“Panglakaw Kamo ug Paghimog mga Tinun-an”

“Ang tanang awtoridad gihatag na kanako sa langit ug sa yuta. Busa panglakaw kamo ug paghimog mga tinun-an.”—MATEO 28:18, 19.

1, 2. (a) Unsang buluhaton ang gihatag ni Jesus sa iyang mga sumusunod? (b) Unsang mga pangutana bahin sa mga sugo ni Jesus ang pagahisgotan?

USA ka adlaw kadto sa tingpamulak sa Israel sa tuig 33 K.P., ug ang mga tinun-an ni Jesus nagtigom sa bukid sa Galilea. Ang ilang nabanhawng Ginoo hapit nang mosaka sa langit, apan duna usa siyay hinungdanong isulti kanila. Si Jesus adunay buluhaton nga gisugo kanila. Unsa man kana? Sa unsang paagi misanong niana ang iyang mga tinun-an? Ug sa unsang paagi ang maong buluhaton mapadapat kanato karon?

² Ang giingon ni Jesus nasulat diha sa Mateo 28:18-20: “Ang tanang awtoridad gihatag na kanako sa langit ug sa yuta. Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo. Ug, tan-awa! ako magauban kaninyo sa tanang adlaw hangtod sa kataposan sa sistema sa mga butang.” Si Jesus naghisgot sa “tanang awtoridad,” “tanang kanasoran,” “tanang butang,” ug “tanang adlaw.” Ang iyang mga sugo nga naglangkit nianang upat ka malangkobong mga pamulong nagpatunghag pipila ka hinungdanong mga pangutana, nga mahimong sumaryohon sa mga pulong ngano? asa? unsa? ug kanus-a? Tagsatagsaon nato paghisgot ang maong mga pangutana. *

“Ang Tanang Awtoridad Gihatag na Kanako”

3. Nganong angay natong sugton ang sugo nga maghimog mga tinun-an?

³ Una, ngano man nga angay natong sugton ang sugo sa paghimog mga tinun-an? Si Jesus miingon: “Ang tanang awtoridad gihatag na kanako sa langit ug sa yuta. Busa panglakaw kamo ug paghimog mga tinun-an.” Ang pulong “busa” nagpaila sa pangunang rason kon nganong angay natong sugton kining sugoa. Tungod kini kay si Jesus, ang usa nga nagsugo, nakabaton sa “tanang awtoridad.” Unsa ka dako ang iyang awtoridad?

4. (a) Unsa ka dako ang awtoridad ni Jesus? (b) Sa unsang paagi ang atong pagsabot sa awtoridad ni Jesus mag-apektar sa atong panglantaw sa sugo nga maghimog mga tinun-an?

⁴ Si Jesus adunay awtoridad ibabaw sa iyang kongregasyon, ug sukad sa 1914 siya adunay awtoridad ibabaw sa bag-ong natukod nga Gingharian sa Diyos. (Colosas 1:13; Pinadayag 11:15) Siya mao ang arkanghel ug ingong arkanghel sakop niya ang langitnong panon sa gatosan ka milyong manulonda. (1 Tesalonica 4:16; 1 Pedro 3:22; Pinadayag 19:14-16) Siya gihatagag gahom sa iyang Amahan sa paglaglag sa “tanang kagamhanan ug tanang awtoridad ug gahom” nga mosupak sa matarong nga mga prinsipyo. (1 Corinto 15:24-26; Efeso 1:20-23)  Ang awtoridad ni Jesus dili lamang ibabaw sa mga buhi. Siya mao usay “maghuhukom sa mga buhi ug sa mga patay” ug gihatagan siya sa Diyos ug gahom sa pagbanhaw niadtong nangatulog sa kamatayon. (Buhat 10:42; Juan 5:26-28) Segurado nga ang sugo nga gihatag sa Usa nga gitugyanan ug dako kaayong awtoridad angayng isipon nga hinungdanon kaayo. Busa, kita matinahoron ug kinabubut-on nga mosugot sa sugo ni Kristo nga ‘manglakaw ug maghimog mga tinun-an.’

5. (a) Sa unsang paagi si Pedro misugot sa sugo ni Jesus? (b) Unsang panalangin ang misangpot tungod sa pagsugot ni Pedro sa sugo ni Jesus?

⁵ Sa sayong bahin sa iyang yutan-ong ministeryo, gitudloan ni Jesus ang iyang mga tinun-an sa talagsaong paagi nga ang pag-ila sa iyang awtoridad ug pagsugot sa iyang mga sugo mosangpot ngadto sa mga panalangin. Usa ka higayon niana iyang giingnan si Pedro, kinsa usa ka mangingisda: “Balhin kamo ngadto sa lawom, ug ilagak ninyo ang inyong pukot aron makakuha.” Segurado si Pedro nga walay isda, busa iyang giingnan si Jesus: “Magtutudlo, sa tibuok gabii kami naghago ug wala gayoy nakuha.” Hinunoa, si Pedro mapainubsanong midugang: “Apan tungod sa imong sulti ilagak ko ang mga pukot.” Human mosugot si Pedro sa sugo ni Kristo, siya nakakuha ug “dakong duot sa isda.” Kay natandog pag-ayo, si Pedro “mihapa sa tiilan ni Jesus, nga nag-ingon: ‘Pahilayo kanako, tungod kay ako tawong makasasala, Ginoo.’” Apan si Jesus mitubag: “Ayaw na kahadlok. Sukad karon mangisda ka na ug mga tawo nga buhi.” (Lucas 5:1-10; Mateo 4:18) Unsay atong makat-onan gikan sa maong asoy?

6. (a) Unsay giilustrar sa asoy bahin sa milagrosong pagkakuha ug mga isda mahitungod sa matang sa pagkamasinugtanon nga gikinahanglan ni Jesus? (b) Sa unsang paagi masundog nato si Jesus?

⁶ Gihatagan ni Jesus si Pedro, Andres ug ang ubang mga apostoles sa sugo nga ‘mahimong mga mangingisda ug mga tawo,’ dili sa wala pa, kondili human sila makakuha ug daghan kaayong isda. (Marcos 1:16, 17) Klaro nga wala magkinahanglan si Jesus ug binuta nga pagsugot. Iyang gihatagan ang mga lalaki ug makapadaning rason kon nganong angay silang mosugot kaniya. Maingon nga ang pagsugot sa sugo ni Jesus nga itaktak ang ilang mga pukot misangpot sa talagsaong mga resulta, ang pagsugot sa sugo ni Jesus sa ‘pagpangisda ug mga tawo’ mosangpot usab sa dagkong mga panalangin. Uban sa bug-os nga pagtuo, ang mga apostoles mituman. Ang asoy nagpadayon: “Gidala nilag balik ang mga sakayan sa mamala, ug gibiyaan ang tanan ug misunod kaniya.” (Lucas 5:11) Karon, samtang gidasig nato ang uban sa pagpakigbahin sa buluhaton nga paghimog mga tinun-an, atong gisundog si Jesus. Dili nato ingnon ang mga tawo nga basta motuman na lang sila sa atong isulti kanila, kondili ato silang hatagan ug makapadaning mga rason sa pagsugot sa sugo ni Kristo.

Makapadaning mga Rason ug Hustong mga Motibo

7, 8. (a) Unsa ang pipila ka Kasulatanhong mga rason sa pagsangyaw sa Gingharian ug paghimog mga tinun-an? (b) Unsang teksto ang ilabinang nagpalihok kanimo sa pagpadayon diha sa buluhatong pagsangyaw? (Tan-awa usab ang potnot.)

⁷ Tungod kay atong giila ang awtoridad ni Kristo, kita nakigbahin sa buluhatong pagsangyaw sa Gingharian ug paghimog mga tinun-an. Unsang ubang Kasulatanhong mga rason sa paghimo nianang buluhatona ang atong ikapaambit niadtong buot natong mapalihok sa paghimog maayong mga buhat? Tagda ang mosunod nga mga komento sa ubay-ubayng matinumanong mga Saksi gikan sa lainlaing kayutaan, ug matikdi kon sa unsang paagi ang gisitar nga mga teksto nagpaluyo sa ilang mga komento.

⁸ Si Roy, nabawtismohan sa 1951: “Sa dihang gipahinungod nako ang akong kaugalingon kang Jehova, ako nagsaad nga moalagad gayod kaniya. Gusto nakong tumanon ang akong gisaad.” (Salmo 50:14; Mateo 5:37) Si Heather, nabawtismohan sa 1962: “Sa dihang akong gihunahuna ang tanan nga nahimo ni Jehova alang kanako, gusto nakong ipakita ang akong pagpasalamat pinaagi sa matinumanong pag-alagad kaniya.” (Salmo 9:1, 9-11; Colosas 3:15) Si Hannelore, nabawtismohan sa 1954: “Matag higayon nga mosangyaw kita, gipaluyohan kita sa mga manulonda—pagkadakong pribilehiyo!” (Buhat 10:30-33; Pinadayag 14:6, 7) Si Honor, nabawtismohan sa 1969: “Inig-abot sa panahon sa paghukom ni Jehova, dili nako gusto nga adunay si bisan kinsa sa akong kasilinganan nga moakusar kang Jehova ug sa iyang mga Saksi nga nagpabaya ug moingon, ‘wala gayod ako pasidan-i!’” (Ezequiel 2:5; 3:17-19; Roma 10:16, 18) Si Claudio,  nabawtismohan sa 1974: “Sa dihang kita magsangyaw, kita ‘ilalom sa panan-aw sa Diyos’ ug ‘kauban ni Kristo.’ Tiaw mo kana! Samtang nagsangyaw kita, atong kauban ang atong suod nga mga Higala.”—2 Corinto 2:17. *

9. (a) Unsay gipadayag sa asoy bahin sa pagpangisda ni Pedro ug sa ubang mga apostoles labot sa hustong motibo sa pagsugot kang Kristo? (b) Unsa ang hustong motibo sa pagsugot sa Diyos ug kang Kristo karon, ug ngano?

⁹ Ang asoy bahin sa daghan kaayong kuha nga isda nagpakita usab sa kahinungdanon sa pagbaton ug hustong motibo sa pagsugot kang Kristo—ang gugma. Sa dihang si Pedro miingon, “Pahilayo kanako, tungod kay ako tawong makasasala,” si Jesus wala mopalayo, ni gihukman niya si Pedro sa bisan unsang sala. (Lucas 5:8) Wala gani sawaya ni Jesus si Pedro tungod sa paghangyo kaniya nga siya mopalayo. Hinunoa, si Jesus malulotong mitubag: “Ayaw na kahadlok.” Ang dili maayong matang sa kahadlok maoy sayop nga motibo sa pagsugot kang Kristo. Hinunoa, giingnan ni Jesus si Pedro nga siya ug ang iyang mga kauban mahimong mapuslanon ingong mga mangingisda ug mga tawo. Karon, kita usab dili mogamit ug kahadlok o susamang negatibong mga pagbati, sama sa pagkasad-an ug kaulaw, sa pagpugos sa uban nga mosugot kang Kristo. Ang tibuok-kalag lamang nga pagkamasinugtanon nga gipasukad sa gugma alang sa Diyos ug kang Kristo ang makalipay sa kasingkasing ni Jehova.—Mateo 22:37.

“Paghimog mga Tinun-an sa Katawhan sa Tanang Kanasoran”

10. (a) Unsang detalye bahin sa sugo ni Jesus sa paghimog mga tinun-an ang malisod para sa iyang mga tinun-an? (b) Sa unsang paagi misanong ang mga tinun-an sa sugo ni Jesus?

¹⁰ Ang ikaduhang pangutana nga gipatungha maylabot sa sugo ni Kristo mao, Asa himoon kining buluhatong paghimog mga tinun-an? Giingnan ni Jesus ang iyang mga sumusunod: “Paghimog mga tinun-an sa tanang kanasoran.” Sa wala pa ang ministeryo ni Jesus, ang katawhan sa kanasoran ginadawat kon sila moadto sa Israel aron sa pag-alagad kang Jehova. (1 Hari 8:41-43) Sa panguna si Jesus nagsangyaw ngadto sa kinaiyanhong mga Hudiyo, apan niining tungora giingnan niya ang iyang mga sumusunod sa pag-adto sa katawhan  sa tanang kanasoran. Sa pagkatinuod, ang dapit nga kapangisdaan, o teritoryo nga sangyawanan, sa iyang mga tinun-an maoy diha lamang sa gamayng “linaw”—ang kinaiyanhong mga Hudiyo—apan sa wala madugay kadto nag-apil na sa tibuok “dagat” sa katawhan. Bisan tuod kining maong kausaban malisod alang sa mga tinun-an, sila kinabubut-ong misugot sa sugo ni Jesus. Wala dangtig 30 ka tuig human sa kamatayon ni Jesus, si apostol Pablo nakasulat nga ang maayong balita nawali na sa “tibuok kalalangan ilalom sa langit.”—Colosas 1:23.

11. Unsang pagdako sa ‘dapit nga kapangisdaan’ ang nahitabo sukad sa unang bahin sa ika-20ng siglo?

¹¹ Sa di pa dugayng mga panahon, nakita usab ang susamang pagdako sa teritoryo nga sangyawanan. Sa sinugdan sa ika-20ng siglo, ang ‘dapit nga kapangisdaan’ nahimutang lamang diha sa pipila ka kayutaan. Bisan pa niana, ang mga sumusunod ni Kristo niadtong panahona misundog sa panig-ingnan sa unang-siglong mga Kristohanon ug mahinamong nagpadako sa teritoryo nga ilang gisangyawan. (Roma 15:20) Sa unang bahin sa katuigan sa 1930, sila naghimog mga tinun-an diha sa mga usa ka gatos ka kayutaan. Karon, ang atong ‘dapit nga kapangisdaan’ anaa na sa 235 ka kayutaan.—Marcos 13:10.

“Gikan sa Tanang Pinulongan”

12. Unsang kalisod ang gipasiugda sa tagna nga makita diha sa Zacarias 8:23?

¹² Ang paghimog mga tinun-an sa tanang kanasoran malisod dili lamang tungod sa kadako sa teritoryo kondili usab tungod sa daghang pinulongan. Pinaagi kang manalagnang Zacarias, si Jehova nagtagna: “Mahitabo unya niadtong mga adlawa nga napulo ka tawo gikan sa tanang pinulongan sa mga nasod mokupot, oo, sila gayod mokupot sa sidsid sa tawo nga usa ka Hudiyo, nga magaingon: ‘Mouban kami kaninyo, kay kami nakadungog nga ang Diyos nagauban kaninyo.’” (Zacarias 8:23) Sa mas dakong katumanan niining tagnaa, ang “tawo nga usa ka Hudiyo” naghawas sa nanghibilin sa dinihogang mga Kristohanon, samtang ang “napulo ka tawo” naghawas sa “dakong panon.” * (Pinadayag 7:9, 10; Galacia 6:16) Kining dakong panon sa mga tinun-an ni Kristo makita diha sa daghang kanasoran, ug sumala sa giingon ni Zacarias, sila magsulti ug daghang pinulongan. Ang modernong-adlaw ba nga katawhan sa Diyos naggikan sa daghang kanasoran ug nagsultig daghang pinulongan? Oo.

13. (a) Unsang kaugmaran labot sa mga pinulongan ang nagakahitabo taliwala sa modernong-adlaw nga katawhan sa Diyos? (b) Sa unsang paagi ang matinumanong ulipon nga matang misanong sa nagkadakong panginahanglan sa espirituwal nga pagkaon diha sa lainlaing mga pinulongan? (Ilakip ang kahon nga “Mga Publikasyon Alang sa mga Buta.”)

¹³ Sa 1950 mga 3 sa matag 5 ka Saksi ni Jehova sa tibuok kalibotan ang nagsultig Iningles ingong lumad nga pinulongan. Pagka-1980 ang maong proporsiyon nausab ngadto sa mga 2 sa 5, ug karon 1 na lang sa matag 5 ka Saksi ang nagsultig Iningles ingong lumad nga pinulongan. Sa unsang paagi misanong ang matinumanon ug maalamong ulipon nga matang sa kamatuoran nga mas daghang igsoon ang nagsultig laing pinulongan gawas sa Iningles? Pinaagi sa pagtaganag espirituwal nga pagkaon diha sa mas daghang pinulongan. (Mateo  24:45) Pananglitan, sa 1950 ang atong literatura gipatik diha sa 90 ka pinulongan, apan karon kini miuswag na ngadto sa duolan sa 400 ka pinulongan. Kini bang mas dakong pagtagad nga gihatag ngadto sa katawhan nga lainlaig mga pinulongan adunay mga resulta? Oo! Sa aberids mga 5,000 ka tawo ‘gikan sa tanang pinulongan’ ang nahimong mga tinun-an ni Kristo kada semana sa tuig! (Pinadayag 7:9) Ug nagpadayon pa kini sa pag-uswag. Diha sa pipila ka kayutaan ang “mga pukot” daghag kuha!—Lucas 5:6; Juan 21:6.

Usa ka Makapatagbawng Ministeryo—Makapakig-ambit Ka ba Niini?

14. Sa unsang paagi matabangan nato kadtong anaa sa atong teritoryo nga nagsultig langyawng pinulongan? (Ilakip ang kahon nga “Pagsulti Pinaagig Senyas ug Paghimog mga Tinun-an.”)

¹⁴ Diha sa daghang nasod sa Kasadpan, ang pag-abot sa mga lalin nakapalisod sa paghimog mga tinun-an sa katawhan sa ‘tanang pinulongan’ diha sa kaugalingong nasod. (Pinadayag 14:6) Sa unsang paagi matabangan nato ang mga tawo sa atong teritoryo nga nagsultig pinulongan nga lahi sa atoa? (1 Timoteo 2:4) Mahimo natong gamiton ang hustong kasangkapan sa pagpangisda, ingnon ta. Tanyagi ang maong mga tawo ug literatura diha sa pinulongan nga ilang ginasulti. Kon posible, hikaya nga maduaw sila sa usa ka Saksi nga nagsulti sa ilang pinulongan. (Buhat 22:2) Ang paghimo niining maong mga kahikayan mas sayon karon, tungod kay daghang Saksi ang nakakat-on sa pagsultig pinulongan gawas sa ilang kaugalingong pinulongan aron sa pagtabang sa mga langyaw nga mahimong mga tinun-an ni Kristo. Ang mga taho nagpakita nga ang pagtabang niining paagiha maoy makapatagbawng eksperyensiya.

15, 16. (a) Unsang mga panig-ingnan ang nagpakita nga dako ang balos nga madawat sa pagtabang niadtong nagsulti ug langyawng pinulongan? (b) Unsang mga pangutana mahitungod sa pagsangyaw ngadto sa mga tawo nga langyaw ug pinulongan ang mahimo natong konsiderahon?

¹⁵ Tagda ang duha ka panig-ingnan gikan sa Netherlands, diin ang organisadong pagsangyaw sa Gingharian ginahimo diha sa 34 ka pinulongan. Usa ka Saksing magtiayon miboluntaryo sa paghimog mga tinun-an taliwala sa nagsultig-Polako nga mga lalin. Maayo kaayo ang sanong sa ilang paningkamot nga ang bana napalihok sa pagpamenos sa iyang sekular nga trabaho aron dunay usa pa ka adlaw kada semana nga magamit sa pagtuon sa Bibliya uban sa mga interesado. Wala madugay, ang magtiayon nagdumala  na ug kapin sa 20 ka panagtuon sa Bibliya kada semana. Sila miingon: “Ang among ministeryo nakapalipay kaayo kanamo.” Kadtong naghimog mga tinun-an ilabinang malipay sa dihang kadtong nakadungog sa mga kamatuoran sa Bibliya sa ilang kaugalingong pinulongan napalihok sa pagpahayag sa ilang apresasyon. Pananglitan, panahon sa usa ka tigom nga gihimo sa pinulongang Vietnamese, usa ka tigulang nga lalaki ang mitindog ug mihangyo nga mosulti. Nga nagluha ang mga mata, iyang giingnan ang mga Saksi: “Salamat sa inyong pagpaningkamot nga makakat-on sa akong lisod nga pinulongan. Mapasalamaton kaayo ko nga nakakat-on ug daghang nindot nga mga butang gikan sa Bibliya sa akong pagkatigulang.”

¹⁶ Busa, dili ikatingala nga kadtong nag-alagad diha sa mga kongregasyon nga langyawg pinulongan mibati nga dako ang balos nga ilang nadawat. Usa ka magtiayon nga taga-Britanya miingon: “Ang pagsangyaw ngadto sa mga tawo nga langyaw ug pinulongan maoy usa sa labing kulbahinam nga matang sa ministeryo nga among naeksperyensiyahan sulod sa among 40 ka tuig nga pag-alagad sa Gingharian.” Mapasibo mo ba ang imong mga sirkumstansiya aron makapakigbahin ka niining makapadasig nga ministeryo? Kon nag-eskuyla ka pa, makatuon ka ba ug langyawng pinulongan agig pagpangandam alang niining matanga sa ministeryo? Ang paghimo niana mahimong motultol ngadto sa makapatagbawng paagi sa pagkinabuhi nga tugob sa mga panalangin. (Proverbio 10:22) Nganong dili kini hisgotan uban sa imong mga ginikanan?

Pag-usab-usab sa Atong mga Pamaagi

17. Sa unsang paagi maestorya nato ang mas daghang tawo diha sa teritoryo sa atong kongregasyon?

¹⁷ Masabot nga ang atong mga sirkumstansiya dili motugot sa kadaghanan kanato sa pagtaktak sa atong “mga pukot” diha sa mga teritoryo diin ang mga tawo langyaw ug pinulongan. Apan, basin maestorya nato ang mas daghang tawo kay sa atong naestorya karon diha sa teritoryo sa atong kongregasyon. Sa unsang paagi? Pinaagi sa paglainlain, dili sa atong mensahe, kondili sa atong mga pamaagi. Diha sa daghang dapit nagkadaghan ang mga tawo nga nagpuyo sa guwardiyado-kaayo nga mga tinukod. Daghan usab ang wala sa balay sa dihang moduaw kita panahon sa atong pagpamalaybalay. Busa kinahanglan tingali natong itaktak ang atong “mga pukot” sa lainlaing mga panahon ug sa lainlaing dapit. Sa ingon atong gisundog si Jesus. Nangita siyag mga paagi sa pagpakigsulti sa mga tawo sa lainlaing mga kahimtang.—Mateo 9:9; Lucas 19:1-10; Juan 4:6-15.

18. Sa unsang paagi napamatud-ang epektibo ang pagpamatuod diha sa lainlaing mga kahimtang? (Ilakip ang kahon nga “Paghimog mga Tinun-an sa mga Tawo Diha sa Negosyohanan.”)

¹⁸ Diha sa pipila ka dapit sa kalibotan, ang pagsangyaw bisan asa makaplagan ang mga tawo maoy hinungdanong paagi sa paghimog mga tinun-an. Ang eksperyensiyadong mga tighimog tinun-an nagahatag ug mas dakong pagtagad sa pagsangyaw diha sa lainlaing mga dapit. Gawas pa sa pagbalaybalay, ang mga magmamantala karon nagsangyaw na diha sa mga erport, opisina, tindahan, parkingan, hunonganan sa bus, kadalanan, parke, baybayon, ug sa ubang mga dapit. Daghang bag-ong bawtismado nga mga Saksi sa Hawaii ang unang nakaestorya diha sa maong mga dapit. Ang paglainlain sa atong mga pamaagi motabang kanato sa pagtuman sa bug-os sa sugo ni Jesus sa paghimog mga tinun-an.—1 Corinto 9:22, 23.

19. Unsang mga bahin sa sugo ni Jesus kanato ang hisgotan sa sunod nga artikulo?

¹⁹ Ang sugo ni Jesus sa paghimog mga tinun-an naglakip ug mga detalye dili lamang bahin sa kon ngano ug asa kita angayng mohimo nianang buluhatona kondili usab bahin sa kon unsa ang atong angayng isangyaw ug hangtod kanus-a kita angayng magpadayon sa pagbuhat niana. Kining duha ka bahin sa sugo ni Jesus kanato pagahisgotan sa sunod nga artikulo.

[Mga footnote]

Nahinumdom Ka Ba?

• Tungod sa unsang mga rason ug uban sa unsang motibo nga kita makigbahin sa pagsangyaw sa Gingharian ug paghimog tinun-an?

• Sa unsang gilapdon nga ang mga alagad ni Jehova karon nagtuman sa sugo ni Jesus sa paghimog mga tinun-an sa katawhan sa tanang kanasoran?

• Sa unsang paagi lainlainon nato ang atong ‘pamaagi sa pagpangisda,’ ug nganong angay natong buhaton kana?

[Mga Pangutana sa Pagtuon]

[Kahon/Mga hulagway sa panid 10]

Mga Publikasyon Alang sa mga Buta

Si Albert maoy usa ka Kristohanong ansiyano ug bug-os-panahong ministro nga nagpuyo sa Tinipong Bansa. Siya buta. Ang paggamit ug literatura sa Bibliya nga sinulat sa Braille nakatabang kaniya nga mahimong mas epektibo sa iyang ministeryo, lakip na sa iyang mga kalihokan ingong magtatan-aw sa pag-alagad. Sa unsang paagi ginadumala niya ang iyang buluhaton sa kongregasyon?

“Si Albert maoy epektibo kaayong magtatan-aw sa pag-alagad sa among kongregasyon,” miingon si James, ang nagadumalang magtatan-aw. Si Albert usa sa mga 5,000 ka buta sa Tinipong Bansa kinsa, latas sa katuigan, nakadawat ug mga publikasyon sa Bibliya nga sinulat sa Iningles ug Kinatsila nga Braille. Gani, sukad sa 1912, ang matinumanong ulipon nga matang nagpatik ug kapin sa usa ka gatos ka lainlaing publikasyon sa Braille. Pinaagi sa paggamit ug modernong teknolohiya, ang mga imprentahan sa mga Saksi ni Jehova sa pagkakaron nagpatik ug milyonmilyong panid kada tuig diha sa kapin sa napulo ka pinulongan ug nag-apod-apod niini ngadto sa kapin sa 70 ka nasod. May kaila ka ba nga makabenepisyo gikan sa mga publikasyon sa Bibliya nga gipatik alang sa mga buta?

[Kahon/Hulagway sa panid 11]

Pagsulti Pinaagig Senyas ug Paghimog mga Tinun-an

Libolibo ka Saksi sa tibuok kalibotan, lakip na ang daghang masibotong mga batan-on, ang nakakat-on pagsulti pinaagig senyas aron sa pagtabang sa mga bungol nga mahimong mga tinun-an ni Kristo. Ingong resulta, sa Brazil lamang, 63 ka bungol ang nabawtismohan sulod sa usa ka di pa dugayng tuig ug 35 ka bungol nga mga Saksi didto nag-alagad karon ingong bug-os-panahong mga tig-ebanghelyo. Sa tibuok kalibotan, adunay kapin sa 1,200 ka kongregasyon ug mga grupo nga nagsulti pinaagig senyas. Ang bugtong sirkito nga nagsulti pinaagig senyas didto sa Rusya, kon bahin sa gidak-on, mao ang kinadak-ang sirkito sa kalibotan, nga nagsakop sa tibuok Rusya.

[Kahon sa panid 12]

Paghimog mga Tinun-an sa mga Tawo Diha sa Negosyohanan

Samtang miduaw sa mga negosyante diha sa mga opisina nga ilang gitrabahoan, usa ka Saksi sa Hawaii ang nakahimamat ug ehekutibo sa usa ka kompaniya sa transportasyon. Bisan tuod puliki, ang maong tawo miuyon nga magtuon sa Bibliya sulod sa 30 minutos kada semana diha sa iyang opisina. Kada Miyerkoles sa buntag, iyang ingnon ang iyang kawani nga dili siya tugawon sa mga tawag sa telepono ug dayon ihatag niya ang iyang bug-os nga pagtagad ngadto sa pagtuon. Laing Saksi sa Hawaii ang nagtuon sa Bibliya kas-a sa usa ka semana uban sa tag-iya sa ayohanag sapatos. Ang pagtuon ginahimo diha mismo sa lamesa sa ayohanan. Kon dunay mosulod nga kustomer, ang Saksi mopadaplin lang. Iniglakaw sa kustomer, ipadayon nila ang pagtuon.

Ang ehekutibo ug ang tag-iyag ayohanan ug sapatos nahimamat tungod kay ang mga Saksi may inisyatibo sa pagtaktak sa ilang “mga pukot” diha sa lainlaing mga dapit. Makahunahuna ka ba ug mga dapit diha sa teritoryo sa imong kongregasyon diin makaestorya nimo ang mga tawo nga subsob nga wala sa balay?

[Hulagway sa panid 12]

Makasangyaw ka ba sa mga tawo nga langyaw ug pinulongan?