Gidumtan nga Walay Pasikaranan

“Sila nagdumot kanako nga walay pasikaranan.”—JUAN 15:25.

1, 2. (a) Nganong ang uban nahibulong sa dihang ang mga Kristohanon pasipad-an, apan nganong ang maong sinultihan dili makapatingala kanato? (b) Unsang diwa sa pulong “pagdumot” ang atong hisgotan niining artikuloha? (Tan-awa ang potnot.)

 ANG mga Saksi ni Jehova naningkamot sa pagkinabuhi sumala sa mga prinsipyo nga makaplagan diha sa Pulong sa Diyos. Tungod niini, sila adunay maayong reputasyon diha sa daghang kanasoran. Apan, usahay sila gidaot. Pananglitan, usa ka opisyal sa gobyerno sa siyudad sa St. Petersburg, Rusya, nahinumdom: “Ang mga Saksi ni Jehova gitaho kanamo ingong usa ka matang sa tinago nga sekta nga nagapamatay ug mga bata ug nagapatay sa ilang kaugalingon.” Apan human magtrabaho uban sa mga Saksi ni Jehova may kalabotan sa usa ka internasyonal nga kombensiyon, ang mao gihapong opisyal miingon: “Karon akong nakita ang normal, mapahiyomon nga mga tawo . . . Sila malinawon ug kalmado, ug sila nahigugma pag-ayo sa usag usa.” Siya midugang: “Wala gayod ako makasabot kon nganong ang mga tawo mosultig mga bakak bahin kanila.”—1 Pedro 3:16.

² Ang mga alagad sa Diyos dili malipay nga butangbutangan ingong mga mamumuhat ug daotan, apan dili sila matingala sa dihang pasipad-an sila sa mga tawo. Gipasidan-an ni Jesus ang iyang mga sumusunod: “Kon ang kalibotan nagdumot kaninyo, kamo nahibalo nga kini nagdumot na kanako sa wala pa kini magdumot kaninyo. . . . Kini maoy aron matuman ang pulong nga nahisulat sa ilang Balaod, ‘Sila nagdumot kanako nga walay pasikaranan.’” a (Juan 15:18-20, 25; Salmo 35:19; 69:4) Una pa niana iyang giingnan ang iyang mga tinun-an: “Kon ang mga tawo nagtawag sa tagbalay nga Beelzebub, unsa pa ka labaw nga tawgon nila sa ingon kadtong mga sakop sa iyang panimalay?” (Mateo 10:25) Ang mga Kristohanon nakasabot nga ang pag-antos sa maong pasipala maoy bahin sa “estaka sa pagsakit” nga ilang gidawat sa dihang sila nahimong mga sumusunod ni Kristo.—Mateo 16:24.

3. Sa unsang gilapdon nga ang matuod nga mga magsisimba ginalutos?

³ Ang paglutos sa matuod nga mga magsisimba dugay nang nagakahitabo, nga masubay pa ngadto sa “matarong nga si Abel.” (Mateo 23:34, 35) Ang maong paglutos dili kay panagsa rang mahitabo. Si Jesus miingon nga ang iyang mga sumusunod “pagadumtan sa tanang katawhan” tungod sa iyang ngalan. (Mateo 10:22) Dugang pa, si apostol Pablo misulat nga ang tanang alagad sa Diyos—lakip na ang matag usa kanato—angayng magdahom nga lutoson. (2 Timoteo 3:12) Unsay hinungdan niini?

Ang Nagpahinabo sa Dili-Makataronganong Pagdumot

4.Sa unsang paagi gipadayag sa Bibliya kon kinsay nagpahinabo sa tanang dili-makataronganong pagdumot?

⁴ Ang Pulong sa Diyos nagpadayag nga sukad sa sinugdan, adunay dili makita nga tighulhog. Tagda ang mabangis nga pagpatay sa unang tawo sa pagtuo, si Abel. Ang Bibliya nag-ingon nga ang iyang mamumuno nga igsoon, si Cain, “naggikan sa usa nga daotan,” si Satanas nga Yawa. (1 Juan 3:12) Gipasundayag ni Cain ang tinamdan ni Satanas, ug gigamit siya sa Yawa sa pagpatuman sa iyang daotang mga tumong. Ang Bibliya nagpadayag usab sa papel ni Satanas sa mapintas nga pag-atake kang Job ug kang Jesu-Kristo. (Job 1:12; 2:6, 7; Juan 8:37, 44; 13:27) Ang basahon sa Pinadayag klarong nagpunting kon kinsay nagpahinabo ug paglutos sa mga sumusunod ni Jesus, nga nag-ingon: “Ang Yawa padayong magabalhog sa pipila kaninyo sa  bilanggoan aron kamo bug-os mabutang sa pagsulay.” (Pinadayag 2:10) Oo, si Satanas maoy nagpahinabo sa tanang dili-makataronganong pagdumot batok sa katawhan sa Diyos.

5. Nganong nagdumot man si Satanas sa matuod nga mga magsisimba?

⁵ Nganong nagdumot man si Satanas sa matuod nga mga magsisimba? Sa usa ka laraw nga nagpakita ug hilabihang pagkamapahitas-on, gihagit ni Satanas ang “Hari nga walay kataposan,” si Jehova nga Diyos. (1 Timoteo 1:17; 3:6) Siya nangangkon nga ang Diyos hilabihan ka mapig-oton sa iyang pagmando sa iyang mga linalang ug walay nag-alagad kang Jehova uban ang putling motibo, nga ang mga tawo nagbuhat niana tungod lamang sa hakog nga tinguha. Si Satanas nangangkon nga kon tugotan siya sa pagsulay sa mga tawo, iyang mapatalikod ang matag usa kanila sa pag-alagad sa Diyos. (Genesis 3:1-6; Job 1:6-12; 2:1-7) Sa pagbutangbutang kang Jehova ingong madaogdaogon, bakakon, ug pakyas, si Satanas naningkamot sa paghimo sa iyang kaugalingon ingong karibal nga magmamando. Busa, ang iyang kaligutgot batok sa mga alagad sa Diyos gitukmod sa iyang pangandoy nga simbahon.—Mateo 4:8, 9.

6. (a) Sa unsang paagi kita personal nga nalangkit sa isyu bahin sa pagkasoberano ni Jehova? (b) Sa unsang paagi ang pagsabot niining isyuha motabang kanato sa paghupot sa atong integridad? (Tan-awa ang kahon sa panid 16.)

⁶ Nasabtan ba nimo kon sa unsang paagi kining maong isyu nakaapektar kanimo? Ingong alagad ni Jehova, lagmit nakaplagan nimo nga bisan tuod ang pagtuman sa kabubut-on sa Diyos magkinahanglan ug tim-os nga paningkamot, mas dako ang mga kaayohan sa pagbuhat niana. Apan, komosta kon ang mga sirkumstansiya sa imong kinabuhi makapalisod, makapasakit pa gani, kanimo sa pagpadayon sa pagtuman sa mga balaod ug mga prinsipyo ni Jehova? Ug komosta kon morag wala kay nadawat nga kaayohan gikan niana? Manghinapos ka ba nga dili takos ang pagpadayon sa pag-alagad kang Jehova? O ang gugma ba alang kang Jehova ug ang halalom nga pagpabili sa iyang halangdong mga hiyas magtukmod kanimo sa pagpadayon sa paglakaw diha sa tanan niyang mga dalan? (Deuteronomio 10:12, 13) Pinaagi sa pagtugot kang Satanas sa paghatag kanato ug kalisdanan, si Jehova naghatag sa matag usa kanato sa kahigayonan sa paghatag sa atong personal nga tubag sa hagit ni Satanas.—Proverbio 27:11.

“Sa Dihang Pakaulawan Kamo sa mga Tawo”

7. Unsa ang usa ka taktika nga gigamit sa Yawa sa pagpatalikod kanato kang Jehova?

⁷ Karon susihon nato pag-ayo ang usa sa malipatlipatong mga buhat nga gigamit ni Satanas sa paningkamot nga mapamatud-an ang mga isyu nga iyang gipatungha—ang iyang pagpakaulaw pinaagig kabakakan. Gitawag ni Jesus si Satanas nga “amahan sa bakak.” (Juan 8:44) Ang mahubitong ngalan nga Yawa, nga nagkahulogang “Tigpasipala,” nagpaila kaniya ingong pangunang tigpasipala sa Diyos, sa iyang mapuslanong pulong, ug sa iyang balaang ngalan. Ang Yawa naggamit ug mga pasumbingay, bakak nga mga akusasyon, ug bug-os nga kabakakan sa paghagit sa pagkasoberano ni Jehova, ug siya naggamit niining mao gihapong mga taktika aron sa pagdaot sa maunongong mga alagad sa Diyos. Pinaagi sa pagpakaulaw niining maong mga Saksi, puwede niyang himoon ang usa ka grabeng pagsulay nga mas lisod pa nilang antoson.

8. Sa unsang paagi gipakaulawan ni Satanas si Job, ug uban sa unsang epekto?

⁸ Tagda ang nahitabo kang Job, kansang ngalan nagpasabot ug “Tumong sa Pagdumot.” Gawas pa sa pagwagtang sa panginabuhi ni Job, sa iyang mga anak, ug sa iyang maayong panglawas, gihimo ni Satanas si Job nga daw makasasala nga gisilotan sa Diyos. Bisan tuod siya gitahod pag-ayo, si Job nahimong tinamay, bisan sa iyang mga partidos ug suod nga mga higala.  (Job 19:13-19; 29:1, 2, 7-11) Dugang pa, pinaagi sa mini nga mga maghuhupay, gipaningkamotan ni Satanas nga ‘mahugno si Job pinaagi sa mga pulong,’ una nagpasumbingay nga lagmit nakahimo siya ug grabeng sala ug dayon direkta siyang gihukman ingong mamumuhat ug daotan. (Job 4:6-9; 19:2; 22:5-10) Naguol gayod niadto si Job!

9. Sa unsang paagi si Jesus gihimo nga daw usa ka makasasala?

⁹ Ingong pangunang tigbayaw sa pagkasoberano ni Jehova, ang Anak sa Diyos nahimong pangunang tumong sa pagdumot ni Satanas. Sa dihang mianhi si Jesus sa yuta, si Satanas naningkamot sa paghimo kaniyang morag mahugaw sa espirituwal, sama sa gibuhat niya kang Job, nga naghimo kang Jesus nga daw usa ka makasasala. (Isaias 53:2-4; Juan 9:24) Ang mga tawo nagtawag kaniyang palainom ug tawong ulitan ug miingon nga siya ‘may demonyo.’ (Mateo 11:18, 19; Juan 7:20; 8:48; 10:20) Siya bakak nga giakusahan nga nagpasipala sa Diyos. (Mateo 9:2, 3; 26:63-66; Juan 10:33-36) Nakapaguol kini kang Jesus, kay siya nahibalo nga kini dili-makataronganong nagsumbalik-silaw sa iyang Amahan. (Lucas 22:41-44) Sa kataposan, si Jesus gilansang ingong tinunglo nga kriminal. (Mateo 27:38-44) Sa paghupot ug hingpit nga integridad, giantos ni Jesus ang “pagsupak sa mga makasasala.”—Hebreohanon 12:2, 3.

10. Sa unsang paagi ang nanghibilin sa mga dinihogan gipuntirya ni Satanas sa modernong mga panahon?

¹⁰ Sa modernong panahon, ang mga nanghibilin sa dinihogang mga sumusunod ni Kristo nahimong tumong usab sa pagdumot sa Yawa. Si Satanas gihubit ingong “magsusumbong sa mga igsoon [ni Kristo] . . . , kinsa nagsumbong kanila adlaw ug gabii atubangan sa atong Diyos.” (Pinadayag 12:9, 10) Sukad sa panahon nga siya gitambog gikan sa langit ug gilimitehan dinhi sa silinganan sa yuta, gidugangan ni Satanas ang iyang mga paningkamot sa paghulagway sa mga igsoon ni Kristo ingong talamayong mga sinalikway. (1 Corinto 4:13) Diha sa pipila ka nasod, sila mapasipalahong gitawag ug peligrosong sekta, sama gayod sa unang-siglo nga mga Kristohanon. (Buhat 24:5, 14; 28:22) Sumala sa gihisgotan sa sinugdan, sila gidaot pinaagi sa bakak nga propaganda. Bisan pa niana, “pinaagi sa himaya ug sa kaulawan, pinaagi sa daotang taho ug sa maayong taho,” ang dinihogang mga igsoon ni Kristo, nga gipaluyohan sa ilang mga kauban nga “ubang mga karnero,” mapainubsanong naningkamot sa ‘pagbantay sa mga sugo sa Diyos ug pagpamatuod bahin kang Jesus.’—2 Corinto 6:8; Juan 10:16; Pinadayag 12:17.

11, 12. (a) Unsa tingaliy hinungdan sa ubang pagpakaulaw nga naagoman sa mga Kristohanon? (b) Sa unsang mga paagi nga ang usa ka Kristohanon mag-antos tingali nga dili makataronganon tungod sa iyang pagtuo?

¹¹ Siyempre, dili tanang pakaulaw nga naagoman sa tagsatagsa ka alagad sa Diyos maoy “tungod sa pagkamatarong.” (Mateo 5:10) Ang ubang mga problema mahimong maoy resulta sa atong kaugalingong pagkadili-hingpit. Walay linaing kadungganan kon sa dihang kita “nagpakasala ug gisagpa, [kita] nagaagwanta niana.” Apan, kon ang usa ka Kristohanon “tungod sa tanlag maylabot sa Diyos, moagwanta ilalom sa makapaguol nga mga butang ug mag-antos nga dili-makataronganon, butang kini nga kahimut-anan” sa panglantaw ni Jehova. (1 Pedro 2:19, 20) Ilalom sa unsang mga sirkumstansiya nga kini lagmit nga mahitabo?

¹² Ang uban gidagmalan tungod kay sila midumili sa pagpakigbahin sa dili-kasulatanhong mga kostumbre sa paglubong. (Deuteronomio 14:1) Ang mga batan-ong Saksi maoy gipuntirya sa way-puas nga pagpanamastamas tungod sa pagsunod sa moral nga mga sukdanan ni Jehova. (1 Pedro 4:4) Ang ubang Kristohanong mga ginikanan sayop nga giakusahan ingong “mapinasagdanon” o “maabusohon” tungod kay sila nagtinguha ug walay-dugo nga medikal nga pagtambal alang sa ilang mga anak. (Buhat 15:29) Ang mga Kristohanon gisalikway sa mga partidos ug mga silingan tungod lamang sa pagkahimong mga alagad ni Jehova. (Mateo 10:34-37) Silang tanan nagsunod sa sumbanan nga gihatag sa mga manalagna ug ni Jesus mismo sa pag-antos nga dili makataronganon.—Mateo 5:11, 12; Santiago 5:10; 1 Pedro 2:21.

Paglahutay sa Dihang Gipakaulawan

13. Unsay makatabang kanato sa paghupot sa atong espirituwal nga pagkatimbang sa dihang kita nag-atubang ug grabeng pagpakaulaw?

¹³ Sa dihang makaagom kita sa grabeng pagpakaulaw tungod sa atong pagtuo, kita tingali mawad-ag kadasig, sama kang manalagnang Jeremias, ug mobati nga dili na kita makapadayon sa  pag-alagad sa Diyos. (Jeremias 20:7-9) Unsay makatabang kanato sa paghupot sa atong espirituwal nga pagkatimbang? Paningkamoti nga lantawon ang maong butang sumala sa panglantaw ni Jehova. Iyang gilantaw kadtong nagpabiling maunongon ilalom sa pagsulay ingong mga mananaog, dili ingong mga biktima. (Roma 8:37) Sulayi paghulagway sa inyong hunahuna kadtong nagbayaw sa pagkasoberano ni Jehova bisan pa sa tanang pagpakaulaw nga gipahamtang sa Yawa kanila—ang mga lalaki ug babaye sama kang Abel, Job, inahan ni Jesus nga si Maria, ug ang ubang mga matinumanon sa kakaraanan, maingon man ang atong mga isigkaalagad sa modernong panahon. (Hebreohanon 11:35-37; 12:1) Palandonga ang ilang integridad. Kanang bagang panganod sa mga maunongon nagdapit kanato sa pagduyog kanila diha sa tungtonganan sa mga mananaog nga gigahin alang niadtong kinsa pinaagi sa ilang pagtuo gidaog ang kalibotan.—1 Juan 5:4.

14. Sa unsang paagi ang kinasingkasing nga pag-ampo magpalig-on kanato sa pagpabiling matinumanon?

¹⁴ Kon ang ‘atong makapatugaw nga mga hunahuna modaghan sa atong kahiladman,’ kita makadangop kang Jehova pinaagi sa kinasingkasing nga pag-ampo, ug siya magahupay ug magapalig-on kanato. (Salmo 50:15; 94:19) Siya magahatag kanato sa kaalam nga atong gikinahanglan sa pagsagubang sa kalisdanan ug motabang kanato nga masentro ang atong pagtagad sa dakong isyu, ang pagkasoberano ni Jehova, nga maoy hinungdan sa dili-makataronganong pagdumot nga gipahamtang batok sa iyang mga alagad. (Santiago 1:5) Si Jehova makahatag usab kanato sa “kalinaw sa Diyos nga labaw sa tanang panghunahuna.” (Filipos 4:6, 7) Kining hinatag-sa-Diyos nga kalinaw makapaarang kanato sa pagpabiling kalmado ug determinado bisan pa sa grabeng kapit-os, nga dili magpadaog sa pagduhaduha o kahadlok. Pinaagi sa iyang espiritu, si Jehova makapalig-on kanato diha sa bisan unsa nga itugot niyang mahitabo kanato.—1 Corinto 10:13.

15. Unsay makatabang kanato sa paglikay nga dili mayugot sa dihang kita nag-antos?

¹⁵ Unsay motabang kanato aron dili mayugot niadtong nagdumot kanato nga walay pasikaranan? Hinumdomi nga ang atong pangunang mga kaaway mao si Satanas ug ang mga demonyo. (Efeso 6:12) Bisan tuod ang ubang mga tawo tinuyo nga naglutos kanato, daghan niadtong misupak sa katawhan sa Diyos nagbuhat niana tungod sa kawalay-alamag o tungod kay sila gimaniobra sa uban. (Daniel 6:4-16; 1 Timoteo 1:12, 13) Si Jehova nagtinguha nga ang “tanang matang sa mga tawo” makabaton ug kahigayonan nga “mangaluwas unta ug makadangat sa tukmang kahibalo sa kamatuoran.” (1 Timoteo 2:4) Sa pagkatinuod, ang ubang kanhing mga magsusupak sa pagkakaron ato nang Kristohanong mga igsoon tungod kay naobserbahan nila ang atong walay ikasaway nga panggawi. (1 Pedro 2:12) Dugang pa, makakat-on kita gikan sa panig-ingnan sa anak ni Jacob nga si Jose. Bisan tuod si Jose nag-antos pag-ayo tungod sa iyang mga igsoon sa amahan, wala siya maghambin ug kasuko kanila. Ngano man? Tungod kay iyang nasabtan nga si Jehova adunay kalambigitan sa maong butang, nga nagmaniobra sa mga hitabo aron matuman ang Iyang katuyoan. (Genesis 45:4-8) Ikapahinabo usab ni Jehova nga ang bisan unsang dili-makataronganong pag-antos nga atong naagoman mosangpot sa paghimaya sa iyang ngalan.—1 Pedro 4:16.

16, 17. Nganong dili man kita sobrang mabalaka sa mga paningkamot sa mga magsusupak sa pagbabag sa buluhatong pagsangyaw?

¹⁶ Kinahanglang dili kita sobrang mabalaka kon may panahon nga morag milampos ang mga magsusupak sa pagbabag sa pag-uswag sa maayong balita. Ginauyog ni Jehova karon ang mga nasod pinaagi sa tibuok-globong pagpamatuod nga ginahimo, ug ang tilinguhaong mga butang nanagpanulod. (Haggeo 2:7) Si Kristo Jesus, ang Maayong Magbalantay, miingon: “Ang akong mga karnero magapatalinghog sa akong tingog, ug ako nakaila kanila, ug sila magasunod kanako. Ug ihatag ko kanila ang kinabuhing walay kataposan, . . . ug walay magsakmit kanila gikan sa akong kamot.” (Juan 10:27-29) Ang balaang mga manulonda nalambigit usab sa dakong espirituwal nga  pagpangani. (Mateo 13:39, 41; Pinadayag 14:6, 7) Busa, walay bisan unsa nga isulti o buhaton sa mga magsusupak ang makasanta sa katuyoan sa Diyos.—Isaias 54:17; Buhat 5:38, 39.

¹⁷ Kasagaran, ang mga paningkamot sa mga magsusupak mosumbalik. Sa usa ka komunidad sa Aprika, daghang naghingapin nga kabakakan ang gipakaylap bahin sa mga Saksi ni Jehova, lakip na sa bakak nga sila mga magsisimba sa Yawa. Tungod niini, kon moduaw ang mga Saksi, si Grace modagan paingon sa likod sa iyang balay ug motago hangtod nga sila manglakaw. Usa ka adlaw niana ang pastor sa iyang simbahan nagpakita ug usa sa atong mga publikasyon ug giingnan ang tanan nga nanambong nga dili kana angayng basahon tungod kay makapatalikod kini kanila sa ilang relihiyon. Nakapukaw kini sa kaikag ni Grace. Sa sunod higayon nga ang mga Saksi miduaw, imbes motago, nakigsulti siya kanila ug nadawat niya ang personal nga kopya sa maong publikasyon. Nasugdan ang usa ka pagtuon sa Bibliya, ug sa 1996 siya nabawtismohan. Karon gigamit ni Grace ang iyang panahon sa pagpangita sa uban nga nakadawat tingali ug sayop nga impormasyon bahin sa mga Saksi ni Jehova.

Palig-ona ang Imong Pagtuo Karon

18. Nganong kinahanglang palig-onon ang atong pagtuo sa dili pa motungha ang grabeng mga pagsulay, ug sa unsang paagi mahimo nato kini?

¹⁸ Tungod kay bisan kanus-a si Satanas mahimong mokalit pag-atake uban ang dili-makataronganong pagdumot, hinungdanon nga atong palig-onon ang atong pagtuo karon. Sa unsang paagi mahimo nato kini? Usa ka taho gikan sa usa ka nasod diin ang katawhan ni Jehova gilutos nag-ingon: “Usa ka butang ang nadayag pag-ayo: Kadtong adunay maayong espirituwal nga mga batasan ug halalom nga pagpabili sa kamatuoran sa Bibliya nakabarog nga malig-on sa dihang miabot ang mga pagsulay. Apan kadtong mipalta ug mga tigom bisan sa ‘maayong panahon,’ dili-regular sa pag-alagad sa kanataran, ug mikompromiso sa ginagmayng mga isyu subsob nga mahulog sa dihang  mailalom sa ‘grabeng’ pagsulay.” (2 Timoteo 4:2) Kon makakita kag mga bahin nga kinahanglan nimong pauswagon, paningkamoti ang pagbuhat niana nga walay langan.—Salmo 119:60.

19. Unsay napalampos sa integridad sa mga alagad sa Diyos atubangan sa dili-makataronganong pagdumot?

¹⁹ Ang integridad sa matuod nga mga magsisimba nga nailalom sa hampak sa pagdumot ni Satanas maoy buhing pamatuod sa pagkaangayan, pagkatakos, ug pagkamatarong sa pagkasoberano ni Jehova. Ang ilang pagkamatinumanon nakapalipay gayod sa kasingkasing sa Diyos. Bisan tuod ang mga tawo magpakaulaw kanila, ang usa kansang dignidad maoy labaw pa sa yuta ug langit ‘dili maulaw nga sila motawag kaniya nga ilang Diyos.’ Sa pagkatinuod, mahitungod nianang maong mga maunongon, hustong ikaingon: “Ang kalibotan dili-takos kanila.”—Hebreohanon 11:16, 38.

[Footnote]

Ikapatin-aw Mo Ba?

• Unsay nagpaluyo sa dili-makataronganong pagdumot nga gipunting ngadto sa matuod nga mga magsisimba?

• Sa unsang paagi gigamit ni Satanas ang pagpakaulaw sa paningkamot nga bungkagon ang integridad nila ni Job ug Jesus?

• Sa unsang paagi si Jehova nagpalig-on kanato sa pagbarog nga malig-on bisan pa sa pagdumot ni Satanas?

[Mga Pangutana sa Pagtuon]

[Kahon/Hulagway sa panid 16]

Ilang Nasabtan ang Tinuod nga Isyu

Usa sa mga Saksi ni Jehova sa Ukraine, diin ang buluhatong pagsangyaw sa Gingharian gidili sulod sa kapin sa 50 ka tuig, miingon: “Ang situwasyon nga naagoman sa mga Saksi ni Jehova dili angayng lantawon sumala lamang sa kahimtang sa tawhanong relasyon. . . . Ang kadaghanan sa mga opisyal nagtuman lamang sa ilang trabaho. Sa dihang laing gobyerno na ang mipuli, ang pagkamaunongon sa mga opisyal mibalhin, apan kami nagpabiling mao ra gihapon. Kami nahibalo nga ang tinuod nga tuboran sa among mga kalisod gipadayag diha sa Bibliya.

“Wala namo isipa ang among kaugalingon ingong inosenteng mga biktima sa mga tawong daogdaogan. Ang nakatabang kanamo sa paglahutay mao ang tin-awng pagsabot sa isyu nga gipatugbaw diha sa tanaman sa Eden—ang isyu sa katungod sa Diyos sa pagmando. . . . Kami mibarog alang sa usa ka isyu nga nalangkit dili lamang sa personal nga mga intereses sa mga tawo kondili sa mga intereses usab sa Soberano sa uniberso. Mas nakasabot kami sa tinuod nga isyung nalangkit. Kini ang nakapalig-on kanamo ug nakapaarang kanamo sa paghupot sa among integridad bisan sa grabe kaayong mga kahimtang.”

[Hulagway]

Si Victor Popovych, gidakop niadtong 1970

[Hulagway sa panid 13]

Kinsay nagpaluyo sa pagpakaulaw nga naagoman ni Jesus?

[Mga hulagway sa panid 15]

Sila si Job, Maria, ug ang mga alagad sa Diyos sa modernong mga panahon, sama kang Stanley Jones, nagbayaw sa pagkasoberano ni Jehova