Gikapoy Apan Dili Molunga
Gikapoy Apan Dili Molunga
“Si Jehova, ang Maglalalang sa mga kinatumyan sa yuta, . . . naghatag ug gahom sa gikapoy; ug sa walay dinamikong kusog siya nagpadagaya sa bug-os nga gahom.”—ISAIAS 40:28, 29.
1, 2. (a) Unsang makapadaning pagdapit ang gipadangat sa tanan nga gustong motuman sa putling pagsimba? (b) Unsay magpameligro pag-ayo sa atong espirituwalidad?
INGONG mga tinun-an ni Jesus, kita nasinati pag-ayo sa iyang makapadaning pagdapit: “Umari kanako, kamong tanang nabudlayan ug nabug-atan, ug ako magapalagsik kaninyo. . . . Kay ang akong yugo masayon ug ang akong luwan magaan.” (Mateo 11:28-30) Ang mga Kristohanon gitanyagan usab ug “mga panahon sa kahayahay . . . gikan sa atubangan ni Jehova.” (Buhat 3:19) Segurado nga nasinati ninyo mismo ang makapalagsik nga mga epekto sa pagkakat-on sa mga kamatuoran sa Bibliya, pagkabaton ug masanag nga paglaom sa umaabot, ug sa pagpadapat sa mga prinsipyo ni Jehova diha sa inyong kinabuhi.
2 Bisan pa niana, ang ubang mga magsisimba ni Jehova nakaagom sa emosyonal nga pagkaluya. Sa pipila ka kaso kining mga panahon sa pagkaluya sa buot dili magdugay. Sa ubang mga panahon ang kakapoy dugay mawala. Sa paglabay sa panahon, ang uban mobati tingali nga ang ilang Kristohanong mga responsibilidad nahimo nang usa ka kabug-at imbes usa ka makapalagsik nga luwan sumala sa gisaad ni Jesus. Ang maong negatibong pagbati magpameligro gayod sa relasyon sa usa ka Kristohanon uban kang Jehova.
3. Nganong si Jesus naghatag sa tambag nga makita diha sa Juan 14:1?
3 Sa hapit na siyang dakpon ug patyon, giingnan ni Jesus ang iyang mga tinun-an: “Ayaw tugoti nga mabalisa ang inyong mga kasingkasing. Pagpasundayag ug pagtuo sa Diyos, pagpasundayag usab ug pagtuo kanako.” (Juan 14:1) Gisulti ni Jesus kining mga pulonga tungod kay ang mga apostoles hapit nang mag-atubang ug makapaguol nga mga hitabo. Sundan kini sa kaylap nga paglutos. Nahibalo si Jesus nga ang iyang mga apostoles mahimong mapandol tungod sa tumang kaluya sa buot. (Juan 16:1) Kon dili makontrolar, ang kaguol makapaluya sa espirituwalidad ug makapawala sa ilang pagsalig kang Jehova. Tinuod usab kini sa mga Kristohanon karon. Ang dugay nga pagkaluya sa buot makapahinabog dakong kaguol, ug ang atong kasingkasing mahimong mabug-atan. (Jeremias 8:18) Ang atong pangsulod nga pagkatawo mahimong maluya. Ilalom niining maong pagpit-os, maluya tingali ang atong emosyon ug espirituwalidad, mawala pa gani ang atong tinguha nga mosimba kang Jehova.
4. Unsay makatabang kanato aron dili kapoyon ang atong mahulagwayong kasingkasing?
4 Haom gayod ang tambag sa Bibliya: “Labaw sa tanan nga pagabantayan, ampingi ang imong kasingkasing, kay niana nagagikan ang mga tuboran sa kinabuhi.” (Proverbio 4:23) Ang Bibliya naghatag ug praktikal nga tambag nga motabang kanato sa pagpanalipod sa atong mahulagwayong kasingkasing aron dili kini mawad-ag kadasig ug kapoyon sa espirituwal. Apan, una kinahanglang klaro natong mailhan ang hinungdan sa atong kalapoy.
Ang Kristiyanidad Dili Mapig-oton
5. Unsay morag panagsumpaki mahitungod sa Kristohanong pagkatinun-an?
5 Tinuod nga ang pagkahimong Kristohanon nagkinahanglan ug pagpanglimbasog. (Lucas 13:24) Miingon pa gani si Jesus: “Bisan kinsa nga wala magapas-an sa iyang estaka sa pagsakit ug magasunod kanako dili mahimong akong tinun-an.” (Lucas 14:27) Kining mga pulonga morag kasumpaki sa gisulti ni Jesus nga ang iyang luwan gaan ug makapalagsik, apan sa pagkatinuod wala kini magkasumpaki.
6, 7. Nganong ikaingon nga ang atong matang sa pagsimba dili makapakapoy?
6 Ang pagpanglimbasog ug paghago, bisan tuod makapakapoy sa lawas, mahimong makapatagbaw ug makapalagsik kon kini gibuhat nga maayo ang motibo. (Ecclesiastes 3:13, 22) Ug may mas maayo pa ba nga motibo kay sa pagpaambit sa maanindot nga mga kamatuoran sa Bibliya ngadto sa atong mga silingan? Dugang pa, ang atong pagpanglimbasog nga magkinabuhi sumala sa hataas nga moral nga mga sukdanan sa Diyos wala ra sa kumingking kon itandi sa mga benepisyo nga atong matagamtam gumikan niana. (Proverbio 2:10-20) Bisan sa dihang gilutos, giisip nato nga kadungganan ang pag-antos alang sa Gingharian sa Diyos.—1 Pedro 4:14.
7 Ang luwan ni Jesus makapalagsik gayod, ilabina kon itandi sa espirituwal nga kangitngit niadtong nailalom gihapon sa yugo sa bakak nga relihiyon. Ang Diyos adunay malumong gugma alang kanato ug wala magkinahanglan ug labaw kay sa atong maarangan. Ang “mga sugo [ni Jehova] dili mabug-at.” (1 Juan 5:3) Ang tinuod nga Kristiyanidad, sumala sa gilatid diha sa Kasulatan, dili mapig-oton. Klaro nga ang atong matang sa pagsimba dili makapakapoy ug makapaluya sa buot.
‘Tangtanga ang Tanang Kabug-at’
8. Unsay kasagarang hinungdan sa espirituwal nga kakapoy?
8 Ang bisan unsang espirituwal nga kakapoy nga atong masinati subsob maoy resulta sa dugang kabug-at nga gipahinabo kanato niining dunot nga sistema sa mga butang. Tungod kay “ang tibuok kalibotan nailalom sa gahom sa usa nga daotan,” kita gilibotan sa negatibong mga puwersa nga makapaluya kanato ug makadaot sa atong Kristohanong pagkatimbang. (1 Juan 5:19) Ang wala-kinahanglanang mga pangagpas makapakomplikado ug makabalda sa atong Kristohanong rutina. Kining dugang mga palas-anon makahatag kanatog kabug-at ug makapaguol kanato. Sa kahaom, ang Bibliya nagtambag kanato nga ‘tangtangon ang tanang kabug-at.’—Hebreohanon 12:1-3.
9. Sa unsang paagi ang materyal nga mga pangagpas makahatag kanato ug kabug-at?
9 Pananglitan, ang pagkalinga sa kalibotan sa kabantog, salapi, kalingawan, pagbiyahe aron sa paglulinghayaw, ug uban pang materyal nga mga pangagpas makaimpluwensiya sa atong panghunahuna. (1 Juan 2:15-17) Ang ubang unang-siglo nga mga Kristohanon nga nagtinguhag bahandi naghimo sa ilang kinabuhi nga komplikado kaayo. Si apostol Pablo nag-ingon: “Sila nga determinadong madato mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagbanlod sa mga tawo sa kalaglagan ug sa kadaotan. Kay ang gugma sa salapi maoy gamot sa tanang matang sa makadaot nga mga butang, ug tungod sa pagpangab-ot niini nga gugma ang pipila nahisalaag gikan sa pagtuo ug nagtusaktusak sa ilang kaugalingon sa daghang kasakitan.”—1 Timoteo 6:9, 10.
10. Unsay atong makat-onan bahin sa bahandi gikan sa ilustrasyon ni Jesus sa magpupugas?
10 Kon kita mobatig kakapoy ug kaluya sa buot diha sa atong pag-alagad sa Diyos, tungod kaha kini kay ang pagpangagpas sa materyal nga mga butang nakabalda sa atong espirituwalidad? Posible gayod kining mahitabo, ingon sa gipakita sa ilustrasyon ni Jesus bahin sa magpupugas. Si Jesus nagtandi sa “mga kabalaka niining sistema sa mga butang ug ang malimbongong gahom sa mga bahandi ug ang mga tinguha alang sa uban pang mga butang” ngadto sa mga sampinit nga “modaot ug motuok” sa binhi sa pulong sa Diyos diha sa atong kasingkasing. (Marcos 4:18, 19) Busa, ang Bibliya nagtambag kanato: “Himoa ang inyong paagi sa pagkinabuhi nga mahigawas sa gugma sa salapi, samtang kamo magmakontento sa presenteng mga butang. Kay siya nag-ingon: ‘Dili ko gayod ikaw pagabiyaan ni sa bisan unsang paagi pagatalikdan.’”—Hebreohanon 13:5.
11. Unsaon nato pagwagtang ang mga butang nga makahatag kanato ug kabug-at?
11 Usahay ang makapakomplikado sa atong kinabuhi, dili ang pagpangagpas ug dugang mga butang, kondili kon unsay atong gibuhat sa mga butang nga ato nang nabatonan. Ang uban tingali makasinati ug kakapoy sa emosyon tungod sa grabeng mga sakit, pagkamatay sa ilang mga minahal, o uban pang dagkong mga problema. Nakita nila ang panginahanglan nga mohimog mga kausaban matag karon ug unya. Usa ka magtiayon nakahukom sa paghunong sa pipila sa ilang mga pasatiempo ug wala-kinahanglanang personal nga mga proyekto. Aktuwal nilang gisusi ang ilang mga butang ug literal nga giempake ang tanang materyal nga may kalabotan sa maong mga proyekto ug gitago kini. Matag karon ug unya, kitang tanan makabenepisyo gikan sa pagsusi sa atong mga batasan ug mga kabtangan, nga magtangtang sa tanang wala-kinahanglanang kabug-at aron dili kita kapoyon ug mangaluya ang atong kalag.
Ang Pagkamakataronganon ug Pagkamakasaranganon Hinungdanon
12. Unsay angay natong ilhon bahin sa atong kaugalingong mga sayop?
12 Ang atong kaugalingong mga kasaypanan, bisan sa gagmayng mga butang, inanayng makapakomplikado sa atong kinabuhi. Pagkatinuod sa giingon ni David: “Milapaw sa akong ulo ang akong kasaypanan; sama sa mabug-at nga luwan sila bug-at kaayo alang kanako.” (Salmo 38:4) Kasagaran, ang pipila ka praktikal nga mga kausaban makapahigawas kanato gikan sa bug-at nga mga palas-anon.
13. Sa unsang paagi ang pagkamakataronganon motabang kanato sa pagbaton ug timbang nga panglantaw sa atong ministeryo?
13 Ang Bibliya nagdasig kanato sa pag-ugmad ug ‘praktikal nga kaalam ug katakos sa panghunahuna.’ (Proverbio 3:21, 22) “Ang kaalam nga gikan sa itaas maoy . . . makataronganon,” nag-ingon ang Bibliya. (Santiago 3:17) Ang uban mibati nga kinahanglang mohimo sila sama sa nahimo sa uban diha sa Kristohanong ministeryo. Apan, ang Bibliya nagtambag kanato: “Pasulaya ang matag usa sa iyang kaugalingong binuhatan, ug niana siya may hinungdan sa pagsadya labot sa iyang kaugalingon lamang, ug dili sa pagtandi sa laing tawo. Kay ang matag usa magpas-an sa iyang kaugalingong luwan.” (Galacia 6:4, 5) Tinuod, ang maayong panig-ingnan sa mga isigka-Kristohanon makadasig kanato sa pag-alagad kang Jehova nga tibuok kasingkasing, apan ang praktikal nga kaalam ug pagkamakataronganon motabang kanato sa paghimo ug realistikanhong mga tumong sumala sa atong mga sirkumstansiya.
14, 15. Sa unsang paagi kita makapakita ug praktikal nga kaalam sa pag-atiman sa atong pisikal ug emosyonal nga mga panginahanglan?
14 Ang atong pagkamakataronganon bisan sa mga butang nga morag dili kaayo hinungdanon makatabang aron dili kita kapoyon. Pananglitan, giugmad ba nato ang timbang nga mga batasan nga makatampo sa maayong pisikal nga kahimsog? Tagda ang panig-ingnan sa usa ka magtiayon nga nag-alagad diha sa usa sa mga sangang buhatan sa mga Saksi ni Jehova. Nakita nila nga hinungdanon ang praktikal nga kaalam aron dili kapoyon. Ang asawa miingon: “Bisag unsa pa ka daghan ang among trabaho, gipaningkamotan namo nga matulog sa halos mao gihapong oras kada gabii. Regular usab kaming mag-ehersisyo. Nakatabang gayod kini kanamo. Nahibalo kami sa among mga limitasyon, ug nagbuhat kami sa mga butang sumala niana. Gipaningkamotan namo nga dili itandi ang among kaugalingon niadtong morag lagsik kanunay.” Kita ba regular nga mokaon ug sustansiyadong mga pagkaon ug husto sa tulog? Ang makataronganong pag-atiman sa atong panglawas makapamenos sa kakapoy sa emosyon ug sa espirituwal.
15 Ang uban kanato adunay talagsaon nga mga panginahanglan. Pananglitan, ang usa ka Kristohanong babaye nakaalagad ingong bug-os-panahong ministro diha sa ubay-ubay nang malisod nga mga asaynment. Nakaagom siya sa grabeng mga sakit, lakip na sa kanser. Unsay nakatabang kaniya sa pagsagubang sa makapahigwaos nga mga situwasyon? Siya miingon: “Hinungdanon kanako nga maggahin ug panahon nga mag-inusara diha sa hilom nga dapit. Kon bation nako nga nagkagrabe ang kahigwaos ug kakapoy, gikinahanglan gayod nako ang mga yugto sa pag-inusara diha sa hilom nga dapit diin ako makabasa ug makapahulay.” Ang praktikal nga kaalam ug katakos sa panghunahuna motabang kanato sa pag-ila ug pagtagbaw sa atong tagsatagsa ka panginahanglan ug busa dili kapoyon sa espirituwal.
Si Jehova Nagapalig-on Kanato
16, 17. (a) Nganong ang pag-atiman sa atong espirituwal nga panglawas hinungdanon kaayo? (b) Unsay atong ilakip sa atong adlaw-adlaw nga rutina?
16 Siyempre, ang pag-atiman sa atong espirituwal nga kahimsog hinungdanon gayod. Kon kita adunay suod nga relasyon kang Jehova nga Diyos, kita tingali kapoyon sa pisikal, apan dili gayod kita kapoyon sa pagsimba kaniya. Si Jehova mao ang “naghatag ug gahom sa gikapoy; ug sa walay dinamikong kusog siya nagpadagaya sa bug-os nga gahom.” (Isaias 40:28, 29) Si apostol Pablo, kinsa nakasinati mismo sa pagkatinuod niining mga pulonga, misulat: “Wala kami moangka, apan bisan pa kon ang among pagkatawo sa gawas nagakahugo, tino nga ang among pagkatawo sa sulod ginabag-o sa adlaw-adlaw.”—2 Corinto 4:16.
17 Matikdi ang ekspresyong “sa adlaw-adlaw.” Kini nagpasabot nga pahimuslan nato ang mga tagana ni Jehova sa adlaw-adlaw. Usa ka misyonarya nga matinumanong nag-alagad sulod na sa 43 ka tuig kinahanglang moatubang ug mga yugto sa pisikal nga kakapoy ug pagkaluya sa buot. Apan wala siya molunga. Siya miingon: “Gibatasan nako ang pagbangon ug sayo aron nga sa dili pa magsugod ug bisan unsang trabaho, makagugol ako ug panahon sa pag-ampo kang Jehova ug pagbasa sa iyang Pulong. Kining adlaw-adlaw nga rutina nakatabang kanako sa paglahutay hangtod karon.” Sa pagkatinuod, makasalig kita sa nagapalig-ong gahom ni Jehova kon kita regular, oo “sa adlaw-adlaw” moampo kaniya ug mamalandong sa iyang hamiling mga hiyas ug sa iyang mga saad.
18. Unsang paghupay ang gitagana sa Bibliya ngadto sa mga matinumanon nga tigulang na o masakiton?
18 Ilabinang makatabang kini niadtong mibatig kaluya sa buot tungod sa pagkatigulang ug dili-maayong panglawas. Ang maong mga tawo maguol tingali, dili tungod kay ilang gitandi ang ilang kaugalingon sa uban, kondili tungod kay gitandi nila ang ilang kaugalingon sa kon unsa sila kaniadto. Pagkamakapahupay ang pagkahibalo nga si Jehova nagapasidungog sa mga tigulang! Ang Bibliya nag-ingon: “Ang pagkaubanon maoy usa ka purongpurong sa katahom sa dihang makaplagan kini sa dalan sa pagkamatarong.” (Proverbio 16:31) Si Jehova nahibalo sa atong mga limitasyon ug nagpabili gayod sa atong tibuok-kasingkasing nga pagsimba bisan pa sa atong mga kaluyahon. Ug ang maayong mga buhat nga ato nang nahimo dili mapapas sa panumdoman sa Diyos. Ang Kasulatan nagpasalig kanato: “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan, sa pagkaagi nga kamo nag-alagad sa mga balaan ug nagpadayon sa pag-alagad.” (Hebreohanon 6:10) Pagkadako sa kalipay natong tanan nga kauban nato kadtong nagmaunongon kang Jehova sulod sa daghang dekada!
Ayaw Paghunong
19. Sa unsang paagi kita makabenepisyo sa pagkapuliki kanunay sa pagbuhat kon unsay maayo?
19 Daghan ang nagtuo nga ang lagsik nga pisikal nga kalihokan, nga regular nga himoon, makapawala sa kakapoy. Sa susama, ang regular nga espirituwal nga mga kalihokan makatabang sa pagwagtang sa kakapoy sa emosyon o sa espirituwal. Ang Bibliya nag-ingon: “Dili kita mohunong sa pagbuhat ug maayo, kay sa takdang panahon kita moani kon kita dili molunga. Nan, sa pagkatinuod, samtang kita may kahigayonan alang niini, buhaton nato ang maayo ngadto sa tanan, apan ilabina kanila nga atong kabanay sa pagtuo.” (Galacia 6:9, 10) Matikdi ang mga ekspresyong “pagbuhat ug maayo” ug ‘buhaton ang maayo.’ Kini nagpasabot nga duna kitay buhaton. Ang pagbuhat ug maayong mga butang alang sa uban makatabang gayod kanato nga dili molunga sa pag-alagad kang Jehova.
20. Aron mapakigbisogan ang pagkaluya sa buot, kinsay dili nato pakig-ubanan?
20 Sa kasukwahi, ang pagpakig-uban ug ang mga kalihokan uban sa mga tawo nga nagsalikway sa mga balaod sa Diyos mahimong makapakapoy nga palas-anon. Ang Bibliya nagpasidaan kanato: “Ang kabug-at sa usa ka bato ug ang usa ka luwan nga balas—apan ang kagul-anan nga ipahinabo sa usa nga buangbuang mabug-at pa kay niining duha.” (Proverbio 27:3) Aron mapakigbisogan ang pagkaluya sa buot ug kakapoy, kinahanglang dili kita makig-uban niadtong naghambin ug negatibong mga hunahuna ug tigpangitag sayop ug tigpanaway sa uban.
21. Sa unsang paagi kita makadasig sa uban diha sa Kristohanong mga tigom?
21 Ang Kristohanong mga tigom maoy tagana gikan kang Jehova nga makahatag kanato ug espirituwal nga kusog. Didto kita adunay maayo kaayong kahigayonan sa pagdasig sa usag usa pinaagig makapalagsik nga instruksiyon ug pag-ubanay. (Hebreohanon 10:25) Ang tanan diha sa kongregasyon kinahanglan maningkamot nga mahimong makapalig-on sa dihang magkomento sa mga tigom o sa dihang adunay bahin sa programa diha sa plataporma. Kadtong nagapanguna ingong mga magtutudlo ilabinang adunay responsibilidad sa pagdasig sa uban. (Isaias 32:1, 2) Bisan pag gikinahanglan ang pagpahimangno o pagbadlong, ang paagi sa pagtambag kinahanglang makapalagsik. (Galacia 6:1, 2) Ang atong gugma alang sa uban motabang gayod kanato nga dili molunga sa pag-alagad kang Jehova.—Salmo 133:1; Juan 13:35.
22. Bisan pa sa atong dili-hingpit nga tawhanong kinaiya, nganong mahimo kitang magmaisogon?
22 Ang pagsimba kang Jehova niining panahon sa kataposan naglangkit ug trabaho. Ug ang mga Kristohanon makasinati usab ug kakapoy sa hunahuna, kaguol, ug makapahigwaos nga mga sirkumstansiya. Ang atong dili-hingpit nga tawhanong kinaiya mahuyang, samag sudlanang kulonon. Apan, ang Bibliya nag-ingon: ‘Nabatonan nato kini nga bahandi diha sa mga sudlanan nga kulonon, aron ang gahom nga labaw sa kasarangan maiya sa Diyos ug dili gikan sa atong kaugalingon.’ (2 Corinto 4:7) Oo, kita kapoyon, apan hinaot nga kita dili molunga o mohunong. Hinunoa, ‘magmaisogon kita ug moingon: “Si Jehova mao ang akong magtatabang.”’—Hebreohanon 13:6.
Mubo nga Repaso
• Unsa ang pipila ka mga butang nga makahatag ug kabug-at nga mahimo natong tangtangon?
• Sa unsang paagi makapakigbahin kita sa pagbuhat ug “maayo” ngadto sa atong mga isigka-Kristohanon?
• Sa unsang paagi si Jehova nagapalig-on kanato sa dihang kita batiog kakapoy o kaluya sa buot?
[Mga Pangutana sa Pagtuon]
[Hulagway sa panid 23]
Si Jesus nahibalo nga ang dugay nga pagkaluya sa buot makahasol sa mga apostoles
[Hulagway sa panid 24]
Gihunong sa uban ang pipila ka pasatiempo ug wala-kinahanglanang personal nga mga proyekto
[Hulagway sa panid 26]
Bisan pa sa atong mga limitasyon, si Jehova nagpabili gayod sa atong tibuok-kasingkasing nga pagsimba