Kon Unsaon Pagbuntog ang Kahigawad

NAHIGAWAD ka ba? Sa atong panahon nga komon kaayo ang kawalay-kasegurohan ug panagbangi, daghang tawo ang nahigawad. Ang uban nahigawad tungod kay wala silay trabaho. Ang uban nag-antos sa mga epekto sa usa ka aksidente. Ang uban usab nakigbisog sa mga problema sa pamilya, grabe nga sakit, o kamingaw.

Unsay makatabang kanimo kon ikaw nahigawad? Daghang tawo sa tibuok kalibotan ang nahupayan pinaagi sa pagbasa sa Pulong sa Diyos, ang Bibliya. Napalig-on sila sa mga pulong ni apostol Pablo, kinsa miingon: “Dalayegon ang Diyos ug Amahan sa atong Ginoong Jesu-Kristo, ang Amahan sa malumong mga kaluoy ug ang Diyos sa tanang paghupay, kinsa nagahupay kanamo sa tanan namong kasakitan.” (2 Corinto 1:3, 4) Nganong dili nimo sulayan nga basahon kini ug ang uban pang mga teksto diha sa imong Bibliya? Ang pagbuhat niana “maghupay sa imong kasingkasing ug magpalig-on kanimo.”—2 Tesalonica 2:17.

Ang pagpakig-uban niadtong nag-alagad kang Jehova makatabang usab sa pagbuntog sa kahigawad. Ang Proverbio 12:25 nag-ingon: “Ang pagkamabalak-on diha sa kasingkasing sa usa ka tawo maoy magpatikuko niini, apan ang maayong pulong mao ang makapalipay niini.” Sa dihang motambong kita sa Kristohanong mga tigom, madunggan nato kanang “maayong pulong,” nga “matam-is sa kalag ug makapaayo sa kabukogan.” (Proverbio 16:24) Nganong dili nimo sulayan ang pagtambong sa mga tigom sa Kingdom Hall sa mga Saksi ni Jehova aron masinati nimo kon unsa ka makapadasig ang maong mga tigom?

Mabatonan usab nimo ang tabang pinaagi sa pag-ampo. Kon nabug-atan ka sa mga problema sa kinabuhi, ipahungaw ang tinuod nimo nga gibati ngadto sa “Tigpatalinghog sa pag-ampo.” (Salmo 65:2) Ang atong Maglalalang, si Jehova nga Diyos, mas nakasabot kanato kay sa atong kaugalingon. Makasalig kita sa iyang tabang. Ang iyang Pulong nagsaad kanato: “Itugyan ang imong palas-anon kang Jehova, ug siya magasapnay kanimo. Dili gayod niya itugot nga matarog ang matarong.” (Salmo 55:22) Oo, “kadtong naglaom kang Jehova maulian sa kusog.”—Isaias 40:31.

Gitagana ni Jehova nga Diyos ang tanan natong gikinahanglan nga tabang aron malamposon natong mabuntog ang kahigawad. Pahimuslan ba nimo kana?