“Mag-ampo Kamo sa Ingon Niini nga Paagi”

NAHIBALO ka ba kon unsay giingon diha sa Pag-ampo sa Ginoo? Kini maoy modelong pag-ampo nga gitudlo ni Jesu-Kristo. Panahon sa iyang gibantog nga Wali sa Bukid, si Jesus miingon: “Busa, mag-ampo kamo sa ingon niini nga paagi.” (Mateo 6:9) Sanglit si Jesus maoy nagtudlo niini, kini kasagarang gitawag ug Pag-ampo sa Ginoo, nga nailhan usab ingong Amahan Namo nga pag-ampo.—Latin, Paternoster.

Milyonmilyong tawo sa tibuok kalibotan ang nagsag-ulo sa Pag-ampo sa Ginoo ug subsob nga naglitok niana, tingali kada adlaw. Sa di pa dugayng katuigan, daghan ang naglitok niining pag-ampoa diha sa mga eskuylahan ug sa publikong mga okasyon. Nganong gitamod man pag-ayo ang Pag-ampo sa Ginoo?

Ang ikatulong-siglo nga teologo nga si Cyprian misulat: “Aduna pa bay mas espirituhanon nga pag-ampo kay nianang gihatag kanato ni Kristo . . . ? Aduna pa bay mas matinud-anon nga pag-ampo ngadto sa Amahan kay nianang gihatag kanato sa Anak kinsa mao ang Kamatuoran?”—Juan 14:6.

Ang katekismo sa Romano Katolikong Iglesya nag-isip sa Amahan Namo nga “pangunang Kristohanong pag-ampo.” Ang The World Book Encyclopedia nag-ila sa kahinungdanon niining pag-ampoa diha sa tanang relihiyon sa Kakristiyanohan, nga nagtawag niini nga usa sa  “paninugdang mga pagpahayag sa Kristohanong pagtuo.”

Apan, angayng ilhon nga daghang tawo nga naglitok sa Pag-ampo sa Ginoo ang wala gayod makasabot niana. “Kon duna kay bisan unsang matang sa Kristohanong kagikan, paspas tingali nimong malitok ang Pag-ampo sa Ginoo nga way hunonghunong,” matod pa sa mantalaan sa Canada nga Ottawa Citizen, “apan malisdan ka tingali sa paglitok niana nga hinayhinay ug sa pagsabot niana.”

Hinungdanon ba gayod ang pagsabot sa atong mga pag-ampo ngadto sa Diyos? Nganong gipahayag man ni Jesus kanato ang Pag-ampo sa Ginoo? Unsay kahulogan niini alang kanimo? Ato karong tagdon kining mga pangutanaha.