Si Jehova Nagpadayag sa Iyang Himaya Ngadto sa mga Mapainubsanon

“Ang sangpotanan sa pagpaubos ug pagkahadlok kang Jehova maoy bahandi ug himaya ug kinabuhi.”—PROVERBIO 22:4.

1, 2. (a) Sa unsang paagi ang basahon sa Mga Buhat nagpakita nga si Esteban “usa ka tawo nga puno sa pagtuo ug sa balaang espiritu”? (b) Unsay pamatuod nga si Esteban mapainubsanon?

 SI Esteban “usa ka tawong puno sa pagtuo ug sa balaang espiritu.” Siya usab “puno sa pagkamapuangoron ug gahom.” Ingong usa sa unang mga tinun-an ni Jesus, siya mihimog dagkong mga ilhanan ug mga tilimad-on taliwala sa katawhan. Sa usa ka higayon, dihay pipila ka lalaki nga nanindog aron makiglalis kaniya, “apan sila dili makasugakod batok sa kaalam ug sa espiritu nga pinaagi niana siya nagasulti.” (Buhat 6:5, 8-10) Dayag nga si Esteban maoy maayong estudyante sa Pulong sa Diyos, ug siya hanas nga nagdepensa niana atubangan sa Hudiyong relihiyoso nga mga lider sa iyang adlaw. Ang iyang detalyadong pamatuod, nga nasulat diha sa Buhat kapitulo 7, nagpamatuod sa iyang dakong kaikag sa inanayng pagpadayag sa katuyoan sa Diyos.

² Dili sama niadtong relihiyosong mga lider, kansang posisyon ug kahibalo nagpabati kanilang labaw kay sa ordinaryong mga tawo, si Esteban mapainubsanon. (Mateo 23:2-7; Juan 7:49) Bisan tuod batid sa Kasulatan, siya kontento na kaayo nga gitudlo sa “pag-apod-apod ug pagkaon nganha sa mga lamesa” aron ang mga apostoles makadeboto sa ilang kaugalingon “sa pag-ampo ug sa pagministeryo sa pulong.” Si Esteban maayog dungog taliwala sa mga igsoon busa napili nga mahimong usa sa pito ka lalaki nga napanghimatud-ang maayo nga maoy modumala niining adlaw-adlaw nga pagpang-apod-apod ug pagkaon. Mapainubsanon niyang gidawat ang maong buluhaton.—Buhat 6:1-6.

3. Unsang talagsaong pagpasundayag sa dili-takos nga kalulot sa Diyos ang nasinati ni Esteban?

³ Ang mapainubsanong tinamdan ni Esteban, dinuyogan sa iyang espirituwalidad ug integridad, namatikdan ni Jehova. Sa dihang si Esteban nagpamatuod ngadto sa mabatokong panon sa Hudiyong mga lider sa Sanhedrin, “nakita [sa iyang mga magsusupak] nga ang iyang nawong sama sa nawong sa manulonda.” (Buhat 6:15) Ang iyang panagway maoy sama nianang iya sa mensahero sa Diyos, uban ang kalinaw nga naggikan sa Diyos sa himaya, si Jehova. Human makahatag ug maisogong pagpamatuod ngadto sa mga membro sa Sanhedrin, nasinati ni Esteban ang talagsaon kaayong pagpasundayag sa dili-takos nga kalulot sa Diyos. “Siya, nga puno sa balaang espiritu, mitutok sa langit ug iyang nakita ang himaya sa Diyos ug si Jesus nga nagbarog sa tuong kamot sa Diyos.” (Buhat 7:55) Alang kang Esteban, kining makapahinganghang talan-awon nagpamatuod pag-usab sa posisyon ni Jesus ingong Anak sa Diyos ug ang Mesiyas. Kini nagpalig-on sa mapainubsanong Esteban ug nagpasalig kaniya nga naangkon niya ang pag-uyon ni Jehova.

4. Kang kinsa gipadayag ni Jehova ang iyang himaya?

⁴ Sumala sa gipatin-aw sa panan-awon nga gipakita kang Esteban, si Jehova nagpadayag sa iyang himaya ug sa iyang katuyoan ngadto sa mahinadlokon-sa-Diyos nga mga tawo nga mapainubsanon ug nagpabili sa ilang relasyon kaniya. “Ang sangpotanan sa pagpaubos ug pagkahadlok kang Jehova maoy bahandi ug himaya ug kinabuhi,” nag-ingon ang Bibliya. (Proverbio 22:4) Busa, hinungdanon nga atong masabtan kon unsa ang tinuod nga pagkamapainubsanon, kon unsaon nato pag-ugmad kining importanteng hiyas, ug kon sa unsang paagi kita makabenepisyo sa pagpasundayag niana sa tanang bahin sa kinabuhi.

 Pagkamapainubsanon—Usa ka Diyosnong Hiyas

5, 6. (a) Unsa ang pagkamapainubsanon? (b) Sa unsang paagi si Jehova nagpasundayag ug pagkamapainubsanon? (c) Sa unsang paagi kita angayng maapektohan sa pagkamapainubsanon ni Jehova?

⁵ Makapatingala sa pipila ka tawo nga si Jehova nga Diyos, ang kinatas-an ug labing mahimayaon sa uniberso, mao ang pangunang panig-ingnan sa pagkamapainubsanon. Kang Jehova, si Haring David miingon: “Ihatag mo kanako ang imong taming sa kaluwasan, ug ang imong tuong kamot magalig-on kanako, ug ang imong pagpaubos magapadako kanako.” (Salmo 18:35) Sa paghubit kang Jehova ingong mapainubsanon, gipadapat ni David ang Hebreohanong lintunganay nga pulong nga nagkahulogang “nagadungo.” Gawas pa sa pulong nga “pagkamapainubsanon,” ang ubang mga pulong nga adunay kalabotan sa mao gihapong lintunganay nga pulong naglakip sa “pagpaubos,” “kaaghop,” ug “pagpaubos sa kaugalingon aron motupong sa mas ubos ug kahimtang.” Busa si Jehova nagpasundayag ug pagkamapainubsanon sa dihang iyang gipaubos ang iyang kaugalingon aron makiglabot sa dili-hingpit nga tawong si David ug migamit kaniya ingong Iyang hawas nga hari. Ingon sa gipakita sa superskripsiyon sa Salmo 18, si Jehova nanalipod ug nagpaluyo kang David, nagluwas kaniya “gikan sa kamot sa tanan niyang kaaway ug gikan sa kamot ni Saul.” Si David, sa baylo, nahibalo nga ang bisan unsang kabantog o himaya nga makab-ot tingali niya ingong hari nagdepende sa mapainubsanong paglihok ni Jehova alang kaniya. Kining maong kaamgohan nakatabang kang David sa pagpabiling mapainubsanon.

⁶ Komosta kita? Gipili ni Jehova nga tudloan kita sa kamatuoran, ug tingali gihatagan niya kita ug linaing mga pribilehiyo sa pag-alagad pinaagi sa iyang organisasyon, o tingali gigamit niya kita sa usa ka paagi aron sa pagpatuman sa iyang kabubut-on. Unsa may atong bation niining tanan? Dili ba angay kitang magpaubos? Dili ba angay kitang magpasalamat sa pagkamapainubsanon ni Jehova ug likayan ang pagtuboy sa atong kaugalingon, nga seguradong mosangpot sa katalagman?—Proverbio 16:18; 29:23.

7, 8. (a) Sa unsang paagi ang pagkamapainubsanon ni Jehova napasundayag diha sa iyang mga pakiglabot kang Manases? (b) Sa unsang paagi si Jehova, maingon man si Manases, naghatag ug panig-ingnan nga atong sundon sa pagpakitag pagkamapainubsanon?

⁷ Dili lang kay nagpakita si Jehova ug dakong pagkamapainubsanon pinaagi sa pagpakiglabot sa dili-hingpit nga mga tawo kondili andam usab siyang magpakita ug kaluoy niadtong mapaubsanon ug hunahuna, nga nagbangon pa gani, o nagbayaw, niadtong mga tawong nagpaubos. (Salmo 113:4-7) Tagda, pananglitan, ang kahimtang ni Haring Manases sa Juda. Gigamit niya sa sayop nga paagi ang iyang dungganong posisyon ingong hari aron sa pagpalambo sa bakak nga pagsimba ug “nagbuhat sa hilabihan kon unsay daotan sa mga mata ni Jehova, aron sa pagpasuko kaniya.” (2 Cronicas 33:6) Sa kataposan, gisilotan ni Jehova si Manases  pinaagi sa pagtugot sa hari sa Asirya nga tangtangon siya sa iyang pagkahari. Sa bilanggoan, “gilukmay [ni Manases] ang nawong ni Jehova nga iyang Diyos ug nagpadayon pagpaubos pag-ayo sa iyang kaugalingon,” mao nga gipasig-uli siya ni Jehova sa trono sa Jerusalem, ug “naila ni Manases nga si Jehova mao ang matuod nga Diyos.” (2 Cronicas 33:11-13) Oo, sa kataposan, ang mapainubsanong hunahuna ni Manases nakapahimuot kang Jehova, kinsa sa baylo nagpakitag pagkamapainubsanon pinaagi sa pagpasaylo kaniya ug pagpasig-uli kaniya sa pagkahari.

⁸ Ang pagkaandam ni Jehova nga mopasaylo ug ang mahinulsolong tinamdan ni Manases nagsilbing hinungdanong mga pagtulon-an sa pagkamapainubsanon alang kanato. Angay natong hinumdoman kanunay nga ang paagi sa atong pagtratar niadtong nakapasilo tingali kanato ug ang tinamdan nga atong gipasundayag sa dihang kita nakasala makaapektar sa paagi nga si Jehova makiglabot kanato. Kon kita andam nga mopasaylo sa mga kalapasan sa uban ug mapainubsanong moangkon sa atong mga kasaypanan, si Jehova mahimong maluoy kanato.—Mateo 5:23, 24; 6:12.

Ang Diyosnong Himaya Gipadayag sa mga Mapainubsanon

9. Ang pagkamapainubsanon timailhan ba sa kahuyang? Ipatin-aw.

⁹ Apan ang pagkamapainubsanon ug mga hiyas nga nalangkit niana dili angayng pakasaypon nga usa ka timailhan sa kahuyang o ingong kiling sa pagkonsentir sa sayop. Ingon sa gipamatud-an sa Balaang Kasulatan, si Jehova mapainubsanon, bisan pa niana siya nagpasundayag ug matarong nga kapungot ug talagsaong gahom sa dihang kinahanglan niya kining ipasundayag. Tungod sa iyang pagkamapainubsanon, si Jehova nagpakitag pag-uyon, o linaing konsiderasyon, niadtong mapaubsanon ug hunahuna, apan mopalayo siya niadtong mga mapahitas-on. (Salmo 138:6) Sa unsang paagi si Jehova nagpakita ug linaing konsiderasyon sa iyang mapainubsanong mga alagad?

10. Unsay gipadayag ni Jehova ngadto sa mga mapainubsanon, sumala sa gipaila sa 1 Corinto 2:6-10?

¹⁰ Sa iyang gitakdang panahon ug pinaagi sa iyang gipiling agianan sa komunikasyon, si Jehova nagpadayag ngadto sa mga mapainubsanon sa mga detalye kon unsaon niya pagpatuman ang iyang katuyoan. Kining mahimayaong mga butang wala ipadayag niadtong mapahitas-ong nagasalig, o hugot nga nagsunod, sa tawhanong kaalam o panghunahuna. (1 Corinto 2:6-10) Apan ang mga mapainubsanon, tungod kay nahatagan ug tukmang pagsabot sa katuyoan ni Jehova, natukmod sa paghimaya kang Jehova tungod kay mas gipabilhan nila ang iyang makapahinganghang himaya.

11. Sa unang siglo, sa unsang paagi ang uban nagpakita ug kakulang sa pagkamapainubsanon, ug sa unsang paagi kini nakadaot kanila?

¹¹ Sa unang siglo, daghan, lakip na ang pipila nga nag-angkong mga Kristohanon, ang nagpakita ug kakulang sa pagkamapainubsanon ug nangapandol sa gipadayag ni apostol Pablo kanila bahin sa katuyoan sa Diyos. Si Pablo nahimong “usa ka apostol alang sa kanasoran,” apan dili tungod sa iyang nasyonalidad, edukasyon, edad, o hataas nga rekord sa maayong mga buhat. (Roma 11:13) Subsob nga isipon sa unodnon-ug-hunahuna nga mga tawo nga mao kiniy magtino kon kinsay angayng himoon ni Jehova nga iyang galamiton. (1 Corinto 1:26-29; 3:1; Colosas 2:18) Apan, si Pablo pinili ni Jehova, kaharmonya sa Iyang mahigugmaong-kalulot ug matarong nga katuyoan. (1 Corinto 15:8-10) Kadtong gihubit ni Pablo ingong “maayong laki nga mga apostoles,” maingon man ang ubang mga magsusupak, wala modawat kang Pablo ug sa iyang pagpangatarongan pinasukad sa Kasulatan. Ang ilang kakulang sa pagkamapainubsanon nakababag kanila sa pagbaton ug kahibalo ug pagsabot sa mahimayaong paagi nga si Jehova nagapalampos sa iyang katuyoan. Hinaot nga dili nato pakamenoson o hukman-daan kadtong gipili ni Jehova sa pagtuman sa iyang kabubut-on.—2 Corinto 11:4-6.

12. Sa unsang paagi ang panig-ingnan ni Moises nagpakita nga si Jehova magpakitag kalulot niadtong mga mapainubsanon?

 ¹² Sa laing bahin, adunay daghang panig-ingnan sa Bibliya nga nagpasiugda kon sa unsang paagi ang mapainubsanong mga tawo gipakitaag pag-uyon pinaagi sa daklit nga pagkakita sa himaya sa Diyos. Si Moises, “ang labing maaghop” sa tanang tawo, nakakita sa himaya sa Diyos ug adunay suod nga relasyon uban kaniya. (Numeros 12:3) Kining mapainubsanong tawo, kinsa migugol ug 40 ka tuig ingong ubos nga magbalantay, nga lagmit ang dakong bahin niini diha sa Arabianhong Peninsula, gipakitaan gayod ug pag-uyon sa Maglalalang sa daghang paagi. (Exodo 6:12, 30) Uban sa pagpaluyo ni Jehova, si Moises nahimong tigpamaba ug pangulong tig-organisar sa nasod sa Israel. Makapakigsulti siya sa Diyos. Pinaagi sa usa ka panan-awon, iyang nakita “ang dagway ni Jehova.” (Numeros 12:7, 8; Exodo 24:10, 11) Kadtong miila niining mapainubsanong alagad ug hawas sa Diyos gipanalanginan usab. Sa susama, kita pagapanalanginan kon kita moila ug motuman sa manalagna nga mas dako pa kang Moises, si Jesus, maingon man sa “matinumanon ug maalamong ulipon” nga gitudlo niya.—Mateo 24:45, 46; Buhat 3:22.

13. Sa unsang paagi ang himaya ni Jehova gipadayag ngadto sa mapainubsanong mga magbalantay sa unang siglo?

¹³ Kang kinsa ‘midan-ag ang himaya ni Jehova’ duyog sa pagpahibalo sa manulonda sa maayong balita bahin sa pagkatawo sa “usa ka Manluluwas, nga mao ang Kristo nga Ginoo”? Dili sa mapahitas-ong relihiyoso nga mga lider o sa importanteng mga tawo nga tag-as ug posisyon kondili sa mapainubsanong mga magbalantay “nga nagpuyo sa gawas ug nagpadayon sa pagbantay sa ilang panon sa kahayopan sa kagabhion.” (Lucas 2:8-11) Kining mga tawhana wala pabilhi tungod sa ilang kahimtang ug trabaho. Bisan pa niana, sila mao ang namatikdan ni Jehova ug gipili niya nga unang pahibaloon bahin sa pagkatawo sa Mesiyas. Oo, si Jehova nagpadayag sa iyang himaya ngadto sa mapainubsanon ug mahinadlokon-sa-Diyos nga mga tawo.

14. Unsang mga panalangin gikan sa Diyos ang modangat niadtong mga mapainubsanon?

¹⁴ Unsay gitudlo kanato niining maong mga panig-ingnan? Kini nagpakita kanato nga si Jehova nagpakitag pag-uyon ug nagpadayag ug kahibalo ug pagsabot sa iyang katuyoan ngadto sa mga mapainubsanon. Iyang gipili ang mga indibiduwal nga wala tingali makakab-ot sa panahom sa mga tawo ug gihimo silang galamiton sa pagpahibalo sa iyang mahimayaong katuyoan ngadto sa uban. Kini angayng magpalihok kanato sa pagpadayon sa pagpangayog pagtultol gikan kang Jehova, sa iyang matagnaong Pulong, ug sa iyang organisasyon. Makaseguro kita nga si Jehova magpadayon sa pagpahibalo sa iyang mapainubsanong mga alagad bahin sa anam-anam nga pagpadayag sa iyang mahimayaong katuyoan. Ang manalagnang si Amos miingon: “Ang Soberanong Ginoong Jehova dili mobuhat sa usa ka butang gawas kon gikapadayag niya ang iyang kompidensiyal nga butang ngadto sa iyang mga alagad nga mga manalagna.”—Amos 3:7.

Ugmara ang Pagkamapainubsanon ug Mabatonan Nimo ang Pag-uyon sa Diyos

15. Nganong maningkamot kita sa paghupot sa pagkamapainubsanon, ug sa unsang paagi kini gipakita sa kahimtang ni Haring Saul sa Israel?

¹⁵ Aron mabatonan ang dumalayong pag-uyon sa Diyos, kita kinahanglang magpabiling mapainubsanon. Sa dihang ang usa mapainubsanon, wala magpasabot nga magpabilin siyang mapainubsanon. Posible nga ang usa ka tawo mawad-an sa pagkamapainubsanon ug mahimong mapahitas-on ug magbayaw sa kaugalingon, nga motultol ngadto sa pagkamapangahason ug katalagman. Mao gayod kanay gibuhat ni Saul, ang unang gidihogan nga hari sa Israel. Sa dihang gipili siya, iyang gibati nga siya ‘gamay sa iyang panan-aw.’ (1 Samuel 15:17) Apan, human makamando ug sulod lamang sa duha ka tuig, siya milihok nga mapangahason. Iyang gisalikway ang kahikayan ni Jehova sa pagtanyag ug mga halad pinaagi ni manalagnang Samuel, ug gipakamatarong niya ang iyang pagtanyag mismo sa mga halad. (1 Samuel 13:1, 8-14) Mao kini ang sinugdanan sa sunodsunod nga mga hitabo nga dayag nga nagpakita sa iyang kakulang sa pagkamapainubsanon. Ang resulta mao ang pagkawala sa espiritu ug pag-uyon sa Diyos, nga sa ngadtongadto mitultol sa iyang makauulaw nga kamatayon. (1 Samuel 15:3-19, 26; 28:6; 31:4) Klaro ang pagtulon-an: Kinahanglang maningkamot kita sa paghupot sa pagkamapainubsanon ug pagkamapinasakopon ug pukgoon ang pagbati sa pagpaimportante sa kaugalingon, sa ingon malikayan ang bisan unsang mapangahasong mga buhat nga moresulta sa pagkawala sa pag-uyon ni Jehova.

16. Sa unsang paagi ang pagpamalandong bahin sa atong relasyon kang Jehova ug sa atong isigkatawo motabang kanato sa pag-ugmad sa pagkamapainubsanon?

¹⁶ Bisan tuod ang pagkamapainubsanon wala ilista ingong bahin sa bunga sa espiritu sa Diyos, kini maoy diyosnong hiyas nga kinahanglang ugmaron. (Galacia 5:22, 23; Colosas 3:10, 12) Tungod kay naglangkit kini sa kahimtang sa hunahuna—sa ato pa, kon sa unsang paagi atong gilantaw ang atong kaugalingon ug ang uban—ang pag-ugmad sa pagkamapainubsanon nagkinahanglan ug tinuyong paningkamot. Ang pagpangatarongan ug pagpamalandong sa atong relasyon kang Jehova ug sa atong isigkatawo makatabang kanato sa pagpabiling mapainubsanon. Sa mga mata sa Diyos, ang tanang dili-hingpit nga unod sama ra sa lunhawng balili nga motubo sulod sa usa ka yugto sa panahon, dayon malaya. Ang mga tawo sama sa mga apan-apan diha sa uma. (Isaias 40:6, 7, 22) Aduna bay katarongan ang usa ka dahon sa sagbot nga magpasigarbo tungod lang kay mas taas kini kay sa ubang mga dahon sa sagbot? Aduna bay katarongan ang apan-apan nga manghambog sa abilidad niini tungod lang kay makalukso kini ug mas taas kay sa ubang mga apan-apan? Dili makataronganon bisan ang paghunahuna na lang niana. Busa gipahinumdoman ni apostol Pablo ang iyang mga isigka-Kristohanon: “Kinsa bay naghimo kanimo nga lahi sa uban? Sa pagkatinuod, unsay anaa kanimo nga wala nimo madawat? Kon, karon, tinuod man nga nadawat nimo kini, nganong ikaw manghambog nga daw wala nimo kini madawat?” (1 Corinto 4:7) Ang pagpamalandong sa mga teksto sa Bibliya nga sama niini makatabang kanato sa pag-ugmad ug pagpasundayag sa pagkamapainubsanon.

17. Unsay nakatabang kang manalagnang Daniel sa pag-ugmad ug pagkamapainubsanon, ug unsay makatabang kanato sa paghimog susama niana?

¹⁷ Ang Hebreohanong manalagna nga si Daniel gipahayag ingon nga “tawong tilinguhaon kaayo” sa mga mata sa Diyos tungod sa iyang ‘pagpaubos’ sa iyang kaugalingon, sa ato pa, tungod sa iyang pagkamapainubsanon. (Daniel 10:11, 12) Unsay nakatabang kang Daniel sa pag-ugmad sa pagkamapainubsanon? Una sa tanan, siya nagpasundayag ug bug-os nga pagsalig kang Jehova, nga kanunayng midangop kaniya diha sa pag-ampo. (Daniel 6:10, 11) Dugang pa, si Daniel maoy makugihon ug hustong napalihok nga estudyante sa Pulong sa Diyos, nga nakatabang kaniya sa pagsentro sa iyang pagtagad sa mahimayaong katuyoan  sa Diyos. Siya andam usab nga modawat sa iyang mga kasaypanan, dili lamang nianang sa iyang katawhan. Ug siya interesado gayod sa pagbayaw sa pagkamatarong sa Diyos, dili sa iyaha. (Daniel 9:2, 5, 7) Makakat-on ba kita gikan sa talagsaong panig-ingnan ni Daniel ug maningkamot sa pag-ugmad ug pagpasundayag ug pagkamapainubsanon diha sa tanang bahin sa atong kinabuhi?

18. Unsang himaya ang nagpaabot niadtong nagpasundayag ug pagkamapainubsanon karon?

¹⁸ “Ang sangpotanan sa pagpaubos ug pagkahadlok kang Jehova maoy bahandi ug himaya ug kinabuhi,” nag-ingon ang Proverbio 22:4. Oo, si Jehova may pag-uyon niadtong mga mapainubsanon, ug ang resulta mao ang himaya ug kinabuhi. Human mapasibo ni Jehova ang panghunahuna ni Asap, tungod kay mohunong na unta siya sa pag-alagad sa Diyos, ang salmista mapainubsanong midawat: “Pinaagi sa imong tambag pagatultolan mo ako, ug sa ulahi dad-on mo ako sa himaya.” (Salmo 73:24) Komosta karon? Unsang himaya ang nagpaabot niadtong nagpasundayag ug pagkamapainubsanon? Gawas pa sa pagtagamtam ug inuyonan ug malipayon nga relasyon uban kang Jehova, sila makapaabot sa pagkakita sa katumanan sa inspiradong mga pulong ni David: “Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” Usa ka mahimayaong kaugmaon gayod!—Salmo 37:11.

Nahinumdom Ka Ba?

• Sa unsang paagi si Esteban usa ka panig-ingnan sa mapainubsanon nga tawo kang kinsa si Jehova nagpadayag sa Iyang himaya?

• Sa unsang mga paagi si Jehova nga Diyos nagpasundayag ug pagkamapainubsanon?

• Unsang mga panig-ingnan ang nagpakita nga gipadayag ni Jehova ang iyang himaya ngadto sa mga mapainubsanon?

• Sa unsang paagi ang panig-ingnan ni Daniel makatabang kanato sa pag-ugmad sa pagkamapainubsanon?

[Mga Pangutana sa Pagtuon]

 [Kahon sa panid 12]

Lig-on Apan Mapainubsanon

Sa kombensiyon sa mga Estudyante sa Bibliya (karon nailhan ingong mga Saksi ni Jehova), didto sa Cedar Point, Ohio, T.B.A. niadtong 1919, ang 50-anyos nga si J. F. Rutherford, kinsa maoy nagdumala sa buluhaton niadtong panahona, malipayong miboluntaryo ingong bell boy, nga nagbitbit sa mga maleta ug nagpahiluna sa mga kombensiyonista sa ilang mga lawak. Sa kataposang adlaw sa kombensiyon, nalipay kaayo ang nanambong nga 7,000 sa iyang giingon: “Kamo maoy mga embahador sa Hari sa mga hari ug Ginoo sa mga ginoo, nga nagapahibalo sa mga tawo . . . sa mahimayaong gingharian sa atong Ginoo.” Bisan tuod si Brader Rutherford maoy tawo nga hugot ug kombiksiyon, nga nailhan tungod sa puwersadong pagpanulti ug dili pagkompromiso sa iyang gituohan nga maoy matuod, siya mapainubsanon usab kaayo sa atubangan sa Diyos, nga subsob nagbanaag niana diha sa iyang mga pag-ampo panahon sa pagsimba sa buntag sa Bethel.

[Hulagway sa panid 9]

Si Esteban, nga batid sa Kasulatan, mapainubsanong nag-apod-apod ug pagkaon

[Hulagway sa panid 10]

Ang mapainubsanong hunahuna ni Manases nakapahimuot kang Jehova

[Hulagway sa panid 12]

Unsay nakapahimo kang Daniel nga “tawong tilinguhaon kaayo”?