Mapalipay Nimo ang Diyos

MATANDOG ba gayod nato ang pagbati sa Diyos? Mobati ba ug kalipay ang Diyos? Ang uban nag-ingon nga ang Diyos maoy usa lamang ka puwersa. Mobati bag kalipay ang usa ka dili-persona nga puwersa? Dili gayod. Apan, tagda kon unsay giingon sa Bibliya bahin sa Diyos.

“Ang Diyos maoy Espiritu,” matod pa ni Jesu-Kristo. (Juan 4:24) Ang usa ka espiritu maoy usa ka matang sa kinabuhi nga lahi nianang iya sa mga tawo. Bisan tuod dili makita sa tawhanong mga mata, ang usa ka espiritu adunay lawas—usa nga “espirituhanon.” (1 Corinto 15:44; Juan 1:18) Naggamit ug mahulagwayong mga sinultihan, ang Bibliya naghisgot pa gani sa Diyos ingong dunay mga mata, dalunggan, kamot, ug uban pa. a Ang Diyos usab adunay ngalan—Jehova. (Salmo 83:18) Busa, ang Diyos diha sa Bibliya maoy usa ka espirituhanong persona. (Hebreohanon 9:24) “Siya ang Diyos nga buhi ug ang Hari hangtod sa panahong walay tino.”—Jeremias 10:10.

Ingong tinuod nga buhing persona, si Jehova makahunahuna ug makalihok. Siya makapasundayag ug mga hiyas ug mga pagbati, mga gusto ug dili gusto. Gani, ang Bibliya naundan ug daghang pamulong nga nagbutyag kon unsay makapahimuot o dili-makapahimuot kaniya. Samtang ang hinimog-tawo nga mga diyos ug mga idolo nagbanaag lamang sa mga kinaiya o mga hiyas sa mga tawo nga nagmugna kanila, ang labing-gamhanang Diyos, si Jehova, mao gayod ang Tinubdan sa mga emosyon nga iyang gibutang diha sa mga tawo.—Genesis 1:27; Isaias 44:7-11.

Walay duhaduha nga si Jehova mao ang “malipayong Diyos.” (1 Timoteo 1:11) Siya dili lang malipay sa iyang mga linalang kondili malipay usab sa pagtuman sa iyang katuyoan. Pinaagi sa manalagna nga si Isaias, si Jehova nagpahayag: “Ang tanang butang nga akong gikahimut-an akong pagabuhaton . . . Akong gisulti gayod kini; akong ipadangat usab kini. Akong giumol kini, akong pagabuhaton usab kini.” (Isaias 46:9-11) Ang salmista miawit: “Si Jehova malipay sa iyang mga buhat.” (Salmo 104:31) Apan duna pay laing tinubdan sa kalipay ang Diyos. Siya nag-ingon: “Magmaalamon, anak ko, ug lipaya ang akong kasingkasing.” (Proverbio 27:11) Hunahunaa lang kon unsay kahulogan niana—atong mapalipay ang Diyos!

Kon Unsaon Nato Paglipay ang Kasingkasing sa Diyos

Tagda kon sa unsang paagi ang ulo sa pamilya nga si Noe naglipay sa kasingkasing ni Jehova. Si Noe “nakakaplag ug pabor sa mga mata ni Jehova” tungod kay “siya walay-ikasaway taliwala sa iyang mga katalirongan.” Lahi gayod sa daotang katawhan niadtong panahona, ang pagtuo ug pagkamasinugtanon ni Noe nakapahimuot pag-ayo sa Diyos nga gikaingon nga “si Noe naglakaw uban sa matuod nga Diyos.” (Genesis 6:6, 8, 9, 22) “Tungod sa pagtuo si Noe . . . nagpakitag diyosnong kahadlok ug  nagtukod ug arka aron sa pagluwas sa iyang panimalay.” (Hebreohanon 11:7) Si Jehova nahimuot kang Noe ug nagpanalangin kaniya ug sa iyang pamilya pinaagi sa pagluwas kanila gikan niadtong malisod nga yugto sa tawhanong kasaysayan.

Ang patriarka nga si Abraham usab nahibalo pag-ayo sa mga pagbati ni Jehova. Ang iyang lalom nga kahibalo bahin sa panghunahuna sa Diyos tin-aw nga nadayag sa dihang gipahibalo siya ni Jehova nga ang Sodoma ug Gomora pagalaglagon tungod sa ilang kahiwian. Nailhan pag-ayo ni Abraham si Jehova nga siya nakahinapos nga imposible nga patyon sa Diyos ang matarong nga tawo uban sa daotan. (Genesis 18:17-33) Mga tuig sa ulahi, agig pagsunod sa pagtultol sa Diyos, si Abraham “sama ug naghalad na kang Isaac,” tungod kay “giisip niya nga ang Diyos makahimo sa pagbangon kaniya bisan gikan sa mga patay.” (Hebreohanon 11:17-19; Genesis 22:1-18) Si Abraham mipahiuyon gayod sa mga pagbati sa Diyos ug nagpasundayag ug lig-ong pagtuo ug pagkamasinugtanon nga “siya gitawag nga ‘higala ni Jehova.’”—Santiago 2:23.

Ang laing tawo nga naningkamot sa paglipay sa kasingkasing sa Diyos mao si Haring David sa karaang Israel. Bahin kaniya, si Jehova nag-ingon: “Nakaplagan ko si David nga anak ni Jese, usa ka tawo nga gikahimut-an sa akong kasingkasing, nga maoy mobuhat sa tanang butang nga akong ginatinguha.” (Buhat 13:22) Sa wala pa makigharong sa higante nga si Goliat, si David bug-os nga misalig sa Diyos ug giingnan ang Israelinhon nga Haring Saul: “Si Jehova, nga nagluwas kanako gikan sa kuyamas sa leyon ug gikan sa kuyamas sa oso, siya mao ang magluwas kanako gikan sa kamot niini nga Filistehanon.” Gipanalanginan ni Jehova ang pagsalig ni David Kaniya, nga nagpaarang kang David sa pagpatay kang Goliat. (1 Samuel 17:37, 45-54) Gusto ni David nga dili lamang ang iyang mga lihok kondili ‘ang mga pulong usab sa iyang baba ug ang pagpamalandong sa iyang kasingkasing mahimong kahimut-anan sa atubangan ni Jehova.’—Salmo 19:14.

Komosta kita? Sa unsang paagi nato mapahimut-an si Jehova? Kon mas sensitibo kita sa mga pagbati sa Diyos, mas alisto kita kon unsay atong mahimo aron malipay ang kasingkasing sa Diyos. Nan, samtang atong basahon ang Bibliya, hinungdanon nga maningkamot kita sa pagkat-on bahin sa mga pagbati sa Diyos aron kita ‘mapuno sa tukmang kahibalo sa iyang kabubut-on diha sa tanang kaalam ug espirituwal nga pagsabot, aron makalakaw nga takos kang Jehova aron bug-os nga makapahimuot kaniya.’ (Colosas 1:9, 10) Sa baylo, ang kahibalo motabang kanato sa pagbaton ug pagtuo. Hinungdanon kini tungod kay “kon walay pagtuo imposible ang pagpahimuot [sa Diyos].” (Hebreohanon 11:6) Oo, pinaagi sa pagpaningkamot sa pagpalig-on sa atong pagtuo ug pagpahiuyon sa atong kinabuhi sa kabubut-on ni Jehova, atong malipay ang iyang kasingkasing. Sa samang panahon, kita kinahanglang mag-amping nga dili pasakitan si Jehova.

Ayaw Pasakiti ang Diyos

Ang usa ka pananglitan kon sa unsang paagi masakitan si Jehova makita diha sa asoy bahin sa mga adlaw ni Noe. Niadtong panahona, “ang yuta napuno sa kapintasan. Busa nakita sa Diyos ang yuta ug, tan-awa! kini nadaot, tungod kay ang tanang unod nagdaot sa dalan niini ibabaw sa yuta.” Unsay gibati sa Diyos sa dihang iyang gisusi ang kahiwian ug kapintasan? “Si Jehova nagbasol nga iyang gibuhat ang mga tawo sa yuta,” nag-ingon ang Bibliya, “ug siya nasakitan diha sa iyang kasingkasing.” (Genesis 6:5, 6, 11, 12) Nagbasol ang Diyos sa pagkaagi nga ang panggawi sa mga tawo nahimong daotan kaayo nga nausab ang iyang tinamdan maylabot niadtong daotang kaliwatan sa wala pa ang Lunop. Tungod sa iyang kasuko sa ilang pagkadaotan, nausab ang tinamdan sa Diyos gikan sa pagkahimong Maglalalang sa mga tawo ngadto sa usa ka tiglaglag kanila.

Nagmagul-anon usab si Jehova sa dihang ang iyang kaugalingong katawhan, ang karaang nasod sa Israel, kanunayng nagbalewala sa  iyang mga pagbati ug sa iyang mahigugmaong pagtultol. Ang salmista mimulo: “Pagkasubsob ang pagsukol nila batok kaniya didto sa kamingawan, ilang gipasakitan siya didto sa desyerto! Ug sublisubli nga ilang gisulayan ang Diyos, ug ilang gipasakitan bisan ang Balaang Usa sa Israel.” Bisan pa niana, “siya maluluy-on; siya nagtabon sa sayop ug wala manglaglag. Ug sa daghang higayon gipahilayo niya ang iyang kasuko, ug wala niya pukawa ang bug-os niyang kaaligutgot.” (Salmo 78:38-41) Bisan tuod ang rebelyosong mga Israelinhon makataronganong nag-antos sa sangpotanan sa kaugalingon nilang kasal-anan, ang Bibliya nagtug-an kanato nga “sa panahon sa tanan nilang kasakit kadto nakapasakit [sa Diyos].”—Isaias 63:9.

Bisan pa sa daghang pamatuod sa malumong pagkamabination sa Diyos alang kanila, ang katawhan sa Israel “nagpadayon . . . sa pagbugalbugal sa mga mensahero sa matuod nga Diyos ug nagtamay sa iyang mga pulong ug nagyagayaga sa iyang mga manalagna, hangtod nga ang kaaligutgot ni Jehova midangat batok sa iyang katawhan, hangtod nga wala nay pagkaayo.” (2 Cronicas 36:16) Sa ngadtongadto, ang ilang matig-a nga batasan sa pagrebelde “nagpasakit sa iyang balaang espiritu” hangtod sa punto nga ilang nawala ang pabor ni Jehova. (Isaias 63:10) Unsay resulta? Ang Diyos makataronganong nagkuha sa iyang panalipod, ug ang kalamidad midangat kanila sa dihang ang mga taga-Babilonya nag-ilog sa Juda ug naglaglag sa Jerusalem. (2 Cronicas 36:17-21) Pagkamakapasubo gayod sa dihang ang mga tawo mopili sa pagsunod sa makasasalang paagi sa kinabuhi nga makapasuko ug makapaguol sa ilang Maglalalang!

Ang Bibliya naghatag ug pamatuod nga masakitan pag-ayo ang Diyos sa dili-matarong nga panggawi. (Salmo 78:41) Ang mga butang nga makapasuko—dulumtanan pa gani—sa Diyos naglakip sa garbo, pagpamakak, pagpatay, salamangka, pagpanag-an, pagsimba sa katigulangan, law-ay nga moralidad, homoseksuwalidad, pagkadili-matinud-anon sa kaminyoon, pag-unay, ug pagdaogdaog sa mga kabos.—Levitico 18:9-29; 19:29; Deuteronomio 18:9-12; Proverbio 6:16-19; Jeremias 7:5-7; Malaquias 2:14-16.

Unsay pagbati ni Jehova bahin sa idolatriya? Ang Exodo 20:4, 5 nag-ingon: “Dili ka magbuhat alang kanimo ug usa ka linilok nga larawan o usa ka dagway nga sama sa bisan unsa nga anaa sa kalangitan sa itaas o anaa sa yuta sa ubos o anaa sa mga tubig ilalom sa yuta. Dili ka magyukbo kanila ni maaghat sa pag-alagad kanila.” Ngano? Tungod kay ang usa ka idolo maoy ‘usa ka butang nga dulumtanan kang Jehova.’ (Deuteronomio 7:25, 26) Si apostol Juan nagpasidaan: “Minahal nga mga anak, pagbantay kamo gikan sa mga idolo.” (1 Juan 5:21) Ug si apostol Pablo misulat: “Akong mga hinigugma, kalagiw gikan sa idolatriya.”—1 Corinto 10:14.

Tinguhaa ang Pag-uyon sa Diyos

‘Ang pagpakigsuod sa Diyos anaa uban sa mga matul-id.’ Kadtong “mga walay-ikasaway sa ilang dalan makapahimuot kaniya.” (Proverbio 3:32; 11:20) Sa kasukwahi, kadtong magpadayon sa pagpasuko sa Diyos pinaagi sa pagbalewala o pagsalikway kanunay sa iyang matarong nga mga pagbati sa dili madugay makaagom sa iyang kasuko. (2 Tesalonica 1:6-10) Sa pagkatinuod, sa dili madugay iyang taposon ang tanang pagkadaotan nga kaylap kaayo karong adlawa.—Salmo 37:9-11; Sofonias 2:2, 3.

Apan, gitin-aw pag-ayo sa Bibliya nga si Jehova “wala magtinguha nga dunay malaglag apan nagtinguha nga ang tanan makakab-ot sa paghinulsol.” (2 Pedro 3:9) Palabihon gayod niya ang pagpasundayag sa iyang gugma alang sa matarong nga mga tawo nga nahigugma kaniya inay sa pagpahamtang sa iyang kasuko niadtong mipili nga magpabiling daotan. Si Jehova malipay, “dili sa kamatayon sa tawong daotan, apan nga mobiya ang daotan gikan sa iyang dalan ug mabuhi.”—Ezequiel 33:11.

 Busa walay usa nga kinahanglang mahimong tumong sa kasuko ni Jehova. “Si Jehova malumo kaayo sa pagmahal ug maluluy-on.” (Santiago 5:11) Uban ang bug-os nga pagsalig sa pagbati sa Diyos, ikaw ‘makatugyan kaniya sa tanan mong mga kabalaka, tungod kay siya may kahingawa kanimo.’ (1 Pedro 5:7) Magmasaligon nga kadtong maglipay sa kasingkasing sa Diyos adunay kahibulongang kahigayonan sa pagpahimulos sa iyang pag-uyon ug panaghigala. Busa, mas dinalian karon kay sukad masukad nga ‘padayong tinoon kon unsa ang dalawaton sa Ginoo.’—Efeso 5:10.

Kahibulongan gayod nga ang Diyos tungod sa iyang dili-takos nga kalulot nagbutyag sa iyang mahimayaong mga hiyas ug mga pagbati! Ug ikaw makapalipay sa iyang kasingkasing. Kon buot nimong himoon kana, gidasig ka namo sa pagkontak sa mga Saksi ni Jehova sa imong dapit. Malipay sila sa pagpakita kanimo kon unsay ilang nakaplagan nga praktikal ug realistikanhon nga himoon diha sa ilang pagpaningkamot sa pagpahimuot sa Diyos.

[Footnote]

[Kahon sa panid 7]

Nganong Naggamit man ang Bibliya ug Tawhanong mga Termino sa Paghubit sa Diyos?

Sanglit “ang Diyos maoy Espiritu,” kita dili makakita kaniya pinaagi sa atong pisikal nga mga mata. (Juan 4:24) Busa ang Bibliya naggamit ug mahulagwayong mga sinultihan, sama sa mga simile, metaphor, ug anthropomorphism aron matabangan kita sa pagsabot sa gahom, kahalangdon, ug mga kalihokan sa Diyos. Ang anthropomorphism (Grego, “dagway sa tawo”) mao ang paghatag ug tawhanong mga hiyas ngadto sa usa ka dili-tawhanon nga butang. Busa bisan tuod wala kita mahibalo kon sama sa unsa ang espirituhanong lawas sa Diyos, ang Bibliya nag-ingon nga ang Diyos dunay mga mata, dalunggan, kamot, bukton, tudlo, tiil, ug kasingkasing.—Genesis 8:21; Exodo 3:20; 31:18; Job 40:9; Salmo 18:9; 34:15.

Ang maong mahubitong pinulongan wala magkahulogan nga ang espirituhanong lawas sa Diyos dunay susamang mga sangkap sa lawas nga iya sa tawo. Ang mga anthropomorphism dili gayod sabton nga literal. Kini maoy tabang lamang aron mas masabtan sa mga tawo ang Diyos. Kon wala ang maong mahulagwayong mga sinultihan, lisod o imposible gayod nga masabtan sa mga tawo ang bisan unsang kahubitan bahin sa Diyos. Apan, wala kana magpasabot nga ang personalidad ni Jehova nga Diyos gimugna lang sa mga tawo. Ang Bibliya tin-awng nagsaysay nga ang tawo gilalang sumala sa larawan sa Diyos—dili kay ang Diyos sumala sa larawan sa tawo. (Genesis 1:27) Tungod kay ang mga magsusulat sa Bibliya “inspirado sa Diyos,” ang ilang kahubitan sa personalidad sa Diyos sa pagkatinuod maoy kahubitan sa Diyos sa iyang kaugalingong mga hiyas—ang samang mga hiyas nga iyang gibutang nganha sa iyang tawhanong kalalangan diha sa nagkalainlaing sukod. (2 Timoteo 3:16, 17) Inay mga hiyas sa tawo nga gihatag ngadto sa Diyos, kini gayod maoy mga hiyas sa Diyos nga iyang gihatag ngadto sa tawo.

[Hulagway sa panid 4]

Si Noe nakakaplag ug pabor sa mga mata sa Diyos

[Hulagway sa panid 5]

Si Abraham mipahiuyon sa mga pagbati sa Diyos

[Hulagway sa panid 6]

Si David misalig sa bug-os kang Jehova

[Hulagway sa panid 7]

Samtang imong basahon ang Bibliya, imong makat-onan kon unsaon paglipay ang Diyos

[Picture Credit Line sa panid 4]

Courtesy of Anglo-Australian Observatory, photograph by David Malin