Kinahanglan Bang Magpasakop Ka sa Usa ka Relihiyon?

‘DILI mistil magpasakop ko sa usa ka relihiyon o mosimba kanunay aron lang motuo sa Diyos!’ Ingon niana ang pagbati sa mga tawo bahin sa pagpasakop sa usa ka relihiyon o sa bisan unsang relihiyosong organisasyon. Ngani, ang uban moingon nga sila mobating mas suod sa Diyos sa dihang sila nagapahimulos sa kaanindot sa kinaiyahan sa gawas kay sa dihang nagatambong sa usa ka relihiyosong serbisyo sa simbahan. Sa pagkakaron, ang naandang opinyon mao nga ang pagpasakop sa usa ka relihiyon o denominasyon dili na kinahanglanon alang sa pagtuo sa Diyos.

Apan, lahi kaayo ang pagbati sa uban. Sila nangatarongan nga ang pagpamembro ug pagtambong diha sa usa ka sa relihiyon maoy kinahanglanon, hinungdanon pa gani, kon buot sa usa ang pag-uyon sa Diyos. Busa, ang isyu kon gikinahanglan ba gayod nga magpasakop sa usa ka relihiyon, maoy usa ka butang nga hinungdanon kaayo alang sa matag tawo, dili lamang alang sa mga tawong nagtuon sa estadistika sa mga relihiyon. Bisan unsa pay kahimtang, tungod kay nalangkit ang atong relasyon uban sa Diyos, dili ba makataronganon ang pagsusi sa panglantaw sa Diyos bahin niini? Nan, unsay atong makat-onan gikan sa iyang Pulong, ang Bibliya, maylabot niining ulohana?

Kon sa Unsang Paagi ang Diyos Nakiglabot sa mga Tawo sa Miagi

Halos 4,400 ka tuig kanhi, ang malaglagong lunop misanap sa tibuok yuta. Ang maong hitabo dili daling makalimtan, ug ang mga tawo sa tibuok kalibotan adunay mga sugilanon bahin niana sa ilang karaang mga kasaysayan. Bisan tuod managlahi ang mga detalye, ang maong mga sugilanon daghag kasamahan, lakip ang kamatuoran nga pipila lamang ka tawo ug mga mananap ang naluwas.

Kadto bang mga naluwas sa Lunop maoy mga tawong bulahan kaayo nga sulagmang nakalingkawas sa kalaglagan? Gipakita sa asoy sa Bibliya nga dili ingon niana ang nahitabo. Makaiikag, ang Diyos wala magpahibalo sa matag tawo bahin sa umaabot nga Lunop. Hinunoa, iyang gisuginlan si Noe, nga sa baylo nagpasidaan sa iyang mga  katalirongan bahin sa taliabot nga Lunop.—Genesis 6:13-16; 2 Pedro 2:5.

Ang kaluwasan nag-agad sa pagkahimong bahin niadtong nagtinabangay nga grupo ug pagkaandam sa pagdawat sa pagtultol sa Diyos nga gihatag kang Noe. Bisan ang mga mananap nga didto sa arka naluwas sa Lunop tungod usab kay sila nahimong bahin sa maong grupo. Ang tukmang mga instruksiyon gihatag kang Noe aron sa paghimog nahiangay nga mga tagana alang sa pagtipig sa kinabuhi sa mga mananap.—Genesis 6:17-7:8.

Kasiglohan sa ulahi, ang mga kaliwat ni Noe sa pamilya sa iyang anak nga si Sem naulipon sa Ehipto. Apan, ang katuyoan sa Diyos mao ang pagluwas ug pagdala kanila ngadto sa yuta nga iyang gisaad sa ilang apohan nga si Abraham. Sa makausa pa, kadto wala ibutyag ngadto sa matag tawo kondili unang gibutyag ngadto sa mga tawong natudlo nga mahimong ilang mga lider—si Moises ug ang iyang igsoon, si Aaron. (Exodo 3:7-10; 4:27-31) Human ang kanhing mga ulipon napagawas ingong usa ka grupo gikan sa Ehipto, sila gihatagan sa Balaod sa Diyos didto sa Bukid sa Sinai ug gihimo nga nasod sa Israel.—Exodo 19:1-6.

Naluwas ang tagsa ka Israelinhon tungod kay sila nagpasakop sa usa ka grupo nga gitukod sa Diyos ug nagsunod sa pagtultol sa gitudlo nga mga lider sa maong grupo. May gihimo pa ganing mga kahikayan alang sa indibiduwal nga mga Ehiptohanon aron sa pagpasakop sa maong grupo nga dayag nga giuyonan sa Diyos. Sa dihang ang mga Israelinhon mibiya sa Ehipto, kini nga mga Ehiptohanon mikuyog kanila, sa ingon sila nakabatog palaaboton nga mapanalanginan sa Diyos.—Exodo 12:37, 38.

Dayon, sa unang siglo, si Jesus nagsugod sa iyang pagsangyaw, nga nagtigom ug mga tawo ingong iyang mga tinun-an. Siya nakiglabot kanila ingong usa ka grupo, bisan tuod siya naghatag ug mahigugmaong pagtagad sa matag usa sumala sa ilang mga panginahanglan. Ngadto sa 11 ka matinumanong mga apostoles, si Jesus miingon: “Kamo mao ang nagpabilin kanako diha sa akong mga pagsulay; ug nagahimo ako ug pakigsaad uban kaninyo, maingon nga ang akong Amahan naghimo ug usa ka pakigsaad kanako, alang sa usa ka gingharian.” (Lucas 22:28, 29) Sa ulahi, ang balaang espiritu sa Diyos mikunsad diha sa mga apostoles sa dihang sila nagtigom ingong usa ka grupo.—Buhat 2:1-4.

Kining maong mga pananglitan tin-awng nagpakita nga sa miagi, ang Diyos kanunayng nakiglabot sa iyang katawhan ingong usa ka organisadong grupo. Ang pipila ka tawo nga kanila ang Diyos personal nga nakiglabot—si Noe, Moises, Jesus, ug uban pa—maoy, sa pagkatinuod, gigamit Niya aron makigsulti sa usa ka suod nga grupo. Walay katarongan nga motuo nga ang Diyos makiglabot sa lahi nga paagi uban sa iyang mga alagad karon. Siyempre, kini magpatunghag laing pangutana: Igo na ba ang pagpasakop sa bisan unsang relihiyosong grupo? Atong tagdon kining hinungdanong pangutana sa sunod nga artikulo.

[Hulagway sa panid 4]

Ang Diyos dugay nang nakiglabot sa iyang katawhan ingong usa ka organisadong grupo