-11.
4 Si Pablo mihimog puwersadong mga pamulong bahin sa tabang nga gihatag kaniya sa iyang maunongong mga higala. Gigamit niya ang Gregong pulong nga (pa·re·go·riʹa) nga gihubad ug “makapalig-on nga tabang,” nga sa Bibliya makita lamang dinhi niining bersikuloha. Kining pulonga daghag kahulogan ug gigamit ilabina may kalabotan sa mga tambal. a Kini mahimong hubaron nga ‘kahuwasan, kahumpayan, kahayahay, o kahupayan.’ Gikinahanglan ni Pablo ang ingon nianang pagpalig-on, ug gitagana kana nianang lima ka lalaki.
Kon Nganong Nagkinahanglan si Pablo ug “Makapalig-on nga Tabang”
5. Bisan pag siya apostoles, unsay gikinahanglan ni Pablo, ug unsay gikinahanglan natong tanan matag karon ug unya?
5 Makapahibulong tingali sa uban ang paghunahuna nga si Pablo, nga usa ka apostoles, nagkinahanglan ug pagpalig-on. Apan, nagkinahanglan gayod siya niana. Tinuod nga lig-on ang pagtuo ni Pablo, ug nakalahutay siya sa daghang pagdagmal, “sa mga pagbun-og naghingapin,” “sa pag-ungaw sa kamatayon makadaghan,” ug sa uban pang mga kasakit. (2 Corinto 11:23-27) Bisan pa niana, siya tawo lamang, ug ang tanang tawo sa usa ka panahon nagkinahanglan ug kahupayan ug pagpalig-on sa pagtuo pinaagi sa tabang sa uban. Tinuod kini bisan kang Jesus. Sa iyang kataposang gabii, usa ka manulonda ang nagpakita kaniya sa Getsemane ug “nagpalig-on kaniya.”—Lucas 22:43.
6, 7. (a) Sa Roma, kinsay nakapahigawad kang Pablo, ug kinsay nagdasig kaniya? (b) Unsang matanga sa mga tabang ang gihatag sa Kristohanong mga igsoon ni Pablo didto sa Roma, sa ingon nahimo silang “makapalig-on nga tabang”?
6 Si Pablo nagkinahanglan usab ug pagpalig-on. Sa dihang miabot siya ingong piniriso sa Roma, siya wala abiabiha sa mga tawo nga pareho niyag rasa. Kini nga mga Hudiyo, sa katibuk-an, wala modawat sa mensahe sa Gingharian. Human duawa sa pangunang mga lalaki sa mga Hudiyo si Pablo sa dapit nga gibilanggoan kaniya, ang asoy sa Mga Buhat nag-ingon: “Dihay pipila nga mituo sa mga butang nga iyang gisulti; ang uban wala motuo. Busa, tungod kay sila wala man magkauyonay, sila namahawa.” (Buhat 28:17, 24, 25) Seguradong nasakitan gayod si Pablo sa ilang kakulang ug apresasyon sa dili-takos nga kalulot ni Jehova! Ang kaguol nga gibati niya niining butanga nadayag diha sa iyang sulat nga gipadala niya pipila ka tuig sayosayo pa niana ngadto sa kongregasyon sa Roma: “Ako adunay dakong kaguol ug walay-hunong nga kasakit sa akong kasingkasing. Kay ako nakapanghinaot nga unta ako nahimulag isip usa nga tinunglo gikan ni Kristo alang sa akong mga igsoon [mga Hudiyo], nga akong mga paryente sumala sa unod.” (Roma 9:2, 3) Bisan pa niana, sa Roma nakakaplag siyag maunongon, tinuod nga mga higala kansang kaisog ug pagmahal nakapahupay sa iyang kasingkasing. Sila maoy iyang tinuod nga espirituwal nga mga igsoon.
7 Sa unsang paagi kadtong lima ka igsoon nahimong makapalig-on nga tabang? Wala nila likayi si Pablo tungod kay piniriso siya. Hinunoa, sila andam ug mahigugmaon nga nagtagana ug personal nga mga serbisyo alang kang Pablo, nga naghimog mga trabaho nga dili niya mahimo tungod sa iyang pagkabilanggo. Pananglitan, sila nagsilbing mga mensahero ug naghatod sa mga sulat ni Pablo ug binaba nga mga instruksiyon ngadto sa lainlaing mga kongregasyon; sila nagdala ug makapalig-ong mga taho ngadto kang Pablo bahin sa kaayohan sa mga igsoon sa Roma ug sa ubang dapit. Lagmit gidad-an nila si Pablo ug mga butang nga gikinahanglan, sama sa besti alang sa tingtugnaw, mga linukot nga basahon, ug mga galamiton sa pagsulat. (Efeso 6:21, 22; 2 Timoteo 4:11-13) Kanang tanang tabang nakapalig-on ug nakadasig sa nabilanggo nga apostol mao nga siya, sa baylo, nahimong “makapalig-on nga tabang” ngadto sa uban, lakip na sa tibuok kongregasyon.—Roma 1:11, 12.
Kon sa Unsang Paagi Mahimong “Makapalig-on nga Tabang”
8. Unsang pagtulon-an ang atong makat-onan gikan sa mapainubsanong pag-ila ni Pablo sa iyang panginahanglan ug “makapalig-on nga tabang”?
8 Unsay atong makat-onan gikan niining asoy bahin kang Pablo ug sa iyang lima ka isigkamagbubuhat? Susihon nato sa linain ang usa ka pagtulon-an: Nagkinahanglag kaisog ug pagsakripisyo sa kaugalingon sa pagtabang sa uban sa dihang nakaagom sila sa kalisdanan. Dugang pa, nagkinahanglag pagkamapainubsanon ang pag-ila nga kita mahimong nagkinahanglan ug tabang sa panahon sa kalisod. Wala lang ilha ni Pablo nga nagkinahanglan siyag tabang kondili gipabilhan niya ang maong tabang ug gidayeg kadtong mihimo niana. Wala niya isipa nga ang pagdawat ug tabang gikan sa uban maoy usa ka timailhan sa kahuyangan o kaulawan sa iyang bahin, ug mao man usab kita. Ang pag-ingon nga kita wala gayod magkinahanglan ug makapalig-on nga tabang magpasabot nga kita maoy labaw-tawhanon. Hinumdomi, ang panig-ingnan ni Jesus nagpakita nga bisan ang hingpit nga tawo usahay kinahanglang motuaw sa pagpangayog tabang.—Hebreohanon 5:7.
9, 10. Unsang kaayohan ang mosangpot kon ilhon sa usa ka tawo ang iyang panginahanglan ug tabang, ug unsay impluwensiya niini nganha sa uban sa pamilya ug sa kongregasyon?
9 Maayo ang sangpotan kon ang responsableng mga igsoon moila nga sila adunay mga limitasyon ug nga sila nagdepende sa tabang sa uban. (Santiago 3:2) Ang maong pag-ila makapalig-on sa bugkos tali niadtong adunay awtoridad ug niadtong nailalom sa maong awtoridad, nga magpalambo ug mahigalaon ug madayganon nga komunikasyon. Ang pagkamapainubsanon niadtong andam nga modawat ug tabang nagsilbing praktikal nga pananglitan alang sa uban nga anaa sa susamang situwasyon. Kini nagpakita nga kadtong nagapanguna maoy tawhanon ug daling duolon.—Ecclesiastes 7:20.
10 Pananglitan, ang mga anak sayonan tingali sa pagdawat sa tabang sa ilang mga ginikanan sa pagsagubang sa mga problema ug mga tentasyon kon sila nahibalo nga ang ilang mga ginikanan nag-atubang usab ug susamang mga problema sa mga bata pa sila. (Colosas 3:21) Busa ang maayong komunikasyon mabuksan tali sa ginikanan ug bata. Ang Kasulatanhong mga solusyon mas epektibong ikapaambit ug mas daling dawaton. (Efeso 6:4) Sa susama, ang mga membro sa kongregasyon mas andam modawat ug tabang gikan sa mga ansiyano kon ilang naamgohan nga ang mga ansiyano nagsagubang usab ug mga problema, kahadlok, ug mga gikalibgan. (Roma 12:3; 1 Pedro 5:3) Sa makausa pa, ang maayong komunikasyon moresulta, ang Kasulatanhong tambag ikapaambit, ug mapalig-on ang pagtuo. Hinumdomi, ang atong mga igsoong lalaki ug babaye nagkinahanglan ug pagpalig-on karon kay sukad masukad.—2 Timoteo 3:1.
11. Nganong daghan kaayo karon ang nanginahanglan ug “makapalig-on nga tabang”?
11 Way sapayan kon asa kita magpuyo, kon kinsa kita, o kon pilay atong edad, kitang tanan mag-atubang usahay ug mga kapit-os sa kinabuhi. Bahin kini sa kalibotan karon. (Pinadayag 12:12) Ang maong mga kahimtang nga makaapektar sa lawas o sa emosyon magsulay sa kalidad sa atong pagtuo. Ang masulayong mga situwasyon mahimong motungha diha sa trabahoan, eskuylahan, sulod sa pamilya, o sa kongregasyon. Ang usa ka grabeng sakit o masakit nga kasinatian sa miagi mahimong mao ang hinungdan sa kapit-os. Kon ang usa ka kapikas sa kaminyoon, usa ka ansiyano, o usa ka higala malulotong mohatag ug pagdasig uban ang mahunahunaong mga pulong ug matinabangong mga buhat—pagkamakapahupay gayod niana! Aw, sama kini sa balsamo nga gipahid sa nagkatol nga panit! Busa, kon mamatikdan nimo nga usa sa imong mga igsoon anaa sa maong kahimtang, himoa ang makapalig-on nga tabang. O kon nabug-atan ka sa makahasol kaayo nga problema, pangayog tabang gikan sa mga lalaking dunay espirituwal nga mga kuwalipikasyon.—Santiago 5:14, 15.
Kon sa Unsang Paagi Makatabang ang Kongregasyon
12. Unsay mahimo sa matag usa diha sa kongregasyon sa pagpalig-on sa iyang mga igsoon?
12 Ang tanan diha sa kongregasyon, lakip na ang mga batan-on, dunay mahimo sa pagpalig-on sa uban. Pananglitan, ang imong pagkaregular diha sa mga tigom ug sa pag-alagad sa kanataran makapalig-on gayod sa pagtuo sa uban. (Hebreohanon 10:24, 25) Ang imong pagkamakanunayon sa sagradong pag-alagad maoy pamatuod sa imong pagkamaunongon kang Jehova ug nagpakita nga ikaw padayong nagatukaw sa espirituwal bisan pa sa mga kalisdanan nga imo tingaling ginasagubang. (Efeso 6:18) Ang maong pagkamakanunayon makapalig-on sa uban.—Santiago 2:18.
13. Nganong ang uban mahimong dili-aktibo, ug unsay mahimo sa pagtabang kanila?
13 Usahay, ang mga kapit-os sa kinabuhi o ang ubang mga kalisdanan makapaluya o makapahimong dili-aktibo sa uban diha sa pag-alagad sa kanataran. (Marcos 4:18, 19) Dili tingali nato makita ang mga dili-aktibo diha sa mga tigom sa kongregasyon. Bisan pa niana, lagmit nga sila aduna gihapoy gugma sa Diyos diha sa ilang kasingkasing. Unsay mahimo sa pagpalig-on sa ilang pagtuo? Ang mga ansiyano makahatag ug malulotong tabang pinaagi sa pagduaw kanila. (Buhat 20:35) Ang ubang mga membro sa kongregasyon mahimong hangyoon usab sa pagtabang. Ang maong mahigugmaong mga pagduaw mahimong mao gayod ang gikinahanglang tambal, ingnon ta, aron mapalagsik kadtong luya ug pagtuo.
14, 15. Unsang tambag ang gihatag ni Pablo bahin sa pagpalig-on sa uban? Paghatag ug panig-ingnan sa usa ka kongregasyon nga nagpadapat sa iyang tambag.
14 Ang Bibliya nagtambag kanato nga ‘hupayon ang magul-anong mga kalag, buligan ang mga maluya.’ (1 Tesalonica 5:14) Basin nakaplagan niadtong “magul-anong mga kalag” nga nagkamenos ang ilang kaisog ug nga dili sila makasagubang sa mga babag nga giatubang nila kon walay motabang kanila. Makatabang ka ba kanila? Ang ekspresyon nga “buligi ang mga maluya” gihubad nga “pagkupot ug maayo” o “paghawid” sa maluya. Si Jehova nag-atiman ug nahigugma sa tanan niyang mga karnero. Wala niya isipa sila nga walay bili, ug dili niya gusto nga adunay si bisan kinsa nga maanod. Matabangan ba nimo ang kongregasyon sa “pagkupot ug maayo” sa mga mahuyang sa espirituwal hangtod nga sila molig-on?—Hebreohanon 2:1.
15 Ang usa ka ansiyano miduaw sa usa ka magtiayon nga unom ka tuig nang dili-aktibo. Ang ansiyano misulat: “Ang maluloton ug mahigugmaon nga kahingawa nga gipasundayag kanila sa enterong kongregasyon dako kaayog epekto nga sila napalihok sa pagbalik ngadto sa panon.” Unsay gibati sa kanhing dili-aktibo nga igsoong babaye bahin sa mga pagduaw sa mga membro sa kongregasyon? Karon miingon siya: “Ang nakatabang kanamo nga mahimong aktibo na usab mao nga ang mga igsoong lalaki ug babaye nga mikuyog kanila wala gayod mohukom o manaway kanamo. Hinunoa, sila masinaboton ug naghatag ug Kasulatanhong pagdasig.”
16. Kinsa ang kanunayng andam nga motabang niadtong nagkinahanglan ug paglig-on?
16 Oo, ang sinserong Kristohanon malipay nga mahimong makapalig-on nga tabang sa uban. Ug samtang mausab ang mga kahimtang sa atong kinabuhi, kita mismo mahimong makadawat ug makapalig-on nga tabang gikan sa atong mga igsoon. Apan, sa tinuoray lang, dili sa tanang higayon nga ang atong mga igsoon anaa kanunay sa pagtabang kanato. Bisan pa niana, adunay usa ka Tuboran sa kalig-on nga anaa kanunay, ang usa nga kanunayng andam nga motabang—si Jehova nga Diyos.—Salmo 27:10.
Si Jehova—Ang Kinalabwang Tuboran sa Kalig-on
17, 18. Sa unsang paagi si Jehova nagpalig-on sa iyang Anak, si Jesu-Kristo?
17 Samtang gilansang sa estaka, si Jesus misinggit: “Amahan, sa imong mga kamot itugyan ko ang akong espiritu.” (Lucas 23:46) Dayon siya namatay. Pipila ka oras una niana, siya gidakop ug ang iyang kinasuorang mga higala mibiya kaniya ug mikalagiw tungod sa kahadlok. (Mateo 26:56) Si Jesus nag-inusara na lang nga ang bugtong Tuboran sa kalig-on mao na lamang ang iyang langitnong Amahan. Bisan pa niana, ang iyang pagsalig kang Jehova wala makawang. Ang pagkamaunongon ni Jesus sa iyang Amahan gibalosan sa maunongong pagpaluyo ni Jehova kaniya.—Salmo 18:25; Hebreohanon 7:26.
18 Sa tibuok ministeryo ni Jesus sa yuta, si Jehova nagtagana sa iyang Anak sa iyang gikinahanglan aron sa paghupot ug integridad hangtod sa pagkabugto sa iyang gininhawa. Pananglitan, human gayod sa pagbawtismo ni Jesus, nga nagtimaan sa pagsugod sa iyang ministeryo, iyang nadungog ang tingog sa iyang Amahan nga nagpahayag ug pag-uyon ug pagpalig-on sa Iyang gugma alang kaniya. Sa dihang si Jesus nagkinahanglan ug tabang, gipadala ni Jehova ang iyang mga manulonda aron sa pagpalig-on kaniya. Sa dihang si Jesus nag-atubang sa kinadak-ang pagsulay sa kataposan sa iyang yutan-ong kinabuhi, si Jehova nagpatalinghog sa iyang mga pangamuyo ug mga pangaliya. Segurado nga kining tanan maoy makapalig-on nga tabang kang Jesus.—Marcos 1:11, 13; Lucas 22:43.
19, 20. Sa unsang paagi makaseguro kita nga si Jehova magpalig-on kanato sa panahon sa atong panginahanglan?
19 Buot ni Jehova nga siya mahimong atong pangunang Tuboran usab sa kalig-on. (2 Cronicas 16:9) Ang tinuod nga Tuboran sa tanang dinamikong kusog ug dakong gahom mahimong makapalig-on nga tabang kanato sa panahon sa atong panginahanglan. (Isaias 40:26) Ang gubat, kakabos, sakit, kamatayon, o ang atong kaugalingong mga pagkadili-hingpit mahimong magpit-os pag-ayo kanato. Sa dihang ang mga kalisdanan sa kinabuhi daw sama ka puwersado sa “kaaway nga kusganon,” si Jehova mahimong atong kusog ug gahom. (Salmo 18:17; Exodo 15:2) Siya adunay gamhanang tabang alang kanato—ang iyang balaang espiritu. Pinaagi sa iyang espiritu, si Jehova makahatag ug “gahom sa gikapoy” aron ang maong tawo ‘makalupad pataas pinaagig mga pako nga sama sa mga agila.’—Isaias 40:29, 31.
20 Ang espiritu sa Diyos mao ang labing gamhanang puwersa sa uniberso. Miingon si Pablo: “Sa tanang butang ako adunay kusog pinaagi kaniya nga naghatag ug gahom kanako.” Oo, ang atong mahigugmaong langitnon nga Amahan makahatag kanato ug “gahom nga labaw sa kasarangan” aron kita makalahutay sa tanang masakit nga mga problema hangtod nga iyang ‘bag-ohon ang tanang butang’ diha sa iyang gisaad nga Paraiso nga haduol na kaayo.—Filipos 4:13; 2 Corinto 4:7; Pinadayag 21:4, 5.
[Footnote]
a Ang Vine’s Complete Expository Dictionary of Old and New Testament Words, ni W. E. Vine, nag-ingon: “Ang usa ka berbong dagway sa pulong nga [pa·re·go·riʹa] nagkahulogan ug mga tambal nga makapahupay sa kakatol (Iningles, ‘paregoric’).”
Nahinumdom Ka Ba?
• Sa unsang paagi ang mga igsoon sa Roma nahimong “makapalig-on nga tabang” kang Pablo?
• Sa unsang paagi kita mahimong “makapalig-on nga tabang” diha sa kongregasyon?
• Sa unsang paagi nga si Jehova mao ang atong kinalabwang Tuboran sa kalig-on?
[Mga Pangutana sa Pagtuon]
[Hulagway sa panid 18]
Ang mga igsoon nahimong “makapalig-on nga tabang” kang Pablo pinaagi sa paghatag kaniyag maunongong pagpaluyo, pagdasig, ug personal nga serbisyo
[Hulagway sa panid 21]
Ang mga ansiyano manguna sa pagpalig-on sa panon