Himayaa ang Diyos “sa Usa ka Baba”

“Sa usa ka baba maghimaya sa Diyos ug Amahan sa atong Ginoong Jesu-Kristo.”—ROMA 15:6.

1. Unsang pagtulon-an bahin sa pagdumala sa lainlaing mga punto-debista ang gipaambit ni Pablo sa mga isigkamagtutuo?

 DILI tanang Kristohanon ang mohimog samang mga pagpili o managsama ug gusto. Bisan pa niana, ang tanang Kristohanon kinahanglang magkahiusa sa paglakaw diha sa dalan sa kinabuhi. Posible ba kana? Oo, kon dili nato padak-on ang ginagmayng mga problema. Mao kana ang pagtulon-an nga gipaambit ni apostol Pablo ngadto sa mga isigkamagtutuo sa unang siglo. Giunsa niya pagpatin-aw kining hinungdanong punto? Ug sa unsang paagi ikapadapat nato ang iyang inspiradong tambag karon?

Ang Importansiya sa Kristohanong Panaghiusa

2. Sa unsang paagi gipasiugda ni Pablo ang panginahanglan nga magkahiusa?

² Nahibalo si Pablo nga hinungdanon ang Kristohanong panaghiusa, ug naghatag siya ug maayong tambag sa pagtabang sa mga Kristohanon sa pag-inantosay sa usag usa diha sa gugma. (Efeso 4:1-3; Colosas 3:12-14) Bisan pa niana, human magtukod ug daghang kongregasyon ug moduaw sa uban sulod sa kapin sa 20 ka tuig, nahibalo siya nga lisod ang paghupot sa panaghiusa. (1 Corinto 1:11-13; Galacia 2:11-14) Busa, iyang giawhag ang mga isigkamagtutuo nga nagpuyo sa Roma: “Hinaot ang Diyos nga naghatag ug pag-antos (o paglahutay) ug paghupay magtugot . . . nga uban ang panag-uyon kamo sa usa ka baba maghimaya sa Diyos ug Amahan sa atong Ginoong Jesu-Kristo.” (Roma 15:5, 6) Karong adlawa, kita usab kinahanglang maghimaya kang Jehova nga Diyos “sa usa ka baba” ingong nahiusa nga pundok sa iyang katawhan. Komosta kita niining bahina?

3, 4. (a) Unsa ang lainlaing kagikan sa mga Kristohanon didto sa Roma? (b) Sa unsang paagi ang mga Kristohanon sa Roma makaalagad kang Jehova “sa usa ka baba”?

³ Daghang Kristohanon sa Roma ang personal nga mga higala ni Pablo. (Roma 16:3-16) Bisan tuod lainlain ang ilang mga kagikan, gidawat ni Pablo ang tanan niyang mga igsoon ingong “mga hinigugma sa Diyos.” Siya misulat: “Ako nagpasalamat sa akong Diyos pinaagi ni Jesu-Kristo mahitungod kaninyong tanan, tungod kay ang inyong pagtuo gihisgotan lukop sa tibuok kalibotan.” Klaro nga ang mga Romano maoy sulondan sa daghang paagi. (Roma 1:7, 8; 15:14) Sa samang higayon, ang pipila ka membro sa kongregasyon lainlain ug mga punto-debista sa pipila ka butang. Tungod kay ang mga Kristohanon karon naggikan sa nagkadaiyang mga kagikan ug mga kultura, ang pagtuon sa inspiradong tambag ni Pablo kon sa unsang paagi dumalahon ang mga kalainan makatabang kanila sa pagsulti “sa usa ka baba.”

⁴ Sa Roma dihay Hudiyo ug Hentil nga mga magtutuo. (Roma 4:1; 11:13) Ang ubang Hudiyong mga Kristohanon dayag nga dili gayod makahunong sa pagtuman sa pipila ka kostumbre nga ilang gisunod ilalom sa Moisesnong Balaod, bisan tuod angay unta nilang maamgohan nga ang maong mga tulumanon dili hinungdanon sa kaluwasan. Sa laing bahin, daghang Hudiyong mga Kristohanon ang midawat nga ang halad ni Kristo nagpahigawas kanila sa mga pagdili nga ilang gisunod sa wala pa mahimong mga Kristohanon. Tungod niini, ilang giusab ang pipila sa ilang personal nga mga batasan ug mga kostumbre. (Galacia 4:8-11) Bisan pa niana, sumala sa gipunting ni Pablo, ang tanan maoy “mga hinigugma sa Diyos.” Ang tanan makahimaya sa Diyos “sa usa ka baba” kon ilang huptan ang hustong tinamdan sa hunahuna ngadto sa usag usa. Kita karon magkalain usab ug mga punto-debista labot sa  pipila ka butang, busa angay natong palandongon pag-ayo kon sa unsang paagi gipatin-aw ni Pablo kanang importanteng prinsipyo.—Roma 15:4.

“Dawata ang Usag Usa”

5, 6. Nganong dihay mga kalainan sa punto-debista didto sa kongregasyon sa Roma?

⁵ Sa iyang sulat ngadto sa mga Romano, si Pablo naghisgot bahin sa usa ka situwasyon diin magkalahi ang mga hunahuna. Siya misulat: “Ang usa ka tawo nagtuo nga makakaon siya sa tanang butang, apan ang tawo nga maluya mokaon ug mga utanon.” Nganong ingon man niana? Aw, ilalom sa Moisesnong Balaod, gidili ang pagkaon ug baboy. (Roma 14:2; Levitico 11:7) Apan, ang Balaod dili na kinahanglang sundon human mamatay si Jesus. (Efeso 2:15) Unya, tulo ka tuig ug tunga human sa kamatayon si Jesus, usa ka manulonda miingon kang apostol Pedro nga sa panglantaw sa Diyos walay pagkaon nga isipong mahugaw. (Buhat 11:7-12) Nga naghunahuna niining mga butanga, ang ubang Hudiyong mga Kristohanon mibati tingali nga sila makakaon na ug baboy—o makakaon sa uban pang pagkaon nga gidili ilalom sa Balaod.

⁶ Apan, ang paghunahuna lamang nga kaonon ang mga pagkaon nga giisip nga mahugaw kaniadto lagmit makaluod alang sa ubang Hudiyong mga Kristohanon. Natural na lang nga nahasol ang tanlag nianang sensitibo nga mga igsoon sa pagkakita sa ilang Hudiyong mga igsoon diha kang Kristo nga mikaon sa maong mga pagkaon. Dugang pa, ang pipila ka Hentil nga mga Kristohanon, kansang relihiyosong mga kagikan wala gayoy gidili nga pagkaon, naglibog tingali kon nganong dunay maglalis bahin sa pagkaon. Siyempre, dili sayop alang kang bisan kinsa ang paglikay sa pipila ka pagkaon, basta dili lang niya iinsistir nga ang maong paglikay gikinahanglan aron maluwas. Bisan pa niana, ang magkalahi nga mga punto-debista dali rang makapukaw ug panagkabingkil diha sa kongregasyon. Ang mga Kristohanon sa Roma kinahanglang mag-amping nga ang maong mga kalainan dili magpugong kanila sa paghimaya sa Diyos “sa usa ka baba.”

7. Unsang lainlaing mga punto-debista ang naglungtad maylabot sa paggahin ug usa ka linaing adlaw kada semana?

⁷ Si Pablo mihatag ug ikaduhang pananglitan: “Ang usa ka tawo nagahukom sa usa ka adlaw ingong labaw kay sa lain; ang lain nga tawo nagahukom sa usa ka adlaw nga sama ra sa tanan.” (Roma 14:5a) Ilalom sa Moisesnong Balaod, gidili ang pagtrabaho sa Igpapahulay. Bisan ang pagpanaw gilimitehan gayod nianang adlawa. (Exodo  20:8-10; Mateo 24:20; Buhat 1:12) Apan, sa dihang giwagtang ang Balaod dili na kinahanglang sundon ang maong mga pagdili. Bisan pa niana, ang ubang Hudiyong mga Kristohanon mabalaka tingali nga mohimo ug bisan unsang matang sa trabaho o magbiyahe ug layo nianang adlawa nga kaniadto gilantaw nila nga sagrado. Bisan human mahimong mga Kristohanon, sila tingali naggahin gihapon sa ikapitong adlaw alang lamang sa espirituwal nga mga katuyoan, bisan tuod sa panglantaw sa Diyos ang Igpapahulay wala na ipatuman. Sayop ba sila sa paghimo niana? Dili, basta dili lang nila iinsistir nga ang pagsunod sa Igpapahulay gibaod sa Diyos. Busa, agig konsiderasyon sa tanlag sa iyang Kristohanong mga igsoon, si Pablo misulat: “Pasagding ang matag tawo bug-os nga kombinsido diha sa iyang kaugalingong hunahuna.”—Roma 14:5b.

8. Bisan tuod sila angayng magpakitag konsiderasyon sa tanlag sa uban, unsay dili angayng buhaton sa mga Kristohanon sa Roma?

⁸ Bisan pa niana, bisan tuod mainitong nagdasig sa iyang mga igsoon nga magmapailobon niadtong naglisod sa pagdesisyon labot sa mga butang nga nagdepende sa tanlag, gisaway gayod ni Pablo kadtong misulay sa pagpugos sa mga isigkamagtutuo sa pagpailalom sa Moisesnong Balaod ingong kinahanglanon aron maluwas. Pananglitan, sa mga 61 K.P., si Pablo misulat sa basahon sa mga Hebreohanon, usa ka puwersadong sulat ngadto sa Hudiyong mga Kristohanon nga nagpatin-aw pag-ayo nga ang pagpailalom sa Moisesnong Balaod dili hinungdanon tungod kay ang mga Kristohanon adunay labaw nga paglaom nga gipasukad sa halad lukat ni Jesus.—Galacia 5:1-12; Tito 1:10, 11; Hebreohanon 10:1-17.

9, 10. Unsay dili gayod buhaton sa mga Kristohanon? Ipatin-aw.

⁹ Sa atong nasabtan, nangatarongan si Pablo nga ang paghimog lainlaing mga pagpili dili magpameligro sa panaghiusa basta walay nalapas nga Kristohanong mga prinsipyo. Busa, si Pablo nangutana sa mga Kristohanon nga huyang ug tanlag: “Nganong imong gihukman ang imong igsoon?” Ug iyang gipangutana ang mga lig-on (tingali kadtong kansang tanlag nagtugot kanila sa pagkaon ug mga pagkaon nga gidili ilalom sa Balaod o sa paghimog sekular nga trabaho sa Igpapahulay): “Nganong imong gipakaubos usab ang imong igsoon?” (Roma 14:10) Sumala kang Pablo, ang mga Kristohanon nga huyang ug tanlag kinahanglang dili manaway sa ilang mga igsoon nga matinugoton ug punto-debista. Sa samang panahon, ang mga Kristohanon nga lig-on kinahanglang dili motamay niadtong kansang tanlag huyang gihapon sa pipila ka bahin. Ang tanan kinahanglang motahod sa hustong mga motibo sa uban ug dili “maghunahuna ug labaw bahin sa [ilang kaugalingon] kay sa angay nga hunahunaon.”—Roma 12:3, 18.

¹⁰ Gipatin-aw ni Pablo ang timbang nga punto-debista niining paagiha: “Dili ipakaubos sa usa nga nagakaon ang usa nga wala mokaon, ug dili pagahukman sa usa nga wala mokaon ang usa nga nagakaon, kay kana siya gidawat sa Diyos.” Dugang pa, siya miingon: “Si Kristo usab midawat kanato, alang sa himaya sa Diyos.” Tungod kay ang  lig-on ug huyang dalawaton sa Diyos ug kang Kristo, kinahanglang huptan nato ang susamang tinamdan ug ‘dawaton ang usag usa.’ (Roma 14:3; 15:7) Angay bang mosupak niana ang usa?

Ang Inigsoong Gugma Magpatunghag Panaghiusa Karon

11. Unsang talagsaong situwasyon ang naglungtad sa adlaw ni Pablo?

¹¹ Sa iyang sulat sa mga Romano, naghisgot si Pablo ug talagsaong situwasyon. Bag-o lang giwagtang ni Jehova ang usa ka pakigsaad ug naghimo siyag bag-ong pakigsaad. Ang uban naglisod sa pagpasibo. Ang situwasyon nga pareho gayod niana wala na maglungtad karon, apan ang susamang mga isyu mahimong motungha usahay.

12, 13. Unsa ang pipila ka situwasyon diin ang mga Kristohanon karon makapakitag konsiderasyon sa tanlag sa ilang mga igsoon?

¹² Pananglitan, ang usa ka Kristohanong babaye basin sakop kanhi sa relihiyon nga nagpasiugda sa simpleng pamesti ug panagway. Sa dihang dawaton niya ang kamatuoran, malisdan tingali siya sa pagpasibo sa ideya nga wala idili ang pagsul-ob ug makasaranganon, daghag-kolor nga sinina sa haom nga mga okasyon o ang makasaranganong paggamit ug mek-ap. Tungod kay walay prinsipyo sa Bibliya nga nalangkit, dili husto para kang bisan kinsa nga danihon ang maong Kristohanong babaye sa paglapas sa iyang tanlag. Sa samang higayon, siya nakaamgo nga dili niya angayng sawayon ang Kristohanong mga babaye kansang mga tanlag motugot kanila sa paggamit sa maong mga butang.

¹³ Tagda ang laing pananglitan. Ang usa ka Kristohanong lalaki gimatuto tingali sa palibot diin ang pag-inom ug alkoholikong ilimnon wala uyoni. Human mahibalo sa kamatuoran, iyang makat-onan ang panglantaw sa Bibliya nga ang bino maoy gasa gikan sa Diyos ug mahimong imnon sa kasarangang gidaghanon. (Salmo 104:15) Iyang dawaton ang maong panglantaw. Apan, tungod sa iyang kagikan, mas gusto niyang maglikay sa bug-os gikan sa alkoholikong mga ilimnon, apan dili niya sawayon kadtong moinom niana sa kasarangang gidaghanon. Busa iyang gipadapat ang giingon ni Pablo: “Atong tinguhaon ang mga butang nga mopatunghag pakigdait ug ang mga butang nga makapalig-on sa usag usa.”—Roma 14:19.

14. Sa unsang mga situwasyon nga ikapadapat sa mga Kristohanon ang tinuod nga kahulogan sa tambag ni Pablo ngadto sa mga Romano?

¹⁴ Motungha ang ubang mga situwasyon nga nagkinahanglan ug pagpadapat sa tinuod nga kahulogan sa tambag ni Pablo ngadto sa mga Romano. Ang Kristohanong kongregasyon gilangkoban sa daghang indibiduwal, ug sila lainlain ug mga gusto. Busa, lainlain tingali silag himoon nga pagpili—pananglitan, maylabot sa pamesti ug panghindik. Siyempre, ang Bibliya naglatid ug klarong mga prinsipyo nga angayng tumanon sa tanang sinserong mga Kristohanon. Walay usa kanato ang angayng magsul-ob ug besti o maghupot ug estilo sa buhok nga katingad-an o dili-makasaranganon o kanang nagpaila nga kita nakig-uban sa dili-maayong mga tawo sa kalibotan. (1 Juan 2:15-17) Angayng hinumdoman sa mga Kristohanon nga sa tanang panahon, bisan pag sila naglingawlingaw, sila maoy mga ministro nga naghawas sa Soberano sa Uniberso. (Isaias 43:10; Juan 17:16; 1 Timoteo 2:9, 10) Apan, diha sa daghang bahin adunay daghang maayong kapilian alang sa mga Kristohanon. a

Likayi nga Makapandol sa Uban

15. Kanus-a nga ang usa ka Kristohanon, alang sa kaayohan sa iyang mga igsoon, maglikay sa paggamit sa iyang katungod?

¹⁵ Adunay usa pa ka importanteng prinsipyo nga gipunting ni Pablo diha sa iyang tambag ngadto sa mga Kristohanon sa Roma. Usahay, ang usa ka Kristohanon nga adunay maayong-pagkabansay nga tanlag mohukom tingali nga dili mohimo sa pagpili nga bukas kaniya. Ngano? Tungod kay iyang naamgohan nga ang iyang pagsubay sa usa ka dalan basin makadaot sa uban. Nianang kahimtanga, unsay angay natong buhaton? Si Pablo miingon: “Maayo nga dili mokaon ug karne o moinom ug bino o mobuhat ug bisan unsang butang nga ikapandol sa imong igsoon.” (Roma 14:14, 20, 21) Busa “kita nga mga lig-on angayng mopas-an sa mga kaluyahon niadtong mga dili lig-on, ug dili kay magpahimuot sa atong kaugalingon. Magpahimuot ang matag usa kanato sa iyang silingan sa kon unsay maayo aron sa paglig-on kaniya.” (Roma 15:1, 2)  Kon ang tanlag sa usa ka isigka-Kristohanon mahasol sa atong buhaton, ang inigsoong gugma magtukmod kanato nga magmahunahunaon ug limitehan ang atong katungod sa pagpili. Ang usa ka pananglitan niini mao tingali ang pag-inom ug alkoholikong mga ilimnon. Ang usa ka Kristohanon gitugotan sa pag-inom ug bino sa kasarangang gidaghanon. Apan kon ang pagbuhat niana makapandol sa iyang kauban, dili niya iinsistir ang iyang katungod.

16. Sa unsang paagi kita makapakitag konsiderasyon alang niadtong anaa sa atong teritoryo?

¹⁶ Kining prinsipyoha mapadapat usab ngadto sa atong mga pakiglabot sa gawas sa Kristohanong kongregasyon. Pananglitan, kita tingali nagpuyo sa usa ka dapit diin ang pangunang relihiyon nagtudlo sa mga sumusunod niini sa paglantaw sa usa ka adlaw sa semana ingong adlaw sa pagpahulay. Tungod niana, aron dili mapandol ang atong mga silingan ug magpatunghag mga babag sa atong buluhatong pagsangyaw, atong likayan kutob sa mahimo ang pagbuhat ug bisan unsa nianang adlawa nga makahasol sa tanlag sa atong mga silingan. Sa laing situwasyon, ang usa ka adunahang Kristohanon mobalhin tingali aron sa pag-alagad diin mas dako ang panginahanglan taliwala sa mga tawong kabos. Tingali mopili siya sa pagpakitag konsiderasyon sa iyang bag-ong mga silingan pinaagi sa pagpamesti nga simple kaayo o tingali sa pagkinabuhi nga mas makasaranganon bisag makaabot siya ug mas komportableng pagkinabuhi.

17. Nganong makataronganon ang pagkonsiderar sa uban diha sa mga pagpili nga atong himoon?

¹⁷ Makataronganon ba ang pagdahom nga kadtong “lig-on” mohimo sa maong mga pagpasibo? Aw, hunahunaa kining maong ilustrasyon: Samtang nagdrayb diha sa haywey, nakita nato sa unahan ang pipila ka mga bata nga halos nagpatunga na sa karsada. Magpadayon ba kita sa pagdrayb segun sa kinakusgang dagan nga gitugot sa balaod tungod lang kay atong legal nga katungod ang paghimo niana? Dili, kita momenor aron dili mabanggaan o maligsan ang mga bata. Usahay, ang susamang pagkaandam nga momenor, o mopahiuyon, gikinahanglan sa atong relasyon sa atong mga isigkamagtutuo o sa uban. Tingali ginabuhat nato ang usa ka butang diin kita aduna gayoy katungod sa pagbuhat niana. Walay prinsipyo sa Bibliya nga nalapas. Bisan pa niana, kon makahasol kita sa tanlag sa uban o makadaot niadtong huyang ug tanlag, ang Kristohanong gugma motukmod kanato nga magmabinantayon. (Roma 14:13, 15) Ang paghupot ug panaghiusa ug pagpalambo sa mga intereses sa Gingharian mas importante kay sa paggamit sa atong personal nga mga katungod.

18, 19. (a) Sa pagpakitag konsiderasyon alang sa uban, sa unsang paagi gisunod nato ang panig-ingnan ni Jesus? (b) Sa unsang mga butanga nga kitang tanan molihok nga bug-os nga magkahiusa, ug unsay hisgotan sa sunod nga artikulo?

 ¹⁸ Kon molihok kita niining paagiha, atong gisunod ang kinamaayohang panig-ingnan. Si Pablo miingon: “Bisan gani si Kristo wala magpahimuot sa iyang kaugalingon; kondili ingon sa nahisulat: ‘Nahiagoman ko ang mga pakaulaw niadtong mga nagapakaulaw kanimo.’” Si Jesus andam nga misakripisyo sa iyang kinabuhi alang kanato. Segurado nga andam kitang mosakripisyo sa pipila sa atong mga katungod kon kana makapaarang “niadtong mga dili lig-on” sa paghimaya sa Diyos nga nahiusa kanato. Sa pagkatinuod, ang pagpakita ug pagkamasinabtanon ug pagkamaluloton sa mga Kristohanon nga huyang ug tanlag—o kinabubut-ong paglimite sa atong mga kapilian ug dili moinsistir sa atong mga katungod—magpasundayag sa “samang tinamdan sa pangisip nga nabatonan ni Kristo Jesus.”—Roma 15:1-5.

¹⁹ Bisan tuod ang atong mga panglantaw sa mga butang diin wala malangkit ang Kasulatanhong mga prinsipyo medyo magkalahi, sa mga butang maylabot sa pagsimba, kita molihok nga bug-os nga magkahiusa. (1 Corinto 1:10) Pananglitan, ang maong panaghiusa makita diha sa atong reaksiyon niadtong mosupak sa matuod nga pagsimba. Ang Pulong sa Diyos nagtawag nianang maong mga magsusupak nga mga estranyo ug nagpasidaan kanato nga magbantay sa “tingog sa mga estranyo.” (Juan 10:5) Sa unsang paagi maila nato ang maong mga estranyo? Unsay angay natong reaksiyon kanila? Kining mga pangutanaha hisgotan sa sunod nga artikulo.

[Footnote]

Unsaon Nimo Pagtubag?

• Nganong ang pagbaton ug lainlaing mga punto-debista bahin sa personal nga mga butang dili magpameligro sa panaghiusa?

• Nganong kita ingong mga Kristohanon angayng magpakita ug mainitong konsiderasyon sa usag usa?

• Unsa ang pipila ka paagi diin atong ikapadapat karon ang tambag ni Pablo bahin sa panaghiusa, ug unsay magtukmod kanato sa pagbuhat niana?

[Mga Pangutana sa Pagtuon]

[Hulagway sa panid 9]

Ang tambag ni Pablo bahin sa panaghiusa hinungdanon alang sa kongregasyon

[Hulagway sa panid 10]

Ang mga Kristohanon nagkahiusa bisan pa sa ilang magkalahi nga mga kagikan

[Hulagway sa panid 12]

Unsa may angayng buhaton karon niining maong drayber?