Mga Pangutana Gikan sa mga Magbabasa

Unsay buot ipasabot ni Jesus sa dihang giingnan niya ang iyang mga tinun-an: “Nagsugod na ako pagkakita kang Satanas nga nahulog na ingon sa kilat gikan sa langit”?

Bag-o pang napili ni Jesus ang 70 ka tinun-an, ug iyang “gipadala sila nga tinagurha nga mag-una kaniya ngadto sa matag siyudad ug dapit nga iyang adtoan.” Sa dihang namauli na ang 70, sila nagmaya tungod kay nagmalamposon ang ilang buluhaton. “Ginoo, bisan ang mga demonyo nailalom kanamo pinaagi sa paggamit sa imong ngalan,” sila miingon. Nianang higayona, si Jesus miingon: “Nagsugod na ako pagkakita kang Satanas nga nahulog na ingon sa kilat gikan sa langit.”—Lucas 10:1, 17, 18.

Sa unang tan-aw, morag naghisgot si Jesus dinhi ug usa ka hitabo nga natapos na. Apan, 60 ka tuig human gisulti ni Jesus ang mga pulong sa itaas, ang edarang si apostol Juan namulong usab sa samang paagi sa dihang siya misulat: “Gitambog ang dakong dragon, ang orihinal nga halas, ang usa nga gitawag Yawa ug Satanas, nga nagpahisalaag sa tibuok gipuy-ang yuta; siya gitambog sa yuta, ug ang iyang mga manulonda gitambog uban kaniya.”—Pinadayag 12:9.

Sa dihang gisulat ni Juan kanang mga pulonga, si Satanas atua pa sa langit. Nganong nasayod man kita? Tungod kay ang Pinadayag maoy usa ka basahon sa mga tagna, dili sa kasaysayan. (Pinadayag 1:1) Busa, sa panahon ni Juan, si Satanas wala pa itambog sa yuta. Sa pagkatinuod, adunay mga pamatuod nga kana nahitabo wala madugay human naentrono si Jesus ingong Hari sa Gingharian sa Diyos niadtong 1914. a—Pinadayag 12:1-10.

Busa, nganong namulong man si Jesus nga daw si Satanas gipalagpot na gikan sa langit? Ang ubang eskolar miingon nga gisaway ni Jesus ang iyang mga tinun-an tungod sa ilang dili-husto nga garbo. Nagtuo sila nga mao kini ang diwa sa iyang gisulti: ‘Nabuntog ninyo ang mga demonyo, apan ayaw pagpanghambog. Si Satanas nahimong garboso, ug mitultol kana sa iyang kalit nga pagkapukan.’

Dili kita bug-os nga makaseguro nga mao kini ang iyang ipasabot. Apan, mas dakog kalagmitan nga si Jesus nagmaya niadtong tungora uban sa iyang mga tinun-an ug naghisgot bahin sa umaabot nga pagkapukan ni Satanas. Mas nahibalo si Jesus sa dakong kasuko sa Yawa kay ni bisan kinsa sa iyang mga tinun-an. Handurawa ang kalipay nga gibati ni Jesus sa pagkadungog nga nabuntog sa iyang dili-hingpit nga tawhanong mga tinun-an ang gamhanang mga demonyo! Kining pagbuntog sa mga demonyo nagpakita lang kon unsa unyay mahitabo sa dihang si Jesus, ingong si Miguel nga arkanghel, makiggubat kang Satanas ug magtambog kaniya sa yuta gikan sa langit.

Sa dihang miingon si Jesus nga iyang nakita si Satanas nga “nahulog na,” lagmit nga gipasiugda niya ang pagkasegurado sa pagkapukan ni Satanas. Sama kini sa ubang mga tagna sa Bibliya nga naghisgot sa umaabot nga mga panghitabo nga daw kini nahitabo na. Pananglitan, matikdi nga ang tagna labot sa Mesiyas diha sa Isaias 52:13–53:12 gihisgotan nga daw nahitabo na. Si Jesus lagmit nga nagpadayag sa iyang pagsalig nga ang pagpalagpot kang Satanas gikan sa langit matuman gayod sumala sa kabubut-on sa Iyang Amahan. Masaligon usab si Jesus nga sa takdang panahon sa Diyos, si Satanas ug ang iyang mga demonyo itambog sa kahiladman ug malaglag na unya hangtod sa hangtod.—Roma 16:20; Hebreohanon 2:14; Pinadayag 20:1-3, 7-10.

[Footnote]