Ginghariang Kagamhanan sa Diyos—Nagmando na Karon

“Sa unsang paagi magkauyon ang daghan kaayong nasod, nga may nagkadaiya kaayong mga kultura diha sa nagkalainlaing ang-ang sa kaugmaran? Gikaingon nga ang usa ka pag-atake gikan sa laing planeta mao lamang ang makapahiusa sa tawhanong kaliwatan.”—The Age, mantalaan sa Australia.

USA ka pag-atake gikan sa laing planeta? Kon makapahiusa kana o dili sa tanang nasod sa yuta, ang tagna sa Bibliya naghisgot bahin sa usa ka nagsingabot nga krisis nga makapahiusa sa mga nasod sa kalibotan. Ug sa pagkatinuod, mga puwersang anaa sa gawas sa planetang yuta ang magpahinabo sa maong krisis.

Si Haring David sa karaang Israel matagnaong naghisgot bahin niining kahimtanga sa kalibotan. Ubos sa pag-inspirar sa Diyos siya misulat: “Ang mga hari sa yuta mibarog ug ang hataas nga mga opisyal naghugpong ingong usa batok kang Jehova ug batok sa iyang dinihogan, nga nagaingon: ‘Bugtoon nato ang ilang mga gapos ug isalibay ang ilang mga higot gikan kanato!’” (Salmo 2:2, 3; Buhat 4:25, 26) Matikding ang mga magmamando sa kalibotan maghugpong ingong usa batok kang Jehova, ang Maglalalang sa uniberso, ug sa iyang dinihogang usa, o sa iyang tinudlo nga Hari, si Jesu-Kristo. Sa unsang paagi mahitabo kana?

Sumala sa kronolohiya sa Bibliya ug sa natuman nga mga tagna, ang Gingharian sa Diyos natukod sa tuig 1914 sa mga langit nga ang Hari  mao si Jesu-Kristo. a Niadtong panahona ang mga nasod sa kalibotan nakabaton ug usa lang ka hunahuna. Inay magpasakop sa pagkasoberano sa bag-ong nahimugso nga Gingharian sa Diyos, sila nalangkit sa usa ka panagtigi sa gahom—ang Dakong Gubat, o ang Gubat sa Kalibotan I.

Unsay hunahuna ni Jehova nga Diyos sa maong reaksiyon sa tawhanong mga magmamando? “Ang Usa nga nagalingkod sa kalangitan magakatawa; himoon sila ni Jehova nga yubitonon. Nianang panahona siya mosulti kanila sa iyang kasuko ug sa iyang kapungot iyang gubton sila.” Unya, si Jehova moingon sa iyang Anak, ang dinihogang Hari sa Gingharian: “Pangayo kanako, aron ikahatag ko ang mga nasod ingong imong panulondon ug ang mga kinatumyan sa yuta ingong imong gipanag-iya. Imong dugmokon sila pinaagi sa setro nga puthaw, imong pulpogon sila ingon sa usa ka sudlanan sa magkukulon.”—Salmo 2:4, 5, 8, 9.

Kining pagdugmok sa kataposan sa mabatokong mga nasod pinaagig setro nga puthaw mahitabo sa Armagedon, o Har–​Magedon. Ang kataposang basahon sa Bibliya, ang Pinadayag, nagbatbat niining tayuktok nga hitabo ingong ang “gubat sa dakong adlaw sa Diyos nga Labing Gamhanan,” nga niana ang “mga hari sa tibuok gipuy-ang yuta” gitigom. (Pinadayag 16:14, 16) Sa pag-impluwensiya sa mga demonyo, ang mga nasod sa yuta sa kataposan magkahiusa nga adunay usa lang ka tumong—ang pagpakiggubat batok sa Diyos nga Labing Gamhanan.

Kusog nagsingabot ang panahon nga ang mga tawo magtigom aron sa pagpakigbatok sa pagkasoberano sa Diyos. Katingad-anan, ang ilang “panaghiusa” dili makahatag kanilag personal nga mga kaayohan. Hinunoa, ang ilang lihok mahimong pasiuna sa dugay nang gipaabot nga kalinaw alang sa tanang tawo. Sa unsang paagi matuod kana? Nianang kataposang pakiggubat, ang Gingharian sa Diyos “magadugmok ug magatapos niining tanang gingharian [sa kalibotan], ug kini mobarog hangtod sa panahong walay tino.” (Daniel 2:44) Ang Gingharian sa Diyos, dili ang bisan unsang tawhanong organisasyon, mao unya ang kagamhanan nga magtuman sa pangandoy sa katawhan alang sa kalinaw sa kalibotan.

Ang Pangulong Administrador sa Ginghariang Kagamhanan

Kana mao ang Gingharian nga giampo sa daghang sinserong tawo, nga nag-ingon: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:10) Imbes nga usa ka dili-dayag nga kahimtang sa kasingkasing, ang Gingharian sa Diyos maoy tinuod nga kagamhanan nga nakahimo nag kahibulongang mga buhat sukad sa pagkatukod niini sa langit niadtong 1914. Atong hisgotan ang pipila ka hinungdanong butang nga magpasundayag nga ang Gingharian sa Diyos nagmando na gayod karon.

Una sa tanan, kini adunay gamhanan ug mahanason nga ehekutibong bahin nga gipangulohan sa naentronong Hari, si Jesu-Kristo. Niadtong 33 K.P., si Jehova nga Diyos naghimo kang Jesu-Kristo nga Ulo sa Kristohanong kongregasyon. (Efeso 1:22) Sukad niadto, gigamit ni Jesus ang iyang pagkaulo, sa ingon niana iyang gipasundayag ang iyang katakos sa pagdumala. Pananglitan, sa mihugpa ang usa ka dakong gutom sa Judea sa unang siglo, ang Kristohanong kongregasyon milihok dayon aron tabangan ang mga membro niini. Giorganisar ang kalihokan sa hinabang, ug si Bernabe ug Saulo gisugo gikan sa Antioquia nga nagdalag mga hinabang.—Buhat 11:27-30.

Makadahom kitag labaw pa gani gikan ni Jesu-Kristo karon tungod kay ang Ginghariang kagamhanan nagamando na. Kon mahitabo ang mga  katalagman sama sa mga linog, gutom, baha, urakan, bagyo, o pagbuto sa bolkan, ang Kristohanong kongregasyon sa mga Saksi ni Jehova motabang dayon sa mga isigkamagtutuo ug sa uban diha sa apektadong mga dapit. Pananglitan, sa dihang nahitabo ang grabeng mga linog sa El Salvador sa Enero ug Pebrero 2001, giorganisar ang mga hinabang sa tanang bahin sa nasod, ug ang mga grupo sa mga Saksi ni Jehova nga taga-Canada, Guatemala, ug Tinipong Bansa mihatag ug mga hinabang. Ang ilang tulo ka Kingdom Hall ug kapig 500 ka balay gitukod pag-usab sa kadiyot nga panahon.

Mga Sakop sa Ginghariang Kagamhanan sa Diyos

Sukad gayod sa pagkatukod niini sa 1914, ang langitnong Gingharian sa Diyos nagtigom ug nag-organisar sa mga sakop niini gikan sa mga katawhan sa tibuok kalibotan. Kini maoy katumanan sa usa ka talagsaong tagna nga gitala ni Isaias: “Mahitabo sa kaulahiang bahin sa mga adlaw nga ang bukid sa balay ni Jehova [iyang binayaw nga matuod nga pagsimba] lig-ong matukod ibabaw sa tumoy sa kabukiran, . . . nganha niini ang tanang kanasoran magaganayan.” Kining tagnaa nagpakita nga ang “daghang katawhan” motungas nianang bukira ug modawat sa mga instruksiyon ug mga balaod ni Jehova.—Isaias 2:2, 3.

Kining maong buluhaton miresulta sa labing talagsaong organisasyon sa modernong panahon—usa ka internasyonal nga kapunongan sa kapig 6,000,000 ka Kristohanon diha sa kapig 230 ka nasod sa yuta. Panahon sa internasyonal nga mga kombensiyon sa mga Saksi ni Jehova, ang mga maniniid sagad mahingangha sa pagkakita sa gugma, pakigdait, ug panaghiusa sa daghan kaayong katawhan, nga nagbuntog sa kababagan sa nasyonalidad, kultura, ug pinulongan. (Buhat 10:34, 35) Dili ka ba mouyon nga aron mahiusa sa usa ka kagamhanan ang ginatos ka etnikong grupo nga may kalinaw ug panag-uyon, kinahanglan nga kana maoy epektibo ug malig-on—ug tinuod?

Gingharian sa Diyos ug Edukasyon

Ang matag kagamhanan adunay mga sukdanan nga pagakab-oton sa mga lungsoranon niini, ug ang tanan nga buot mopuyo ubos sa maong kagamhanan kinahanglang makakab-ot sa maong mga sukdanan. Sa susama, ang Gingharian sa Diyos adunay mga sukdanan nga kinahanglang makab-ot sa tanan nga mahimong kuwalipikadong mga sakop niini. Ugaling lang, ang paghimo sa daghan kaayong tawo nga may lahi kaayong kagikan sa pagdawat ug pagsunod sa samang mga sukdanan maoy dako kaayong proyekto. Ania ang laing butang nga magpamatuod nga ang Gingharian sa Diyos nagmando na—ang epektibong programa niini sa edukasyon nga makaabot ug makapausob sa hunahuna ug kasingkasing.

Sa unsang paagi gipalampos sa Ginghariang kagamhanan kining lisod nga buluhaton? Pinaagi sa metodo sa mga apostoles sa pagwali “sa balay-balay” ug pagtudlo sa Pulong sa Diyos sa tagsatagsa ka tawo. (Buhat 5:42; 20:20) Unsa ka epektibo kining matanga sa edukasyon? Si Jacques Johnson, usa ka paring Katoliko, misulat diha sa usa ka senemanang mantalaan sa Canada bahin sa iyang paningkamot nga pahunongon ang usa ka  babaye sa pagtuon uban sa mga Saksi ni Jehova. “Nalibog ako ug nakaamgo nga nalangkit ako sa usa ka pakigbisog nga dili ako makadaog,” matod niya. “Nakaamgo ako nga latas sa ubay-ubayng bulan, naugmad niining mga babayeng Saksi ni Jehova ang hinungdanong relasyon uban niining batan-ong inahan nga anaa na lang sa sulod sa balay. Sila nakigsuod kaniya pinaagi sa pagtabang kaniya, pagpakighigala kaniya, pag-ugmad ug hinungdanong pagbinatiay sa kasingkasing. Sa wala madugay siya nahimong aktibong membro sa ilang relihiyon ug ako walay mahimo sa pagpugong sa pagkahitabo niana.” Maingon nga ang kasingkasing niining kanhi Katoliko natandog sa mensahe sa Bibliya nga gitudlo sa mga Saksi ni Jehova ug pinaagi sa ilang Kristohanong panggawi, natandog usab ang mga kasingkasing sa milyonmilyon sa tibuok kalibotan.

Kining matanga sa edukasyon—ang edukasyon bahin sa Gingharian—gipasukad sa Bibliya, nga nagpaluyo sa mga prinsipyo ug mga sukdanan niini bahin sa moralidad. Nagtudlo kini sa mga tawo nga maghigugmaay ug magpasidungog sa usag usa walay sapayan kon unsay ilang kagikan. (Juan 13:34, 35) Motabang usab kini sa mga tawo sa pagsunod sa tambag: “Hunong na sa pagpaumol sumala niining sistemaha sa mga butang, kondili mag-usab kamo pinaagi sa pagbag-o sa inyong hunahuna, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.” (Roma 12:2) Pinaagi sa pagbiya sa ilang kanhing pagkinabuhi ug sa malipayong pagsunod sa mga balaod ug mga prinsipyo sa Ginghariang kagamhanan, ang milyonmilyon nakakaplag sa kalinaw ug kalipay karon ug sa sanag nga kaugmaon.—Colosas 3:9-11.

Ang usa ka talagsaong tabang sa pagkab-ot niining tibuok-kalibotan nga panaghiusa mao kining magasina, Ang Bantayanang Torre. Pinaagi sa nagkahiusang mga paagi sa paghubad ug sa daghag-pinulongan nga kasangkapan sa pagpamatik, ang pangunang mga artikulo sa Ang Bantayanang Torre gidungan pagpatik diha sa 135 ka pinulongan, ug kapig 95 porsiyento sa mga magbabasa niini sa tibuok kalibotan makatuon sa impormasyon diha sa ilang pinulongan mismo sa samang panahon.

Ang usa ka Mormon nga magsusulat naglista sa labing talagsaong mga kalamposan sa pagmisyon sa gawas sa iyang simbahan. Iyang gilista ang Ang Bantayanang Torre ug Pagmata!, nga gipatik sa mga Saksi ni Jehova, ingong labing maayong mga magasin alang sa pag-ebanghelyo ug miingon: “Wala gayoy makaakusar nga ang Bantayanang Torre o Pagmata! nagpasiugdag pagkamatagbawon sa kaugalingon—sa kasukwahi, ilang ginahaling ang pagbati sa kaigmat nga talagsa ra nakong nasinati sa ubang relihiyosong publikasyon. Ang Bantayanang Torre ug Pagmata! makapadasig tungod kay ang unod niini maoy binase sa tinuod nga mga panghitabo, nasusi pag-ayo, ug realistiko.”

Ang ebidensiya nagbuntaog nga ang Gingharian sa Diyos bug-os nang naglihok. Ang mga Saksi ni Jehova malipayon ug maabtikong nagapakig-ambit niining “maayong balita sa gingharian” ngadto sa ilang mga silingan, nga nagdapit kanila nga mahimong mga sakop niini. (Mateo 24:14) Makapaikag ba kanimo ang maong kalaoman? Matagamtam nimo ang mga panalangin tungod sa pagpakig-uban niadtong ginaedukar ug naningkamot sa pagsunod sa mga sukdanan sa Gingharian. Labi pang maayo, makapahimulos ka sa kalaoman nga magkinabuhi ubos sa pagmando sa Gingharian sa sinaad nga bag-ong kalibotan diin “magpuyo ang pagkamatarong.”—2 Pedro 3:13.

[Footnote]

[Hulagway sa panid 4, 5]

Niadtong 1914 ang mga nasod nalangkit sa usa ka gubat sa kalibotan

[Mga hulagway sa panid 6]

Ang boluntaryong kalihokan sa paghinabang maoy ebidensiya sa pagpakitag Kristohanong gugma

[Hulagway sa panid 7]

Ang mga Saksi ni Jehova sa tibuok kalibotan nagpahimulos sa samang programa sa edukasyon