Unsay Makahatag sa Kinabuhi ug Tinuod nga Kahulogan?

SA DIHANG si Jesse, nga usa ka 17-anyos nga estudyante sa hayskul, gipangutana bahin sa kahulogan sa kinabuhi, siya mitubag, “Paglipaylipay lang kutob sa mahimo, samtang buhi ka pa.” Si Suzie adunay lahi nga panglantaw. “Sa tan-aw nako, depende ra kanimo kon unsaon nimo paghatag ug kahulogan sa imong kinabuhi,” matod niya.

Nakapamalandong ka na ba sukad bahin sa kahulogan sa kinabuhi? Aduna bay usa ka katibuk-ang katuyoan alang sa tanang katawhan? O husto ba si Suzie—nga depende ra sa matag usa kanato kon unsaon nato paghatag ug kahulogan sa atong kinabuhi? Bisag mauswagon na kaayo ang teknolohiya sa atong katilingban karon, mobati gihapon kitag kahaw-ang. May mga panahon nga mahibulong kita, ‘Nganong naglungtad man kita?’

Gisulayan sa modernong mga siyentipiko ang pagtubag sa maong pangutana. Unsay ilang nakaplagan? “Sumala sa ebolusyon, ang kinabuhi wala gayoy kinaiyanhong bili,” matod ni David P. Barash, propesor sa sikolohiya ug zoolohiya. Alang sa mga siyentipiko nga nagtuo sa ebolusyon, ang buhing mga butang adunay usa ra ka katuyoan: magpabiling buhi ug magpasanay. Busa, si Propesor Barash miingon: “Diha sa haluag nga uniberso nga walay katuyoan ug wala magtagad sa katawhan, ang mga tawo na lay mag-igo kon unsaon nila paghatag ug kahulogan sa ilang kinabuhi pinaagi sa mga butang nga kinabubut-on nilang gipili nga himoon.”

Ang Tinubdan sa Kahulogan ug Katuyoan sa Kinabuhi

Nan, ingon ba niana ang kinabuhi—nga ang matag usa kanato mobuhat ra kon unsay gusto natong himoon? Inay pasagdan kita nga magkinabuhi nga walay tumong diha sa walay-katuyoan nga kalibotan, ang Bibliya nagbutyag dugay na kanhi nga adunay hinungdan kon nganong ania kita dinhi. Wala kita molungtad tungod lang sa usa ka aksidente sa kawanangan. Gisultihan kita nga ang Maglalalang migugol ug daghang katuigan sa pag-andam sa yuta alang sa tawo. Ang tanang butang wala mitungha nga aksidente. Iyang gitino nga ang tanan “maayo kaayo.” (Genesis 1:31; Isaias 45:18) Ngano man? Tungod kay ang Diyos adunay katuyoan alang sa tawo.

Apan, makaiikag nga wala gimbut-i daan sa Diyos ang kaugmaon sa matag tawo, pinaagi man sa iyang pagpangilabot o pinaagi sa biolohikanhong mga paagi. Bisan tuod apektado kita sa atong napanunod nga mga gene, makabuot kita kon unsay atong gustong himoon. Kitang tanan libreng makapili kon unsang paagi sa pagkinabuhi ang gusto nato.

Bisan tuod ang matag usa kanato makapili kon unsay buot natong himoon sa atong kinabuhi, dili maalamong isalikway ang Maglalalang gikan sa mga desisyon nga atong himoon. Sa pagkatinuod, nakaplagan sa daghan nga ang pagbaton ug kahulogan ug katuyoan sa kinabuhi nalangkit sa atong relasyon sa Diyos. Ang hinungdanong koneksiyon tali sa Diyos ug sa katuyoan sa atong kinabuhi klarong makita diha sa ngalan sa Diyos, si Jehova, nga sa literal nagkahulogan ug, “Siya Magpahinabo.” (Exodo 6:3; Salmo 83:18) Nagpasabot kini nga siya inanay nga motuman kon unsay iyang gisaad ug kanunayng mopahinabo kon unsay iyang buot nga himoon. (Exodo 3:14; Isaias  55:10, 11) Hunahunaa kana. Ang ngalan ni Jehova nagpasalig kanatong tanan nga siya mao ang Tinubdan sa makahuloganong katuyoan sa kinabuhi.

Ang yanong pag-ila nga naglungtad ang Maglalalang adunay dakong epekto sa panglantaw sa usa ka tawo sa kinabuhi. Si Linet, nga nag-edad ug 19-anyos, miingon: “Sanglit nakita nako nga ang tanang kahibulongang butang nga gilalang ni Jehova adunay katuyoan, nasabtan nako nga ang akong paglungtad aduna usay katuyoan.” Si Amber midugang: “Sa dihang ang mga tawo moingon nga wala sila masayod kon aduna bay Diyos, mapasalamaton ako nga ako nasayod. Ang pamatuod nga naglungtad si Jehova klarong makita diha sa mga butang nga iyang gilalang.” (Roma 1:20) Siyempre, ang yanong pag-ila nga naglungtad ang Maglalalang wala magpasabot nga ikaw aduna nay makahuloganong relasyon uban kaniya.

Pakighigala Uban sa Diyos

Ang Bibliya makatabang usab niining bahina. Ang unang mga kapitulo niini naghatag ug tin-awng ebidensiya nga si Jehova nga Diyos maoy usa ka mahigugmaong Amahan. Pananglitan, wala niya lalanga si Adan ug Eva ug dayon gipasagdan sila nga walay kasayoran bahin kaniya. Hinunoa, kanunay siyang nakig-estorya kanila. Wala niya sila pasagdi sa Eden aron magbuotbuot lang kon unsay ilang gustong himoon samtang giatiman niya ang ubang mga butang. Hinunoa, gihatagan niya sila ug espesipikong instruksiyon kon unsaon pagkinabuhi sa labing maayong paagi. Gihatagan niya silag makapatagbawng buluhaton, ug padayon niya silang gitudloan. (Genesis 1:26-30; 2:7-9) Dili ba mao man kanay imong dahomon sa usa ka may-katakos, mahigugmaon nga ginikanan? Karon hunahunaa kon unsay ipasabot niana. “Ang pagkasayod nga gilalang ni Jehova ang yuta ug gidisenyo kita nga malingaw sa iyang mga linalang,” matod ni Denielle, “nagpakita nga buot niya nga kita magmalipayon.”

Labaw pa niana, sama sa ubang mahigugmaong amahan, buot ni Jehova nga ang tanan niyang mga anak makabaton ug suod nga relasyon kaniya. Maylabot niana, ang Buhat 17:27 nagpasalig kanato: “Siya dili halayo gikan sa matag usa kanato.” Unsa may epekto niana kanato? Si Amber miingon: “Ang pagkaila kang Jehova naghimo kanakong masaligon nga wala gayod ako mag-inusara. Bisan unsa pay mahitabo, aduna gayoy usa nga akong kadangpan.” Dugang pa, samtang mailhan nimo si Jehova, makaplagan nimo nga siya maluloton, matarong, ug maayo. Makasalig ka kaniya. “Sa dihang nahimo nakong suod nga higala si Jehova,” matod ni Jeff, “nasayod ko nga wala na gayoy lain pa nga andam kaayong motabang kanako.”

Ikasubo, daghang negatibong mga butang ang gipasangil kang Jehova. Siya ang gibasol sa daghang pag-antos sa tawo ug sa mga problemang gipahinabo sa hiwing mga buhat sa relihiyosong mga tawo. Daghang ngilngig nga mga panghitabo sa kasaysayan sa tawo ang gipasangil kaniya. Apan ang Deuteronomio 32:4, 5 nagpatin-aw: “Ang tanan niyang dalan hustisya. . . . Sila migawi sa ikadaot sa ilang bahin; sila dili iyang mga anak, ang sayop ilaha.” Busa, angay natong susihon mismo ang kamatuoran.—Deuteronomio 30:19, 20.

Katuyoan sa Diyos Natuman

Hinunoa, bisan unsa pay atong hunahunaon, walay makapugong sa Diyos sa pagtuman sa tanan niyang katuyoan alang sa yuta ug sa katawhan. Hinumdomi, siya ang Maglalalang. Nan, unsa may iyang katuyoan? Gihisgotan kini ni Jesu-Kristo sa iyang Wali sa Bukid sa dihang siya miingon: “Malipayon ang mga malumog-buot, sanglit sila magapanunod sa yuta.” Sa ulahi, giingnan niya ang iyang apostol nga si Juan nga ang Diyos ‘magalaglag sa mga nagalaglag sa yuta.’ (Mateo 5:5; Pinadayag 11:18) Sanglit si Jesus atua uban sa Diyos panahon sa paglalang, nahibalo siya nga sukad pa sa sinugdan buot sa Diyos nga ang usa ka hingpit tawhanong pamilya mopuyo sa yutan-ong paraiso sa walay kataposan. (Genesis 1:26, 27; Juan 1:1-3) Ug ang Diyos dili mausab. (Malaquias 3:6) “Tino nga sumala sa akong gihunahuna,” ang Diyos misaad kanato, “kini mahitabo gayod; ug sumala sa akong gilaraw, kana mao ang matuman.”—Isaias 14:24.

Sa atong panahon, si Jehova nagsugod na sa pagpahiluna sa mga pundasyon sa usa ka nahiusang katilingban nga gipasukad, dili sa kahakog ug sobrang paghunahuna sa kaugalingon sama sa makita nato sa atong kalibotan karon, kondili sa gugma sa Diyos ug sa silingan. (Juan 13:35; Efeso  4:15, 16; Filipos 2:1-4) Kini maoy usa ka kapunongan sa mga boluntaryo nga maikagon kaayo nga mouswag ug mobuhat sa ilang tumong—ang pagwali sa maayong balita sa umaabot nga Gingharian sa Diyos sa dili pa matapos kining sistema sa mga butang. (Mateo 24:14; 28:19, 20) Sa kapig 230 ka kayutaan, kapin sa unom ka milyong Kristohanon ang duyog nga nag-alagad diha sa usa ka mahigugmaon, nahiusa nga internasyonal nga panag-igsoonay.

Hatagig Kahulogan ang Imong Kinabuhi

Kon buot nimo nga makabaton ug kahulogan ang imong kinabuhi, angay nimong mahibaloan nga si Jehova nga Diyos nagdapit kanimo sa pagpakig-uban sa iyang katawhan—iyang “matarong nga nasod”—karon. (Isaias 26:2) Apan, basin mangutana ka, ‘Unsa ang paagi sa pagkinabuhi niini nga mga Kristohanon? Buot ba gayod nakong malangkit uban kanila?’ Matikdi kon unsay giingon sa pipila ka mga batan-on:

Quentin: “Ang kongregasyon nagpanalipod kanako gikan sa kalibotan. Kay nasayod nga si Jehova interesado sa akong kinabuhi, ako kombinsido nga siya naglungtad ug buot nga ako magmalipayon.”

Jeff: “Ang kongregasyon mao ang akong labing maayong tinubdan sa pagdasig. Atua didto ang akong mga igsoong lalaki ug babaye, nga andam mohatag sa ilang pagpaluyo ug pagdayeg. Sila bahin na gayod sa akong pamilya.”

Linet: “Dili ikatandi ang akong bation nga kalipay sa dihang makita nako ang usa ka tawo nga modawat sa kamatuoran ug modesisyon sa pag-alagad kang Jehova. Nakahatag kanag dakong katagbawan sa akong kinabuhi.”

Cody: “Wala untay bili ang akong kinabuhi kon wala pa si Jehova. Sama sa ubang mga tawo, basin magpalingpaling ako gikan sa usa ka butang ngadto sa lain, nga mangitag kalipay apan dili ra gihapon makakaplag niana. Hinunoa, gihatagan ako ni Jehova sa hamiling pribilehiyo nga masuod kaniya, ug mao kanay naghatag ug kahulogan sa akong kinabuhi.”

Nganong dili nimo susihon kining butanga? Makaplagan nimo nga pinaagi sa pagpakigsuod sa imong Maglalalang, si Jehova nga Diyos, mabatonan nimo ang tinuod nga kahulogan sa kinabuhi.

[Mga hulagway sa panid 31]

Ang pagpakigsuod sa Diyos mohatag ug kahulogan sa atong kinabuhi

[Picture Credit Line sa panid 29]

NASA photo