Bulahan Kadtong Nagahimaya sa Diyos
Bulahan Kadtong Nagahimaya sa Diyos
“Moyukbo sila sa imong atubangan, Oh Jehova, ug magahimaya sa imong ngalan.”—SALMO 86:9.
1. Nganong kita makahimaya sa Diyos sa mga paagi nga labaw pa kay sa mahimo sa walay-kinabuhing mga linalang?
SI Jehova takos dayegon sa tanan niyang mga linalang. Bisan tuod ang iyang walay-kinabuhi nga mga linalang hilom nga nagahimaya kaniya, kitang mga tawo adunay katakos sa pagpangatarongan, pagsabot, pag-apresyar, ug pagsimba. Nan, gitumong kanato ang giingon sa salmista: “Singgit kamo sa kadaogan ngadto sa Diyos, kamong tibuok nga katawhan sa yuta. Magaawit kamo ug mga pagdayeg sa kahimayaan sa iyang ngalan. Himoa nga mahimayaon ang iyang pagdayeg.”—Salmo 66:1, 2.
2. Kinsay misanong sa sugo nga maghimaya sa ngalan sa Diyos, ug ngano?
2 Ang kinabag-an sa katawhan wala moila sa Diyos o maghimaya kaniya. Apan, sa 235 ka kayutaan, kapin sa unom ka milyong Saksi ni Jehova ang nagpasundayag nga ilang nakita ang “dili-makita nga mga hiyas” sa Diyos pinaagi sa mga butang nga iyang gihimo ug ilang ‘nadungog’ ang hilom nga pamatuod sa kalalangan. (Roma 1:20; Salmo 19:2, 3) Pinaagi sa pagtuon sa Bibliya, sila usab nakadangat sa pagkahibalo ug paghigugma kang Jehova. Ang Salmo 86:9, 10 nagtagna: “Ang tanang nasod nga imong gibuhat moanhi, ug moyukbo sila sa imong atubangan, Oh Jehova, ug magahimaya sa imong ngalan. Kay ikaw dako ug nagabuhat sa katingalahang mga butang; ikaw ang Diyos, ikaw lamang.”
3. Sa unsang paagi ang “dakong panon” nagahatag ug “sagradong pag-alagad adlaw ug gabii”?
3 Ang Pinadayag 7:9, 15 naghubit usab sa “usa ka dakong panon” sa mga magsisimba nga “nagahatag [sa Diyos] ug sagradong pag-alagad adlaw ug gabii diha sa iyang templo.” Dili buot ipasabot nga ang Diyos literal nga nagkinahanglan ug walay-hunong nga pagdayeg gikan sa iyang mga alagad, apan ang iyang mga magsisimba maoy tibuok-globong organisasyon. Busa kon gabii na sa ubang mga kayutaan, ang mga alagad sa Diyos sa pikas bahin sa globo puliki sa pagsangyaw. Busa ikaingon nga ang adlaw dili gayod mosalop niadtong nagahimaya kang Jehova. Sa dili madugay “ang tanang may gininhawa” mopatugbaw sa ilang tingog sa pagdayeg kang Jehova. (Salmo 150:6) Apan, sa kasamtangan unsay mahimo sa matag usa kanato sa paghimaya sa Diyos? Unsang mga kalisdanan ang ato tingaling atubangon? Ug unsang mga panalangin ang nagpaabot niadtong nagahimaya sa Diyos? Sa pagtubag, tagdon nato ang usa ka asoy sa Bibliya bahin sa Israelinhong tribo ni Gad.
Usa ka Karaang Kalisdanan
4. Unsang kalisdanan ang giatubang sa tribo ni Gad?
4 Sa wala pa mosulod sa Yutang Saad, ang mga membro sa tribo ni Gad sa Israel mihangyo nga sila tugotan nga manimuyo sa mga sibsibanan sa sidlakan sa Jordan. (Numeros 32:1-5) Ang pagpuyo didto magpasabot ug pagsagubang sa grabeng mga kalisdanan. Ang mga tribo sa kasadpan maprotektahan sa Walog sa Jordan—usa ka kinaiyanhong babag sa militaryong pagsulong. (Josue 3:13-17) Apan, mahitungod sa kayutaan sa sidlakan sa Jordan, ang The Historical Geography of the Holy Land, ni George Adam Smith, nag-ingon: “[Kini] pulos patag, nga halos walay babag, diha sa dakong Arabianhong tagaytay. Dayag nga sa tanang panahon kini dali rang sulongon sa gutom nga mga tawong tiglalin, nga ang uban kanila manghugop kada tuig aron magpasibsib sa kahayopan.”
5. Sa unsang paagi gidasig ni Jacob ang mga kaliwat ni Gad sa paglihok sa dihang atakehon?
5 Sa unsang paagi ang tribo ni Gad makasagubang nianang makanunayong kapit-os? Kasiglohan una pa niana, sa iyang tagna sa himalatyon na siya, ang ilang katigulangan nga si Jacob mitagna: “Kon bahin kang Gad, usa ka pundok sa mga bandido mosulong kaniya, apan siya mosulong sa kinaluyohang bahin.” (Genesis 49:19) Sa unang pagtan-aw kanang mga pulonga morag makapaguol. Apan, sa pagkatinuod kini nagpasabot ug sugo alang sa mga Gadhanon nga mosukol. Gipasaligan sila ni Jacob nga kon buhaton nila kana, ang mga manunulong moatras sa makauulawng paagi, nga ang mga Gadhanon maggukod kanila.
Mga Suliran sa Atong Pagsimba Karon
6, 7. Sa unsang paagi ang situwasyon sa mga Kristohanon karon susama nianang sa tribo ni Gad?
6 Sama sa tribo ni Gad, ang mga Kristohanon karon naladlad sa mga kapit-os ug mga kabug-at sa sistema ni Satanas; walay milagrosong panalipod nga mopalingkawas kanato sa pagpakigbisog niini. (Job 1:10-12) Daghan kanato ang kinahanglang mosagubang sa mga kapit-os sa pag-eskuyla, pagpanginabuhi, ug pagmatuto sa mga bata. Anaa usay mga kapit-os nga personal o sa kahiladman. Ang uban kinahanglang moantos sa “tunok sa unod” sama sa grabeng pagkabaldado o balatian. (2 Corinto 12:7-10) Ang uban gisakit tungod sa ubos nga pagtamod sa kaugalingon. “Ang malisod nga mga adlaw” sa pagkatigulang makababag tingali sa tigulang nga mga Kristohanon sa pag-alagad kang Jehova uban ang kalagsik nga ilang nabatonan kanhi.—Ecclesiastes 12:1.
7 Gipahinumdoman usab kita ni apostol Pablo nga “kita adunay pakigdumog . . . batok sa daotang mga puwersa nga espirituhanon sa langitnong mga dapit.” (Efeso 6:12) Kita kanunayng naladlad sa “espiritu sa kalibotan,” ang espiritu sa rebelyon ug moral nga kadunotan nga gipasiugda ni Satanas ug sa iyang mga demonyo. (1 Corinto 2:12; Efeso 2:2, 3) Sama sa mahinadlokon-sa-Diyos nga si Lot, kita usab karon maguol tingali tungod sa imoral nga mga butang nga gisulti ug gihimo sa mga tawo sa atong palibot. (2 Pedro 2:7) Kita usab naladlad sa direktang pag-atake ni Satanas. Si Satanas nakiggubat sa nanghibilin sa mga dinihogan, “nga nagabantay sa mga sugo sa Diyos ug may buluhaton sa pagpamatuod bahin kang Jesus.” (Pinadayag 12:17) Ang “ubang mga karnero” ni Jesus nakasinati usab sa pag-atake ni Satanas pinaagi sa mga pagdili ug mga paglutos.—Juan 10:16.
Mopasignunot o Mosukol?
8. Unsay angay natong reaksiyon sa mga pag-atake ni Satanas, ug ngano?
8 Unsay angay natong reaksiyon sa mga pag-atake ni Satanas? Sama sa karaang tribo ni Gad, kita kinahanglang lig-on sa espirituwal ug mosukol sumala sa pagtultol sa Diyos. Ikasubo, ang uban nagpadala sa mga kapit-os sa kinabuhi, nga nagpasagad sa ilang espirituwal nga mga kaakohan. (Mateo 13:20-22) Ang usa ka Saksi miingon niini bahin sa hinungdan kon nganong diyutay na lang ang nanambong sa tigom sa iyang kongregasyon: “Ang mga igsoon gikapoy na kaayo. Silang tanan napit-osan pag-ayo.” Sa pagkatinuod, ang mga tawo karon daghan ug hinungdan nga kapoyon. Busa, sayon ra ang paglantaw sa pagsimba sa Diyos ingong laing kapit-os, usa ka bug-at nga obligasyon. Apan kana ba maoy maayo—o husto—nga panglantaw?
9. Sa unsang paagi ang pagpailalom sa yugo ni Kristo makapalagsik?
9 Tagda ang giingon ni Jesus ngadto sa mga panon sa katawhan sa iyang adlaw kinsa gikapoy usab kaayo sa mga kapit-os sa kinabuhi: “Umari kanako, kamong tanang nabudlayan ug nabug-atan, ug ako magapalagsik kaninyo.” Buot bang ipasabot ni Jesus nga ang kalagsik mahitabo pinaagi sa pag-iban sa atong panahon nga gigugol sa pag-alagad sa Diyos? Sa kasukwahi, si Jesus miingon: “Isangon diha kaninyo ang akong yugo ug magtuon gikan kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag.” Ang yugo maoy usa ka kahoy o metal nga gambalay nga pinaagi niini ang usa ka tawo o mananap makapas-an ug bug-at nga karga. Nan, nganong duna may gustong modawat sa maong yugo? Dili ba “nabug-atan” na kita? Oo, apan ang Gregong teksto mabasa usab nga ingon niini: “Magpailalom sa akong yugo uban kanako.” Hunahunaa ra: Si Jesus nagtanyag nga motabang kanato sa pagpas-an sa atong karga! Dili kinahanglang buhaton nato kana sa atong kusog lamang.—Mateo 9:36; 11:28, 29; 2 Corinto 4:7.
10. Unsay moresulta gikan sa atong mga paningkamot sa paghimaya sa Diyos?
10 Sa dihang atong isangon ang yugo sa pagkatinun-an, kita nakig-away kang Satanas. “Sukli ang Yawa, ug siya mokalagiw gikan kaninyo,” nagsaad ang Santiago 4:7. Wala kini magpasabot nga sayon ra ang pagsukol sa Yawa. Ang pag-alagad sa Diyos nagkinahanglan ug dakong paningkamot. (Lucas 13:24) Apan ang Bibliya nagsaad diha sa Salmo 126:5: “Kadtong nagapugas ug binhi uban ang mga luha magaani gayod uban ang hugyaw sa kalipay.” Oo, ang atong ginasimba maoy mapasalamaton nga Diyos. Siya maoy “tigganti sa mga matinuorong nagapangita kaniya,” ug siya magapanalangin niadtong magahimaya kaniya.—Hebreohanon 11:6.
Paghimaya sa Diyos Ingong mga Magwawali sa Gingharian
11. Sa unsang paagi ang ministeryo sa kanataran nagsilbing depensa batok sa mga pag-atake ni Satanas?
11 Si Jesus nagsugo: “Busa panglakaw kamo ug paghimog mga tinun-an sa katawhan sa tanang kanasoran.” Ang buluhatong pagwali mao ang pangunang paagi sa pagtanyag sa Diyos ug “halad sa pagdayeg.” (Mateo 28:19; Hebreohanon 13:15) Ang ‘pagsul-ob diha sa atong mga tiil sa kasangkapan sa maayong balita’ maoy hinungdanong bahin sa atong “kompletong armadura”—ang atong depensa batok sa mga pag-atake ni Satanas. (Efeso 6:11-15) Ang pagdayeg sa Diyos diha sa ministeryo sa kanataran maoy maayo kaayong paagi sa pagpalig-on sa atong pagtuo. (2 Corinto 4:13) Kini motabang kanato nga malikayan ang paghunahuna ug negatibong mga butang. (Filipos 4:8) Ang pagpakig-ambit diha sa ministeryo sa kanataran motugot kanato sa pagpahimulos sa makapalig-on nga pagpakig-uban sa mga isigkamagsisimba.
12, 13. Sa unsang paagi ang regular nga pagpakig-ambit sa ministeryo sa kanataran makabenepisyo sa mga pamilya? Iilustrar.
12 Ang buluhatong pagsangyaw mahimong usa usab ka maayong kalihokan sa pamilya. Siyempre, ang mga batan-on nagkinahanglan ug timbang nga paglingawlingaw. Apan, ang panahon nga gigugol ingong pamilya diha sa ministeryo sa kanataran dili kinahanglang mahimong makalaay nga buluhaton. Ang mga ginikanan makahimo nianang mas makalingaw pinaagi sa pagbansay sa ilang mga anak nga mahimong epektibo diha sa ministeryo. Dili ba ang mga batan-on mas malingaw sa pagbuhat sa mga butang kon sila batid niana? Pinaagi sa pagpakitag pagkatimbang, nga dili mangayo sa mga batan-on ug labaw kay sa ilang mahimo, ang mga ginikanan makatabang kanila sa pagkaplag ug kalipay diha sa ministeryo.—Genesis 33:13, 14.
13 Dugang pa, ang pamilya nga duyog nga nagadayeg kang Jehova mas masuod sa usag usa. Tagda ang usa ka igsoong babaye nga giabandonar sa iyang dili-magtutuong bana ug gibinlan ug lima ka anak. Busa nag-atubang siya sa hagit sa pagpangitag sekular nga trabaho ug pag-atiman sa materyal nga panginahanglan sa iyang mga anak. Nabug-atan ba siya pag-ayo nga nagpabaya na lang siya sa espirituwal nga mga intereses sa iyang mga anak? Siya nahinumdom: “Makugihon akong nagtuon sa Bibliya ug sa mga publikasyon sa Bibliya ug naningkamot sa pagpadapat sa akong nabasahan. Regular nakong dad-on ang mga bata ngadto sa mga tigom ug diha sa balaybalay nga ministeryo. Unsay resulta sa akong mga paningkamot? Ang tanang lima ka anak nabawtismohan.” Ang bug-os nga pagpakig-ambit sa ministeryo makatabang usab kanimo sa imong mga paningkamot sa pagmatuto sa imong mga anak “sa disiplina ug sa pagdumala-sa-kaisipan ni Jehova.”—Efeso 6:4.
14. (a) Sa unsang paagi ang mga batan-on makahimaya sa Diyos diha sa eskuylahan? (b) Unsay makatabang sa mga batan-on aron dili “ikaulaw ang maayong balita”?
14 Mga batan-on, kon kamo nagpuyo sa nasod diin kini gitugot sa balaod, kamo ba nagahimaya sa Diyos pinaagi sa pagpamatuod diha sa eskuylahan, o gitugotan ba ninyo ang kahadlok sa tawo nga mopugong kaninyo? (Proverbio 29:25) Usa ka 13-anyos nga Saksi sa Puerto Rico misulat: “Wala gayod ako maulaw nga mosangyaw sa eskuylahan tungod kay ako nahibalo nga kini mao ang kamatuoran. Sa klase kanunay nakong iisa ang akong kamot ug mosugilon kon unsay akong nakat-onan gikan sa Bibliya. Kon wala koy klase, moadto ko sa librarya ug basahon ang librong Mga Batan-on Nangutana.” a Gipanalanginan ba ni Jehova ang iyang mga paningkamot? Siya nagtaho: “Usahay ang akong mga klasmet mangutana nako ug mangayo pa gani ug kopya sa maong libro.” Kon nagpanuko ka niining bahina, tingali kinahanglang pamatud-an nimo sa imong kaugalingon “ang maayo ug dalawaton ug hingpit nga kabubut-on sa Diyos” pinaagi sa makugihong personal nga pagtuon. (Roma 12:2) Kon kombinsido ka nga ang imong nakat-onan mao ang kamatuoran, dili gayod nimo “ikaulaw ang maayong balita.”—Roma 1:16.
Usa ka ‘Bukas nga Pultahan’ sa Pag-alagad
15, 16. Unsang “dakong pultahan nga nagatultol ngadto sa kalihokan” ang gisudlan sa pipila ka Kristohanon, ug miresulta kini sa unsang mga panalangin?
15 Si apostol Pablo misulat nga ang “usa ka dakong pultahan nga nagatultol ngadto sa kalihokan” nabuksan kaniya. (1 Corinto 16:9) Motugot kaha kanimo ang imong mga sirkumstansiya sa pagsulod sa usa ka pultahan sa kalihokan? Pananglitan, ang pagpakigbahin sa regular o oksilyare payunir nga ministeryo naglangkit ug paggugol ug 70 o 50 oras kada bulan nganha sa buluhatong pagsangyaw. Siyempre, ang mga payunir gipabilhan sa mga isigka-Kristohanon tungod sa ilang matinumanong pag-alagad. Apan ang kamatuoran nga sila naggugol ug mas daghang panahon diha sa ministeryo wala magpabati kanilang labaw sa ilang mga igsoong lalaki ug babaye. Hinunoa, ilang giugmad ang tinamdan nga gidasig ni Jesus: “Kami maoy walay-silbi nga mga ulipon. Ang among nabuhat mao ang angay namong pagabuhaton.”—Lucas 17:10.
16 Ang pagpayunir nagkinahanglan ug pagdisiplina sa kaugalingon, personal nga pag-organisar, ug pagkaandam nga mohimog mga sakripisyo. Apan, ang mga panalangin takos gayod niana. “Ang katakos sa paggamit sa Pulong sa Diyos sa kamatuoran sa hustong paagi maoy tinuod nga panalangin,” matod sa usa ka batan-ong payunir nga ginganlag Tamika. “Kon magpayunir ka, kanunay nimong gamiton ang Bibliya. Karon kon mamalaybalay ko, makahunahuna ko ug mga teksto nga haom alang sa matag tagbalay.” (2 Timoteo 2:15) Matod pa sa usa ka payunir nga ginganlag Mica: “Ang pagkakita kon sa unsang paagi ang kamatuoran nag-apektar sa kinabuhi sa mga tawo maoy laing katingalahang panalangin.” Usa ka batan-on nga ginganlag Matthew naghisgot usab sa kalipay sa “pagkakita nga ang usa makadangat sa kamatuoran. Walay laing kalipay nga makahulip niini.”
17. Sa unsang paagi nabuntog sa usa ka Kristohanon ang negatibong pagbati labot sa pagpayunir?
17 Mapalandong mo ba ang pagpayunir? Tingali gusto nimong magpayunir apan gibati nimong kulang ka sa katakos. “Duna koy negatibong pagbati labot sa pagpayunir,” miangkon ang usa ka batan-ong sister nga ginganlag Kenyatte. “Gibati kong dili makasarang. Dili ko makamaong moandam ug mga introduksiyon o mangatarongan pinasukad sa Kasulatan.” Apan, ang mga ansiyano nagtudlo ug hamtong nga payunir nga sister nga mosangyaw uban kaniya. “Makalingaw ang pagsangyaw uban kaniya,” nahinumdom si Kenyatte. “Natukmod ako sa pagpayunir usab.” Uban sa pipila ka pagdasig ug pagbansay, basin ikaw usab gustong magpayunir.
18. Unsang mga panalangin ang modangat niadtong mosulod sa misyonaryong pag-alagad?
18 Ang pagpayunir mahimong magbukas sa pultahan ngadto sa ubang mga pribilehiyo sa pag-alagad. Pananglitan, ang ubang mga magtiayon basin kuwalipikadong bansayon isip misyonaryo nga ipadala sa langyawng nasod aron mosangyaw. Ang mga misyonaryo kinahanglang mopasibo sa usa ka bag-ong nasod, tingali sa usa ka bag-ong pinulongan, bag-ong kultura, ug bag-ong mga pagkaon. Apan ang mga panalangin maghimo sa maong kalisdanan nga walay bili. Si Mildred, usa ka eksperyensiyadong misyonarya sa Mexico, nag-ingon: “Wala gayod ako magbasol sa akong desisyon nga mahimong misyonarya. Mao kiniy akong gitinguha sukad sa gamay pa ko.” Unsang mga panalangin ang iyang natagamtam? “Sa akong nasod, lisod kaayo ang pagpangita ug panagtuon sa Bibliya. Dinhi, upat sa akong mga estudyante ang dungang nagsugod sa pag-alagad sa kanataran!”
19, 20. Sa unsang paagi ang pag-alagad sa Bethel, internasyonal nga pag-alagad, ug Tunghaan sa Ministeryal nga Pagbansay miresulta sa mga panalangin?
19 Ang dagayang mga panalangin modangat usab niadtong nag-alagad sa Bethel diha sa mga sangang buhatan sa mga Saksi ni Jehova. Si Sven, usa ka batan-ong brader nga nag-alagad sa Alemanya, miingon bahin sa iyang buluhaton sa Bethel: “Akong gibati nga ang akong ginabuhat adunay dumalayong bili. Magamit unta nako ang akong mga katakos sa kalibotan. Apan mahisama ra kana sa paghulog ug kuwarta sa usa ka bangko nga hapit nang mabangkarota.” Tinuod, ang pag-alagad ingong walay-suweldo nga boluntaryo naglangkit ug sakripisyo. Apan si Sven miingon: “Inigpauli nimo, ikaw nahibalo nga ang tanan nimong gibuhat nianang adlawa maoy alang kang Jehova. Ug nindot kaayo ang imong bation.”
20 Ang ubang mga igsoon nakapahimulos sa panalangin sa internasyonal nga pag-alagad, nga nakigbahin sa pagtukod ug mga sangang buhatan sa langyawng mga nasod. Usa ka magtiayon nga nakaalagad na sa walo ka langyawng mga asaynment misulat: “Ang mga igsoon dinhi buotan kaayo. Makaguol ang pagbiya—ang ikawalong higayon nga kami nasubo. Pagkanindot sa among naeksperyensiyahan!” Unya anaa ang Tunghaan sa Ministeryal nga Pagbansay. Kini nagtanyag ug espirituwal nga pagbansay alang sa kuwalipikadong mga ulitawo. Misulat ang usa ka graduwado: “Nalisdan ko sa pagpahayag sa akong mga pasalamat tungod sa maanindot kaayong tunghaan. May lain pa bang organisasyon nga maningkamot pag-ayo aron sa paghatag sa maong pagbansay?”
21. Unsang hagit ang giatubang sa tanang Kristohanon diha sa ilang pag-alagad sa Diyos?
21 Oo, daghang pultahan sa kalihokan ang bukas. Tinuod, kadaghanan kanato dili makaalagad sa Bethel o sa langyawng nasod. Giila mismo ni Jesus nga ang mga Kristohanon magpatungha ug lainlaing matang sa “bunga” tungod sa lainlaing mga sirkumstansiya. (Mateo 13:23) Nan, ang atong hagit ingong mga Kristohanon mao ang pagpahimulos pag-ayo sa atong situwasyon—nga bug-os nga makig-ambit sa pag-alagad kang Jehova sumala sa itugot sa atong mga sirkumstansiya. Kon buhaton nato kana, kita magahimaya kang Jehova, ug kita makaseguro nga siya mahimuot pag-ayo. Tagda si Ethel, usa ka tigulang nga sister diha sa balay amomahan. Siya regular nga nagpamatuod ngadto sa mga isigkaresidente sa maong balay amomahan ug nakigbahin sa pagsangyaw pinaagi sa telepono. Bisan pa sa iyang mga limitasyon, siya tibuok-kalag sa iyang pag-alagad.—Mateo 22:37.
22. (a) Sa unsa pang mga paagi nga kita makahimaya sa Diyos? (b) Unsang maanindot nga panahon ang nagpaabot kanato?
22 Apan, hinumdomi nga ang pagsangyaw maoy usa lamang ka paagi diin kita makahimaya kang Jehova. Pinaagi sa atong sulondan nga panggawi ug panagway sa dihang anaa kita sa atong trabahoan, eskuylahan, ug balay, atong gilipay ang kasingkasing ni Jehova. (Proverbio 27:11) Ang Proverbio 28:20 nagsaad: “Ang usa ka tawong may matinumanong mga buhat makabaton ug daghang panalangin.” Busa angay kitang ‘magpugas nga madagayaon’ diha sa atong pag-alagad sa Diyos, nga nahibalo nga kita magaani ug dagayang mga panalangin. (2 Corinto 9:6) Sa pagbuhat niana, atong pribilehiyo nga mabuhi nianang maanindot nga panahon sa dihang “ang tanang may gininhawa” maghatag kang Jehova sa himaya nga takos gayod kaniya!—Salmo 150:6.
[Footnote]
a Ang librong Mga Pangutanang Gisukna sa Mga Batan-on—Mga Tubag nga Mosaler gipatik sa mga Saksi ni Jehova.
Nahinumdom Ka Ba?
• Sa unsang paagi ang katawhan sa Diyos nag-alagad kang Jehova “adlaw ug gabii”?
• Unsang kalisdanan ang giatubang sa tribo ni Gad, ug unsay gitudlo niini sa mga Kristohanon karon?
• Sa unsang paagi ang ministeryo sa kanataran nagsilbing proteksiyon batok sa mga pag-atake ni Satanas?
• Unsang ‘bukas nga pultahan’ ang gisulod sa pipila, ug unsang mga panalangin ang ilang natagamtam?
[Mga Pangutana sa Pagtuon]
[Hulagway sa panid 15]
Maingon nga ang mga Gadhanon nakig-away batok sa nanulong nga mga bandido, ang mga Kristohanon kinahanglang mosukol usab sa mga pag-atake ni Satanas
[Hulagway sa panid 17]
Atong matagamtam ang makapalig-ong panag-ubanay diha sa ministeryo sa kanataran
[Mga hulagway sa panid 18]
Ang pagpayunir mahimong magbukas sa pultahan ngadto sa ubang mga pribilehiyo sa pag-alagad, lakip sa:
1. Internasyonal nga pag-alagad
2. Pag-alagad sa Bethel
3. Misyonaryong pag-alagad