Mga Pangutana Gikan sa mga Magbabasa

Nganong si David, nga usa ka matinumanong alagad ni Jehova, nagtugot sa iyang asawa nga si Mikal sa pagbaton ug usa ka larawan, o idolo, nga terapim, ingon sa gipakita sa 1 Samuel 19:12, 13?

Hisgotan nato makadiyot ang konteksto. Sa dihang nahibaloan ni Mikal ang laraw ni Haring Saul sa pagpatay kang David, siya milihok dayon. Ang Bibliya nag-ingon: “Gipakanaog ni Mikal si David agi sa bentana, aron makalakaw siya ug makakalagiw ug makaikyas. Unya gikuha ni Mikal ang larawan nga terapim [nga lagmit samag gidak-on ug porma sa usa ka tawo] ug gibutang kini sa higdaanan, ug usa ka ginambat sa balhibo sa kanding gibutang niya sa dapit sa iyang ulohan, nga human niana gitabonan niya kini sa usa ka panapton.” Sa dihang miabot ang mga mensahero ni Saul aron sa pagdakop kang David, si Mikal miingon kanila: “May sakit siya.” Kini nga taktika nagpalangan niadtong mga nangita kang David, ug si David nakaikyas.—1 Samuel 19:11-16.

Ang mga kaplag sa arkeolohiya nagsugyot nga sa karaang mga panahon, ang mga larawan nga terapim ginatipigan dili lamang alang sa relihiyosong gamit kondili alang usab sa legal nga mga katuyoan. Maingon nga ang mga titulo ug sinulat nga mga testamento magpaila sa katungod sa pagkamanununod karong adlawa, mao man usab ang mga larawan nga terapim kaniadto. Lagmit, ubos sa pipila ka kahimtang, ang pagkabaton ug terapim makahatag ug katungod sa usa ka umagad nga lalaki sa pag-angkon sa kabilin sa iyang namatayng ugangang lalaki. Tingali mao kini ang hinungdan kon nganong, diha sa mas una pa nga panghitabo, gikuha ni Raquel ang mga larawan nga terapim sa iyang amahan ug kon nganong ang iyang amahan matinguhaon kaayo sa pagbawi niana. Niadtong higayona, ang bana ni Raquel, si Jacob, wala masayod sa gihimo sa iyang asawa.—Genesis 31:14-34.

Sa dihang ang mga Israelinhon natukod ingong nasod, nadawat nila ang Napulo ka Sugo, nga ang ikaduha niana espesipikong nagdili sa paghimog mga idolo. (Exodo 20:4, 5) Sa ulahi, ang manalagnang Samuel naghisgot niini nga balaod sa dihang nakigsulti siya kang Haring Saul. Siya miingon: “Ang pagkamasuklanon sama ra sa sala sa pagpanag-an, ug ang pagkamapangahason sama ra sa paggamit ug mahikanhong gahom ug terapim.” (1 Samuel 15:23) Tungod niini, lagmit nga wala na gamita ang terapim sa pagpaila sa pagkamanununod didto sa Israel. Bisan pa niana, kining karaang matang sa Hudiyong patuotuo daw nagpadayon gihapon diha sa pipila ka Israelinhong panimalay. (Maghuhukom 17:5, 6; 2 Hari 23:24) Ang pagbaton ni Mikal ug larawan nga terapim nagpakita nga ang iyang kasingkasing dili bug-os ngadto kang Jehova. Si David basin wala masayod bahin sa larawan nga terapim o kaha gitugotan niya kini tungod kay anak ni Haring Saul si Mikal.

Ang panglantaw ni David bahin sa eksklusibong debosyon ngadto kang Jehova gipadayag diha sa mga pulong: “Si Jehova dako ug dalayegon uyamot, ug siya kahadlokan labaw kay sa tanang ubang mga diyos. Kay ang tanang diyos sa mga katawhan maoy walay-bili nga mga diyos. Apan si Jehova, siya nagbuhat sa mga langit.”—1 Cronicas 16:25, 26.

[Hulagway sa panid 29]

Ang ikaduha sa Napulo ka Sugo nagdili sa paghimog mga idolo, sama sa terapim nga makita dinhi

[Credit Line]

From the book The Holy Land, Vol. II, 1859