Ang Labing Bililhong Kabilin

SA HINAPOS sa iyang kinabuhi, ang tigulang nga si apostol Juan misulat: “Wala nay labaw nga hinungdan sa akong pagkamapasalamaton kay niining mga butanga, nga akong madungog nga ang akong mga anak nagpadayon sa paglakaw diha sa kamatuoran.”—3 Juan 4.

Ang gihisgotan sa matinumanong apostol mao ang iyang mga anak sa espirituwal nga diwa. Bisan pa niana, sama sa apostol, mao usab kanay pagbati sa daghang ginikanan bahin sa ilang mga anak. Nagkugi sila pag-ayo aron pagmatuto sa ilang mga anak diha “sa disiplina ug sa pagdumala-sa-kaisipan ni Jehova,” ug sila nalipay karon nga makakita nga ang ilang hingkod nang mga anak ‘naglakaw diha sa kamatuoran.’ (Efeso 6:4) Sa pagkamatuod, ang pagtudlo sa dalan sa kinabuhing dayon ngadto sa mga anak maoy paghatag kanila sa labing bililhong kabilin. Kana matuod kay ang diyosnong pagkamahinalaron, nga naglakip sa pagkinabuhi sumala sa kabubut-on ni Jehova alang sa mga Kristohanon, “naghupot ug saad sa kinabuhi karon ug sa umaabot.”—1 Timoteo 4:8.

Si Jehova, ang hingpit nga Amahan, nagtamod pag-ayo sa diyosnong mga ginikanan nga naningkamot sa pagtaganag espirituwal nga edukasyon sa ilang mga anak. Sa dihang mosanong ang mga anak, mabatonan nila ang dakong kalipay sa pagpadayon sa matuod nga pagsimba kauban sa ilang mga ginikanan. Samtang magkahamtong ang maong mga anak, ilang matigom ang makapahimuot nga mga handomanan sa maong mga kasinatian. Malipay ang pipila sa paghinumdom sa unang higayon nga sila nakigbahin sa Teokratikanhong Tunghaan sa Ministeryo. * O ila tingaling hinumdoman ang panahon nga sila unang nakabasag teksto sa Bibliya diha sa balay-balay nga pagsangyaw kauban sa ilang mga ginikanan. Makalimtan ba god nila ang ilang pagpamati samtang basahan sila sa ilang mga ginikanan sa Akong Basahon sa mga Estorya sa Bibliya o sa Pagpatalinghog sa Dakong Magtutudlo? * Si Gabriel mahinumdom sa butang nga iyang nagustohan pag-ayo: “Sa dihang upat ka tuig pa lang ang akong edad, ako kantahan kada adlaw sa akong inahan samtang siya magluto. Makahinumdom ako nga may kamingaw sa usa ka awit sa Gingharian. Sa ulahi, kadto nakatabang kanako sa pagsabot sa kahinungdanon sa pag-alagad kang Jehova.” Tingali mahinumdom ka usab sa nindot nga awit nga gitumong ni Gabriel. Kini mao ang numero 157 sa alawiton nga Mag-awit ug mga Pagdayeg Kang Jehova, ug kini may ulohang “Magsimba Kang Jehova Samtang Batan-on.”

Kini ang sinugdan sa awit: “Sa Diyos nagdayeg  ang kabataan;/Ug si Jesus ilang giawitan.” Sa pagkatinuod, may mga bata nga nakapribilehiyo sa pagpakig-uban kang Jesus, ug lagmit sila nakapahimuot kaniya tungod sa ilang kapiskay ug pagkamatinud-anon. Gigamit gani ni Jesus ang pagkadaling-tudloan sa mga bata ingong panig-ingnan nga sundon sa iyang mga sumusunod. (Mateo 18:3, 4) Busa ang mga bata adunay angayan nga dapit diha sa pagsimba kang Jehova. Ngani, ang awit nagpadayon: “Sa ngalan sa Diyos [ang mga bata] nagabalaan.”

Pinaagi sa ilang sulondang panggawi—diha sa balay, sa tunghaan, ug sa ubang dapit—ang daghang bata nagpasidungog sa Diyos ug sa ilang pamilya. Talagsaong panalangin alang kanila nga sila adunay ‘Kristohanong mga ginikanan nga motudlo sa kabataan.’ (Deuteronomio 6:7) Ang diyosnong mga ginikanan nagtuman sa gisulti sa Diyos, si kinsa ingong mahigugmaong Amahan, nagtudlo sa iyang mga linalang sa paglakaw sa dalan nga angay nilang subayon. Ug pagkatalagsaong panalangin ang ilang madawat! Samtang ilang tudloan usab ang ilang gagmay pang mga anak, pagkamalipayon nila nga sila nakabaton ug mga anak nga ‘may katahoran, mosugot’! (Isaias 48:17, 18) Si Angélica, kinsa nag-alagad karon sa sangang buhatan sa mga Saksi ni Jehova sa Mexico, nag-ingon: “Ang akong mga ginikanan kanunayng naningkamot sa pagpadapat sa mga prinsipyo sa Bibliya. Kana naghimo sa panahon sa akong pagkabatan-on nga kahimut-anan kaayo. Ako malipayon.”

Ang maong mga Kristohanon mouyon nga mapuslanon ang pag-atiman pag-ayo sa inyong espirituwal nga kabilin. Tingali ikaw maoy usa ka batan-on nga gipadako sa pamilyang adunay tinuod nga Kristohanong mga prinsipyo. Kon tinuod kana, ang samang awit nag-awhag kaninyo: “Magmahinlo mo [Kristohanong kabataan].” Moabot ang panahon nga ikaw mismo ang mohimog mga desisyon, busa karon “Diyos ang saligan./Ayaw pangitaa ang kabantogan.”

Kon ikaw masayop sa pag-una sa kabantogan diha sa imong kinabuhi, ang tanang pagbansay nga imong nadawat makawang ug ikaw makadaot sa imong mga palaaboton. Ang pagtinguha sa kabantogan mahimong mosangpot nga ikaw dili na magmabinantayon. Ang resulta mao nga ang pipila nakig-uban sa mga tawo kinsa, bisan pag dili daotang mga tawo, nga aduna pay madanihong panagway, walay interes sa Kristohanong mga sukdanan. Kana giilustrar ni Tara, nga maoy pangunang karakter nga gihulagway sa video nga Young People Ask—How Can I Make Real Friends? Sama kang Tara, si bisan kinsang batan-ong Kristohanon nga makig-uban niadtong walay pagpabili sa matuod nga pagsimba makadiskobre nga sa madugay o sa madali “kuyaw ang daotang kaubanan,” sumala sa awit. Dangtag daghang katuigan ang pag-ugmad ug maayong mga batasan, apan kana dali kaayo nga daoton.

Tinuod, dili sayon ang pagkinabuhi nga may kahadlok sa Diyos. Bisan pa niana, sumala sa pagpadayon sa awit, “kon ang Diyos sa imong  handumanan,/Nagasilbi sa kamatuoran,” imong matukod ang lig-ong patukoranan alang sa tinuod nga kalamposan. Ug “sa nagakahingkod ka, madugangan ang kalipay mo.” Mas makapabili ka nga ubos sa mahigugmaong pag-atiman ni Jehova, walay makapugong kanimo sa pagbuhat kon unsay matarong sa iyang panan-aw. Kana mao ang paagi sa pagkahimo nga usa ka hamtong, diyosnong hingkod nga tawo. Labaw pa niana, ang maalamong pagpahimulos sa Kristohanong pagmatuto mohatag kanimo sa kahigayonan aron “ang kalipay mo sa Diyos mao man.” Duna bay mas dakong pribilehiyo nga maangkon sa usa ka tawo kay niana?—Proverbio 27:11.

Busa, mga batan-on, hinumdomi kanunay kon unsa ka bililhon ang pagbansay nga gikan ni Jehova ug sa imong Kristohanong mga ginikanan. Hinaot ang ilang dakong gugma kanimo magdasig kanimo sa pagbuhat kon unsay kahimut-anan sa panan-aw ni Jehova. Sama kang Jesu-Kristo ug sa matinumanong batan-on nga si Timoteo, mapalipay nimo ang imong langitnong Amahan ug ang imong tawhanong mga ginikanan. Ug kon ikaw mahimong ginikanan, lagmit mouyon ka kang Angélica, nga gihisgotan ganina, kinsa nag-ingon: “Kon ugaling ako adunay anak, manlimbasog gayod ako nga ibutang ang paghigugma kang Jehova diha sa iyang kasingkasing sukad sa pagkabata pa, nga himoon kana nga maoy iyang labing bililhong prinsipyo sa kinabuhi.” Segurado, ang matarong nga dalan nga motultol sa kinabuhing dayon mao ang labing bililhong kabilin!

[Mga footnote]