“Isul-ob ang Kompletong Armadura Gikan sa Diyos”

“Isul-ob ang kompletong armadura gikan sa Diyos aron kamo makabarog nga malig-on batok sa mga malipatlipatong kaugdahan sa Yawa.”—EFESO 6:11.

1, 2. Sa imong kaugalingong mga pulong, hubita ang espirituwal nga armadura nga kinahanglang isul-ob sa mga Kristohanon.

 ANG Roma anaa sa kinapungkayan sa gahom niini panahon sa unang siglo K.P. Tungod sa puwersa sa Romanong kasundalohan, nakontrolar sa siyudad ang dakong bahin sa nailhang kalibotan kaniadto. Ang usa ka historyano naghubit niining maong kasundalohan ingong “labing malamposon nga militaryong organisasyon sa kasaysayan.” Ang propesyonal nga kasundalohan sa Roma gilangkoban sa disiplinadong mga sundalo nga nakaagi sa estriktong pagbansay, apan ang ilang kalamposan ingong epektibong manggugubat nagdepende usab sa ilang armadura. Gigamit ni apostol Pablo ang armadura sa Romanong sundalo sa pag-ilustrar sa espirituwal nga kasangkapan nga gikinahanglan sa mga Kristohanon aron magmalamposon sa pagpakiggubat sa Yawa.

² Atong makita ang kahubitan niining espirituwal nga armadura diha sa Efeso 6:14-17. Si Pablo misulat: “Barog nga malig-on, nga binaksan ang inyong mga hawak sa kamatuoran, ug sinul-oban sa panagang sa dughan sa pagkamatarong, ug sinul-oban ang inyong mga tiil sa kasangkapan sa maayong balita sa pakigdait. Labaw sa tanang butang, dad-a ang dakong taming sa pagtuo, nga pinaagi niini kamo makapalong sa tanang nagdilaab nga mga udyong sa daotan. Dugang pa, dawata ang helmet sa kaluwasan, ug ang espada sa espiritu, nga mao, ang pulong sa Diyos.” Kon lantawon sa literal nga paagi, ang armadura nga gihubit ni Pablo nanalipod gayod sa usa ka Romanong sundalo. Unya, aduna usab siyay espada, ang iyang pangunang hinagiban sa pagpakigkombate.

3. Nganong angay natong sugton ang mga instruksiyon ni Jesu-Kristo ug sundon ang iyang panig-ingnan?

³ Gawas pa sa kasangkapan ug pagbansay, ang kalamposan sa Romanong kasundalohan nagdepende sa pagkamasinugtanon sa mga sundalo sa ilang komandante. Sa susama, ang mga Kristohanon kinahanglang mosugot kang Jesu-Kristo, kinsa gihubit sa Bibliya ingong “komandante ngadto sa nasodnong mga pundok.” (Isaias 55:4) Siya usab ang “ulo sa kongregasyon.” (Efeso 5:23) Si Jesus naghatag kanato ug mga instruksiyon alang sa atong espirituwal nga pagpakiggubat ug naghatag ug hingpit nga panig-ingnan kon unsaon pagsul-ob ang espirituwal nga armadura. (1 Pedro 2:21) Tungod kay ang samag-Kristo nga personalidad susama gayod sa atong espirituwal nga armadura, ang Kasulatan nagtambag kanato nga ‘sangkapan’ ang atong kaugalingon sa kiling sa kaisipan ni Kristo. (1 Pedro 4:1) Busa, samtang atong susihon  ang matag bahin sa atong espirituwal nga armadura, gamiton nato ang panig-ingnan ni Jesus sa pagpasundayag sa kahinungdanon ug kaepektibo niini.

Pagpanalipod sa Hawak, Dughan, ug mga Tiil

4. Unsay gamit sa bakos diha sa armadura sa sundalo, ug unsay giilustrar niini?

⁴ Ang hawak binaksan sa kamatuoran. Sa kapanahonan sa Bibliya, ang mga sundalo nagsul-ob ug lapad nga panit nga bakos nga gikan sa 5 ngadto sa 15 sentimetros ang gilapdon. Ang ubang mga maghuhubad nagsugyot nga ang bersikulo angayng hubaron nga, “uban sa kamatuoran ingong hugot nga bakos sa imong hawak.” Ang bakos sa sundalo makatabang sa pagpanalipod sa iyang hawak, ug kini adunay parte nga kabitayan sa espada. Sa dihang baksan sa sundalo ang iyang hawak, siya nangandam alang sa gubat. Gigamit ni Pablo ang bakos sa sundalo sa pag-ilustrar sa gilapdon nga ang kamatuoran sa Kasulatan angayng mag-impluwensiya sa atong kinabuhi. Kini kinahanglang hugot nga pagkabakos kanato, ingnon ta, aron kita makakinabuhi nga kaharmonya sa kamatuoran ug makadepensa niana sa bisan unsang higayon. (Salmo 43:3; 1 Pedro 3:15) Tungod niana, kinahanglang makugihon kitang magtuon sa Bibliya ug mamalandong sa unod niini. Ang balaod sa Diyos ‘anaa sa kailadman nga mga bahin’ ni Jesus. (Salmo 40:8) Busa, sa dihang gipangutana sa mga magsusupak, siya makatubag pinaagi sa pagkutlo sa Kasulatan nga iyang namemorya.—Mateo 19:3-6; 22:23-32.

5. Ipatin-aw kon sa unsang paagi ang tambag sa Kasulatan makatabang kanato panahon sa pagsulay o tentasyon.

⁵ Sa dihang tugotan nato ang kamatuoran sa Bibliya nga mogiya kanato, kini makapanalipod kanato batok sa sayop nga pangatarongan ug makapaarang kanato sa paghimog maalamong mga desisyon. Panahon sa mga tentasyon o pagsulay, ang mga giya sa Bibliya magpalig-on sa atong determinasyon nga mobuhat kon unsay matarong. Sama ra nga atong makita ang atong Dakong Instruktor, si Jehova, ug madungog ang mga pulong sa atong luyo nga nag-ingon: “Mao kini ang dalan. Lakaw kamo niini.”—Isaias 30:20, 21.

6. Nganong ang atong mahulagwayong kasingkasing nagkinahanglan ug panalipod, ug sa unsang paagi ang pagkamatarong epektibong makabantay niana?

⁶ Panagang sa dughan sa pagkamatarong. Ang panagang sa dughan nanalipod sa hinungdanong organo, ang kasingkasing. Ang atong mahulagwayong kasingkasing—ang atong pangsulod nga pagkatawo—nagkinahanglan ug linaing panalipod tungod kay kini nakiling ngadto sa kon unsay daotan. (Genesis 8:21) Busa kinahanglang makakat-on kita ug mahigugma sa matarong nga mga sukdanan ni Jehova. (Salmo 119:97, 105) Ang atong gugma sa pagkamatarong motultol kanato sa pagsalikway sa kalibotanong panghunahuna nga wala magtagad o nagpahuyang sa klarong mga giya ni Jehova. Dugang pa, sa dihang kita nahigugma sa kon unsay husto ug nagdumot sa kon unsay sayop, atong gilikayan ang pagsubay sa dalan nga makadaot sa atong kinabuhi. (Salmo 119:99-101; Amos 5:15) Si Jesus usa ka maayong panig-ingnan niining bahina, tungod kay bahin kaniya, ang Kasulatan nag-ingon: “Gihigugma mo ang pagkamatarong, ug gidumtan mo ang pagkamalapason.”—Hebreohanon 1:9. a

7. Nganong ang usa ka Romanong sundalo nagkinahanglan ug maayong sapin sa tiil, ug unsay giilustrar niini?

⁷ Mga tiil sinapinan sa kasangkapan sa maayong balita sa pakigdait. Ang Romanong kasundalohan nagkinahanglan ug durable nga mga sapatos o lig-on nga mga sandalyas, tungod kay panahon sa operasyong  militar sila sagad magmartsa ug 30 kilometros kada adlaw samtang nagsul-ob o nagpas-an ug 27 kilos nga armadura ug kasangkapan. Haom nga gigamit ni Pablo ang sapin sa tiil aron sa paghawas sa atong pagkaandam nga mosangyaw sa mensahe sa Gingharian ngadto sa tanan nga mamati niana. Hinungdanon kini tungod kay unsaon man sa mga tawo pagkaila kang Jehova kon kita dili andam ug kinabubut-on nga mosangyaw?—Roma 10:13-15.

8. Sa unsang paagi masundog nato ang panig-ingnan ni Jesus ingong magwawali sa maayong balita?

⁸ Unsa ang labing hinungdanong kalihokan sa kinabuhi ni Jesus? Iyang giingnan ang Romanong Gobernador nga si Poncio Pilato: ‘Ako mianhi sa kalibotan aron magpamatuod sa kamatuoran.’ Si Jesus nagsangyaw bisan asa nga adunay mamati, ug nalipay kaayo siya sa iyang ministeryo nga giuna niya kini inay ang iyang pisikal nga mga panginahanglan. (Juan 4:5-34; 18:37) Kon kita, sama kang Jesus, mahinamon nga magmantala sa maayong balita, kita makakita ug daghang kahigayonan sa pagpaambit niana ngadto sa uban. Dugang pa, ang atong pagkaokupado kaayo sa atong ministeryo motabang kanato nga magpabiling lig-on sa espirituwal.—Buhat 18:5.

Ang Taming, Helmet, ug ang Espada

9. Unsang proteksiyon ang gitagana sa dakong taming sa Romanong sundalo?

⁹ Ang dakong taming sa pagtuo. Ang Gregong pulong nga gihubad ug “dakong taming” nagtumong sa taming nga ang gidak-on igong makapanalipod sa dakong bahin sa lawas. Kini manalipod sa usa batok sa “nagdilaab nga mga udyong” nga gihisgotan diha sa Efeso 6:16. Sa kapanahonan sa Bibliya, ang mga sundalo naggamit ug mga udyong nga gama sa mga tangbo nga dunay gagmayng puthaw nga mga sudlanan nga kasudlan ug nagsiga nga petrolyo. Usa ka eskolar naghubit niining maong mga udyong ingong “usa sa labing peligrosong mga hinagiban sa karaang pagpakiggubat.” Kon ang usa ka sundalo walay dako nga taming nga makapanalipod sa iyang kaugalingon batok sa maong mga udyong, siya grabeng masamdan o mamatay pa gani.

10, 11. (a) Unsang “nagdilaab nga mga udyong” ni Satanas ang makapahuyang sa atong pagtuo? (b) Sa unsang paagi ang panig-ingnan ni Jesus nagpakita sa kahinungdanon sa pagtuo panahon sa pagsulay?

 ¹⁰ Unsang “nagdilaab nga mga udyong” ang gigamit ni Satanas sa pagpahuyang sa atong pagtuo? Mahimong ipatungha niya ang paglutos o pagsupak diha sa pamilya, sa trabahoan, o sa eskuylahan. Ang tinguha nga makabaton ug mas daghang materyal nga mga butang ug ang panghaylo sa imoralidad nakadaot usab sa espirituwalidad sa pipila ka Kristohanon. Aron mapanalipdan ang atong kaugalingon batok sa maong mga kapeligrohan, ‘labaw sa tanang butang, dad-on nato ang dakong taming sa pagtuo.’ Ang pagtuo moresulta gumikan sa pagkakat-on bahin kang Jehova, regular nga pagpakigsulti kaniya pinaagi sa pag-ampo, ug pagkasabot kon sa unsang paagi siya nanalipod ug nagpanalangin kanato.—Josue 23:14; Lucas 17:5; Roma 10:17.

¹¹ Sa dinhi pa si Jesus sa yuta, iyang gipasundayag ang kahinungdanon sa pagbaton ug lig-ong pagtuo sa malisod nga mga panahon. Siya bug-os nga nagsalig sa mga desisyon sa iyang Amahan ug nalipay sa pagtuman sa kabubut-on sa Diyos. (Mateo 26:42, 53, 54; Juan 6:38) Bisan sa dihang nakaagom sa hilabihang kasakit didto sa tanaman sa Getsemane, si Jesus miingon sa iyang Amahan: “Dili sumala sa akong pagbuot, kondili sumala sa imong pagbuot.” (Mateo 26:39) Si Jesus wala gayod malimot sa kahinungdanon sa paghupot ug integridad ug paglipay sa iyang Amahan. (Proverbio 27:11) Kon kita adunay susamang pagsalig kang Jehova, dili nato tugotan ang pagsaway o pagsupak nga makapahuyang sa atong pagtuo. Hinunoa, ang atong pagtuo mapalig-on kon kita mosalig sa Diyos, magpakita ug gugma kaniya, ug motuman sa iyang mga sugo. (Salmo 19:7-11; 1 Juan 5:3) Walay materyal nga mga balos o lumalabay nga unodnong kalipay ang ikatandi sa mga panalangin nga giandam ni Jehova alang niadtong nahigugma kaniya.—Proverbio 10:22.

12. Unsang hinungdanong bahin nato ang gipanalipdan sa atong mahulagwayong helmet, ug nganong hinungdanon ang maong panalipod?

 ¹² Ang helmet sa kaluwasan. Ang helmet manalipod sa ulo ug utok sa sundalo—ang sentro sa pagproseso sa kahibalo. Ang atong Kristohanong paglaom gitandi ngadto sa usa ka helmet tungod kay kini manalipod sa atong hunahuna. (1 Tesalonica 5:8) Bisan tuod gibag-o na nato ang atong hunahuna pinaagi sa tukmang kahibalo sa Pulong sa Diyos, kita gihapon maoy huyang, dili-hingpit nga mga tawo. Ang atong hunahuna dali rang mahugawan. Ang mga tumong niining sistemaha sa mga butang makapalinga kanato o makapuli pa gani sa atong hinatag-Diyos nga paglaom. (Roma 7:18; 12:2) Ang Yawa naningkamot apan napakyas sa pagpatipas kang Jesus pinaagi sa pagtanyag kaniya sa ‘tanang gingharian sa kalibotan ug sa himaya niini.’ (Mateo 4:8) Apan hugot nga gibalibaran ni Jesus ang maong tanyag, ug si Pablo miingon bahin kaniya: “Tungod sa kalipay nga gibutang sa iyang atubangan [si Jesus] nag-antos sa estaka sa pagsakit, nga wala igsapayan ang kaulaw, ug milingkod sa tuong kamot sa trono sa Diyos.”—Hebreohanon 12:2.

13. Sa unsang paagi mahuptan nato ang atong pagsalig diha sa paglaom sa umaabot?

¹³ Ang matang sa pagsalig nga nabatonan ni Jesus dili awtomatiko. Kon atong pun-on ang atong hunahuna sa mga damgo ug mga tumong niining sistemaha sa mga butang inay isentro ang hunahuna diha sa paglaom sa unahan, ang atong pagtuo sa mga saad sa Diyos mag-anam ka huyang. Sa ngadtongadto, mawala pa gani nato sa bug-os ang atong paglaom. Sa laing bahin, kon kita regular nga mamalandong sa mga saad sa Diyos, kita magpadayon sa pagmaya diha sa paglaom nga gibutang sa atong atubangan.—Roma 12:12.

14, 15. (a) Unsa ang atong mahulagwayong espada, ug sa unsang paagi kana gamiton? (b) Iilustrar kon sa unsang paagi ang espada sa espiritu makatabang kanato sa pagpakigbisog sa tentasyon.

¹⁴ Ang espada sa espiritu. Ang pulong, o mensahe, sa Diyos nga nasulat diha sa Bibliya nahisama sa gamhanan, duhay-sulab nga espada nga makawagtang sa relihiyosong kabakakan ug makatabang sa matarong-ug-kasingkasing nga mga tawo sa pagkaplag ug espirituwal nga kagawasan. (Juan 8:32; Hebreohanon 4:12) Kining espirituwal nga espada makadepensa usab kanato sa dihang kita atakehon sa mga tentasyon o sa paningkamot sa mga apostata sa pagpahuyang sa atong pagtuo. (2 Corinto 10:4, 5) Pagkamapasalamaton nato nga ‘ang tibuok Kasulatan inspirado sa Diyos ug bug-os nga nagsangkap kanato alang sa tanang maayong buhat’!—2 Timoteo 3:16, 17.

¹⁵ Sa dihang gitental siya ni Satanas sa kamingawan, si Jesus epektibong naggamit sa espada sa espiritu aron sa pagsanta sa bakak nga pangatarongan ug malipotong mga tentasyon. Sa matag tentasyon ni Satanas, siya mitubag: “Kini nahisulat.” (Mateo 4:1-11) Si David, usa sa mga Saksi ni Jehova sa Espanya, nakakaplag usab nga natabangan siya sa Kasulatan sa pagdaog sa tentasyon. Sa dihang siya 19 anyos, usa ka matahom nga batan-ong babaye nga nagtrabaho sa cleaning company nga iyang gitrabahoan misugyot nga “maglipaylipay sila.” Si David midumili sa pagbirigbirig sa maong babaye ug mihangyo sa iyang superbisor nga patrabahoon siya sa laing dapit aron dili na motungha pag-usab ang maong situwasyon. “Akong nahinumdoman ang panig-ingnan ni Jose,” matod pa ni David. “Iyang gidumilian ang imoralidad ug mibiya dayon. Mao kanay akong gibuhat.”—Genesis 39:10-12.

16. Ipatin-aw kon nganong kita kinahanglang magbansay aron ‘magamit ang pulong sa kamatuoran sa hustong paagi.’

¹⁶ Gigamit usab ni Jesus ang espada sa espiritu sa pagtabang sa uban nga makaeskapar sa pagkontrolar ni Satanas. “Ang gitudlo ko dili akoa,” miingon si Jesus, “kondili iya sa nagpadala kanako.” (Juan  7:16) Sa pagsundog sa hanas nga pagpanudlo ni Jesus, kita nagkinahanglan ug pagbansay. Mahitungod sa Romanong kasundalohan, ang Hudiyong historyano nga si Josephus misulat: “Ang matag sundalo gibansay kada adlaw, ug kana uban ang dakong kakugi, nga daw sila nakiggubat na nga maoy hinungdan kon nganong malahutay gayod nila ang kakapoy sa pagpakiggubat.” Sa atong espirituwal nga pagpakiggubat, kinahanglang gamiton nato ang Bibliya. Dugang pa, kinahanglang ‘buhaton nato kutob sa atong maarangan nga itanyag ang atong kaugalingon sa Diyos ingong inuyonan, mga mamumuo nga walay angayng ikaulaw, nga nagagamit sa pulong sa kamatuoran sa hustong paagi.’ (2 Timoteo 2:15) Ug pagkadakong katagbawan ang atong masinati sa dihang gamiton nato ang Kasulatan sa pagtubag sa sinserong pangutana sa interesado!

Pag-ampo sa Tanang Higayon

17, 18. (a) Unsay papel sa pag-ampo diha sa pagsukol kang Satanas? (b) Paghatag ug pananglitan sa pag-ilustrar sa bili sa pag-ampo.

¹⁷ Human mahisgoti ang kompletong espirituwal nga armadura, si Pablo midugang ug laing hinungdanong tambag. Sa pagsukol kang Satanas, kinahanglang pahimuslan sa mga Kristohanon ang “tanang matang sa pag-ampo ug pangamuyo.” Unsa ka subsob? “Magpadayon kamo sa pag-ampo sa tanang higayon pinaagi sa espiritu,” misulat si Pablo. (Efeso 6:18) Sa dihang mag-atubang ug mga tentasyon, pagsulay, o pagkaluya sa buot, ang pag-ampo makapalig-on gayod kanato. (Mateo 26:41) Si Jesus “naghimog mga pangamuyo ug mga pangaliya usab ngadto sa Usa nga arang makaluwas kaniya gikan sa kamatayon, uban ang makusog nga mga pagtuaw ug mga luha, ug gidungog siya nga may pag-uyon tungod sa iyang diyosnong kahadlok.”—Hebreohanon 5:7.

¹⁸ Si Milagros, kinsa nag-atiman sa iyang bana nga gilaygay sa sakit sulod sa kapin sa 15 ka tuig, miingon: “Sa dihang maluya ang akong buot, ako modangop kang Jehova pinaagi sa pag-ampo. Walay labaw nga makatabang kanako gawas kaniya. Tinuod, dunay mga yugto diin gibati nako nga dili na ako makaantos. Apan sa daghang higayon human moampo kang Jehova, akong gibati nga nabag-o ang akong kusog ug miarang-arang ang akong gibati.”

19, 20. Unsay atong gikinahanglan aron magmadaogon sa atong pagpakigbugno kang Satanas?

¹⁹ Ang Yawa nahibalo nga mubo na lang ang iyang panahon, ug misamot ang iyang mga paningkamot sa pagbuntog kanato. (Pinadayag 12:12, 17) Kinahanglang pakigbisogan nato kining gamhanang kaaway ug ‘makigbugno sa maayong pakigbugno sa pagtuo.’ (1 Timoteo 6:12) Kini nagkinahanglan ug kusog nga labaw sa kasarangan. (2 Corinto 4:7) Gikinahanglan usab nato ang tabang sa balaang espiritu sa Diyos ug busa angayng pangayoon kana pinaagi sa pag-ampo. Si Jesus miingon: “Kon kamo, bisan tuod daotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!”—Lucas 11:13.

²⁰ Klaro nga kinahanglan natong isul-ob ang kompletong armadura nga gitagana ni Jehova. Ang pagsul-ob niining espirituwal nga armadura nagkinahanglan nga kita mag-ugmad ug diyosnong mga hiyas, sama sa pagtuo ug pagkamatarong. Kini nagkinahanglan nga atong higugmaon ang kamatuoran nga daw gibaksan niana, nga kita andam nga mosangyaw sa maayong balita sa tanang higayon, ug atong huptan kanunay sa hunahuna ang paglaom sa unahan. Kinahanglang makakat-on kita sa paggamit sa espada sa espiritu sa hanas nga paagi. Pinaagi sa pagsul-ob sa kompletong armadura gikan sa Diyos, kita mahimong magmadaogon sa atong pagpakigdumog sa daotang mga puwersa nga espirituhanon ug sa pagkatinuod makahimaya sa balaang ngalan ni Jehova.—Roma 8:37-39.

[Footnote]

Unsaon Nimo Pagtubag?

• Kinsay naghatag ug labing maayong panig-ingnan sa pagsul-ob ug espirituwal nga armadura, ug nganong angay natong tagdon pag-ayo ang iyang panig-ingnan?

• Sa unsang paagi mapanalipdan nato ang atong hunahuna ug ang atong mahulagwayong kasingkasing?

• Sa unsang paagi kita mahimong hanas sa paggamit sa espada sa espiritu?

• Nganong kinahanglan kitang magpadayon sa pag-ampo sa tanang higayon?

[Mga Pangutana sa Pagtuon]

[Mga hulagway sa panid 17]

Ang makugihong pagtuon sa Bibliya makapalihok kanato sa pagmantala sa maayong balita sa tanang higayon

[Mga hulagway sa panid 18]

Ang atong seguradong paglaom motabang kanato sa pag-atubang sa mga pagsulay

[Mga hulagway sa panid 19]

Gigamit ba nimo ang “espada sa espiritu” diha sa ministeryo?