Usa ka Sulat Alang Kang Noe

“MINAHAL nga Noe, makadaghan na akong nagbasa sa Bibliya bahin kanimo ug kon sa unsang paagi gitukod nimo ang usa ka arka diin ikaw ug ang imong pamilya naluwas sa Lunop.”

Mao kanay sinugdanan sa sulat sa usa ka 15-anyos nga babaye nga ginganlag Minnamaria nga iyang gisalmot sa usa ka bangga sa pagsulat alang sa mga estudyante nga nag-edad ug 14 ngadto sa 21. Ang bangga gidumala sa serbisyo sa koreyo sa Pinlandia, sa Federation for Finnish Mother Tongue Teachers, ug sa Finnish Literature Society. Ang mga sumasalmot kinahanglang mohimog usa ka sulat nga gibase sa usa ka libro. Mahimo silang mosulat ngadto sa awtor sa libro o sa usa ka karakter sa libro. Gipili sa mga magtutudlo ang kapin sa 1,400 ka sulat sa ilang mga estudyante ug gipadala kana ngadto sa grupo sa mga maghuhukom sa bangga. Dayon ang grupo mipilig usa ka sulat alang sa unang ganti, napulo ka sulat alang sa ikaduhang ganti, ug napulo ka sulat alang sa ikatulong ganti. Si Minnamaria nalipay nga ang iyang sulat maoy usa sa nakadawat sa ikatulong ganti.

Nganong gipili sa batan-ong estudyante nga si Minnamaria ang pagsulat kang Noe, usa ka tawo nga nabuhi mga 5,000 na ka tuig kanhi? Siya miingon: “Ang Bibliya mao ang unang misantop sa akong hunahuna. Nailhan ko na pag-ayo ang mga karakter sa Bibliya. Makadaghan na akong nagbasa bahin kanila nga sila daw buhi alang kanako. Gipili nako si Noe tungod kay ang iyang kinabuhi makaiikag kaayo ug lahi nianang sa akoa.”

Gitapos ni Minnamaria ang iyang sulat kang Noe niining mga pulonga: “Ikaw maoy usa gihapon ka maayong panig-ingnan sa pagtuo ug pagkamasinugtanon. Ang imong paagi sa kinabuhi nagdasig sa tanang nagbasa sa Bibliya nga molihok diha sa ilang pagtuo.”

Gipakita gayod ning maong sulat sa batan-ong magbabasa sa Bibliya nga ang Bibliya tinuod nga ‘buhi ug may gahom’ diha sa mga tawo, batan-on ug tigulang.—Hebreohanon 4:12.