Ang Hagit sa Pagbansay sa mga Bata Karon

DIHANG halawom na ang gabii, ang tag-iya sa restawran nangandam sa pagsira sa iyang kan-anan aron mopauli. Unya duha ka babaye ug usa ka batang lalaki misulod ug miorder ug pagkaon. Kay gikapoy na kaayo, gusto unta niyang sultihan sila nga sirado na ang restawran, apan midesisyon na lang siya sa pagsilbi kanila. Samtang ang duha ka babaye nag-estoryahanay ug nangaon, ang bata nagdagandagan sulod sa restawran, nga naghuloghulog ug mga biskuwit sa salog ug nagtamaktamak niana. Imbes nga badlongon siya, ang inahan sa bata igo rang mipahiyom. Sa dihang mibiya na sa kataposan ang mga kustomer, gihinloan sa gikapoy nga tag-iya ang nahugawang salog.

Sama sa imo nang nahibaloan, kining tinuod nga kinabuhi nga situwasyon nag-ilustrar nga diha sa daghang pamilya, ang pagbansay sa mga bata dili malamposon. Lainlain ang mga hinungdan niini. Pasagdan lang sa ubang mga ginikanan ang ilang mga anak sa pagtuman sa gusto, nga nagtuo nga ang mga bata kinahanglang matutuon nga may kagawasan. O kaha, tungod sa ilang kapuliki, ang mga ginikanan wala nay panahon sa paghatag ug bug-os nga pagtagad ug sa gikinahanglang pagbansay sa ilang mga anak. Ang ubang mga ginikanan naghunahuna nga ang edukasyon sa ilang anak mao ang labing hinungdanon, busa hatagan nila ang ilang anak ug dakong kagawasan basta makakuha lang siya ug taas nga grado sa eskuylahan ug makatungha sa iladong tunghaan sa kolehiyo.

Apan, may mga tawong moingon nga angayng bag-ohon sa mga ginikanan ug sa katilingban sa katibuk-an ang ilang mga prinsipyo ug sukdanan sa panggawi. Sila nangatarongan nga ang mga bata nalangkit na sa tanang matang sa krimen ug ang kapintasan sa tunghaan padayong nagausbaw. Busa, usa ka prinsipal sa hayskul sa Seoul, Republika sa Korea, ang mipahayag nga ang pagtudlo ug maayong pamatasan ngadto sa mga bata angayng hatagag pangunang pagtagad. Siya miingon: “Human nga mapaugmad nimo ang maayong mga kinaiya, isunod ang pagkuhag kahibalo.”

Daghang ginikanan nga buot nga ang ilang anak motungha sa kolehiyo ug molampos sa kinabuhi wala magpakabana sa mga tambag. Kon ikaw usa ka ginikanan, unsang matanga sa pagkatawo ang buot mong maugmad sa imong anak? Buot mo ba siyang mohingkod ingong usa ka tawo nga maayog moralidad ug responsable? Buot mo ba siyang mahimong mahunahunaon sa uban, mapailin-ilinon, ug usa nga may positibong tinamdan? Kon mao, palihog tagda ang mosunod nga artikulo.