Nahinumdom Ka Ba?

Nalingaw ka ba sa pagbasa sa di pa dugayng mga gula sa Ang Bantayanang Torre? Nganong dili susihon kon makatubag ka ba sa mosunod nga mga pangutana?

• Unsa ang Complutensian Polyglot, ug nganong kini talagsaon?

Kini maoy usa ka inimprenta nga Bibliya nga daghag pinulongan nga gipakita diha sa nagtapad nga mga lindog, ang labing maayong mga teksto nga mabatonan sa maong panahon diha sa Hebreohanon, Grego, ug Latin nga pinulongan, lakip sa pipila ka bahin sa Aramaikong pinulongan. Kining polyglot nga Bibliya maoy usa ka dakong kaugmaran sa pagpatunghag mas tukma nga mga teksto sa orihinal nga mga pinulongan.—4/15, mga panid 28-31.

• Sa unsang paagi mapalipay sa mga tawo ang Diyos?

Ingong tinuod nga buhing persona, si Jehova may katakos sa paghunahuna, paglihok, ug pagbati. Siya maoy “malipayong Diyos” ug mahimuot sa pagpalampos sa iyang katuyoan. (1 Timoteo 1:11; Salmo 104:31) Kon mas sensitibo kita labot sa pagbati sa Diyos, mas makiling kita sa paglipay sa iyang kasingkasing.—5/15, mga panid 4-7.

• Nganong gitugotan ni David ang iyang asawa nga si Mikal sa pagbaton ug usa ka larawan nga terapim?

Sa dihang naglaraw si Haring Saul sa pagpatay kang David, gitabangan siya ni Mikal nga makaikyas, nga nagbutang diha sa higdaanan ug usa ka imahen nga lagmit pormag tawo. Siya lagmit adunay terapim tungod kay ang iyang kasingkasing dili bug-os ngadto sa Diyos. Tingali wala mahibalo si David bahin niini o kaha nagtugot niini tungod kay si Mikal anak ni Haring Saul. (1 Cronicas 16:25, 26)—6/1, panid 29.

• Unsang pasukaranang kamatuoran ang gipasiugda diha sa balaod sa Diyos labot sa dugo?

Ang gipamulong sa Diyos pagkahuman sa Lunop, sa Moisesnong Balaod, ug sa sugo nga makita sa Buhat 15:28, 29, nagpunting sa halad nga nalangkit sa giula nga dugo ni Jesus. Pinaagi lamang sa maong dugo nga atong maangkon ang kapasayloan sa mga sala ug makabaton ug pakigdait uban sa Diyos. (Colosas 1:20)—6/15, mga panid 14-19.

• Pila ka milagro ni Jesus ang gihisgotan diha sa Bibliya?

Ang mga asoy sa Ebanghelyo naghisgot ug 35 ka milagro ni Jesus. Apan ang eksaktong gidaghanon sa mga milagro ni Jesus, lakip na sa mga wala itaho, wala ibutyag. (Mateo 14:14)—7/15, panid 5.