Ang mga Graduwado sa Gilead Nanglakaw Ingong Masibotong mga Mag-aani!

“DAKO ang alanihon, apan diyutay ra ang mga mamumuo. Busa, pangamuyo kamo sa Agalon sa pagpangani nga magpadalag mga mamumuo ngadto sa iyang pagpangani.” (Mateo 9:37, 38) Kanang mga pulonga adunay linaing kahulogan alang sa migraduwar nga mga estudyante sa ika-116 nga klase sa Watchtower Bible School of Gilead samtang sila nangandam sa pag-adto sa ilang misyonaryong mga asaynment.

Sa Sabado, Marso 13, 2004, 6,684 ka tawo ang nagtigom sa Watchtower Educational Center sa Patterson, New York, ug sa uban pang mga lugar diin ang programa sa graduwasyon makita pinaagi sa telebisyon, diin ang klase nakadawat ug panamilit nga pahimangno ug pagdasig. Kitang tanan makakuhag kaayohan gikan sa tambag nga gihatag, samtang kita masibotong nagapakigbahin sa espirituwal nga pagpangani.

Ang pangbukas nga pakigpulong ni Theodore Jaracz, usa ka membro sa Nagamandong Lawas ug graduwado sa ikapitong klase sa Gilead, nagpasiugda sa mga pulong ni Jesus: “Panglakaw kamo ug paghimog mga tinun-an sa katawhan sa tanang kanasoran.” (Mateo 28:19, 20) Pagkahaom gayod niana, sanglit ang mga migraduwar ipadala man ngadto sa 20 ka lainlaing mga nasod! Iyang gipahinumdoman ang mga estudyante nga ang instruksiyon gikan sa Pulong sa Diyos bug-os nga nagsangkap kanila nga mahimong masibotong mga mamumuo sa hinungdanon kaayong espirituwal nga pagpangani.—Mateo 5:16.

Kon sa Unsang Paagi Mahimong Mabungahong mga Mag-aani

Ang unang mamumulong sa programa mao si Robert Wallen, kinsa nalangkit pag-ayo sa Tunghaang Gilead sa daghang tuig. Namulong bahin sa tema nga “Ang Katahom sa Pagkamabination,” iyang giingnan ang mga estudyante: “Ang pagkamabination mao ang pinulongan nga madungog bisan sa mga bungol ug makita bisan sa mga buta.” Nahibalo gayod si Jesus sa mga kasakitan sa ubang mga tawo ug naningkamot siya sa paghupay niana. (Mateo 9:36) Makakaplag ang mga estudyante ug daghang kahigayonan sa paghimo usab niana—diha sa buluhatong pagsangyaw, sa kongregasyon, sa puy-anan sa mga misyonaryo, ug sa kaugalingon nilang kaminyoon. Giawhag sila sa mamumulong: “Tugoti ang katahom sa pagkamabination nga mapadayag mismo sa inyong kinabuhi samtang kamo magaalagad sa uban. Ang inyong kinamaayohang paggawi gikinahanglan gayod sa inyong adlaw-adlaw nga pagkinabuhi diha sa puy-anan sa mga misyonaryo. Busa, isul-ob gayod ninyo ang pagkamabination.”—Colosas 3:12.

Sunod, si Gerrit Lösch, usa ka membro sa Nagamandong Lawas ug graduwado sa ika- 41 nga klase sa Gilead, nagtagik sa ulohang “Mga Magmamantala sa Kaluwasan.” (Isaias 52:7) Aron maluwas ang mga tawo sa dihang laglagon na ang presenteng sistema sa mga butang, sila kinahanglang mokuha ug tukmang kahibalo gikan sa Pulong sa Diyos, mohimog publikong pagpahayag sa ilang pagtuo, ug magpabawtismo. (Roma 10:10; 2 Timoteo 3:15; 1 Pedro 3:21) Apan, ang pangunang katarongan sa pagmantala sa kaluwasan, dili ang pagluwas sa mga tawo, kondili ang pagdayeg sa Diyos. Busa, si Brader Lösch nagtambag sa umaabot nga mga misyonaryo: “Dad-a ang mensahe sa Gingharian  ngadto sa kinatumyan sa yuta, ug magmasiboton ingong mga magmamantala sa kaluwasan, ang tanan alang sa kadayeganan ni Jehova.”—Roma 10:18.

Nangutana ang instruktor sa Gilead nga si Lawrence Bowen, “Sa Unsang Paagi Imong Isumbalik-Silaw ang Espirituwal nga Kahayag?” Iyang gipunting ang giingon ni Jesus nga natala diha sa Mateo 6:22 ug gidasig ang migraduwar nga mga estudyante sa paghupot sa ilang mga mata nga “yano” aron ilang “masumbalik-silaw ang espirituwal nga kahayag nga maghimaya kang Jehova ug makabenepisyo sa mga isigkatawo.” Sukad sa sinugdan sa iyang ministeryo, si Jesus naghatag ug hingpit nga panig-ingnan maylabot niini pinaagi sa pagsentro kanunay sa iyang pagtagad diha sa pagtuman sa kabubut-on sa Diyos. Ang pagpamalandong sa kahibulongang mga butang nga gitudlo sa iyang Amahan kaniya didto sa langit nakatabang kang Jesus sa pag-antos sa mga pagsulay ni Satanas didto sa kamingawan. (Mateo 3:16; 4:1-11) Gipasundayag ni Jesus ang bug-os nga pagsalig kang Jehova sa pagtuman sa gipabuhat sa Diyos kaniya. Sa samang paagi, aron masagubang ang mga kalisdanan sa unahan, kinahanglang ipadayon sa mga misyonaryo ang ilang maayong mga batasan sa pagtuon sa Bibliya ug bug-os nga mosalig kang Jehova.

Si Mark Noumair, usa ka instruktor sa Gilead ug graduwado sa ika-77 nga klase sa Gilead, nagtapos niining maong serye sa mga pakigpulong, nga naghisgot bahin sa tema nga “Ania Kami sa Imong mga  Kamot.” (Josue 9:25) Iyang gidasig ang mga estudyante sa pagsundog sa tinamdan sa karaang mga Gabaonhon. Bisan tuod ang Gabaon maoy ‘usa ka dakong siyudad ug ang tanang lalaki niini mga kusgan,’ ang mga Gabaonhon wala magtinguha nga mainila o magdahom nga mabatonan ang mga butang sumala sa ilang gusto. (Josue 10:2) Sila kinabubut-ong nag-alagad ingong “mga mangangahoy ug mga magkakalos ug tubig” ubos sa mga Levihanon aron sa pagpaluyo sa pagsimba ni Jehova. (Josue 9:27) Sa diwa, ang mga membro sa migraduwar nga klase miingon ngadto sa Dakong Josue, si Jesu-Kristo, “Ania kami sa imong mga kamot.” Karon, samtang ilang sugdan ang ilang langyaw nga mga asaynment, kinahanglan nilang dawaton ang bisan unsang buluhaton nga ipabuhat kanila sa Dakong Josue.

Mga Eksperyensiya ug mga Interbiyo

Ang tema nga gihisgotan ni Wallace Liverance, usa ka graduwado sa ika-61 nga klase sa Gilead ug usa sa mga instruktor, uban sa usa ka grupo sa mga estudyante, maoy “Buksi sa Bug-os ang Kasulatan.” Ilang giasoy ug giakto ang mga eksperyensiya nga ilang nasinatian sa pagsangyaw sa kanataran panahon sa ilang pagtungha. Dayag nga ang ilang bug-os nga pagtuon sa Kasulatan sulod sa ilang lima ka bulan nga pagbansay nakaabot sa ilang kasingkasing ug nakapalihok kanila sa pagpaambit sa ilang nakat-onan ngadto sa uban. (Lucas 24:32) Sulod sa lima ka bulan nga kurso, usa ka estudyante ang nakapaambit sa iyang nakat-onan ngadto sa iyang igsoong lalaki sa unod. Kini nakadasig sa iyang igsoon sa pagpangita sa lokal nga kongregasyon ug pagsugod sa kaugalingon niyang pagtuon sa Bibliya. Siya kuwalipikado na karon nga mahimong dili-bawtismadong magmamantala.

Human sa maong mga eksperyensiya, si Richard Ashe ug John Gibbard nag-interbiyo sa pipila ka dugay nang matinumanong mga alagad ni Jehova, nga naglakip sa nagapanawng mga magtatan-aw nga nakadawat ug linaing pagbansay didto sa Watchtower Educational Center. Sila mga graduwado usab sa nag-unang mga klase sa Tunghaang Gilead. Ang usa kanila nahinumdom nga si Brader Knorr miingon niini panahon sa ilang pagtungha: “Kanunay mong magtuon dinhi sa Gilead. Apan kon modako ang inyong ulo iniggawas ninyo, napakyas kami. Buot namo nga mogawas kamo nga may dakong kasingkasing.” Gitambagan sa nagapanawng mga igsoon ang presenteng klase nga magmahunahunaon sa mga tawo ug sa ilang mga panginahanglan, nga makiglabot sa uban sama sa gihimo ni Kristo, ug mapainubsanong dawaton ang bisan unsang mga asaynment nga ihatag kanila. Ang pagpadapat niining tambaga sa walay duhaduha makatabang sa bag-ong mga misyonaryo nga magmabungahon sa ilang mga asaynment.

Panglakaw Kamo Ingong Masibotong mga Mag-aani!

Ang mamiminaw may kahigayonan sa pagpaminaw kang Stephen Lett, laing membro sa Nagamandong Lawas. Iyang gipahayag ang pangunang pakigpulong sa programa, nga nag-ulohang “Panglakaw Kamo Ingong Masibotong mga Mag-aani!” (Mateo 9:38) Sa literal nga pagpangani, limitado ang panahon sa pag-ani. Kinahanglang magkugi pag-ayo ang mga mag-aani. Mas hinungdanon pa gayod kana panahon sa kataposan niining sistema sa mga butang! Sa dakong espirituwal nga pagpangani, nameligro ang mga kinabuhi. (Mateo 13:39) Gidasig ni Brader Lett ang mga migraduwar nga dili ‘maglangaylangay sa ilang buluhaton,’ kondili “magmainiton sa espiritu” ug “magpaulipon kang Jehova” niining dili na gayod masubli nga pagpangani. (Roma 12:11) Ang mamumulong nagkutlo sa mga pulong ni Jesus: “Iyahat ang inyong mga mata ug lantawa ang kaumahan, nga kini puti na aron anihon.” (Juan 4:35) Dayon iyang giawhag ang mga migraduwar sa pagpasundayag sa ilang kasibot alang sa buluhatong pagpangani pinaagi sa pagpaningkamot gayod sa pagpakig-estorya sa mga tawo bisan kanus-a ug bisan asa sila makaplagan ug pinaagi sa pagpahimulos sa tanang kahigayonan sa paghimog di-pormal nga pagsangyaw. Ang pagkaalisto sa pagmugnag mga kahigayonan makatabang sa paghimog epektibong pagpamatuod. Si Jehova maoy usa ka masibotong Diyos, ug gidahom niya nga kitang tanan mosundog kaniya ug magkugi diha sa espirituwal nga pagpangani.—2 Hari 19:31; Juan 5:17.

Sa pagtapos sa programa, ang tsirman, si Brader Jaracz, nagbasa sa mga pangomosta gikan sa daghang sangang buhatan ug naghatag sa mga estudyante sa ilang mga diploma. Usa sa mga migraduwar ang mibasa sa sulat gikan sa klase, nga nagpahayag ug dakong pagpasalamat sa pagbansay nga ilang nadawat. Dayag nga ang programa sa graduwasyon sa ika-116 nga klase nakapahimo sa tanang nanambong nga mas pang determinado sa pagpanglakaw ingong masibotong mga mag-aani.

[Kahon sa panid 25]

ESTADISTIKA SA KLASE

Gidaghanon sa mga nasod nga gihawasan: 6

Gidaghanon sa mga nasod nga gipadalhan: 20

Gidaghanon sa mga estudyante: 46

Aberids nga edad: 34.2

Aberids nga katuigan sa kamatuoran: 17.2

Aberids nga katuigan sa bug-os-panahong ministeryo: 13.9

[Hulagway sa panid 26]

Ika-116 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.