“Mao Kana ang Kinamaayohang Butang nga Imong Mahimo”

SI Alexis maoy usa ka singko-anyos nga batang lalaki nga nagpuyo sa siyudad sa Morelia, Mexico, kansang mga ginikanan nagtuon sa Bibliya ug tigtambongan sa mga tigom sa mga Saksi ni Jehova. Samtang nagtambong sa usa ka sirkitong asembliya uban sa iyang pamilya, nakita niya ang usa ka pasundayag bahin sa pagpamalaybalay. Kalit lang siyang milingi sa iyang amahan ug nangutana, “Papa, Papa, nganong dili man ka mosangyaw?” Ang iyang amahan mitubag, “Nagtuon pa lang ko mao nga dili pa ko makahimo niana.” Madasigong mitubag si Alexis, “Papa, mao kana ang kinamaayohang butang nga imong mahimo.”

Nakita niining bataa ang panginahanglan nga molihok uyon sa kon unsay iyang nakat-onan bahin kang Jehova. Sanglit pareho ra silag gipuy-ang balay sa duha niya ka manghod nga mga ig-agaw, nag-ampo una siya kang Jehova ug dayon nakigsulti kanila bahin sa gitudlo sa iyang mga ginikanan kaniya gikan sa Akong Basahon sa mga Estorya sa Bibliya. Bisan tuod si Alexis dili pa makamaong mobasa, siya nahibalo pag-ayo sa kaundan sa maong libro gumikan sa mga hulagway nga nag-ilustrar sa mga estorya. Miingon pa gani siya nga gusto niyang duawon ang mga tawo sa ilang mga balay aron ipaambit kanila ang iyang nakat-onan bahin sa mga katuyoan sa Diyos.

Sa pagkatinuod, ang mga bata ug tigulang makapahiuyon sa ilang kinabuhi sa kon unsay gidahom kanila ni Jehova, “ang Balaang Usa,” ug sa ingon makabaton sa kinadak-ang pribilehiyo sa pagpamatuod bahin kaniya taliwala sa mga nasod. (Isaias 43:3; Mateo 21:16) Sa walay duhaduha, usa kana sa kinamaayohang butang nga mahimo sa usa ka tawo.