Ang Imo Bang Kahimtang Maoy Nagkontrolar sa Imong Kinabuhi?

ANG makapaguol nga mga kahimtang ug mga problema maoy ordinaryo na niining “malisod nga mga panahon.” (2 Timoteo 3:1) Tingali ang ubang mga problema temporaryo lang ug busa mawala ra sa dili madugay. Ang uban molungtad ug mga bulan o mga tuig pa gani. Tungod niana, daghan ang mibati sama sa salmista nga si David, kinsa mituaw kang Jehova: “Ang mga kasakit sa akong kasingkasing midaghan; Oh pagawasa ako gikan sa akong mga kapit-os.”—Salmo 25:17.

Nakigbisog ka ba sa bug-at kaayong mga problema? Kon mao, makakaplag kag tabang ug pagdasig diha sa Bibliya. Atong tagdon ang kinabuhi sa duha ka matinumanong mga alagad ni Jehova kinsa malamposong nakasagubang sa mga kalisdanan: si Jose ug David. Pinaagi sa pagsusi kon unsay ilang reaksiyon sa kasakitan, kita makakat-on ug praktikal nga mga leksiyon nga motabang kanato sa pagsagubang sa susamang mga suliran karon.

Nag-atubang ug Grabeng mga Suliran

Sa dihang siya 17 anyos na, si Jose adunay grabeng problema sulod sa kaugalingon niyang pamilya. Nakita sa iyang magulang nga mga lalaki nga si Jacob, ang ilang amahan, ‘nahigugma kang Jose labaw sa tanan niyang mga igsoong lalaki.’ Tungod niana, “sila nagsugod sa pagdumot kaniya, ug sila wala makahimo sa pagsulti kaniya nga madinaiton.” (Genesis 37:4) Atong mahanduraw ang kabalaka ug kahigwaos nga gipahinabo ning maong kahimtang ngadto kang Jose. Sa kadugayan, ang pagdumot sa mga igsoon ni Jose misamot pag-ayo nga ilang gibaligya siya sa pagkaulipon.—Genesis 37:26-33.

Samtang usa ka ulipon didto sa Ehipto, si Jose kinahanglang makigbisog sa imoral nga mga tinguha sa asawa sa iyang agalon. Kay nasuko nga gisalikway, ang asawa binakak nga nag-akusar nga si Jose misulay sa paglugos kaniya. Si Jose ‘gipabilanggo,’ diin “pinaagi sa mga talikala gipasakitan nila ang iyang mga tiil, gibutang sa talikala nga puthaw ang iyang kalag.” (Genesis 39:7-20; Salmo 105:17, 18) Pagkadakong pagsulay gayod kini! Sulod sa mga 13 ka tuig, si Jose nahimong ulipon o usa ka binilanggo tungod sa mga inhustisya nga gipahamtang kaniya sa uban, lakip na sa mga membro sa kaugalingon niyang pamilya.—Genesis 37:2; 41:46.

 Si David sa karaang Israel nasugamak usab sa mga pagsulay sa batan-on pa. Sulod sa daghang tuig, napugos siya sa pagkinabuhi ingong kagiw, nga gipangita ni Haring Saul samag usa ka mananap. Nameligro kanunay ang kinabuhi ni David. Sa usa ka higayon, siya miadto kang Ahimelek nga saserdote aron mangayog pagkaon. (1 Samuel 21:1-7) Sa pagkahibalo nga gitabangan ni Ahimelek si David, gimando ni Saul nga ipapatay dili lang si Ahimelek kondili ang tanang saserdote ug ang ilang mga pamilya usab. (1 Samuel 22:12-19) Mahanduraw ba nimo ang kaguol nga gibati ni David nga sa dili direktang paagi siya maoy nakaingon sa maong trahedya?

Hunahunaa lang ang mga tuig sa kasakit ug pagmaltratar nga giantos ni Jose ug David. Pinaagi sa pagsusi kon sa unsang paagi ilang nasagubang ang ilang malisod nga kahimtang, kita makakat-on ug bililhong mga leksiyon. Atong tagdon ang tulo ka paagi diin kining mga tawhana takos sundogon.

Palabya ang Kayugot ug Pagdumot

Una, kining mga tawhana wala magpalit-ag sa kayugot ug pagdumot. Samtang si Jose didto sa bilanggoan, dali ra unta siyang maghambin ug kayugot tungod sa pagluib sa iyang mga igsoon, tingali maghunahuna sa pagpanimalos kon makita niya sila pag-usab. Sa unsang paagi atong nahibaloan nga gisuklan ni Jose ang maong makadaot nga panghunahuna? Tagda kon unsay iyang reaksiyon sa dihang diha na unta siyay higayon sa pagpanimalos sa iyang mga igsoon nga nangadto sa Ehipto aron sa pagpalit ug lugas. Ang asoy nag-ingon: ‘Si Jose mipahilayo gikan kanila ug mihilak. . . . Human niana si Jose mimando, ug ang iyang mga alagad nagpuno sa mga sudlanan sa iyang mga igsoon ug mga lugas. Ingon man, kinahanglan nilang iuli ang salapi sa mga lalaki nganha sa sako sa matag usa ug maghatag kanilag mga balon alang sa panaw.’ Sa ulahi, sa dihang gipalakaw niya ang iyang mga igsoon aron dad-on ang ilang amahan ngadto sa Ehipto, gidasig sila ni Jose niining mga pulonga: “Ayaw pagkalagot sa usag usa diha sa dalan.” Sa pulong ug sa buhat, gipamatud-an ni Jose nga wala niya tugoti ang pagdumot ug kayugot nga modaot sa iyang kinabuhi.—Genesis 42:24, 25; 45:24.

Sa samang paagi, si David wala maghambin ug kayugot kang Haring Saul. Sa duha ka higayon si David aduna untay kahigayonan sa pagpatay kang Saul. Bisan pa niana, sa dihang ang iyang mga tawo nag-awhag kaniya sa paghimo niana, si David miingon: “Halayo ra alang kanako, gikan sa panglantaw ni Jehova, nga buhaton ko kining butanga sa akong ginoo, ang dinihogan ni Jehova, pinaagi sa pagbakyaw sa akong kamot batok kaniya, kay siya mao ang dinihogan ni Jehova.” Gitugyan ni David ang maong butang ngadto kang Jehova, nga nagsulti sa iyang mga tawo: “Ingon nga si Jehova buhi, si Jehova ang maghampak kaniya; o ang iyang adlaw moabot ug siya mamatay, o moadto siya sa gubat, ug siya malaglag.” Sa ulahi, nagkomposo pa gani si David ug usa ka awit sa pagbangotan alang sa kamatayon ni Saul ug sa anak ni Saul nga si Jonatan. Sama kang Jose, wala tugoti ni David ang iyang kaugalingon nga madaog sa kayugot.—1 Samuel 24:3-6; 26:7-13; 2 Samuel 1:17-27.

 Maghambin ba kitag kayugot ug pagdumot kon may inhustisya nga makapasakit kanato? Dali ra kining mahitabo. Kon atong tugotan ang atong mga emosyon sa pagdominar kanato, ang resulta mahimong mas makadaot pa kanato kay sa inhustisya mismo. (Efeso 4:26, 27) Bisan tuod ug gamay o wala kitay kontrol kon unsay buhaton sa uban, atong makontrolar ang atong reaksiyon. Dali rang palabyon ang kayugot ug pagdumot kon kita nagtuo nga husayon ra ni Jehova ang mga butang sa iyang gitakdang panahon.—Roma 12:17-19.

Buhata ang Imong Maarangan sa Pagpasibo sa Imong Kahimtang

Ang ikaduhang leksiyon nga atong makat-onan mao nga dili nato tugotan ang atong kahimtang nga makaparalisar sa atong kinabuhi. Kita tingali puliki kaayo sa mga butang nga dili nato mahimo nga tungod niana dili na nato makita ang mga butang nga atong mahimo. Sa ingon, ang atong kahimtang nagsugod na sa pagkontrolar kanato. Ingon unta niini ang mahitabo kang Jose. Apan, iyang gipili ang paghimo sa iyang maarangan sa pagpasibo sa iyang kahimtang. Samtang nag-alagad ingong ulipon, si Jose “padayong nakakaplag ug pabor diha sa mga mata [sa iyang agalon] ug padayong nagsilbi kaniya, mao nga siya nagtudlo kaniya nga tagdumala sa iyang balay.” Gihimo usab kana ni Jose samtang didto sa bilanggoan. Tungod sa panalangin ni Jehova ug sa kakugihan ni Jose, “ang pangulong opisyal sa bilanggoan nagtugyan ngadto sa kamot ni Jose sa tanang binilanggo nga diha sa bilanggoan; ug ang tanan nga ilang gibuhat didto siya mao ang nagpabuhat niini.”—Genesis 39:4, 21-23.

Sulod sa mga tuig nga si David nagkinabuhi ingong kagiw, siya usab mihimo sa iyang maarangan sa pagpasibo sa iyang kahimtang. Samtang nagpuyo didto sa kamingawan sa Paran, siya ug ang iyang mga tawo nanalipod sa mga panon sa kahayopan ni Nabal batok sa nanulong nga mga bandido. “Sila nahimong usa ka paril libot kanamo sa magabii ug sa maadlaw,” matod pa sa usa sa mga magbalantay sa karnero ni Nabal. (1 Samuel 25:16) Sa ulahi, panahon sa iyang pag-estar sa Ziklag, gisulong ni David ang mga lungsod nga gipanag-iya sa mga kaaway sa Israel sa habagatan, busa nakuha ang mga utlanan sa Juda.—1 Samuel 27:8; 1 Cronicas 12:20-22.

Kinahanglan ba kitang mohimog dugang paningkamot aron atong mahimo ang atong maarangan sa pagpasibo sa atong kahimtang? Bisan tuod dakong hagit ang paghimo niana, kita magmalamposon. Sa pagpalandong sa iyang kinabuhi, si apostol Pablo misulat: “Akong nakat-onan, bisan unsa man ang akong kahimtang, nga magmakontento. . . . Sa tanang butang ug sa tanang kahimtang nakat-onan ko ang sekreto kon unsaon pagkabusog ug kon unsaon pagkagutom, kon unsaon sa pagkinabuhi sa kadagaya ug kon unsaon sa pag-antos sa kawalad-on.” Sa unsang paagi naugmad ni Pablo kining matanga sa panglantaw sa kinabuhi? Pinaagi sa iyang makanunayong pagsalig kang Jehova. Siya miangkon: “Sa tanang butang ako adunay kusog pinaagi kaniya nga naghatag ug gahom kanako.”—Filipos 4:11-13.

Paghulat Kang Jehova

Ang ikatulong leksiyon mao nga imbes mogamit ug dili-kasulatanhong mga paagi sa pag-usab sa atong kahimtang, kita angayng maghulat kang Jehova. Ang tinun-an nga si Santiago misulat: “Ipatapos sa pagkamainantoson ang buluhaton niini, aron nga kamo mahimong bug-os ug maayo sa tanang bahin, nga dili makulangan sa bisan unsa.” (Santiago 1:4) Angayng tugotan ang pagkamainantoson sa ‘pagtapos sa buluhaton niini’ pinaagi sa pag-antos nato sa pagsulay hangtod sa kataposan nga dili mogamit ug dili-kasulatanhong mga paagi sa pagtapos dayon niini. Niana ang atong pagtuo masulayan ug malunsay, ug ang nagpalig-ong gahom niini madayag. Si Jose ug David aduna niining matanga sa pagkamainantoson. Wala sila mosulay sa paghimog solusyon nga makapasuko kang Jehova. Hinunoa, naningkamot sila sa paghimo sa ilang maarangan sa pagpasibo sa ilang kahimtang. Sila naghulat kang Jehova, ug pagkadakong panalangin ang ilang nadawat gumikan sa pagbuhat niana! Gigamit sila ni Jehova sa pagluwas ug pagtultol sa iyang katawhan.—Genesis 41:39-41; 45:5; 2 Samuel 5:4, 5.

Kita usab mahimong mag-atubang ug mga kahimtang diin kita mahimong matental sa pagpangitag dili-kasulatanhong mga solusyon. Pananglitan, nahigawad ka ba tungod kay wala ka pa makakaplag ug angayang kapikas sa kaminyoon? Kon mao, likayi ang bisan unsang tentasyon sa pagsupak sa sugo ni Jehova sa pagminyo “lamang diha sa Ginoo.” (1 Corinto 7:39) Nagsagubang ka bag mga problema sa imong kaminyoon?  Inay magpadala sa espiritu sa kalibotan nga nagpasiugda ug panagbulag ug diborsiyo, paningkamoti ninyong masulbad ang mga kalisdanan. (Malaquias 2:16; Efeso 5:21-33) Naglisod ka ba sa pag-atiman sa imong pamilya tungod sa imong kakabos? Ang paghulat kang Jehova naglakip sa paglikay sa kuwestiyonable o ilegal nga mga kalihokan aron makakitag kuwarta. (Salmo 37:25; Hebreohanon 13:18) Oo, kitang tanan angayng manlimbasog pag-ayo sa paghimo sa atong maarangan sa pagpasibo sa atong kahimtang ug maningkamot pag-ayo sa paghimo sa mga butang nga takos sa panalangin ni Jehova. Samtang atong himoon kana, magmadeterminado kita sa paghulat kang Jehova alang sa labing maayong solusyon.—Miqueas 7:7.

Si Jehova Mopalig-on Kanimo

Ang pagpamalandong kon sa unsang paagi ang mga karakter sa Bibliya sama kang Jose ug David malamposong nakasagubang sa mga kahigawad ug malisod nga mga kahimtang mahimong adunay mapuslanong epekto kanato. Bisan tuod ang ilang mga sugilanon gihubit lamang diha sa pipila ka panid sa Bibliya, ang ilang mga pagsulay milanat ug daghang katuigan. Pangutan-a ang imong kaugalingon: ‘Sa unsang paagi ang maong mga alagad sa Diyos nakakat-on sa pagdawat sa ilang kahimtang? Sa unsang paagi ilang nahuptan ang ilang kalipay? Unsang mga hiyas ang kinahanglan nilang ugmaron?’

Makaayo usab kanato ang pagtagad sa pagkamainantoson sa modernong-adlaw nga mga alagad ni Jehova. (1 Pedro 5:9) Ang magasing Bantayanang Torre ug Pagmata! naundan ug daghang sugilanon sa kinabuhi matag tuig. Imo bang ginabasa ug ginapalandong ang mga panig-ingnan niining matinumanong mga Kristohanon? Dugang pa, diha sa atong mga kongregasyon anaa kadtong matinumanong nakalahutay sa dili maayong mga kahimtang. Regular ka bang nakig-uban kanila aron makakat-on gikan kanila diha sa mga tigom sa kongregasyon?—Hebreohanon 10:24, 25.

Kon ikaw nag-atubang sa malisod nga mga kahimtang, magmasaligon nga si Jehova may kahingawa kanimo ug mopalig-on kanimo. (1 Pedro 5:6-10) Panlimbasogi nga dili tugotan ang imong kahimtang nga maoy mokontrolar sa imong kinabuhi. Sundoga ang mga panig-ingnan ni Jose, David, ug sa uban pa pinaagi sa pagwagtang sa kayugot, paghimo sa imong maarangan sa pagpasibo sa imong kahimtang, ug sa paghulat kang Jehova alang sa labing maayong solusyon. Pakigsuod kaniya pinaagi sa pag-ampo ug espirituwal nga mga kalihokan. Pinaagi niini, imong maangkon ang kalipay bisan sa mga panahon sa kalisdanan.—Salmo 34:8.

[Hulagway sa panid 20, 21]

Si Jose naningkamot sa paghimo sa iyang labing maarangan sa pagpasibo sa iyang kahimtang

[Hulagway sa panid 23]

Si David naghulat kang Jehova alang sa solusyon sa iyang mga problema