Magmaisogon Sama Kang Jeremias

“Laom kang Jehova; magmaisogon ka ug lig-ona ang imong kasingkasing. Oo, laom kang Jehova.”—SALMO 27:14.

1. Unsang dagayang panalangin ang gipahimuslan sa mga Saksi ni Jehova?

 ANG mga Saksi ni Jehova nagpuyo sa usa ka espirituwal nga paraiso. (Isaias 11:6-9) Niining gubot kaayo nga kalibotan, sila nagapahimulos sa usa ka talagsaong espirituwal nga palibot kauban sa mga isigka-Kristohanon, kinsa adunay pakigdait uban kang Jehova nga Diyos ug sa usag usa. (Salmo 29:11; Isaias 54:13) Ug nagkadako ang ilang espirituwal nga paraiso. Ang tanan nga “tibuok-kalag nga magabuhat sa kabubut-on sa Diyos” adunay bahin sa pagpadako niana. (Efeso 6:6) Sa unsang paagi? Pinaagi sa pagkinabuhi sumala sa mga prinsipyo sa Bibliya ug pinaagi sa pagtudlo sa uban sa paghimo sa samang butang, sa ingon nagdapit kanila sa pagpahimulos sa dagayang mga panalangin sa maong paraiso.—Mateo 28:19, 20; Juan 15:8.

2, 3. Unsay kinahanglang antoson sa tinuod nga mga Kristohanon?

² Apan, ang atong pagpuyo diha sa usa ka espirituwal nga paraiso wala magpasabot nga dili na kita mag-antos sa mga pagsulay. Kita dili gihapon hingpit ug nag-antos sa mga epekto sa sakit, pagkatigulang, ug kamatayon. Dugang pa, atong nakita ang katumanan sa mga tagna bahin sa “kataposang mga adlaw.” (2 Timoteo 3:1) Ang mga gubat, krimen, sakit, gutom, ug ubang grabe nga mga kalisdanan nag-apektar sa tanang tawo, maingon man usab sa mga Saksi ni Jehova.—Marcos 13:3-10; Lucas 21:10, 11.

³ Gawas nianang tanan, kita nahibalo nga sa gawas sa mainit nga palibot sa atong espirituwal nga paraiso, ang bugnawng mga hangin sa paglutos nagahuros. Gipasidan-an ni Jesus ang iyang mga sumusunod: “Tungod kay kamo dili man bahin sa kalibotan, apan gipili ko kamo gikan sa kalibotan, tungod niini ang kalibotan nagdumot kaninyo. Hinumdomi ang pulong nga akong giingon kaninyo, Ang ulipon dili labaw kay sa iyang agalon. Kon sila naglutos kanako, sila magalutos usab kaninyo.” (Juan 15:18-21) Susama ang kahimtang karon. Kadaghanang tawo wala gihapon makasabot o magpabili sa atong matang sa pagsimba. Ang uban manaway, magbugalbugal, o—sumala sa gipasidaan ni Jesus—magdumot pa gani kanato. (Mateo 10:22) Kasagaran, kita gidaot pinaagi sa pagpakaylap ug sayop nga impormasyon ug propaganda diha sa mga balita. (Salmo 109:1-3) Oo, kitang tanan nag-atubang ug malisod nga mga kahimtang, ug ang uban kanato magsugod tingali sa pagkaluya. Sa unsang paagi kita makalahutay?

4. Asa kita mangitag tabang aron makalahutay?

⁴ Si Jehova motabang kanato. Ilalom sa pag-inspirar, ang salmista misulat: “Daghan ang mga katalagman sa matarong, apan si Jehova magaluwas kaniya gikan niining tanan.” (Salmo 34:19; 1 Corinto 10:13) Daghan kanato ang makapamatuod nga sa dihang kita bug-os nga mosalig kang Jehova, siya magahatag kanato sa kusog nga makalahutay sa bisan unsang kalisdanan. Ang atong gugma alang kaniya ug ang kalipay nga anaa sa atong atubangan motabang kanato sa pagbuntog sa kahigawad ug kahadlok. (Hebreohanon 12:2) Busa, atubangan sa mga kalisdanan, kita padayon nga mobarog nga malig-on.

Ang Pulong sa Diyos Nagpalig-on Kang Jeremias

5, 6. (a) Unsang mga panig-ingnan ang atong nabatonan bahin sa tinuod nga mga magsisimba nga nakalahutay? (b) Unsay reaksiyon ni Jeremias sa dihang gitawag siya aron mahimong manalagna?

⁵ Sa tibuok kasaysayan, ang matinumanong mga alagad ni Jehova nakakaplag ug kalipay bisan pa sa malisod nga mga kahimtang. Ang uban  nagkinabuhi panahon sa paghukom sa dihang gipadangat ni Jehova ang iyang kapungot sa mga dili matinumanon. Lakip sa maong matinumanong mga magsisimba mao si Jeremias ug pipila sa iyang mga katalirongan, maingon man ang unang-siglong mga Kristohanon. Ang maong makasaysayanhong mga pananglitan nasulat sa Bibliya aron sa pagdasig kanato, ug dako kitag makat-onan gikan sa pagtuon niana. (Roma 15:4) Pananglitan, tagda si Jeremias.

⁶ Sa bata pa, si Jeremias gitawag aron mag-alagad ingong manalagna sa Juda. Dili kadto sayon nga asaynment. Daghan ang nagsimba sa bakak nga mga diyos. Bisan tuod nagmatinumanon si Josias, nga maoy hari sa dihang si Jeremias nagsugod sa iyang ministeryo, ang tanang nagsunod nga mga hari maoy dili matinumanon, ug kadaghanan niadtong dunay kaakohan sa pagtudlo sa mga tawo—ang mga manalagna ug mga saserdote—wala magbayaw sa kamatuoran. (Jeremias 1:1, 2; 6:13; 23:11) Nan, unsay gibati ni Jeremias sa dihang gitawag siya ni Jehova aron mahimong manalagna? Nahadlok siya! (Jeremias 1:8, 17) Nahinumdoman ni Jeremias ang iyang reaksiyon sa sinugdanan: “Ako miingon: ‘Intawon, Oh Soberanong Ginoong Jehova! Ania, ako gayod dili mahibalo nga mosulti, kay ako usa ka bata lamang.’”—Jeremias 1:6.

7. Unsay reaksiyon sa mga tawo diha sa teritoryo ni Jeremias, ug unsay iyang reaksiyon?

⁷ Ang mga tawo sa teritoryo ni Jeremias kasagaran wala mosanong, ug subsob siyang nag-atubang ug grabeng pagsupak. Sa usa ka higayon gidapatan siya ni Pasur, nga usa ka saserdote, ug gibutang siya sa sepohan. Gitaho ni Jeremias kon unsay iyang gibati nianang panahona: “Ako miingon: ‘Dili na ako maghisgot kaniya [si Jehova], ug dili na ako mosulti diha sa iyang ngalan.’” Usahay basin mobati kag susama niana—nga gusto nang mohunong. Matikdi kon unsay nakatabang kang Jeremias sa paglahutay. Siya miingon: “Sa akong kasingkasing nahisama kini [pulong, o mensahe sa Diyos] sa nagdilaab nga kalayo nga natakpan sulod sa akong kabukogan; ug ako gikapoyan sa pagpinugong, ug wala ko na kini maagwanta.” (Jeremias 20:9) Ingon ba niana ang epekto sa mga pulong sa Diyos kanimo?

Ang mga Kauban ni Jeremias

8, 9. (a) Unsang kahuyangon ang gipasundayag ni manalagnang Uriyas, ug unsay resulta? (b) Nganong nahigawad si Baruk, ug sa unsang paagi siya natabangan?

⁸ Si Jeremias wala mag-inusara sa iyang buluhatong pagpanagna. Siya may mga kauban, ug lagmit gayod nga nakadasig sila kaniya. Apan, usahay ang iyang mga kauban wala molihok nga maalamon. Pananglitan, usa ka kaubang manalagna nga ginganlag Uriyas puliki sa pagpahayag ug mga pasidaan batok sa Jerusalem ug sa Juda “sumala sa tanang pulong ni Jeremias.” Apan, sa dihang si Haring Jehoiakim nagmando nga ipapatay si Uriyas, ang manalagna mikalagiw ngadto sa Ehipto tungod sa kahadlok. Wala kadto makaluwas kaniya. Ang mga tawo sa hari migukod kaniya, nagdakop kaniya, ug nagdala kaniya pagbalik ngadto sa Jerusalem, diin siya gipatay. Lagmit gayong nakurat niadto si Jeremias!—Jeremias 26:20-23.

⁹ Ang laing kauban ni Jeremias mao ang iyang sekretaryo nga si Baruk. Si Baruk maoy maayong tabang alang kang Jeremias, apan usa ka higayon niana ang iyang panglantaw wala na masentro  sa espirituwal nga mga butang. Siya misugod sa pagreklamo, nga nag-ingon: “Alaot ako karon, kay si Jehova nagdugang ug kaguol sa akong kasakit! Ako naluya tungod sa akong pagpanghupaw, ug walay dapit-pahulayan nga akong nakaplagan.” Si Baruk, kay nahigawad, medyo nawad-an na ug pagpabili sa espirituwal nga mga butang. Bisan pa niana, si Jehova malulotong naghatag kang Baruk ug maalamong tambag, ug siya gitul-id. Dayon gipasaligan siya nga siya makalabang-buhi sa kalaglagan sa Jerusalem. (Jeremias 45:1-5) Seguradong nadasig gayod si Jeremias sa dihang si Baruk naulian sa iyang espirituwal nga panimbang!

Gipaluyohan ni Jehova ang Iyang Manalagna

10. Unsang tabang ang gisaad ni Jehova kang Jeremias?

¹⁰ Labawng hinungdanon, wala talikdi ni Jehova si Jeremias. Iyang nasabtan kon unsay gibati sa iyang manalagna ug gihatagan siya sa kalig-on ug tabang nga iyang gikinahanglan. Pananglitan, sa sinugdanan sa ministeryo ni Jeremias sa dihang nagduhaduha siya sa iyang mga kuwalipikasyon, giingnan siya ni Jehova: “Ayaw kahadlok tungod sa ilang mga nawong, kay ‘ako nagauban kanimo sa pagluwas kanimo,’ mao ang giingon ni Jehova.” Unya, human ihatag ngadto sa iyang manalagna ang impormasyon bahin sa iyang asaynment, si Jehova miingon: “Sila makig-away gayod batok kanimo, apan sila dili makadaog batok kanimo, kay ‘ako magauban kanimo,’ mao ang giingon ni Jehova, ‘aron sa pagluwas kanimo.’” (Jeremias 1:8, 19) Pagkamakapahupay! Ug gituman ni Jehova ang iyang saad.

11. Sa unsang paagi nahibaloan nato nga gituman ni Jehova ang iyang gisaad nga tabang kang Jeremias?

¹¹ Busa, human ibutang sa sepohan ug human bugalbugali sa mga tawo, si Jeremias masaligong miingon: “Si Jehova nag-uban kanako sama sa usa nga makalilisang ang pagkagamhanan. Mao nga ang mga naglutos kanako mangapandol ug dili modaog. Sila maulawan pag-ayo.” (Jeremias  20:11) Sa ulahing katuigan sa dihang gisulayan pagpatay si Jeremias, si Jehova padayong nagauban kaniya, ug sama kang Baruk, si Jeremias nakalabang-buhi sa kalaglagan sa Jerusalem ingong tawong gawasnon, samtang ang iyang mga maglulutos ug kadtong wala manumbaling sa iyang mga pasidaan nangamatay o gibihag ngadto sa Babilonya.

12. Bisan pa sa mga hinungdan sa kahigawad, unsay angay natong ibutang sa hunahuna?

¹² Sama kang Jeremias, sa pagkakaron daghang Saksi ni Jehova ang nag-antos sa mga kasakit. Sa gihisgotan na ganina, ang uban niini gipahinabo sa atong mga pagkadili-hingpit, ang uban sa kagubot sa kalibotan, ug ang uban pa gipahinabo niadtong mga tawo nga supak sa atong buluhaton. Ang maong mga kasakit makapahigawad. Sama kang Jeremias, kita mahimong magsugod sa paghunahuna kon makapadayon pa ba kita. Sa pagkatinuod, makadahom kita nga mahigawad matag karon ug unya. Ang kahigawad magsulay sa kalalom sa atong gugma kang Jehova. Busa magmadeterminado kita nga dili tugotan ang kahigawad nga makapatalikod kanato gikan sa pag-alagad kang Jehova sama sa gibuhat ni Uriyas. Hinunoa, sundogon nato si Jeremias ug magmasaligon sa tabang ni Jehova.

Kon Unsaon Pagpakigbisog sa Kahigawad

13. Sa unsang paagi masundog nato ang mga panig-ingnan ni Jeremias ug David?

¹³ Si Jeremias kanunayng nakigsulti kang Jehova nga Diyos, nga nagsulti kaniya sa iyang kinasulorang mga pagbati ug nangayog kusog. Kana maoy maayong panig-ingnan nga sundon. Si David sa karaang panahon, kinsa midangop sa mao gihapong Tuboran sa kusog, misulat: “Patalinghogi ang akong mga pulong, Oh Jehova; sabta ang akong pagpanghupaw. Pamatia ang tingog sa akong pagtuaw alang sa tabang, Oh Hari ko ug Diyos ko, kay kanimo nagaampo ako.” (Salmo 5:1, 2) Ang inspiradong asoy sa kinabuhi ni David nagpakita nga sa makadaghan si Jehova misanong sa mga pag-ampo ni David alang sa tabang. (Salmo 18:1, 2; 21:1-5) Sa susamang paagi, sa dihang ang mga pagpit-os lisod nga antoson o ang atong mga problema morag dili mabuntog, makapahupay kaayo ang pagdangop kang Jehova diha sa pag-ampo ug pagsugid sa atong gibati ngadto kaniya. (Filipos 4:6, 7; 1 Tesalonica 5:16-18) Si Jehova dili gayod modumili sa pagpamati kanato. Hinunoa, siya nagpasalig kanato nga ‘siya may kahingawa kanato.’ (1 Pedro 5:6, 7) Apan, dili makataronganon ang pag-ampo kang Jehova ug dayon dili mamati sa iyang isulti, dili ba?

14. Unsay epekto sa mga pulong ni Jehova nganha kang Jeremias?

¹⁴ Sa unsang paagi si Jehova makigsulti kanato? Tagda pag-usab si Jeremias. Tungod kay si Jeremias maoy usa ka manalagna, si Jehova direktang nakigsulti kaniya. Gihubit ni Jeremias ang epekto sa mga pulong sa Diyos diha sa iyang kasingkasing: “Ang imong mga pulong nakaplagan, ug akong gikaon kini; ug kanako ang imong pulong nahimong kasadya ug pagmaya sa akong kasingkasing; kay ako gitawag sa imong ngalan, Oh Jehova nga Diyos sa mga panon.” (Jeremias 15:16) Oo, si Jeremias nalipay sa kamatuoran nga siya gitawag sa ngalan sa Diyos, ug ang Iyang mga pulong maoy bililhon alang sa manalagna. Busa, sama kang apostol Pablo, si Jeremias mahinamon nga nagmantala sa mensahe nga gipiyal kaniya.—Roma 1:15, 16.

15. Sa unsang paagi ikatisok nato ang mga pulong ni Jehova sa atong kasingkasing, ug unsang mga pagtimbangtimbang ang makapahimo kanatong determinado nga dili magpakahilom?

¹⁵ Si Jehova dili direktang makigsulti kang bisan kinsa karon. Apan, nabatonan nato ang mga pulong sa Diyos diha sa mga panid sa Bibliya. Busa, kon giisip natong seryoso ang atong pagtuon sa Bibliya ug namalandong pag-ayo sa atong nakat-onan, ang mga pulong sa Diyos mahimo usab nga “kasadya ug pagmaya” sa atong kasingkasing. Ug kita malipay nga gidala nato ang ngalan ni Jehova sa dihang atong ipaambit ang maong mga pulong ngadto sa uban. Dili gayod nato kalimtan ang kamatuoran nga walay laing tawo sa kalibotan karon nga nagmantala sa ngalan ni Jehova. Ang iyang mga Saksi lamang ang nagpahayag sa maayong balita sa natukod nang Gingharian sa Diyos ug nagtudlo sa mga maaghop kon sa unsang paagi mahimong mga tinun-an ni Jesu-Kristo. (Mateo 28:19, 20) Bulahan gayod kita! Tungod sa mahigugmaong gipiyal ni Jehova kanato, magpakahilom ba lamang kita?

 Bantayan Nato ang Atong mga Pakig-uban

16, 17. Unsay panglantaw ni Jeremias sa mga pakig-uban, ug sa unsang paagi masundog nato siya?

¹⁶ Dunay dugang gisulti si Jeremias nga nakatabang kaniya nga magmaisogon. Siya miingon: “Ako wala molingkod diha sa suod nga pundok niadtong nagpasiaw ug misugod sa pagsadya. Tungod sa imong kamot ako nag-inusara sa paglingkod, kay gipuno mo man ako sa mahukmanong pagsaway.” (Jeremias 15:17) Mas gusto pa ni Jeremias nga mag-inusara kay sa maimpluwensiyahan sa daotang mga kauban. Lantawon usab nato karon ang mga butang sa samang paagi. Dili gayod nato kalimtan ang pasidaan ni Pablo nga “ang daotang pakig-uban makadaot sa mapuslanong pamatasan,” bisan mapuslanong mga batasan nga atong nabatonan sulod na sa daghang tuig.—1 Corinto 15:33.

¹⁷ Tungod sa daotang mga kauban, mahugawan ang atong hunahuna sa espiritu sa kalibotan. (1 Corinto 2:12; Efeso 2:2; Santiago 4:4) Nan, bansayon nato ang atong mga gahom sa pagsabot aron maila ang makadaot nga mga kauban ug likayan sila sa bug-os. (Hebreohanon 5:14) Kon buhi pa si Pablo sa yuta karon, sa imong hunahuna unsay iyang isulti sa usa ka Kristohanon nga motan-aw ug imoral o mapintas nga mga salida o mapintas nga mga esport? Unsaon niya pagtambag ang usa ka igsoon nga nakig-uban sa mga dili-kaila diha sa Internet? Unsay iyang hunahuna sa usa ka Kristohanon nga mogugol ug daghang oras nga nagdulag mga dula sa video o nagtan-aw sa telebisyon apan walay maayong personal nga mga batasan sa pagtuon?—2 Corinto 6:14b; Efeso 5:3-5, 15, 16.

Pagpabilin Diha sa Espirituwal nga Paraiso

18. Unsay motabang kanato sa pagpabiling lig-on sa espirituwal?

¹⁸ Atong gipabilhan ang atong espirituwal nga paraiso. Wala gayoy susama niana sa kalibotan karon. Bisan ang mga dili-magtutuo mokomento bahin sa gugma, pagkamahunahunaon, ug kalulot nga nabatonan sa mga Kristohanon alang sa usag usa. (Efeso 4:31, 32) Bisan pa niana, labi na kay sukad masukad, kita kinahanglang makigbisog sa kahigawad. Ang maayong pakig-uban, pag-ampo, ug maayong mga batasan sa pagtuon makatabang kanato sa pagpabiling lig-on sa espirituwal. Kini magpalig-on kanato sa pag-atubang sa bisan unsang pagsulay uban ang bug-os nga pagsalig kang Jehova.—2 Corinto 4:7, 8.

19, 20. (a) Unsay motabang kanato sa paglahutay? (b) Kang kinsa gitumong ang sunod nga artikulo, ug kinsa ang maikag usab niini?

¹⁹ Dili gayod kita mahadlok o mokompromiso sa atong pagtuo tungod sa mga panghulga niadtong nagdumot sa atong mensahe sa Bibliya. Sama sa mga kaaway nga naglutos kang Jeremias, kadtong nakig-away kanato nakig-away sa Diyos. Sila dili molampos. Si Jehova nga mas lig-on pa kay sa atong mga kaaway, nag-ingon: “Laom kang Jehova; magmaisogon ka ug lig-ona ang imong kasingkasing. Oo, laom kang Jehova.” (Salmo 27:14) Nga ang paglaom kang Jehova dulot nga nakagamot sa atong kasingkasing, hinaot magmadeterminado kita nga dili mohunong sa pagbuhat kon unsay maayo. Hinaot kita magmasaligon nga, sama kang Jeremias ug Baruk, kita magaani kon kita dili molunga.—Galacia 6:9.

²⁰ Daghang Kristohanon ang kanunayng nakigbisog sa kahigawad. Hinunoa, ang mga batan-on nag-atubang ug linaing mga suliran. Apan sila adunay maayo usab kaayong mga kahigayonan. Ang sunod nga artikulo gitumong sa mga batan-on sa atong taliwala. Maikag usab niini ang mga ginikanan ug ang tanang dedikadong mga hamtong sa kongregasyon kinsa pinaagi sa pulong, buhat, ug pinaagi sa direktang pagpaluyo makatabang sa mga batan-on diha sa kongregasyon.

Unsaon Nimo Pagtubag?

• Nganong makadahom kita ug makapahigawad nga mga sirkumstansiya, ug kang kinsa kita mangayog tabang?

• Sa unsang paagi gidaog ni Jeremias ang kahigawad bisan pa sa malisod nga asaynment?

• Unsay ‘makapamaya ug makapasadya’ sa atong kasingkasing bisag anaa sa kalisod?

[Mga Pangutana sa Pagtuon]

[Hulagway sa panid 9]

Si Jeremias nagtuo nga bata pa kaayo siya ug kulang ug kasinatian nga mahimong manalagna

[Hulagway sa panid 10]

Bisan sa dihang gilutos, si Jeremias nahibalo nga si Jehova nagauban kaniya “sama sa usa nga makalilisang ang pagkagamhanan”