Kinahanglan ba Kitang Mobuhat ug Maayo sa Uban o Basta Dili Lang Mobuhat ug Daotan?

“KON unsay dili nimo gustong buhaton nganha kanimo, ayaw kanag buhata ngadto sa uban.” Kining maong panultihon bahin sa moral gisulti sa nailhang Insek nga magtutudlo ug pilosopo nga si Confucius. Karon, mga 2,500 ka tuig sa ulahi, daghan gihapon ang nagtuo nga ang usa ka tawo nakahimo na sa iyang moral nga obligasyon pinaagi lamang sa dili pagbuhat ug bisan unsang kadaot ngadto sa uban.

Tinuod, kining maong lagda sa pamatasan ni Confucius adunay pipila ka bili. Sa laing bahin, ang Bibliya nagpadayag sa laing bahin sa tawhanong pamatasan ug pagpakiglabot sa uban. Gawas pa sa matawag nga sala tungod sa paghimog daotan, sa ato pa, ang paghimog sayop batok sa isigkatawo, ang Bibliya naghisgot bahin sa sala tungod sa pagkapakyas sa pagbuhat kon unsay maayo. Ang Kristohanong tinun-an nga si Santiago nagsulat: “Kon ang usa nasayod sa pagbuhat kon unsay maayo apan wala magbuhat niini, siya nakasala.” (Santiago 4:17) Inay tudloan lamang ang mga Kristohanon sa dili paghimog daotan ngadto sa uban, si Jesu-Kristo naghatag ning maong tambag: “Ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.”—Mateo 7:12.

Ang orihinal nga katuyoan sa Diyos mao nga ang tanang tawo magtratar sa usag usa sa paagi nga gusto nilang trataron. Iyang gihatag ang labing maayong panig-ingnan sa pagpahayag ug kahingawa alang sa kaayohan sa uban diha sa paagi sa iyang paglalang sa mga tawo: “Gilalang sa Diyos ang tawo sumala sa iyang larawan, sa larawan sa Diyos iyang gilalang siya; lalaki ug babaye iyang gilalang sila.” (Genesis 1:27) Kini nagkahulogan nga ang Diyos mahigugmaong naghatag sa mga tawo ug tanlag, nga, sa dihang hustong pagkabansay, mogiya kanila sa pagtratar sa uban sa paagi nga gusto nilang trataron.

Daghan karon ang nag-antos nga walay paglaom ug walay mahimo diha sa mga kamot sa walay puangod ug hakog nga mga tawo. Dayag nga ang gikinahanglan maoy labaw pa kay sa dili lamang paghimog daotan ug makadaot ngadto sa uban kondili, hinunoa, ang paghimo sa kon unsay makaayo ug makatabang kanila. Tungod niana, ang mga Saksi ni Jehova boluntaryong mihimog positibong aksiyon sa pagtabang sa uban nga makakat-on sa kahibulongang paglaom nga makaplagan diha sa Pulong sa Diyos. Sa dihang moduaw sila sa ilang mga silingan dala ang maayong balita gikan sa Bibliya, ginahimo nila kana diha sa espiritu sa gugma, nga nagabuhat ngadto sa uban sa kon unsay gusto nilang buhaton ngadto kanila.