Mga Pangutana Gikan sa mga Magbabasa

Nganong gisabot man sa mga Saksi ni Jehova ang 144,000 nga gihisgotan diha sa basahon sa Pinadayag ingong literal nga numero ug dili simboliko?

Si apostol Juan nagsulat: “Nadungog ko ang gidaghanon niadtong gitimbrehan, usa ka gatos ug kap-atag-upat ka libo.” (Pinadayag 7:4) Sa Bibliya, ang mga pulong ‘kadtong gitimbrehan’ nagtumong sa grupo sa mga indibiduwal nga gipili gikan sa taliwala sa katawhan aron magmando uban ni Kristo sa langit ibabaw sa umaabot nga Paraisong yuta. (2 Corinto 1:21, 22; Pinadayag 5:9, 10; 20:6) Ang ilang gidaghanon nga 144,000 gisabot nga literal tungod sa daghang katarongan. Ang usa makaplagan diha sa konteksto mismo sa Pinadayag 7:4.

Human sultihi si apostol Juan diha sa panan-awon bahin ning maong grupo sa 144,000 ka indibiduwal, gipakitaan siya ug laing grupo. Gihubit ni Juan kining ikaduhang grupo ingong “usa ka dakong panon, nga walay tawong makaihap, gikan sa tanang kanasoran ug mga tribo ug katawhan ug mga pinulongan.” Kining dakong panon nagtumong niadtong makalabang-buhi sa umaabot nga “dakong kasakitan,” nga maglaglag sa presenteng daotang kalibotan.—Pinadayag 7:9, 14.

Apan, matikdi ang kalainan nga gihatag ni Juan tali sa mga bersikulo 4 ug 9 sa Pinadayag kapitulo 7. Siya nag-ingon nga ang unang grupo, ‘kadtong gitimbrehan,’ dunay tinong gidaghanon. Apan, ang ikaduhang grupo, ang “dakong panon,” walay tinong gidaghanon. Tungod niana, makataronganon lamang nga sabton ang numerong 144,000 ingong literal. Kon ang numerong 144,000 simboliko pa ug nagtumong sa usa ka grupo nga sa pagkatinuod dili maihap, wala gayoy puwersa ang gihatag nga kalainan tali sa duha ka bersikulo. Busa, ang konteksto nagpaila gayod nga ang numerong 144,000 kinahanglang sabton nga literal.

Daghang eskolar sa Bibliya, kaniadto ug karon, ang nakakab-ot sa mao gihapong konklusyon—nga literal ang maong numero. Pananglitan, sa pagkomento sa Pinadayag 7:4, 9, ang Britanikong leksikograpo nga si Dr. Ethelbert W. Bullinger nag-ingon mga 100 ka tuig kanhi: “Kini usa ka yanong pagpahayag sa kamatuoran: usa ka tinong numero gitandi sa dili-tinong numero niining kapituloha mismo.” (The Apocalypse or “The Day of the Lord,” panid 282) Di pa dugay, si Robert L. Thomas, Jr., propesor sa Bag-ong Testamento sa The Master’s Seminary sa Tinipong Bansa, misulat: “Walay lig-ong basehanan kon sabton kini sa simbolikong paagi.” Siya midugang: “Kini maoy tinong numero [diha sa 7:4] nga lahi sa dili-tinong numero diha sa 7:9. Kon sabton kini sa simbolikong paagi, walay numero diha sa maong basahon ang sabton nga literal.”—Revelation: An Exegetical Commentary, Tomo 1, panid 474.

Nangatarongan ang uban nga sanglit ang Pinadayag naundan ug simboliko kaayong pinulongan, ang tanang numero nga makaplagan sa maong basahon, lakip na ang numerong 144,000, kinahanglang simboliko. (Pinadayag 1:1, 4; 2:10) Apan, ang maong konklusyon dayag nga dili husto. Tinuod nga ang Pinadayag naundan ug daghang simboliko nga mga numero, apan  duna usab kiniy literal nga mga numero. Pananglitan, si Juan naghisgot sa “napulog-duha ka ngalan sa napulog-duha ka apostoles sa Kordero.” (Pinadayag 21:14) Dayag nga ang numerong 12 nga gihisgotan niining bersikuloha maoy literal, dili simboliko. Dugang pa, si apostol Juan nagsulat bahin sa “usa ka libo ka tuig” nga pagmando ni Kristo. Ang maong numero kinahanglang sabton usab nga literal, sumala sa gipakita sa mainampingong pagtuon sa Bibliya. a (Pinadayag 20:3, 5-7) Busa, ang usa ka numero diha sa Pinadayag mahimong sabton nga literal o simboliko depende sa konteksto niini.

Ang ideya nga ang numerong 144,000 maoy literal ug nagtumong ngadto sa limitadong gidaghanon sa mga indibiduwal, usa ka gamayng grupo kon itandi sa “dakong panon,” nahiuyon usab sa ubang mga teksto sa Bibliya. Pananglitan, sa ulahing bahin sa panan-awon nga nadawat ni apostol Juan, ang 144,000 gihubit ingong “gipalit gikan sa katawhan ingong mga unang bunga.” (Pinadayag 14:1, 4) Ang ekspresyon nga “mga unang bunga” nagtumong ngadto sa usa ka gamayng hawas nga pinili. Gawas pa, sa dinhi pa si Jesus sa yuta, siya naghisgot bahin niadtong magmando uban kaniya sa iyang langitnong Gingharian ug nagtawag kanila nga “gamayng panon.” (Lucas 12:32; 22:29) Sa pagkatinuod, kadtong gikan sa taliwala sa katawhan nga magmando sa langit maoy diyutay lang kon itandi sa katawhan nga magapanunod sa umaabot nga Paraisong yuta.

Busa, ang konteksto sa Pinadayag 7:4 ug ang nalangkit nga mga pahayag nga makaplagan sa ubang bahin sa Bibliya nagpamatuod nga ang numerong 144,000 kinahanglang sabton nga literal. Kini nagtumong niadtong magmando sa langit uban kang Kristo ibabaw sa usa ka paraisong yuta, nga pagapun-on sa dako ug wala matino nga gidaghanon sa malipayong mga tawo nga magasimba kang Jehova nga Diyos.—Salmo 37:29.

[Footnote]

[Blurb sa panid 31]

Ang gidaghanon sa langitnong mga manununod maoy 144,000 lamang

[Hulagway sa panid 31]

Dili maihap ang “dakong panon”

[Picture Credit Line sa panid 31]

Stars: Courtesy of Anglo-Australian Observatory, photograph by David Malin