Kon Asa Makaplagan ang Labing Mapuslanong Tambag

TILINGUHAON kaayo ang usa ka malamposong kinabuhi. Ang mapuslanong tambag ug ang tinguha sa pagpadapat niini hinungdanon aron ang kinabuhi magmalamposon niining komplikado nga kalibotan. Apan, ang mga tawo dili kanunayng andam nga mamati ug mapuslanong tambag. Daghan ang nag-ingon nga ang tawo kinahanglang magkinabuhi nga independente. Sa pagkatinuod, ang rekord sa Bibliya nagpakita nga si Satanas, ang orihinal nga kaaway sa pagkasoberano sa Diyos, maoy nagtanyag ug pagkaindependente ngadto sa unang mga tawo. Gitala diha sa Genesis 3:5 ang iyang gisulti kang Eva: “Nasayod ang Diyos nga sa mismong adlaw nga kamo mokaon gikan niini ang inyong mga mata mangabuka ug kamo mahisama sa Diyos, nga mahibalo sa maayo ug sa daotan.”

Pagkahuman niadto, nagmalamposon ba si Adan ug Eva sa pagkinabuhi nga walay daotang gidangatan samtang gigiyahan lang sa ilang kaugalingong mga opinyon? Wala gayod! Sila nahigawad dihadiha sa mga resulta sa ilang paghunahuna nga nahibalo sila kon unsay maayo ug daotan. Ang Diyos makataronganong nagsalikway kanila ug sila nagsugod sa malisod nga kinabuhi sa pagkadili-hingpit, nga misangpot ug kamatayon. (Genesis 3:16-19, 23) Kitang tanan naapektohan sa kamatayon. Ang Bibliya nag-ingon: “Ang sala misulod sa kalibotan pinaagi sa usa ka tawo [si Adan] ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.”—Roma 5:12.

Bisan pag daotan ang mga resulta sa desisyon ni Adan ug Eva, daghan gihapon ang dili kombinsido nga maalamon ang pagpadapat sa tambag sa Magbubuhat sa tawo. Apan, ang Bibliya nag-ingon nga kini “inspirado sa Diyos ug mapuslanon,” ug kini makatabang kanato nga “masinangkapan alang sa tanang maayong buhat.” (2 Timoteo 3:16, 17) Tino gayod nga mas magmalipayon kita kon atong sundon ang tambag sa Bibliya. Ang kinabuhing pamilyahanon maoy pangunang dapit diin kini mapadapat.

Pagkamaunongon Diha sa Kaminyoon

Sumala sa Bibliya, katuyoan sa Diyos nga himoong permanente ang kaminyoon. (Genesis 2:22-24; Mateo 19:6) Dugang pa, ang Kasulatan nag-ingon nga ‘ang higdaanan sa kaminyoon dili angayng mahugawan,’ nga nagpasabot nga kining maong panag-uban kinahanglang dili mamansahan sa relasyon sa sekso nga gawas sa kaminyoon. (Hebreohanon 13:4) Apan, lagmit nasayod ka nga daghang kaminyoon karon wala makakab-ot niini nga sukdanan. Ang ubang mga tawo diha sa trabahoan naanad na sa pagbirigbirig sa mga tawong dili nila kapikas. Ang uban mamakak sa ilang mga pamilya aron makauban ang tawo nga ilang naibgan apan dili nila kapikas. Biyaan pa gani sa uban ang ilang kapikas aron makig-ipon sa mas batan-ong kauban kay kono mibati sila nga mas bata ug mas malipayon, sama sa nahitabo kang Veronica, nga gihisgotan sa nag-unang artikulo.

Bisan pa niana, ang pagporsigir sa pagpahimuot sa kaugalingon bisag unsa pay dangatan dili makahatag ug dumalayong kalipay. Napamatud-an kana ni Ronald. Kay nakombinsir nga iyang mapaarang-arang ang iyang kinabuhi, iyang gibiyaan ang iyang asawa aron magsugod ug bag-ong pamilya uban sa iyang kerida sulod na sa unom ka tuig ug kinsa may duha na siya ka anak. Ugaling lang, wala madugay human makigbulag sa iyang asawa, gibiyaan usab siya sa iyang kerida! Sa ulahi si Ronald miipon sa iyang mga ginikanan. Iyang gihubit ang iyang kahimtang ingong “makauulaw.” Kana maoy usa lang ka pananglitan. Ang maong panggawi nga gitukmod sa hakog nga mga tinguha miresulta sa daghang diborsiyo ug pagkabungkag sa pamilya, nga miresultag pag-antos sa daghan kaayong tawo—mga hamtong ug mga bata.

Sa laing bahin, ang pagpadapat sa tambag sa Bibliya mohatag ug tinuod nga kalipay. Mao kana ang nahitabo kang Roberto, kinsa miingon: “Tungod sa tambag sa Bibliya, wala kami magbulag sa akong asawa. Dili nato mabatonan ang tinuod nga kalipay pinaagi sa pagpatental sa tawo nga dili nato kapikas, bisan pag siya maanyag o ambongan. Ang edukasyon sa Bibliya nakatabang kanako sa pagpabili sa akong kapikas, kinsa kauban nako sa daghan na kaayong katuigan.” Ang tambag sa Bibliya nga “walay usa nga magluib sa asawa sa iyang pagkabatan-on” dako kaayong tabang sa kinabuhi ni Roberto. (Malaquias 2:15) Unsa pa ang laing mga kahimtang diin ang tambag sa Diyos makabenepisyo kanato?

Pagmatuto sa Atong mga Anak

Sa daghang tuig nga milabay napopular ang ideya nga ang mga ginikanan dili angayng maglatid ug daghang limitasyon sa pagmatuto sa mga anak. Gituohang makataronganon nga tugotan ang mga bata sa paghimo sa ilang kaugalingong desisyon kon unsaon paghunahuna ug paggawi. Ang tuyo mao nga aron dili masanta ang ilang pagtubo. Sa ubang mga dapit dunay gitukod nga mga sistema sa edukasyon nga gamay rag eskedyul, diin ang mga estudyante  makadesidir kon mosulod ba sila sa klase o dili ug silay magbuot kon unsa ka daghang panahon sa paglulinghayaw o sa instruksiyon ang ilang dawaton. Ang polisa sa usa niining matanga sa tunghaan mao nga “tugotan ang mga bata nga makapahayag sa ilang mga pagbati nga dili sila sawayon ug hilabtan sa mga hamtong.” Karong adlawa, ang ubang mga magtatambag bahin sa tawhanong panggawi nagkuwestiyon gihapon sa mga benepisyo sa pagpahamtang ug pipila ka matang sa disiplina, bisan sa mga kahimtang diin ang mga ginikanan nagtuo nga kinahanglang ihatag ang mahigugmaong disiplina.

Unsay resulta? Daghang tawo ang nagtuo nga ang mapatuyangong mga paagi sa pagmatuto sa mga bata nakahatag sa mga bata ug sobrang kagawasan. Sila nagtuo nga kini mao ang nakaingon sa kusog nga pag-uswag sa krimen ug paggamit sa droga. Gipakita sa surbi sa Tinipong Bansa nga 70 porsiyento sa gisurbi nagtuo nga kulang sa pagtultol sa ginikanan ang mga bata ug ang mga batan-on. Sa dihang gisusi kon unsay hinungdan sa pagpamusil sa tunghaan ug sa ubang grabeng mga krimen nga gihimo sa mga tin-edyer, gibasol sa daghang tawo ang “kakulangan sa ginikanan sa paghatag ug disiplina.” Ug bisan pag dili kaayo makapasubo ang resulta, giani sa mga ginikanan ug mga anak ang mapait nga mga bunga sa sayop nga paagi sa pagmatuto sa bata.

Unsay ikasulti sa Bibliya bahin niini? Ang Kasulatan nagtambag nga ang mga ginikanan angayng mogamit ug awtoridad nga inubanan sa gugma ug kalig-on. Ang Bibliya nag-ingon: “Ang mga binuang nabugkos sa kasingkasing sa usa ka bata; ang bunal sa disiplina mao ang magpahilayo niana gikan kaniya.” (Proverbio 22:15) Siyempre, ang tanang disiplina sa ginikanan kinahanglang mohaom sa mga kahimtang. Ang kalumo, pagpugong sa kaugalingon, ug konsiderasyon kinahanglang maoy mogiya sa bisan unsang disiplina nga ihatag. Sa ingon, kini maoy timaan sa gugma. Ang paggamit sa awtoridad sa ginikanan diha sa mahigugmaong paagi, dili sa mapintas nga paagi, lagmit gayod nga magmalamposon.

Ang pagpadapat niini nga tambag dunay makita nga maayong mga resulta. Si Arturo, usa ka 30-anyos nga lalaki sa Mexico nga bag-o pang naminyo, miingon: “Giklaro sa akong amahan ngadto sa akong mga igsoong lalaki ug kanako nga siya ug ang akong inahan mao ang may awtoridad sa pamilya. Dili gayod sila magpanuko sa pagdisiplina kanamo. Bisan pa niana, sila naggahin gayod ug panahon sa pagpakig-estorya kanamo. Karon nga hamtong na, akong gipabilhan ang lig-ong kinabuhi nga akong natagamtam, ug nahibalo ako nga resulta kini sa maayong giya nga akong nadawat.”

 Pahimusli ang Labing Mapuslanong Tambag

Ang Pulong sa Diyos, ang Bibliya, naundan sa labing mapuslanong tambag nga mabatonan sa mga tawo. Ang giya niini dili lamang alang sa kahikayan sa pamilya. Kini motabang sa pagsangkap kanato sa daghang paagi tungod kay nagtudlo kini kanato kon unsaon paggawi diha sa usa ka kalibotan diin ang kadaghanan dili andam sa pagdawat nga ang usa ka superyor nga Tinubdan sa kaalam mao ang angayng magmando sa ilang kinabuhi alang sa ilang kaayohan.

Si Jehova nga Diyos, ang Maglalalang sa mga tawo, naghatag niini nga pasalig pinaagi ni salmistang David: “Ihatag ko kanimo ang hait nga salabotan ug tudloan ko ikaw sa dalan nga imong pagalaktan. Ihatag ko ang tambag nga ang akong mata magatan-aw kanimo.” (Salmo 32:8) Dili ba makapahinuklog ang paghunahuna nga ang Maglalalang nagbantay kanato aron panalipdan kita batok sa mga kapeligrohan? Apan, ang pangutana alang sa tagsatagsa kanato mao kini: ‘Ako ba mapainubsanong modawat sa mapanalipdanong paggiya ni Jehova?’ Ang iyang Pulong mahigugmaong nagsulti kanato: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.”—Proverbio 3:5, 6.

Ang pagsinati kang Jehova nagkinahanglan ug paningkamot ug paglahutay, apan mahimo kini sa mga tawo pinaagi sa Bibliya. Ang iyang giawhag nga paagi sa pagkinabuhi ‘naghupot ug saad sa kinabuhi karon ug sa umaabot.’ Kini makahatag gayod ug dakong benepisyo tungod sa mga kaayohan nga gitanyag niini.—1 Timoteo 4:8; 6:6.

Kon nakapaikag kanimo ang pagsabot nga ginahatag sa Bibliya ug ang mga panalangin nga madawat tungod sa pagkinabuhi subay niini, himoang panguna sa imong kinabuhi ang pagbasa ug pagpamalandong sa Pulong sa Diyos. Kini makatabang kanimo aron magmalamposon sa pag-atubang sa mga problema karon ug sa umaabot. Dugang pa, imong masayran ang paglaom sa kinabuhi diha sa bag-ong kalibotan sa Diyos, diin ang tanan pagatudloan ni Jehova ug ang ilang pakigdait mahimong dagaya.—Isaias 54:13.

 [Hulagway sa panid 5]

Ang tambag sa Bibliya makapalig-on sa bugkos sa kaminyoon

[Mga hulagway sa panid 6]

Ang tambag sa Bibliya mao ang pasukaranan sa maayong pagtultol, apan naghatag usab kinig lugway sa tawo sa paglulinghayaw

[Mga hulagway sa panid 7]

Kadtong nagpadapat sa tambag sa Bibliya makatagamtam ug balanse nga kinabuhi