‘Gitudloan Niya Kami sa Pagtahod sa Iyang Relihiyon’

NAHIBALOAN sa usa sa mga Saksi ni Jehova nga nagpuyo sa probinsiya sa Rovigo, Italya, nga duna siyay tumor ug grabe ang iyang kahimtang. Human siya maospital sa makadaghan, nga sa maong panahon mihangyo siya nga tambalan nga dili abonohag dugo, gitabangan siya diha sa iyang balay sa mga nars nga gikan sa lokal nga institusyon nga nagtaganag mga nars aron tabangan ang mga pasyente nga dunay kanser.

Nakadayeg kaayo ang mga doktor ug mga nars nga nag-atiman kaniya tungod sa lig-ong pagtuo ug pagkaandam nga mokooperar niining 36-anyos nga pasyente. Sa wala pa mamatay ang pasyente tungod sa kanser, usa sa mga nars nga mitabang kaniya misulat diha sa usa ka magasin bahin sa mga nars labot sa kasinatian uban sa pasyente nga gitawag niyang Angela.

“Si Angela madasigon ug determinadong mabuhi. Siya nahibalo sa iyang kahimtang ug sa iyang grabeng balatian, ug sama kanato, siya nangitag solusyon, usa ka tambal, o usa ka medisina. . . . Kaming mga nars anam-anam nga nasinati kaniya. Wala siya mosupak sa among tabang. Sa kasukwahi, ang pagkaprangka ni Angela nakapasayon sa tanang butang. Makapalipay ang pag-atiman kaniya, tungod kay nahibalo kami nga kadto maoy usa ka panahon sa pagpakighimamat ug sinsero nga tawo diin kaming tanan makabenepisyo. . . . Amo dayong naamgohan nga ang iyang relihiyon mahimong babag sa pag-atiman sa iyang balatian.” Mao kanay hunahuna sa nars tungod kay gibati niya nga si Angela kinahanglang abonohag dugo, apan gidumilian kadto ni Angela.—Buhat 15:28, 29.

“Ingong propesyonal nga mga tig-atiman sa panglawas, among giingnan si Angela nga wala mi mouyon sa iyang desisyon, apan sa iyang tabang, among nasabtan kon unsay kahulogan sa kinabuhi alang kaniya. Among nasabtan usab ang kahinungdanon sa iyang relihiyon alang kaniya ug sa iyang pamilya. Si Angela wala mosurender. Wala siya magpadaog sa iyang balatian. Lig-on siya. Gusto niyang mabuhi, makigbisog, ug magpabiling buhi. Gipahayag niya ang iyang determinasyon ug iyang pagtuo. Aduna siyay determinasyon nga subsob wala namo mabatoni, usa ka pagtuo, nga mas lig-on kay sa among pagtuo. . . . Si Angela nagtudlo kanamo sa kahinungdanon sa pagtahod sa iyang relihiyon, bisan pag lahi ang gidiktar sa among propesyonal nga mga prinsipyo. . . . Kami nagtuo nga ang gitudlo ni Angela kanamo hinungdanon gayod, tungod kay masinati namo ang tanang matang sa mga tawo, tanang matang sa kahimtang, ug tanang matang sa relihiyon, ug kami makakat-on ug makatanyag ug usa ka butang ngadto sa tanan namong mahibalag.”

Dayon gipasiugda sa artikulo sa magasin ang Kalagdaan sa Propesyonal nga mga Prinsipyo Alang sa Italyanong mga Nars, nga giaprobahan niadtong 1999, nga nag-ingon: “Ang nars mohimo sa iyang tulumanon, nga magatahod sa relihiyoso, moral, ug kultural nga mga prinsipyo sa usa ka tawo, maingon man sa rasa ug sekso.” Usahay, malisdan tingali ang mga doktor ug mga nars sa pagtahod sa relihiyosong mga kombiksiyon sa usa ka pasyente, apan ang usa ka tawo mapabilhon ug mapasalamaton gayod niadtong andam nga mohimo niana.

Ang mga desisyon nga ginahimo sa mga Saksi ni Jehova maylabot sa ilang panglawas ug medikal nga pag-atiman gipamalandong pag-ayo. Seryoso nilang gikonsiderar kon unsay giingon sa Kasulatan, ug sama sa giilustrar sa kahimtang ni Angela, sila dili mga panatiko. (Filipos 4:5) Sa tibuok kalibotan, nagkadaghan ang mga doktor ug mga nars nga andam motahod sa tanlag sa ilang mga pasyenteng Saksi.