Mga Magmamantala sa Gingharian Nagtaho

“Nahikalimtang mga Biktima” Nahinumdoman

SAYO sa 2001, si Haykaz, usa ka 15-anyos nga Saksi ni Jehova, mibisita sa “Nahikalimtang mga Biktima,” usa ka eksibit didto sa Bern, Switzerland, nga may kalabotan sa paglutos sa Nazi sa mga Saksi ni Jehova. Pagkahuman sa iyang pagbisita, si Haykaz miingon: “Nakadungog ako bahin sa mabangis nga pagtratar ug pag-antos nga naagoman sa mga Saksi ni Jehova ilalom sa pagmando sa Nazi, apan kini ang unang higayon nga akong nakita ang orihinal nga mga dokumento ug mga hulagway sa maong panahon. Ang mga displey, taho sa mga nakasaksi, ug ang mga komento sa mga historyano diha sa eksibit natisok pag-ayo sa akong hunahuna ug kasingkasing.”

Pipila ka panahon sa ulahi, sa dihang si Haykaz giasayn sa pagsulat ug usa ka taho alang sa iyang mga klasmet sa kuwarto anyo sa hayskul, iyang gipili ang ulohang “Mga Saksi ni Jehova—Ang Nahikalimtang mga Biktima sa Nazismo.” Giuyonan sa iyang magtutudlo ang maong ulohan apan iyang giingnan si Haykaz nga kinahanglan niyang ilakip ang sekular nga literatura sa iyang mga reperensiya. Malipayong miuyon si Haykaz. “Gisulat nako ang usa ka sumaryo sa pipila ka libro bahin sa mga Saksi ni Jehova panahon sa Nazi nga akong girepaso. Gihubit ko usab ang kaugalingon nakong opinyon bahin sa eksibit sa ‘Nahikalimtang mga Biktima.’ Ang 43-panid nga report naglakip ug mga ilustrasyon ug mga letrato.”

Sa Nobyembre 2002, gipresentar ni Haykaz ang iyang report ngadto sa iyang mga eskolmet, magtutudlo, pamilya, ug mga higala. Human niana, dunay sesyon nga pangutanag tubag, nga naghatag kaniyag kahigayonan sa pagpatin-aw sa iyang pinasukad-sa-Bibliya nga mga pagtuo. Sa dihang may batan-ong babaye diha sa mamiminaw ang nangutana kon nganong gipili niya ang maong ulohan, gipatin-aw ni Haykaz nga daghang libro sa kasaysayan ang wala maghisgot sa mga Saksi ni Jehova ug buot niyang mahibalo ang mga tawo kon unsa ka maisogon ang mga Saksi sa pagdepensa sa ilang Kristohanong pagtuo. Unsay resulta sa iyang presentasyon?

“Nahingangha ang akong mga eskolmet,” matod pa ni Haykaz. “Wala sila masayod nga ang mga Saksi ni Jehova ingong grupo grabeng gilutos. Gawas pa, daghan ang wala mahibalo nga ang mga Saksi nga gibilanggo sa mga kampo konsentrasyon sa Nazi nagtaod ug linaing ilhanan—usa ka purpura nga trianggulo.”

Pagkahuman sa iyang presentasyon, nakahigayon pa si Haykaz sa pagpakigsulti sa iyang mga klasmet ug sa paghisgot sa pinasukad-sa-Bibliya nga baroganan sa mga Saksi bahin sa pag-abonog dugo, alkoholikong ilimnon, ug bahin sa moralidad. “Walay usa sa akong mga eskolmet ang nagyagayaga nako,” matod pa ni Haykaz. Dugang pa, ang iyang report gitipigan karon diha sa librarya sa eskuylahan. Makatabang kana sa pagseguro nga ang maisogong baroganan sa mga Saksi ni Jehova dili mahikalimtan.