Ang Diyos Matinagdanon Gayod Kanimo

KINAIYANHON ang pagsangpit sa Diyos alang sa tabang kon kita anaa sa kalisdanan. Kon buot sabton, siya “dako ug dagaya sa gahom; ang iyang pagsabot dili ikabatbat.” (Salmo 147:5) Siya labing takos nga makatabang kanato sa pagsulbad sa atong mga problema. Dugang pa niana, ang Bibliya nagdapit kanato nga ‘ibubo kon unsay anaa sa atong kasingkasing’ sa iyang atubangan. (Salmo 62:8) Nan, nganong daghan kaayo ang naghunahuna nga wala tubaga sa Diyos ang ilang mga pag-ampo? Nagpasabot ba kana nga siya dili matinagdanon?

Imbes basolon dayon ang Diyos tungod kay siya daw dili-matinagdanon, hinumdomi ang panahon sa dihang bata ka pa. Sa dihang wala ihatag sa imong mga ginikanan ang tanan nimong gipangayo, giakusar mo ba sila nga wala sila mahigugma kanimo? Daghang bata ang moakusar niana sa ilang mga ginikanan. Hinuon, sa dihang midako ka na, imong nasabtan nga ang gugma gipasundayag sa daghang paagi ug ang paghatag sa tanang pangayoon sa bata dili gayod mahigugmaon.

Sa susama, kon si Jehova dili kanunay motubag sa atong mga pag-ampo sumala sa atong gusto, kana wala magpasabot nga siya dili matinagdanon kanato. Ang tinuod mao, ang Diyos nagpakita sa iyang pagkamatinagdanon kanatong tanan sa daghang paagi.

“Pinaagi Kaniya Kita Adunay Kinabuhi”

Una sa tanan, maoy tungod sa Diyos nga “kita adunay kinabuhi ug naglihok ug naglungtad.” (Buhat 17:28) Ang paghatag kanatog kinabuhi tinong nagpakita sa iyang mahigugmaong pagtagad kanato!

Dugang pa, si Jehova nagtagana sa atong gikinahanglan aron kita magpadayong buhi. Atong mabasa: “Siya nagapatubo sa lunhawng balili alang sa mga mananap, ug sa mga tanom alang sa tawo, aron magpatungha ug pagkaon gikan sa yuta.” (Salmo 104:14) Sa pagkamatuod, ang atong Maglalalang dili lamang nagtagana sa pangunang mga kinahanglanon sa kinabuhi. Siya madagayaong naghatag ug “ulan gikan sa langit ug mabungahong mga panahon, nga nagbuhong sa [atong] mga kasingkasing sa pagkaon ug kalipay.”—Buhat 14:17.

Bisan pa niana, ang pipila mahibulong tingali, ‘Kon kita gihigugma pag-ayo sa Diyos, nganong gitugotan man niya nga kita mag-antos?’ Nahibalo ka ba sa tubag niana?

Diyos ba ang Mabasol?

Ang kadaghanan sa pag-antos sa tawo maoy iyang tinuyoan. Pananglitan, ilado ang mga kapeligrohan sa pipila ka makadaot nga mga kalihokan. Bisan pa niana, ang mga tawo nagbuhat sa seksuwal nga imoralidad, nag-abuso sa alkoholikong ilimnon ug ubang mga droga, manabako, mosalmot sa peligrosong mga esport, tulin kaayo nga modrayb, ug uban pa. Kon ang maong peligrosong mga buhat mosangpot sa pag-antos, kinsa ang angayng basolon? Ang Diyos o ang tawo nga nagbuhat nga dili maalamon? Ang inspiradong Pulong sa Diyos nag-ingon: “Ayaw pagpahisalaag: Ang Diyos dili kayagayagaan. Kay bisan unsay ginapugas sa usa ka tawo, kini usab iyang anihon.”—Galacia 6:7.

Dugang pa niana, ang mga tawo nagdinaotay sa usag usa. Sa dihang ang usa ka nasod modeklarar ug gubat, segurado nga ang Diyos dili mabasol sa pag-antos nga moresulta niana. Sa dihang ang usa ka kriminal moatake sa isigkatawo, Diyos ba ang mabasol sa bisan unsang kadaot o kamatayon nga moresulta? Siyempre dili! Sa dihang ang usa ka diktador magmalupigon, magpaantos, ug magpatay sa mga tawo nga ubos sa iyang gahom, angay ba natong basolon ang Diyos tungod niana? Dili kana makataronganon.—Ecclesiastes 8:9.

Apan, komosta man ang milyonmilyon nga nag-ilaid sa kakabos o halos mangamatay na sa gutom? Diyos ba ang mabasol? Dili. Ang atong  gipuy-an nga planeta nagtagana ug daghang pagkaon alang sa tanan. (Salmo 10:2, 3; 145:16) Ang dili-angay nga pagpang-apod-apod sa hinatag-sa-Diyos nga dagayang abiyo mao ang moresulta sa kaylap nga kagutmanan ug kakabos. Ug ang kahakog sa tawo maoy makapugong sa pagkasulbad sa maong problema.

Ang Pangunang Hinungdan

Apan, kinsay basolon sa dihang ang usa masakit o mamatay tungod sa pagkatigulang? Matingala ka ba nga mahibalo nga ang Diyos dili mabasol bisan tungod niana? Ang Diyos wala maglalang sa tawo aron matigulang ug mamatay.

Sa dihang ang unang magtiayon, si Adan ug Eva, gibutang sa tanaman sa Eden, si Jehova mihatag kanila sa kalaoman nga mabuhing walay kataposan sa usa ka yutang paraiso. Hinuon, buot niya nga ang yuta pagapuy-an ug mga tawong magpabili sa ilang panulondon. Busa, gihimo niyang kondisyonal ang ilang kalaoman bahin sa kinabuhi. Makapuyo lamang si Adan ug Eva sa Paraiso samtang sila magpabilin nga nagpasakop sa ilang mahigugmaong Maglalalang.—Genesis 2:17; 3:2, 3, 17-23.

Ikasubo, si Adan ug Eva mirebelde. Si Eva mipalabi sa pagpamati kang Satanas nga Yawa. Ang Yawa nagbakak kaniya ug sa pagkamatuod miingon nga ang Diyos naghikaw kaniya ug butang nga maayo. Busa siya misugod sa pagsubay sa independenteng dalan ug misulay nga “mahimong sama sa Diyos, nga nahibalo sa maayo ug sa daotan.” Si Adan mikuyog sa iyang pagrebelde.—Genesis 3:5, 6.

Sa dihang sila nakasala sa ingong paagi, gipakita ni Adan ug Eva nga sila dili angayan nga mabuhing walay kataposan. Naagoman nila ang daotang mga resulta sa sala. Ang ilang kusog ug kaabtik nagkamenos, ug sa kataposan sila namatay. (Genesis 5:5) Ugaling lang, ang ilang pagrebelde may mas grabeng mga resulta. Kita nag-antos gihapon sa mga epekto sa sala ni Adan ug Eva. Si apostol Pablo misulat: “Ang sala misulod sa kalibotan pinaagi sa usa ka tawo [Adan] ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.” (Roma 5:12) Oo, tungod sa pagrebelde ni Adan ug Eva, ang sala ug kamatayon mikaylap sama sa usa ka makapatayng sakit sa tibuok tawhanong banay.

Ang Labing Lig-ong Ebidensiya sa Pagtagad sa Diyos

Nagpasabot ba kana nga ang tawhanong kalalangan sa Diyos permanenteng  nadaot? Wala, ug hisgotan nato ang labing lig-ong ebidensiya nga ang Diyos nagtagad kanato. Sa iyang dakong sakripisyo, ang Diyos mitagana sa paagi nga malukat ang katawhan gikan sa sala ug kamatayon. Ang panglukat mao ang hingpit nga kinabuhi ni Jesus, nga kinabubut-ong gihatag alang kanato. (Roma 3:24) Busa, si apostol Juan misulat: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Ingong resulta niining talagsaong buhat sa gugma, kita makabaton na usab sa kalaoman nga mabuhing walay kataposan. Si Pablo misulat ngadto sa mga taga-Roma: “Pinaagi sa usa ka buhat sa pagkamatarong ang tanang matang sa tawo igapahayag nga matarong alang sa kinabuhi.”—Roma 5:18.

Makapaneguro kita nga sa gitakdang panahon sa Diyos, wala na unyay pag-antos o kamatayon sa planetang Yuta. Hinunoa, ang mga kahimtang nga napanan-aw diha sa basahong Pinadayag mao na ang maglungtad: “Tan-awa! Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang mga katawhan. Ug ang Diyos makig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” (Pinadayag 21:3, 4) Tingali moingon ka, ‘Dili na ako makaabot nianang panahona.’ Bisan pa niana, ang tinuod mao nga basin makaabot ka pa. Ug kon ikaw mamatay, ang Diyos makabanhaw kanimo gikan sa patay. (Juan 5:28, 29) Kana ang katuyoan sa Diyos alang kanato, ug kana mao ang mahitabo. Dili gayod tinuod ang pag-ingon nga ang Diyos dili matinagdanon sa katawhan!

“Duol sa Diyos”

Makalilipay nga masayran nga gisugdan na sa Diyos ang malungtarong solusyon sa problema bahin sa pag-antos sa tawo. Apan, komosta man karong panahona? Unsay mahimo nato kon kita mawad-an ug minahal tungod sa kamatayon o masakit ang atong anak? Hinuon, karon dili pa panahon nga hanawon sa Diyos ang sakit ug kamatayon. Gipaila sa Bibliya nga kita kinahanglang maghulat pa sa katumanan niana. Apan ang Diyos wala magpasagad kanato. Ang tinun-ang si Santiago miingon: “Duol sa Diyos ug siya moduol kaninyo.” (Santiago 4:8) Oo, gidapit kita sa atong Maglalalang sa pagbaton ug suod personal nga relasyon uban niya, ug ang makabaton niana dili gayod mapakyas sa pagmatikod sa iyang pagsuportar bisan sa labing lisod nga mga kahimtang.

Apan, sa unsang paagi kita moduol sa Diyos? Nangutana si Haring David sa susamang pangutana mga tulo ka milenyo kanhi, nga miingon: “Oh Jehova, . . . kinsa man ang mopuyo sa imong bukid nga balaan?” (Salmo 15:1) Gitubag ni David ang iyang kaugalingong pangutana sa miingon siya: “Siya nga nagalakaw nga walay-ikasaway ug nagabuhat sa pagkamatarong ug nagasulti sa kamatuoran diha sa iyang kasingkasing. Wala siya magbutangbutang pinaagi sa iyang dila. Wala siyay gihimong daotan sa iyang kauban.” (Salmo 15:2, 3) Sa laing mga pulong, dawaton ni Jehova kadtong mosubay sa dalan nga gisalikway ni Adan ug Eva. Siya moduol kanila nga nagbuhat sa iyang kabubut-on.—Deuteronomio 6:24, 25; 1 Juan 5:3.

Sa unsang paagi mabuhat nato ang kabubut-on sa Diyos? Kinahanglang kat-onan nato kon unsa “ang maayo ug dalawaton sa panan-aw sa atong Manluluwas, ang Diyos,” ug unya molihok sumala niana. (1 Timoteo 2:3) Naglakip kana sa pagbaton ug tukmang kahibalo sa Pulong sa Diyos, ang Bibliya. (Juan 17:3; 2 Timoteo 3:16, 17) Nalangkit niana ang labaw pa kay sa basta pagbasa lamang sa Bibliya. Kinahanglang sundogon nato ang mga Hudiyo sa Berea sa unang siglo nga nakadungog sa pagwali ni Pablo. Bahin kanila, atong mabasa: “Ila mang gidawat ang pulong uban ang tumang kaikag sa hunahuna, nga sa adlaw-adlaw maampingong nagasusi sa Kasulatan kon tinuod ba kining mga butanga.”—Buhat 17:11.

Mao usab karon, ang maampingong pagtuon sa Bibliya makapalig-on sa atong pagtuo sa Diyos ug makatabang kanato sa pag-ugmad ug suod nga relasyon uban niya. (Hebreohanon 11:6) Makatabang usab kini kanato sa pagsabot sa tukma kon sa unsang paagi si Jehova nagtagad sa katawhan—dili lamang alang sa kadiyot nga mga kaayohan kondili ilabina alang sa malungtarong kaayohan sa tanan nga hilig sa pagkamatarong.

Tagda ang mga gipahayag sa pipila ka Kristohanon nga may suod nga relasyon uban sa Diyos. “Gihigugma ko pag-ayo si Jehova, ug daghan kaayo ang angay kong pasalamatan kaniya,” matod  sa 16-anyos nga si Danielle. “Siya naghatag kanakog mahigugmaong mga ginikanan nga adunay lunsay nga gugma alang kaniya ug nagtudlo kanako sumala sa iyang Pulong.” Usa ka Kristohanon sa Uruguay misulat: “Ang akong kasingkasing nahupong sa pagkamapasalamaton, ug natandog ako sa pagpasalamat kang Jehova tungod sa iyang dili-takos nga kalulot ug sa iyang pagpakighigala kanako.” Ang Diyos nagdawat bisan sa mga bata pa kaayo. Ang siyete-anyos nga si Gabriela miingon: “Gihigugma ko ang Diyos labaw sa tanan sa tibuok kalibotan! Duna koy kaugalingong Bibliya. Gusto kong makakat-on bahin sa Diyos ug sa iyang Anak.”

Karon, milyonmilyon sa tibuok kalibotan bug-os kasingkasing nga mouyon sa salmista nga miingon: “Ang pagduol sa Diyos maayo alang kanako.” (Salmo 73:28) Natabangan sila sa pagsagubang sa mga problema nga ilang giatubang karon, ug sila nakabaton sa seguradong paglaom nga mabuhing walay kataposan sa Paraiso sa yuta. (1 Timoteo 4:8) Nganong dili nimo himoong tumong nga ‘moduol sa Diyos’? Sa pagkatinuod, kita gipasaligan: “Siya dili halayo gikan sa matag usa kanato.” (Buhat 17:27) Oo, ang Diyos matinagdanon gayod kanimo!

[Mga hulagway sa panid 5]

Ang pagkamatinagdanon ni Jehova kanato makita sa daghang paagi

[Hulagway sa panid 7]

Bisan ang mga bata pa makahimo sa pagduol sa Diyos

[Mga hulagway sa panid 7]

Karon, si Jehova motabang kanato aron kita makaantos. Sa gitakdang panahon, iyang hanawon ang sakit ug kamatayon