Napalig-on Ka ba sa Pulong sa Diyos?

SA DIHANG nag-atubang ug mga suliran, unsaon nimo kini pagsagubang? Sa kahimtang ni Jesus, ang paghinumdom ug usa ka tukmang teksto nakatabang kaniya sa pag-atubang sa mga hagit ni Satanas. (Mateo 4:1-11) Sa samang paagi, sa dihang si Haring David nasugamak sa personal nga mga pagsulay, siya napalig-on sa Pulong sa Diyos. Siya miingon: “Sa dihang ang makapatugaw nga mga hunahuna midaghan sa akong kahiladman, ang imong mga paghupay mihapohap sa akong kalag.”—Salmo 94:19.

Sa samang paagi, ang paghinumdom ug usa ka paboritong teksto makapahupay o makapalig-on kanato sa dihang kita moatubang ug mga suliran. Pananglitan, si Rex, nga karon 89 anyos na, maoy usa ka bug-os-panahong ebanghelisador sukad pa sa 1931. Bisan pa niana, siya miingon: “Sagad mobati ako nga dili takos sa dihang ako hatagan ug usa ka espesyal nga asaynment sa ministeryo.” Giunsa niya pag-atubang kadto? “Akong hinumdoman ang paborito nakong teksto, ang Proverbio 3:5, nga nag-ingon: ‘Salig kang Jehova sa bug-os mong kasingkasing ug ayaw pagsalig sa kaugalingon mong pagsabot.’ Ang paghinumdom ug pagpadapat ning maong teksto nakatabang kanako sa pagtuman sa akong mga asaynment nga malamposon.”

Bisan ang mga bata makapahimulos sa pagbaton ug usa ka paboritong teksto. Ang sayis anyos nga si Jack miingon nga ang iyang paboritong teksto mao ang Mateo 24:14. Kining tekstoha nagdasig kaniya sa pagsangyaw uban sa iyang mga ginikanan. Siya miingon: “Gusto kong mosangyaw kada Sabado uban sa akong mama, papa, ug magulang nga babaye.”

Sama kang Jesus, moatubang ka ba usahay ug direktang mga hagit sa imong pagtuo? Nan ang Filipos 4:13 mahimong usa sa imong paboritong mga teksto. Sama kang Haring David, nag-antos ka bag “makapatugaw nga mga hunahuna”? Nan ang paghinumdom sa Filipos 4:6, 7 makatabang nimo sa pagsagubang. Mabalaka ka ba usahay nga ang imong pag-alagad sa Diyos walay kapuslanan? Nan ang paghinumdom sa 1 Corinto 15:58 mopalig-on kanimo.

Pinaagi sa pagmemorya ug tukmang mga teksto, atong matugotan ang Pulong sa Diyos sa paggahom sa atong kinabuhi. (Hebreohanon 4:12) Ang maong paboritong mga teksto mohatag kanatog kalig-on ug kahupayan.—Roma 15:4.