Si Jehova, Atong “Kuta sa Panahon sa Kasakitan”

“Ang kaluwasan sa mga matarong magagikan kang Jehova; siya ang ilang kuta sa panahon sa kasakitan.”—SALMO 37:39.

1, 2. (a) Unsay giampo ni Jesus alang sa iyang mga tinun-an? (b) Unsay kabubut-on sa Diyos mahitungod sa iyang katawhan?

 SI Jehova labing gamhanan. Siya adunay gahom sa pagpanalipod sa iyang matinumanong mga magsisimba sa bisan unsang paagi nga gusto niya. Mahimo gani niyang ibulag ang iyang katawhan sa literal nga paagi gikan sa ubang mga tawo sa kalibotan ug ibutang sila sa usa ka luwas ug malinawon nga palibot. Apan, mahitungod sa iyang mga tinun-an, si Jesus miampo ngadto sa iyang langitnong Amahan: “Naghangyo ako kanimo, dili nga kuhaon sila gikan sa kalibotan, kondili nga bantayan sila tungod sa usa nga daotan.”—Juan 17:15.

² Gipili ni Jehova nga dili kita kuhaon “gikan sa kalibotan.” Hinunoa, iyang kabubut-on nga kita magpuyo taliwala sa ubang mga tawo niining kalibotana aron ikamantala ang iyang mensahe sa paglaom ug paghupay ngadto sa uban. (Roma 10:13-15) Apan, ingon sa gipasabot ni Jesus diha sa iyang pag-ampo, sa pagpuyo niining kalibotana, kita nameligro sa “usa nga daotan.” Ang dili masinugtanong katawhan ug ang daotang espirituhanong mga puwersa makapahinabo ug dakong kasakit ug kaguol, ug ang mga Kristohanon makaagom usab ug kasakitan.—1 Pedro 5:9.

3. Unsang kamatuoran ang kinahanglang atubangon bisan sa matinumanong mga magsisimba ni Jehova, apan unsang paghupay ang atong makaplagan diha sa Pulong sa Diyos?

³ Ilalom sa maong mga pagsulay, natural lamang nga mahiagom sa temporaryong pagkaluya sa buot. (Proverbio 24:10) Ang rekord sa Bibliya adunay daghang sugilanon bahin sa mga matinumanon nga nakaagom ug kasakitan. “Daghan ang mga katalagman sa matarong,” miingon ang salmista, “apan si Jehova magaluwas kaniya gikan niining tanan.” (Salmo 34:19) Oo, ang daotang mga butang mahitabo bisan ngadto sa “matarong.” Sama kang salmistang David, usahay kita tingali ‘maminhod o maluya ug mahugno sa hilabihan.’ (Salmo 38:8) Apan, makapahupay ang pagkahibalo nga “si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.”—Salmo 34:18; 94:19.

4, 5. (a) Kaharmonya sa Proverbio 18:10, unsay kinahanglan natong buhaton aron mapanalipdan kita sa Diyos? (b) Unsa ang pipila ka espesipikong mga lakang nga atong mahimo aron tabangan kita sa Diyos?

⁴ Kaharmonya sa pag-ampo ni Jesus, si Jehova nagabantay gayod kanato. Siya mao ang atong “kuta panahon sa kasakitan.” (Salmo 37:39) Ang basahon sa Proverbio naggamit ug susamang  ekspresyon sa dihang kini nag-ingon: “Ang ngalan ni Jehova usa ka malig-ong torre. Nganha niana ang matarong modagan ug mahatagan sa panalipod.” (Proverbio 18:10) Kining tekstoha nagpadayag sa paninugdang kamatuoran bahin sa malumong kabalaka ni Jehova alang sa iyang mga linalang. Ang Diyos nagtagana ug proteksiyon ilabina ngadto sa mga matarong nga aktibong nangita kaniya, nga daw kita midangop ngadto sa usa ka malig-ong torre aron mapanalipdan.

⁵ Sa dihang nag-atubang ug makapaguol nga mga suliran, sa unsang paagi kita modangop kang Jehova aron mapanalipdan? Hisgotan nato ang tulo ka hinungdanong mga lakang nga atong mahimo aron makadawat sa tabang ni Jehova. Una, kinahanglang moampo kita sa atong langitnong Amahan. Ikaduha, kinahanglang molihok kita nga kaharmonya sa iyang balaang espiritu. Ug ikatulo, kinahanglang magpasakop kita sa kahikayan ni Jehova pinaagi sa pagpakig-uban sa mga isigka-Kristohanon nga makahupay sa atong kasakitan.

Ang Gahom sa Pag-ampo

6. Sa unsang paagi lantawon sa matuod nga mga Kristohanon ang pag-ampo?

⁶ Ang ubang mga eksperto sa panglawas nagrekomendar sa pag-ampo ingong tambal alang sa depresyon ug kahigwaos. Bisan tinuod tingali nga ang hilom nga yugto sa pagpamalandong sama sa pag-ampo makahupay sa kahigwaos, makab-ot usab ang susama niana pinaagi sa pagpamati sa pipila ka tingog diha sa kinaiyahan o bisan sa pagpamasahe sa bukobuko. Ang matuod nga mga Kristohanon dili magpakamenos sa pag-ampo pinaagi sa paglantaw niana ingong usa lamang ka terapiya nga makapaarang-arang sa gibati. Atong gilantaw ang pag-ampo ingong matahaon nga pagpakigsulti sa Maglalalang. Ang pag-ampo naglangkit sa atong debosyon ug pagsalig sa Diyos. Oo, ang pag-ampo maoy bahin sa atong pagsimba.

7. Unsay kahulogan sa pag-ampo uban ang pagsalig, ug sa unsang paagi ang maong mga pag-ampo motabang kanato sa pagsagubang sa kasakitan?

⁷ Ang atong mga pag-ampo kinahanglang inubanan sa pagsalig kang Jehova. Si apostol Juan misulat: “Kini ang pagsalig nga atong nabatonan diha kaniya, nga, bisan unsay atong pangayoon sumala sa iyang kabubut-on, siya magpatalinghog kanato.” (1 Juan 5:14) Si Jehova, ang Supremong Persona, ang bugtong matuod ug labing gamhanan nga Diyos, aktuwal nga naghatag ug linaing pagtagad sa kinasingkasing nga mga pag-ampo sa iyang mga magsisimba. Makapahupay bisan ang pagkahibalo lamang nga ang atong mahigugmaong Diyos magpatalinghog kanato sa dihang atong isulti kaniya ang atong mga kabalaka ug mga problema.—Filipos 4:6.

8. Nganong ang matinumanong mga Kristohanon dili gayod maulaw o mobating dili takos sa dihang moduol kang Jehova pinaagi sa pag-ampo?

⁸ Ang matinumanong mga Kristohanon dili gayod angayng maulaw, mobating dili takos, o makulangan sa pagsalig sa dihang moduol kang Jehova pinaagi sa pag-ampo. Tinuod, sa dihang kita nahigawad o nabug-atan sa mga problema, kita tingali dili kanunayng mokiling sa pagduol kang Jehova pinaagi sa pag-ampo. Nianang mga panahona angay natong hinumdoman nga si Jehova ‘nagpakita ug kaluoy sa mga sinakit nga iyang  kaugalingon’ ug siya “nagahupay kanilang gipaubos.” (Isaias 49:13; 2 Corinto 7:6) Ilabina sa panahon sa kagul-anan ug kasakitan nga kita kinahanglang modangop nga masaligon sa atong langitnong Amahan ingong atong kuta.

9. Unsay papel sa pagtuo diha sa atong mainampoong pagduol sa Diyos?

⁹ Aron bug-os nga makabenepisyo gikan sa pribilehiyo sa pag-ampo, kinahanglang mabatonan nato ang tinuod nga pagtuo. Ang Bibliya nag-ingon nga “siya nga moduol sa Diyos angay nga motuo nga siya mao ug nga siya maoy tigganti sa mga matinuorong nagapangita kaniya.” (Hebreohanon 11:6) Ang pagtuo naglangkit ug labaw pa kay sa pagtuo lamang nga ang Diyos naglungtad, nga “siya mao.” Ang tinuod nga pagtuo naglangkit ug hugot nga pagtuo sa katakos ug tinguha sa Diyos nga gantihan ang atong pagkamasinugtanon kaniya. “Ang mga mata ni Jehova anaa sa mga matarong, ug ang iyang mga igdulungog gikiling sa ilang pangamuyo.” (1 Pedro 3:12) Ang paghunahuna kanunay sa mahigugmaong kabalaka ni Jehova alang kanato maghatag ug linaing kahulogan sa atong mga pag-ampo.

10. Unsa may angayng kalidad sa atong mga pag-ampo aron kita makadawat ug espirituwal nga pagpalig-on gikan kang Jehova?

¹⁰ Si Jehova mamati sa atong mga pag-ampo sa dihang kini gitanyag uban ang bug-os nga kasingkasing. Ang salmista misulat: “Misangpit ako uban sa bug-os kong kasingkasing. Tubaga ako, Oh Jehova.” (Salmo 119:145) Dili sama sa rituwalistikong mga pag-ampo diha sa daghang relihiyon, ang atong mga pag-ampo dili rutina lamang o dili-kinasingkasing. Sa dihang kita mag-ampo kang Jehova uban sa atong ‘bug-os nga kasingkasing,’ ang atong mga pulong tugob sa kahulogan ug katuyoan. Human nianang kinasingkasing nga mga pag-ampo, masinati nato ang kahupayan nga naggikan sa pagtugyan sa atong “palas-anon kang Jehova.” Ingon sa gisaad sa Bibliya, “siya magasapnay” kanato.—Salmo 55:22; 1 Pedro 5:6, 7.

Ang Espiritu sa Diyos Mao ang Atong Magtatabang

11. Unsa ang usa ka paagi nga si Jehova nagatubag kanato sa dihang kita ‘padayon nga mangayo’ sa iyang tabang?

¹¹ Si Jehova dili lamang ang Tigpatalinghog sa pag-ampo kondili ang Tigtubag usab. (Salmo 65:2) Si David misulat: “Sa adlaw sa akong kasakitan ako motawag kanimo, kay ikaw motubag kanako.” (Salmo 86:7) Busa, gidasig ni Jesus ang iyang mga tinun-an sa ‘pagpadayon sa pagpangayo’ sa tabang ni Jehova tungod kay ang “Amahan sa langit mohatag ug balaang espiritu niadtong nagapangayo kaniya.” (Lucas 11:9-13) Oo, ang aktibong gahom sa Diyos magsilbing magtatabang, o maghuhupay, sa iyang katawhan.—Juan 14:16.

12. Sa unsang paagi ang espiritu sa Diyos motabang kanato sa dihang ang mga problema daw bug-at kaayo?

¹² Bisan sa dihang mag-atubang kita ug mga pagsulay, ang espiritu sa Diyos makahatag kanato ug “gahom nga labaw sa kasarangan.” (2 Corinto 4:7) Si apostol Pablo, kinsa nakalahutay sa daghang makapahigwaos nga mga situwasyon, masaligong miingon: “Sa tanang butang ako adunay kusog pinaagi kaniya nga naghatag ug gahom kanako.” (Filipos 4:13) Sa susama, daghang Kristohanon karon ang mibati nga napasig-uli ang ilang espirituwal ug emosyonal nga kalig-on agig tubag sa ilang mga pangamuyo. Kasagaran, ang makapaguol nga mga problema dili na kaayo bug-at human nato madawat ang tabang sa espiritu sa Diyos. Tungod niining hinatag-sa-Diyos nga kalig-on, kita makaingon, sama sa apostol: “Kami ginapiit sa tanang paagi, apan dili napiotan nga dili na makalihok; kami nangalibog, apan dili bug-os nga walay kalingkawasan; kami ginalutos, apan wala biyai sa bug-os; kami nangatumba, apan wala malaglag.”—2 Corinto 4:8, 9.

13, 14. (a) Sa unsang paagi si Jehova napamatud-an nga atong kuta pinaagi sa iyang sinulat nga Pulong? (b) Sa unsang paagi ang pagpadapat sa mga prinsipyo sa Bibliya nakatabang kanimo sa personal?

¹³ Ang balaang espiritu nag-inspirar ug nagpreserbar usab sa sinulat nga Pulong sa Diyos alang sa atong kaayohan. Sa unsang paagi si Jehova napamatud-an nga atong kuta sa panahon sa kasakitan pinaagi sa iyang Pulong? Ang usa ka paagi maoy sa paghatag kanato ug praktikal nga kaalam ug katakos sa panghunahuna. (Proverbio 3:21-24) Ang Bibliya nagbansay sa atong mga gahom sa panghunahuna ug nagpauswag sa atong gahom sa pagpangatarongan. (Roma 12:1) Pinaagi sa regular nga pagbasa ug pagtuon sa Pulong sa Diyos, duyog sa paggamit niana, ang atong ‘mga gahom sa pagsabot mabansay sa pag-ila sa maayo ug sa daotan.’ (Hebreohanon 5:14) Tingali naeksperyensiyahan nimo mismo kon sa unsang paagi ang mga prinsipyo sa Bibliya mitabang  kanimo sa paghimog maalamong mga desisyon sa dihang ikaw nag-atubang ug mga kalisdanan. Ang Bibliya naghatag kanatog kaalam nga motabang kanato sa pagkaplag ug praktikal nga mga solusyon sa makapaguol nga mga problema.—Proverbio 1:4.

¹⁴ Ang Pulong sa Diyos nagtagana kanato ug laing tuboran sa kalig-on—ang paglaom sa kaluwasan. (Roma 15:4) Ang Bibliya nag-ingon nga ang daotang mga butang dili magpadayon hangtod sa hangtod. Temporaryo lamang ang bisan unsang mga kasakit nga atong giantos. (2 Corinto 4:16-18) Atong nabatonan ang “paglaom sa kinabuhing walay kataposan nga gisaad sa Diyos, nga dili makabakak, sa wala pa ang kanhing kapanahonan.” (Tito 1:2) Kon kita magmaya nianang maong paglaom, uban ang kanunayng paghunahuna sa masanag nga kaugmaon nga gisaad ni Jehova, kita makalahutay ilalom sa kasakitan.—Roma 12:12; 1 Tesalonica 1:3.

Ang Kongregasyon—Usa ka Pagpahayag sa Gugma sa Diyos

15. Sa unsang paagi ang mga Kristohanon mahimong panalangin sa usag usa?

¹⁵ Ang laing tagana gikan kang Jehova nga makatabang kanato panahon sa kasakitan mao ang panag-ubanay nga atong matagamtam diha sa Kristohanong kongregasyon. Ang Bibliya nag-ingon: “Ang tinuod nga higala mahigugma sa tanang panahon, ug maoy usa ka igsoon nga natawo alang sa panahon sa kasakit.” (Proverbio 17:17) Ang Pulong sa Diyos nagdasig sa tanan diha sa kongregasyon sa pagpasidungog ug paghigugma sa usag usa. (Roma 12:10) “Magpadayon pagpangita ang matag usa, dili sa iyang kaugalingong kaayohan, kondili nianang sa laing tawo,” misulat si apostol Pablo. (1 Corinto 10:24) Ang pagbaton nianang maong tinamdan makatabang kanato sa pagsentro sa atong pagtagad sa mga panginahanglan sa uban inay kay sa atong kaugalingong mga pagsulay. Sa dihang motabang kita sa uban, wala lamang kita makatabang kanila kondili matagamtam usab nato ang usa ka sukod sa kalipay ug katagbawan nga makapagaan sa atong kaugalingong mga palas-anon.—Buhat 20:35.

16. Sa unsang paagi ang matag Kristohanon mahimong makapadasig?

¹⁶ Ang hamtong sa espirituwal nga mga lalaki ug babaye adunay hinungdanong bahin sa pagpalig-on sa uban. Aron mahimo kana, ilang gihimo ang ilang kaugalingon nga daling duolon ug andam nga motabang. (2 Corinto 6:11-13) Bulahan gayod ang kongregasyon kon ang tanan mogahin ug panahon sa paghatag ug komendasyon sa mga batan-on, sa pagpalig-on sa mga bag-ohan, ug sa pagdasig niadtong nagmagul-anon. (Roma 15:7) Ang inigsoon nga gugma motabang usab kanato sa paglikay nga mahimong madudahon sa usag usa. Dili kita angayng mohinapos dayon nga ang mga kalisdanan nga giantos sa usa maoy timailhan sa espirituwal nga kaluya. Si Pablo haom nga nag-awhag sa mga Kristohanon nga ‘hupayon ang magul-anong mga kalag.’ (1 Tesalonica 5:14) Ang Bibliya nagpakita nga bisan ang matinumanong mga Kristohanon makaagom ug kasakitan.—Buhat 14:15.

17. Unsay atong mga kahigayonan sa pagpalig-on sa bugkos sa Kristohanong panag-igsoonay?

 ¹⁷ Ang Kristohanong mga tigom maoy maayo kaayong kahigayonan nga kita makahupay ug makadasig sa usag usa. (Hebreohanon 10:24, 25) Kining mahigugmaong pag-estoryahanay dili lamang himoon diha sa mga tigom sa kongregasyon. Hinunoa, ang katawhan sa Diyos mangita usab ug mga kahigayonan sa pagpakigbahin sa maayong panag-ubanay diha sa di-pormal nga mga kahimtang. Sa dihang motungha ang makapaguol nga mga situwasyon, kita dali rang magtinabangay tungod kay nalig-on na ang mga bugkos sa panaghigalaay. Si apostol Pablo misulat: ‘Kinahanglang walay pagkabahinbahin diha sa lawas, kondili ang mga sangkap niini magtagad sa usag usa. Ug kon ang usa ka sangkap nagaantos, ang tanang ubang mga sangkap magaantos uban niini; o kon ang usa ka sangkap ginahimaya, ang tanang ubang mga sangkap magamaya uban niini.’—1 Corinto 12:25, 26.

18. Unsang kiling ang angay natong likayan sa dihang kita magmagul-anon?

¹⁸ Usahay, kita tingali maguol pag-ayo nga dili na kita ganahang makig-uban sa mga isigka-Kristohanon. Kinahanglang pakigbisogan nato ang maong pagbati aron dili nato mahikawan ang atong kaugalingon sa kahupayan ug tabang nga ikahatag sa mga isigkamagtutuo. Ang Bibliya nagpasidaan kanato: “Ang nagalain sa iyang kaugalingon mangita sa iyang hakog nga tinguha; siya mobatok sa tanang praktikal nga kaalam.” (Proverbio 18:1) Ang atong mga igsoong lalaki ug babaye maoy pasundayag sa pag-atiman sa Diyos kanato. Kon atong ilhon kanang mahigugmaong tagana, kita mahupayan panahon sa kasakitan.

Hupti ang Positibong Tinamdan

19, 20. Sa unsang paagi ang Kasulatan motabang kanato sa pagsalikway sa negatibong mga hunahuna?

¹⁹ Sa dihang mobatig kaluya sa buot ug kaguol, sayon ra ang paghambin ug negatibong mga panghunahuna. Pananglitan, sa dihang nakaagom sa kalisdanan, ang uban magsugod tingali sa pagduhaduha sa ilang espirituwalidad, nga manghinapos nga ang ilang kalisdanan maoy timailhan sa dili pag-uyon sa Diyos. Apan, hinumdomi nga si Jehova dili mosulay kang bisan kinsa pinaagi sa “daotang mga butang.” (Santiago 1:13) “Dili gikan sa iyang kaugalingong kasingkasing nga [ang Diyos] nagsakit o nagpaguol sa mga anak sa mga tawo,” nag-ingon ang Bibliya. (Lamentaciones 3:33) Sa kasukwahi, si Jehova masubo pag-ayo sa dihang mag-antos ang iyang mga alagad.—Isaias 63:8, 9; Zacarias 2:8.

²⁰ Si Jehova mao ang “Amahan sa malumong mga kaluoy ug ang Diyos sa tanang paghupay.” (2 Corinto 1:3) Siya may kahingawa kanato, ug siya magabayaw kanato sa takdang panahon. (1 Pedro 5:6, 7) Ang paghunahuna kanunay sa pagmahal sa Diyos kanato motabang kanato sa paghupot ug positibong tinamdan, magmaya pa gani. Si Santiago misulat: “Mga igsoon ko, isipa nga maoy bug-os kalipay kon makasagubang kamo ug nagkadaiyang mga pagsulay.” (Santiago 1:2) Ngano? Siya nagtubag: “Tungod kay sa pagkahimong inuyonan iyang madawat ang purongpurong sa kinabuhi, nga gisaad ni Jehova niadtong nagpadayon sa paghigugma kaniya.”—Santiago 1:12.

21. Bisan pa sa kalisdanan nga atong giatubang, unsay gipasalig sa Diyos niadtong magmatinumanon ngadto kaniya?

²¹ Ingon sa gipasidaan ni Jesus kanato, sa kalibotan kita adunay kasakitan. (Juan 16:33) Apan ang Bibliya nagsaad nga walay ‘kasakitan o kagul-anan o paglutos o kagutom o kahubo o kapeligrohan’ nga makabulag kanato gikan sa gugma ni Jehova ug sa gugma sa iyang Anak. (Roma 8:35, 39) Pagkamakapahupay ang pagkahibalo nga temporaryo lamang ang bisan unsang kasakitan nga atong giatubang! Sa kasamtangan, samtang ginapaabot nato ang kataposan sa pag-antos sa tawo, ang atong mahigugmaong Amahan, si Jehova, nagabantay kanato. Kon kita modangop kaniya aron mapanalipdan, siya mahimong “usa ka luwas nga hataas nga dapit alang sa dinaogdaog, usa ka luwas nga hataas nga dapit sa mga panahon sa kasakit.”—Salmo 9:9.

Unsay Atong Nakat-onan?

• Unsay angayng dahomon sa mga Kristohanon samtang nagkinabuhi niining daotang kalibotan?

• Sa unsang paagi ang atong kinasingkasing nga pag-ampo makapalig-on sa dihang kita mag-atubang ug mga pagsulay?

• Sa unsang paagi ang espiritu sa Diyos usa ka magtatabang?

• Unsay atong mahimo sa pagtabang sa usag usa?

[Mga Pangutana sa Pagtuon]

[Hulagway sa panid 18]

Kinahanglang mangita kita kang Jehova nga daw kita midangop ngadto sa usa ka malig-ong torre

[Mga hulagway sa panid 20]

Ang mga hamtong sa espirituwal mogamit sa tanang kahigayonan sa paghatag ug komendasyon ug pagdasig sa uban