Pabilhi ang Imong Gasa sa Kinabuhi sa Hustong Paagi
Pabilhi ang Imong Gasa sa Kinabuhi sa Hustong Paagi
‘Ang dugo ni Kristo magahinlo sa atong mga tanlag gikan sa patay nga mga buhat aron makahimo kitag sagradong pag-alagad ngadto sa buhi nga Diyos.’—HEBREOHANON 9:14.
1. Unsay pamatuod nga gipabilhan gayod nato ang kinabuhi?
KON pangutan-on ka kon pilay balor sa imong kinabuhi, unsa may imong tubag? Gipabilhan gayod nato ang kinabuhi—ang atoa ug kanang iya sa uban. Ingong pamatuod niana, kita tingali magpadoktor aron maatiman kon kita masakit o regular nga magpahiling. Gusto natong magpabiling buhi ug maayog lawas. Bisan ang kadaghanan sa mga tigulang ug baldado dili gustong mamatay; gusto nilang magpabiling buhi.
2, 3. (a) Ang Proverbio 23:22 nagpasiugda sa unsang obligasyon? (b) Sa unsang paagi nalangkit ang Diyos sa obligasyon nga gihisgotan diha sa Proverbio 23:22?
2 Ang imong pagpabili sa kinabuhi nag-apektar sa imong relasyon sa uban. Pananglitan, ang Pulong sa Diyos nagsugo: “Pamati sa imong amahan nga nanganak kanimo, ug ayaw tamaya ang imong inahan tungod lang kay siya tigulang na.” (Proverbio 23:22) Ang ‘pagpamati’ nagpasabot ug labaw pa kay sa pagkadungog lamang sa mga pulong; kining maong proverbio nagpasabot ug pagkadungog ug dayon pagtuman niana. (Exodo 15:26; Deuteronomio 7:12; 13:18; 15:5; Josue 22:2; Salmo 81:13) Unsang rason ang gihatag sa Pulong sa Diyos sa pagpamati sa imong mga ginikanan? Dili lang tungod kay ang imong amahan ug inahan mas tigulang kay kanimo ug mas taas ug kasinatian. Ang rason nga gihatag mao nga sila “nanganak kanimo.” Ang ubang mga bersiyon naghubad niining bersikuloha nga: “Pamati sa imong amahan nga naghatag kanimog kinabuhi.” Masabot nga kon gipabilhan nimo ang imong kinabuhi, gibati nimong duna kay obligasyon sa tuboran sa imong kinabuhi.
3 Siyempre, kon ikaw tinuod nga Kristohanon, imong giila si Jehova ingong pangunang Tuboran sa imong kinabuhi. Pinaagi kaniya ikaw “adunay kinabuhi” mismo; ikaw ‘makalihok,’ adunay katakos nga mobati; ug karon ikaw “naglungtad” ug makahunahuna o makaplano sa umaabot, lakip na sa walay-kataposang kinabuhi. (Buhat 17:28; Salmo 36:9; Ecclesiastes 3:11) Kaharmonya sa Proverbio 23:22, angayan lamang nga ‘mamati’ sa Diyos sa matinumanong paagi, nga gustong makasabot ug magiyahan sa iyang panglantaw sa kinabuhi imbes pilion ang ubang panglantaw sa kinabuhi.
Ipakita ang Pagtahod sa Kinabuhi
4. Sa sayong bahin sa kasaysayan sa tawo, sa unsang paagi ang pagtahod sa kinabuhi nahimong isyu?
4 Sa sayong bahin sa kasaysayan sa tawo, gitin-aw ni Jehova nga wala niya tugoti ang mga tawo sa paggamit (o pag-abuso) sa kinabuhi tungod sa bisan unsang hinungdan. Kay natugob sa masinahong kapungot, gihunos ni Cain ang inosenteng kinabuhi, ang kinabuhi sa iyang igsoon nga si Abel. Sa imong hunahuna may katungod ba si Cain sa paghimo sa maong desisyon bahin sa kinabuhi? Ang Diyos wala maghunahuna nga nabatonan ni Cain ang maong katungod. Iyang gipapanubag si Cain: “Unsay gibuhat mo? Pamati! Ang dugo sa imong igsoon nagatuaw kanako gikan sa yuta.” (Genesis 4:10) Matikdi nga ang dugo ni Abel nga giula diha sa yuta naghawas sa iyang kinabuhi, nga gihunos ug ahat sa mabangis nga paagi, ug kini nagatuaw ngadto sa Diyos alang sa panimalos.—Hebreohanon 12:24.
5. (a) Unsay gidili sa Diyos sa adlaw ni Noe, ug kang kinsa kana gipadapat? (b) Sa unsang diwa nga kining maong pagdili maoy usa ka hinungdanong lakang?
5 Human sa Lunop, ang katawhan nagsugod pag-usab uban sa walo lamang ka kalag. Diha sa usa ka pahayag nga mapadapat sa tanang tawo, ang Diyos nagpadayag ug labaw pa niini bahin sa paagi nga iyang gipabilhan ang kinabuhi ug dugo. Siya miingon nga ang mga tawo makakaon sa unod sa mananap, apan iyang gipatuman kining maong pagdili: “Ang matag nagalihok nga mananap nga buhi mahimong kalan-on alang kaninyo. Mahitungod sa lunhawng katanoman, ako naghatag niining tanan kaninyo. Ang unod lamang uban sa kalag niini—ang dugo niini—dili gayod ninyo pagakan-on.” (Genesis 9:3, 4) Ang ubang mga Hudiyo nagtuo nga kana nagpasabot nga ang mga tawo wala tugoti sa pagkaon sa unod o dugo sa mananap nga buhi pa. Apan sa ulahi klarong gipakita nga ang gidili sa Diyos dinhi mao ang pagkaon ug dugo aron sa pagpatunhay sa kinabuhi. Dugang pa, ang sugo sa Diyos pinaagi kang Noe maoy pangunang lakang ngadto sa pagpalampos sa Iyang hamiling katuyoan maylabot sa dugo—usa ka katuyoan nga magtugot sa mga tawo sa pagbaton ug walay-kataposang kinabuhi.
6. Pinaagi kang Noe, sa unsang paagi gipasiugda sa Diyos ang Iyang panglantaw sa bili sa kinabuhi?
6 Ang Diyos nagpadayon pagsulti: “Ang inyong dugo sa inyong mga kalag akong paninglon. Gikan sa kamot sa matag buhing linalang ako kining paninglon; ug gikan sa kamot sa tawo, gikan sa kamot sa matag usa nga iyang igsoon, akong paninglon ang kalag sa tawo. Ang bisan kinsa nga magaula ug dugo sa tawo, pinaagi sa tawo ang iyang kaugalingong dugo igaula, kay sa larawan sa Diyos iyang gibuhat ang tawo.” (Genesis 9:5, 6) Masabtan nimo gikan niining maong pahayag ngadto sa tibuok tawhanong pamilya nga gilantaw sa Diyos ang dugo sa tawo ingong naghawas sa iyang kinabuhi. Ang Maglalalang naghatag sa tawo ug kinabuhi, ug walay usa ang angayng mohunos sa maong kinabuhi, nga gihawasan sa dugo. Kon, sama kang Cain, dunay makapatay, ang Maglalalang adunay katungod sa ‘pagpaningil’ sa kinabuhi sa mamumuno.
7. Nganong angay kang mainteres sa gipahayag sa Diyos ngadto kang Noe bahin sa dugo?
7 Pinaagi sa iyang gipahayag, ang Diyos nagsugo sa mga tawo nga dili gamiton ang dugo sa sayop nga paagi. Naghunahuna ka ba sukad kon nganong gihatag sa Diyos ang maong sugo? Unsay hinungdan sa pagbaton sa Diyos sa maong panglantaw labot sa dugo? Sa pagkatinuod, ang tubag adunay kalabotan sa labing hinungdanong mga pagtulon-an sa Bibliya. Kana maoy pasukaranan sa Kristohanong mensahe, bisan tuod daghang relihiyon ang wala manumbaling niana. Unsa man kanang maong pagtulon-an, ug sa unsang paagi nalangkit ang imong kinabuhi, mga desisyon, ug mga lihok?
Dugo—Sa Unsang Paagi Kini Gamiton?
8. Sa Balaod, unsang pagdili ang gihatag ni Jehova bahin sa paggamit sa dugo?
8 Si Jehova naghatag ug dugang mga detalye bahin sa kinabuhi ug dugo sa dihang iyang gihatag sa Israel ang Balaod. Sa paghimo niana, siya mihimog dugang lakang sa pagtuman sa iyang katuyoan. Lagmit nahibalo ka nga ang Balaod nagkinahanglan ug mga halad ngadto sa Diyos, sama sa lugas, lana, ug bino. (Levitico 2:1-4; 23:13; Numeros 15:1-5) Diha usay mga halad nga mananap. Ang Diyos miingon bahin niini: “Ang kalag sa unod anaa sa dugo, ug ako nagbutang niini diha sa halaran alang kaninyo aron sa paghimog pagtabon-sa-sala alang sa inyong mga kalag, tungod kay ang dugo ang nagahimog pagtabon-sa-sala pinaagi sa kalag nga anaa niana. Mao kana nga ako miingon sa mga anak sa Israel: ‘Walay kalag diha kaninyo ang magakaon ug dugo.’” Si Jehova midugang nga kon adunay tawo, sama sa usa ka mangangayam o mag-uuma, nga mag-ihaw ug mananap aron kan-on, kinahanglang paawason niya ang dugo ug tabonan kana sa abog. Ang yuta mao ang tumbanan sa mga tiil sa Diyos, ug pinaagi sa pagyabo sa dugo diha sa yuta, giila sa tawo nga ang kinabuhi gibalik ngadto sa Maghahatag-ug-Kinabuhi.—Levitico 17:11-13; Isaias 66:1.
9. Unsa ang bugtong kagamitan sa dugo nga gipaila diha sa Balaod, ug unsay katuyoan niini?
9 Ang maong balaod dili lamang usa ka relihiyosong rituwal nga walay kahulogan alang kanato. Namatikdan ba nimo kon nganong ang mga Israelinhon wala pakan-a ug dugo? Ang Diyos miingon: “Mao kana nga ako miingon sa mga anak sa Israel: ‘Walay kalag diha kaninyo ang magakaon ug dugo.’” Unsay rason? “Ako nagbutang [sa dugo] diha sa halaran alang kaninyo aron sa paghimog pagtabon-sa-sala alang sa inyong mga kalag.” Nasabtan ba nimo nga kini naghatag ug katin-awan kon nganong giingnan sa Diyos si Noe nga ang mga tawo dili pakan-on ug dugo? Ang Maglalalang nakahukom nga isipon ang dugo nga hinungdanon kaayo, nga naggahin niana alang sa usa ka linaing kagamitan nga makaluwas ug daghang kinabuhi. Kini adunay hinungdanong bahin sa pagtabon sa mga sala. Busa ilalom sa Balaod, ang bugtong giawtorisahan sa Diyos nga paggamit sa dugo maoy diha sa halaran aron sa pagtabon sa sala sa mga Israelinhon, nga nagtinguha sa kapasayloan ni Jehova.
10. Nganong ang dugo sa mananap dili motultol sa bug-os nga kapasayloan, apan unsang pahinumdom ang gihatag sa mga halad ilalom sa Balaod?
10 Kining maong ideya bahin sa dugo dili sukwahi sa Kristiyanidad. Naghisgot niining bahina sa Balaod nga gihikay sa Diyos, ang Kristohanong apostol nga si Pablo misulat: “Halos ang tanang butang mahinloan pinaagi sa dugo sumala sa Balaod, ug gawas kon igaula ang dugo walay mahitabo nga pagpasaylo.” (Hebreohanon 9:22) Gitin-aw ni Pablo nga ang gikinahanglan nga mga halad wala maghimo sa mga Israelinhon nga hingpit, walay sala nga mga tawo. Siya misulat: “Pinaagi niini nga mga halad adunay pagpahinumdom sa mga sala tuigtuig, kay ang dugo sa torong mga baka ug mga kanding dili man makakuha sa mga sala.” (Hebreohanon 10:1-4) Bisan pa niana, ang maong mga halad mapuslanon. Kini nagpahinumdom sa mga Israelinhon nga sila makasasala ug nagkinahanglan ug labaw pa aron makabaton ug bug-os nga kapasayloan. Apan kon ang dugo nga naghawas sa kinabuhi sa mga mananap dili bug-os nga magtabon sa sala sa mga tawo, aduna bay dugo nga makatabon niana?
Ang Solusyon sa Maghahatag ug Kinabuhi
11. Sa unsang paagi kita nahibalo nga ang halad nga dugo sa mananap nagpunting sa usa ka butang?
11 Sa pagkatinuod, ang Balaod nagpunting sa usa ka butang nga mas epektibo kay sa pagtuman sa kabubut-on sa Diyos. Si Pablo nangutana: “Ngano pa man ang Balaod? Gidugang kini aron madayag ang mga kalapasan, hangtod nga ang binhi moabot kang kinsa gihimo ang saad; ug kini gipadangat pinaagi sa mga manulonda pinaagi sa kamot sa usa ka tigpataliwala [si Moises].” (Galacia 3:19) Sa susama, si Pablo misulat: “Ang Balaod may landong man sa maayong mga butang nga moabot, apan dili ang matuod nga dagway mismo sa mga butang.”—Hebreohanon 10:1.
12. Mahitungod sa dugo, sa unsang paagi masabtan nato ang pagpadayag sa katuyoan sa Diyos?
12 Sa pagsumaryo, hinumdomi nga sa adlaw ni Noe ang Diyos nagsugo nga ang mga tawo makakaon ug karne sa mananap aron mabuhi, apan dili sila puwedeng mokaon ug dugo. Sa ulahi, ang Diyos miingon nga “ang kalag sa unod anaa sa dugo.” Sa pagkatinuod, iyang gilantaw ang dugo ingong naghawas sa kinabuhi ug miingon: “Ako nagbutang [sa dugo] diha sa halaran alang kaninyo aron sa paghimog pagtabon-sa-sala alang sa inyong mga kalag.” Apan, dihay kahibulongang pagpadayag sa katuyoan sa Diyos. Ang Balaod naglandong sa maayong mga butang nga moabot. Unsa man kana?
13. Nganong hinungdanon ang kamatayon ni Jesus?
13 Ang katinuoran nasentro diha sa kamatayon ni Jesu-Kristo. Ikaw nahibalo nga si Jesus gisakit ug gilansang. Siya namatay nga samag kriminal. Si Pablo misulat: “Si Kristo, samtang kita maluya pa, namatay alang sa dili-diyosnong mga tawo sa tinudlong panahon. . . . Ang Diyos nagrekomendar sa iyang kaugalingong gugma kanato sa pagkaagi nga, samtang kita mga makasasala pa, si Kristo namatay alang kanato.” (Roma 5:6, 8) Ingong resulta sa iyang pagkamatay alang kanato, si Kristo nagtagana ug lukat aron sa pagtabon sa atong mga sala. Ang maong lukat maoy pasukaranan sa Kristohanong mensahe. (Mateo 20:28; Juan 3:16; 1 Corinto 15:3; 1 Timoteo 2:6) Unsay kalabotan niini sa dugo ug kinabuhi, ug sa unsang paagi nalangkit ang imong kinabuhi?
14, 15. (a) Sa unsang paagi ang ubang mga hubad sa Efeso 1:7 nagpasiugda sa kamatayon ni Jesus? (b) Unsang kamatuoran bahin sa Efeso 1:7 ang lagmit nga masayloan?
14 Ang ubang mga relihiyon nagpasiugda sa kamatayon ni Jesus, ang mga sumusunod niini nagsulti ug mga butang sama sa “si Jesus namatay alang kanako.” Tagda kon giunsa pagbadbad sa pipila ka hubad sa Bibliya ang Efeso 1:7: “Diha kaniya ug pinaagi sa iyang kamatayon nga kita naluwas, sa ato pa, ang pagwagtang sa atong mga kasal-anan.” (The American Bible, ni Frank Scheil Ballentine, 1902) “Pinaagi sa kamatayon ni Kristo kita napahigawas, ug ang atong mga sala napasaylo.” (Today’s English Version, 1966) “Diha ug pinaagi kang Kristo ug sa paghalad sa iyang kinabuhi nga kita napahigawas, usa ka kagawasan nga nagpasabot ug kapasayloan sa mga sala.” (The New Testament, ni William Barclay, 1969) “Pinaagi sa kamatayon ni Kristo nga ang atong mga sala napasaylo ug kita napahigawas.” (The Translator’s New Testament, 1973) Makita nimo sa maong mga hubad ang pagpasiugda sa kamatayon ni Jesus. ‘Apan,’ ang uban tingali moingon, ‘ang kamatayon ni Jesus hinungdanon gayod. Busa, unsay kulang niining maong mga hubad?’
15 Sa pagkatinuod, kon mao lang kana ang imong nabatonang mga hubad, basin masayloan nimo ang hinungdanon kaayong punto, ug kini mahimong maglimite sa imong pagsabot sa mensahe sa Bibliya. Ang maong mga hubad nagtago sa kamatuoran nga ang orihinal nga teksto sa Efeso 1:7 adunay Gregong pulong nga nagpasabot ug “dugo.” Busa, daghang Bibliya, sama sa Bag-ong Kalibotang Hubad, ang mas tukmang naghubad sa maong teksto: “Pinaagi kaniya atong nabatonan ang kagawasan pinaagi sa lukat pinaagi sa iyang dugo, oo, ang kapasayloan sa atong kalapasan, sumala sa bahandi sa iyang dili-takos nga kalulot.”
16. Ang hubad nga “sa iyang dugo” angayng magpahunahuna kanato sa unsa?
16 Ang hubad nga “sa iyang dugo” makahuloganon kaayo ug angayng magpahunahuna kanato sa daghang butang bahin sa dugo. Ang kamatayon sa usa ka tawo dili pa igo, bisan ang kamatayon sa hingpit nga tawo nga si Jesus. Iyang gituman ang gilandongan sa Balaod, ilabina sa Adlaw sa Pagtabon sa Sala. Nianang linain nga adlaw, gihalad ang mga mananap nga gipangayo sa Balaod. Dayon ang hataas nga saserdote nagdala ug bahin sa dugo niini ngadto sa Labing Balaang dapit sa tabernakulo o templo, didto nagtanyag niana sa atubangan sa Diyos, nga daw siya anaa sa iyang presensiya.—Exodo 25:22; Levitico 16:2-19.
17. Sa unsang paagi gituman ni Jesus ang gilandongan sa Adlaw sa Pagtabon sa Sala?
17 Gituman ni Jesus ang gilandongan sa Adlaw sa Pagtabon sa Sala, sumala sa gipatin-aw ni Pablo. Una, iyang gihisgotan nga ang hataas nga saserdote sa Israel misulod sa Labing Balaan kas-a sa usa ka tuig dala ang dugo nga gitanyag “alang sa iyang kaugalingon ug alang sa mga sala tungod sa pagkawalay-alamag sa katawhan.” (Hebreohanon 9:6, 7) Kaharmonya sa maong sumbanan, human mabanhaw ingong espiritu, si Jesus miadto sa langit mismo. Ingong espiritu, nga walay unod-ug-dugo nga lawas, siya makaatubang “sa persona sa Diyos alang kanato.” Unsay iyang gitanyag sa Diyos? Dili butang nga pisikal kondili usa ka butang nga makahuloganon kaayo. Si Pablo nagpadayon: “Sa dihang si Kristo mianhi ingong hataas nga saserdote . . . , siya misulod, dili, dili pinaagi sa dugo sa mga kanding ug sa toreyong mga baka, kondili pinaagi sa iyang kaugalingong dugo, makausa alang sa tanang panahon ngadto sa balaang dapit ug nakabaton sa walay kataposang kaluwasan alang kanato. Kay kon ang dugo sa mga kanding ug sa torong mga baka . . . makapabalaan hangtod sa pagkahinlo sa unod, dili ba labaw pa gayod nga ang dugo ni Kristo, kinsa pinaagi sa walay kataposang espiritu naghalad sa iyang kaugalingon nga walay buling ngadto sa Diyos, magahinlo sa atong mga tanlag gikan sa patay nga mga buhat aron makahimo kitag sagradong pag-alagad ngadto sa buhi nga Diyos?” Oo, gitanyag ni Jesus sa Diyos ang bili sa iyang dugo.—Hebreohanon 9:11-14, 24, 28; 10:11-14; 1 Pedro 3:18.
18. Nganong ang giingon sa Bibliya bahin sa dugo hinungdanon sa mga Kristohanon karon?
18 Kining kamatuoran gikan sa Diyos magtugot kanato sa pagsabot sa makapahinganghang mga bahin sa giingon sa Bibliya bahin sa dugo—kon nganong mao kanay panglantaw sa Diyos niana, kon unsay angay natong panglantaw niana, ug kon nganong angay natong tumanon ang mga pagdili nga gipatuman sa Diyos labot sa paggamit ug dugo. Sa dihang magbasa sa mga basahon sa Kristohanon Gregong Kasulatan, makakita kag daghang teksto nga naghisgot sa dugo ni Kristo. (Tan-awa ang kahon.) Kini klarong nagpakita nga ang matag Kristohanon angayng motuo “sa iyang [kang Jesus] dugo.” (Roma 3:25) Ang atong pagkadawat ug kapasayloan ug pagkabaton ug pakigdait uban sa Diyos posible lamang “pinaagi sa dugo nga iyang [si Jesus] giula.” (Colosas 1:20) Tinuod gayod kini niadtong uban kang kinsa si Jesus mihimog linaing pakigsaad nga magmando uban kaniya sa langit. (Lucas 22:20, 28-30; 1 Corinto 11:25; Hebreohanon 13:20) Tinuod usab kini sa “dakong panon” karon, kinsa makalabang buhi sa nagsingabot nga “dakong kasakitan” ug makatagamtam ug kinabuhing walay kataposan sa yutan-ong paraiso. Sa mahulagwayong pagkasulti, ilang ‘gilabhan ang ilang tag-as nga mga besti sa dugo sa Kordero.’—Pinadayag 7:9, 14.
19, 20. (a) Nganong naghatag ang Diyos ug limitasyon sa paggamit sa dugo, ug unsay angay natong bation labot niana? (b) Angay kitang maikag nga mahibalo sa unsa?
19 Klaro nga ang dugo adunay linaing kahulogan sa panglantaw sa Diyos. Angay usab kining makabaton ug linaing kahulogan alang kanato. Ang Maglalalang, kinsa may kahingawa sa kinabuhi, adunay katungod sa paghatag ug limitasyon sa paggamit sa mga tawo sa dugo. Sa iyang dakong kahingawa bisan sa atong kinabuhi, determinado siyang igahin ang dugo aron gamiton sa usa lamang ka hinungdanon kaayong paagi, ang bugtong paagi nga magpaposible sa walay-kataposang kinabuhi. Kanang maong paagi naglangkit sa bililhong dugo ni Jesus. Pagkamapasalamaton nato nga si Jehova nga Diyos milihok alang sa atong kaayohan pinaagi sa paggamit sa dugo—ang dugo ni Jesus—niining nagaluwas-ug-kinabuhi nga paagi! Ug angay gayod kitang magmapasalamaton kang Jesus tungod sa paghalad niya sa iyang dugo alang kanato! Sa pagkatinuod, masabtan nato ang mga hunahuna nga gipahayag ni apostol Juan: “Kaniya nga nahigugma kanato ug nagtangtang kanato gikan sa atong mga sala pinaagi sa iyang dugo—ug kita iyang gihimo nga usa ka gingharian, mga saserdote ngadto sa iyang Diyos ug Amahan—oo, ngadto kaniya ang himaya ug ang gahom hangtod sa kahangtoran. Amen.”—Pinadayag 1:5, 6.
20 Dugay nang gihunahuna sa atong maalamon-sa-tanan nga Diyos ug Maghahatag-ug-Kinabuhi kining nagaluwas-ug-kinabuhi nga papel. Nan, makapangutana tingali kita, ‘Unsay angayng epekto niini sa atong mga desisyon ug mga lihok?’ Ang sunod nga artikulo magtubag niining pangutanaha.
Unsaon Nimo Pagtubag?
• Unsay atong makat-onan bahin sa panglantaw sa Diyos sa dugo gikan sa mga asoy nga naglangkit kang Abel ug Noe?
• Diha sa Balaod, unsang limitasyon ang gihatag sa Diyos labot sa paggamit ug dugo, ug ngano?
• Sa unsang paagi gituman ni Jesus ang gilandongan sa Adlaw sa Pagtabon sa Sala?
• Sa unsang paagi ang dugo ni Jesus makaluwas sa atong kinabuhi?
[Mga Pangutana sa Pagtuon]
[Kahon sa panid 18]
KANG KINSANG DUGO ANG MAKALUWAS UG KINABUHI?
“Tagda ang inyong kaugalingon ug ang tibuok panon, nga niana kamo gitudlo sa balaang espiritu nga mga magtatan-aw, aron magbantay sa kongregasyon sa Diyos, nga iyang gipalit pinaagi sa dugo sa iyang kaugalingong Anak.”—Buhat 20:28.
“Busa, sanglit kita gipahayag na nga matarong karon pinaagi sa iyang dugo, labi pa nga kita pagaluwason gikan sa kapungot pinaagi kaniya.”—Roma 5:9.
“Kamo walay paglaom ug mga walay Diyos dinhi sa kalibotan. Apan karon nga nahiusa kang Kristo Jesus kamong kanhi nahilayo nahiduol na pinaagi sa dugo ni Kristo.”—Efeso 2:12, 13.
“Tungod kay nakitang maayo sa Diyos nga ang tibuok kabug-osan mopuyo diha kaniya, ug pinaagi kaniya ipasig-uli nganha sa iyang kaugalingon ang tanang ubang butang pinaagi sa pagpakigdait pinaagi sa dugo nga iyang giula diha sa estaka sa pagsakit.”—Colosas 1:19, 20.
“Busa, mga igsoon, . . . bug-os ang atong pagsalig nga mosulod ngadto sa balaang dapit pinaagi sa dugo ni Jesus.”—Hebreohanon 10:19.
“Dili pinaagi sa madunot nga mga butang . . . nga kamo gipahigawas gikan sa inyong walay-pulos nga matang sa panggawi nga napanunod pinaagi sa tradisyon gikan sa inyong mga katigulangan. Apan kini maoy pinaagi sa bililhong dugo, sama nianang sa walay lama ug sa walay buling nga nating karnero, kang Kristo mismo.”—1 Pedro 1:18, 19.
“Kon kita nagalakaw diha sa kahayag ingon nga siya anaa sa kahayag, kita adunay pakig-ambitay sa usag usa, ug ang dugo ni Jesus nga iyang Anak nagahinlo kanato gikan sa tanang sala.”—1 Juan 1:7.
“Takos ikaw sa pagkuha sa linukot nga basahon ug sa pagbukas sa mga timbre niini, tungod kay ikaw gipatay ug pinaagi sa imong dugo gipalit mo ang mga tawo alang sa Diyos gikan sa matag tribo ug pinulongan ug katawhan ug nasod.”—Pinadayag 5:9.
“Ang magsusumbong sa atong mga igsoon gitambog na . . . Ug sila nakadaog batok kaniya tungod sa dugo sa Kordero ug tungod sa pulong sa ilang pagpanghimatuod.”—Pinadayag 12:10, 11.
[Hulagway sa panid 16]
Pinaagi sa Balaod, giklaro sa Diyos nga ang dugo adunay papel sa kapasayloan sa atong mga sala
[Hulagway sa panid 17]
Pinaagi sa dugo ni Jesus, daghang kinabuhi ang maluwas