“Magpadayon sa Pagbaton ug Gahom Diha sa Ginoo”
“Magpadayon sa Pagbaton ug Gahom Diha sa Ginoo”
“Magpadayon sa pagbaton ug gahom diha sa Ginoo ug diha sa pagkagamhanan sa iyang kusog.”—EFESO 6:10.
1. (a) Unsang talagsaong away ang nahitabo mga 3,000 ka tuig kanhi? (b) Nganong nagmadaogon si David?
MGA 3,000 ka tuig kanhi, duha ka tawo ang nag-engkuwentrohay sa tunga sa duha ka magkaatbang nga kasundalohan diha sa natad panggubatan. Ang mas bata usa ka magbalantay sa karnero nga ginganlag David. Sa iyang atubangan nagtindog si Goliat, usa ka tawo nga talagsaon ug kusog ug gitas-on. Ang iyang kotamaya mga 57 kilos, ug ang iyang bangkaw ug espada dagko kaayo. Si David wala gayoy gisul-ob nga armadura, ug ang iya lamang hinagiban mao ang lambuyog. Nainsulto ang Filistehanong higante nga si Goliat nga ang Israelinhon nga makig-away kaniya maoy usa lamang ka bata. (1 Samuel 17:42-44) Para sa mga tumatan-aw sa duha ka kiliran, klaro na kaayo kon kinsay makadaog. Apan ang mga gamhanan dili kanunayng makadaog sa gubat. (Ecclesiastes 9:11) Si David nagmadaogon tungod kay siya nakig-away pinaagi sa kusog ni Jehova. “Iya ni Jehova ang gubat,” siya miingon. Ang asoy sa Bibliya nag-ingon nga “si David, pinaagi sa usa ka lambuyog ug usa ka bato, nahimong mas kusganon kay sa Filistehanon.”—1 Samuel 17:47, 50.
2. Sa unsang matang sa pagpakigbugno nakigbahin ang mga Kristohanon?
2 Ang mga Kristohanon dili makigbahin sa pisikal nga pagpakiggubat. Bisan tuod sila makigdaiton sa tanang tawo, sila adunay espirituwal nga pagpakiggubat batok sa gamhanan kaayong mga kaaway. (Roma 12:18) Sa kataposang kapitulo sa iyang sulat ngadto sa mga taga-Efeso, gihubit ni Pablo ang usa ka pagpakigbugno diin nalangkit ang matag Kristohanon. Siya misulat: “Kita adunay pakigdumog, dili batok sa dugo ug unod, kondili batok sa mga kagamhanan, batok sa mga awtoridad, batok sa mga magmamando sa kalibotan niini nga kangitngit, batok sa daotang mga puwersa nga espirituhanon sa langitnong mga dapit.”—Efeso 6:12.
3. Sumala sa Efeso 6:10, unsay atong gikinahanglan aron segurado kitang molampos?
3 Kanang “daotang mga puwersa nga espirituhanon” mao si Satanas ug ang mga demonyo, kinsa nagtinguha sa pagdaot sa atong relasyon uban kang Jehova nga Diyos. Tungod kay sila mas kusgan kay kanato, kita anaa sa usa ka situwasyon nga susama nianang kang David, ug kita dili molampos gawas kon kita mosalig sa Diyos alang sa kusog. Sa pagkatinuod, giawhag kita ni Pablo nga “magpadayon sa pagbaton ug gahom diha sa Ginoo ug diha sa pagkagamhanan sa iyang kusog.” (Efeso 6:10) Human ihatag ang maong tambag, ang apostol naghubit sa espirituwal nga mga tagana ug sa Kristohanong mga hiyas nga makapaarang kanato nga magmadaogon.—Efeso 6:11-17.
4. Unsang duha ka pangunang mga punto ang atong hisgotan niining artikuloha?
4 Susihon nato karon kon unsay giingon sa Kasulatan bahin sa puwersa ug mga taktika sa atong kaaway. Unya atong hisgotan kon unsang depensa ang angay natong gamiton aron mapanalipdan ang atong kaugalingon. Kon sundon nato ang mga instruksiyon ni Jehova, makasalig kita nga ang atong mga kaaway dili magmadaogon batok kanato.
Pakigdumog Batok sa Daotang mga Puwersa nga Espirituhanon
5. Sa unsang paagi ang paggamit sa pulong ‘pagpakigdumog’ diha sa Efeso 6:12 makapaarang kanato sa pag-ila sa estratehiya ni Satanas?
5 Miingon si Pablo nga kita “adunay pakigdumog . . . batok sa daotang mga puwersa nga espirituhanon sa langitnong mga dapit.” Siyempre, ang pangunang daotang espiritu mao si Satanas nga Yawa, “ang magmamando sa mga demonyo.” (Mateo 12:24-26) Ang Bibliya naghulagway sa atong pagpakigbugno ingong ‘pagpakigdumog,’ o manomano nga pagpakigsangka. Sa mga bangga sa pagpakigdumog sa karaang Gresya, ang matag entrante maningkamot nga mawala ang panimbang sa iyang kontra aron matumba siya. Sa susama, buot sa Yawa nga mawala ang atong espirituwal nga panimbang. Sa unsang paagi ipahinabo niya kini?
6. Ipakita gikan sa Kasulatan kon sa unsang paagi ang Yawa makagamit ug lainlaing mga taktika aron mohuyang ang atong pagtuo.
6 Ang Yawa mahimong molihok ingong bitin, nagangulob nga leyon, o bisan manulonda sa kahayag. (2 Corinto 11:3, 14; 1 Pedro 5:8) Magamit niya ang mga tawo aron sa paglutos o pagpaluya kanato. (Pinadayag 2:10) Tungod kay si Satanas adunay awtoridad ibabaw sa kalibotan, bug-os niyang magamit ang kalibotanong mga tinguha ug pangdani aron malit-agan kita. (2 Timoteo 2:26; 1 Juan 2:16; 5:19) Magamit niya ang kalibotanon o apostatang panghunahuna aron kita mapahisalaag, maingon nga iyang gilimbongan si Eva.—1 Timoteo 2:14.
7. Unsay mga limitasyon sa mga demonyo, ug unsang mga bentaha ang atong matagamtam?
7 Bisan tuod ang mga hinagiban ug ang gahom ni Satanas ug sa iyang mga demonyo makapahingangha tingali, aduna silay mga limitasyon. Kining daotang mga espiritu dili makapugos kanato sa pagbuhat ug daotang mga butang nga dili makapahimuot sa atong langitnong Amahan. Kita may kagawasan sa pagpili, ug makontrolar nato ang atong mga hunahuna ug mga lihok. Dugang pa, wala kita mag-inusara sa pagpakigbugno. Ang tinuod sa panahon ni Eliseo tinuod usab sa atong adlaw: “Mas daghan sila nga uban kanato kay kanila nga uban kanila.” (2 Hari 6:16) Ang Bibliya nagpasalig kanato nga kon kita magpasakop sa Diyos ug mosukol sa Yawa, siya mokalagiw gikan kanato.—Santiago 4:7.
Nahibalo sa mga Laraw ni Satanas
8, 9. Unsang mga pagsulay ang gipahinabo ni Satanas kang Job aron pahuyangon ang iyang integridad, ug unsang espirituwal nga mga kapeligrohan ang atong giatubang karon?
8 Kita dili kay walay alamag sa mga laraw ni Satanas tungod kay ang Kasulatan nagpadayag sa iyang paninugdang mga taktika. (2 Corinto 2:11) Batok sa matarong nga tawong si Job, ang Yawa migamit ug grabeng kalisod sa panalapi, kamatayon sa mga minahal, pagsupak sa pamilya, pisikal nga pag-antos, ug walay-pasikaranan nga pagpanaway gikan sa mini nga mga higala. Si Job naguol pag-ayo ug mibati nga gitalikdan na siya sa Diyos. (Job 10:1, 2) Bisan tuod si Satanas dili tingali direktang nagpahinabo niining mga problemaha karon, ang maong mga kalisdanan nag-apektar gayod sa daghang Kristohanon, ug ang Yawa makagamit niana aron siya makabentaha.
9 Ang espirituwal nga mga kapeligrohan midagsang niining panahon sa kataposan. Kita nagkinabuhi sa kalibotan diin ang espirituwal nga mga tumong nasapawan sa materyal nga mga pangagpas. Ang media kanunayng naghulagway sa gidili nga sekso ingong tuboran sa kalipay inay kay sa kagul-anan. Ug ang kadaghanan nahimong “mga mahigugmaon sa kalipayan inay nga mga mahigugmaon sa Diyos.” (2 Timoteo 3:1-5) Kini nga panghunahuna makapameligro sa atong espirituwal nga panimbang gawas kon kita “kusganong makigbugno alang sa pagtuo.”—Judas 3.
10-12. (a) Unsa ang usa ka pasidaan nga gihatag ni Jesus sa iyang ilustrasyon sa magpupugas? (b) Iilustrar kon sa unsang paagi ang espirituwal nga mga prinsipyo mahimong matuok.
10 Usa sa labing malamposong mga taktika ni Satanas mao kanang pagpalinga kanato niining kalibotana ug sa materyalistikong mga pangagpas niini. Sa iyang ilustrasyon bahin sa magpupugas, si Jesus nagpasidaan nga sa pipila ka kahimtang “ang kabalaka niining sistema sa mga butang ug ang malimbongong gahom sa mga bahandi motuok sa pulong [sa Gingharian].” (Mateo 13:18, 22) Ang Gregong pulong nga gihubad dinhi ug “motuok” nagpasabot ug “gituok pag-ayo.”
11 Sa tropikanhong kalasangan, ang usa makakita tingali ug dakit. Hinayhinayng kulapotan niini ang gitaptan nga kahoy samtang kini magtubo. Ang mga gamot niini mag-anam ka lig-on. Sa ulahi, suphon sa daghan kaayong gamot sa dakit ang sustansiya diha sa yuta sa punoan sa kahoy, samtang kulapotan sa mga dahon niini ang kahoy nga gitaptan niini mao nga kini dili na masidlakan sa adlaw. Sa kataposan, ang kahoy mamatay.
12 Sa samang paagi, ang mga kabalaka niining sistemaha ug ang pagpangitag bahandi ug haruhay nga estilo sa pagkinabuhi inanayng makahurot sa atong panahon ug makapaluya kanato. Kay ang atong pagtagad naliso na ngadto sa mga butang sa kalibotan, basin mapasagdan na nato ang personal nga pagtuon sa Bibliya ug mabatasan na ang pagpalta sa Kristohanong mga tigom, sa ingon nahimulag na gikan sa espirituwal nga sustansiya. Ang materyalistikong mga tumong mipuli na sa espirituwal nga mga pangagpas, ug kita sa kataposan dali rang tukbon ni Satanas.
Kita Kinahanglang Mobarog nga Malig-on
13, 14. Unsay angay natong himoon kon kita atakehon ni Satanas?
13 Giawhag ni Pablo ang mga isigkamagtutuo nga “mobarog nga malig-on batok sa mga malipatlipatong kaugdahan sa Yawa.” (Efeso 6:11) Siyempre, dili nato mabuntog ang Yawa ug ang iyang mga demonyo. Gihatag sa Diyos ang maong buluhaton ngadto kang Jesu-Kristo. (Pinadayag 20:1, 2) Apan, hangtod nga wagtangon si Satanas, kita kinahanglang “mobarog nga malig-on” aron dili kita madaog sa iyang mga pag-atake.
14 Si apostol Pedro nagpasiugda usab sa panginahanglan nga mobarog nga malig-on batok kang Satanas. “Hupti ninyo ang maayong panghunahuna, magmabinantayon,” misulat si Pedro. “Ang inyong kaaway, ang Yawa, nagasuroysuroy sama sa usa ka leyon nga nagangulob, nga nagapangitag matukob. Apan barog kamo batok kaniya, malig-on sa pagtuo, kay nahibalo nga ang samang mga butang maylabot sa mga pag-antos nagakahitabo diha sa tibuok kapunongan sa inyong mga igsoon dinhi sa kalibotan.” (1 Pedro 5:8, 9) Sa pagkatinuod, ang tabang sa atong espirituwal nga mga igsoong lalaki ug babaye hinungdanon sa atong pagbarog nga malig-on sa dihang ang Yawa moatake samag nagangulob nga leyon.
15, 16. Paghatag ug Kasulatanhong panig-ingnan sa pagpakita kon sa unsang paagi ang tabang sa mga isigkamagtutuo makatabang kanato sa pagbarog nga malig-on.
15 Kon mongulob ang usa ka leyon didto sa kalibonan sa Aprika, ang reaksiyon sa antelope nga anaa sa duol mao ang pagdagan ug kusog kaayo hangtod nga mahilayo sila sa kapeligrohan. Apan, ang mga elepante naghatag ug panig-ingnan sa pagtinabangay. Ang librong Elephants—Gentle Giants of Africa and Asia nagpatin-aw: “Ang usa ka paagi sa depensa nga kasagarang gamiton sa naandang panon sa mga elepante mao ang pagporma nilag sirkulo, nga ang mga dagko na maoy mag-atubang sa kapeligrohan ug ang mga nati napanalipdan sa sulod sa sirkulo.” Kay nag-atubang nianang maong pasundayag sa kalig-on ug pagtinabangay, ang mga leyon talagsa rang moatake bisan sa nati nga mga elepante.
16 Sa dihang hulgaon ni Satanas ug sa iyang mga demonyo, kita usab kinahanglang magpabiling nahiusa, nga makigtambayayongay sa atong mga igsoon nga lig-on sa pagtuo. Giila ni Pablo nga ang pipila ka mga isigka-Kristohanon maoy “makapalig-on nga tabang” kaniya sa dihang nabilanggo siya sa Roma. (Colosas 4:10, 11) Ang Gregong pulong nga gihubad ug “makapalig-ong tabang” kas-a lang makita diha sa Kristohanon Gregong Kasulatan. Sumala sa Expository Dictionary of New Testament Words ni Vine, “ang berbong dagway sa pulong nagkahulogan ug mga tambal nga makahupay sa kakatol.” Sama sa makapahupay nga haplas, ang tabang sa hamtong nga mga magsisimba ni Jehova makahupay sa kasakit nga gipahinabo sa emosyonal o pisikal nga pag-antos.
17. Unsay makatabang kanato nga magmatinumanon sa Diyos?
17 Ang pagdasig gikan sa mga isigka-Kristohanon karon makapalig-on sa atong determinasyon nga matinumanong mag-alagad sa Diyos. Ang Kristohanong mga ansiyano andam gayong motagana ug espirituwal nga tabang. (Santiago 5:13-15) Makaabag sa pagkamatinumanon ang regular nga pagtuon sa Bibliya ug pagtambong sa Kristohanong mga tigom, asembliya, ug mga kombensiyon. Ang atong suod nga relasyon uban sa Diyos motabang kanato sa pagpabiling matinumanon kaniya. Sa pagkatinuod, kita man nagakaon, nagainom, o nagabuhat ug bisan unsa pa man, buot natong buhaton ang tanang butang alang sa kahimayaan sa Diyos. (1 Corinto 10:31) Siyempre, ang mainampoong pagsalig kang Jehova hinungdanon aron makapadayon diha sa dalan nga makapahimuot kaniya.—Salmo 37:5.
18. Nganong dili kita angayng mohunong bisan pag ang makapaguol nga mga sirkumstansiya makapaluya kanato?
18 Usahay ang mga pag-atake ni Satanas moabot sa dihang kita dili lig-on sa espirituwal. Ang leyon mokupog sa naluya nga mananap. Ang mga problema sa pamilya, kalisod sa panalapi, o balatian makapahuyang sa atong espirituwalidad. Apan dili kita mohunong sa pagbuhat kon unsay makapahimuot sa Diyos, kay si Pablo miingon: “Sa dihang ako maluya, ako gamhanan hinuon.” (2 Corinto 12:10; Galacia 6:9; 2 Tesalonica 3:13) Unsay buot niyang ipasabot? Iyang gipasabot nga ang gahom sa Diyos makapalig-on kanato, kon kita modangop kang Jehova. Ang kadaogan ni David batok kang Goliat nagpakita nga ang Diyos makapalig-on ug nagapalig-on sa iyang katawhan. Ang presenteng-adlaw nga mga Saksi ni Jehova makapamatuod nga sa panahon sa hilabihang kalisod, ilang gibati ang nagapalig-ong kamot sa Diyos.—Daniel 10:19.
19. Paghatag ug panig-ingnan sa pagpakita nga si Jehova makapalig-on sa iyang mga alagad.
19 Mahitungod sa tabang nga gihatag sa Diyos kanila, usa ka magtiayon misulat: “Latas sa katuigan, kami nag-alagad kang Jehova ingong bana ug asawa ug nakatagamtam ug daghang panalangin ug nakahimamat ug daghang buotan nga mga tawo. Gibansay ug gipalig-on usab kami ni Jehova sa paglahutay sa mga kalisdanan. Sama kang Job, dili namo kanunayng masabtan kon nganong ang mga butang nahitabo nga sama niana, apan nahibalo kami nga si Jehova kanunayng andam nga motabang kanamo.”
20. Unsang Kasulatanhong pamatuod ang nagpakita nga si Jehova kanunayng motabang sa iyang katawhan?
20 Ang kamot ni Jehova dili mubo nga dili siya makatabang ug makapalig-on sa iyang matinumanong katawhan. (Isaias 59:1) Ang salmistang si David miawit: “Si Jehova nagasapnay sa tanan nga napukan, ug nagabangon sa tanan nga naumod.” (Salmo 145:14) Sa pagkatinuod, ang atong langitnong Amahan “sa adlaw-adlaw nagapas-an sa atong luwan” ug nagatagana sa ato gayong gikinahanglan.—Salmo 68:19.
Gikinahanglan Nato ang “Kompletong Armadura Gikan sa Diyos”
21. Sa unsang paagi gipasiugda ni Pablo ang panginahanglan sa espirituwal nga armadura?
21 Ato nang nahisgotan ang pipila sa mga taktika ni Satanas ug nakita ang panginahanglan nga mobarog nga malig-on bisan pa sa iyang mga pag-atake. Karon kinahanglang hisgotan nato ang laing hinungdanong tagana aron magmalamposon sa atong pagdepensa sa atong pagtuo. Duha ka higayon diha sa iyang sulat ngadto sa mga taga-Efeso, si apostol Pablo naghisgot ug hinungdanong butang diha sa pagbarog nga malig-on batok sa mga malipatlipatong kaugdahan ni Satanas ug sa paglampos sa atong pagpakigdumog batok sa daotang mga puwersa nga espirituhanon. Si Pablo misulat: “Isul-ob ang kompletong armadura gikan sa Diyos aron kamo makabarog nga malig-on batok sa mga malipatlipatong kaugdahan sa Yawa . . . Dad-a ang kompletong armadura sa Diyos, aron kamo makaarang sa pagsukol sa daotang adlaw ug, human ninyo mabuhat sa bug-os ang tanang butang, sa pagbarog nga malig-on.”—Efeso 6:11, 13.
22, 23. (a) Unsay nalakip sa atong espirituwal nga armadura? (b) Unsay atong hisgotan sa sunod nga artikulo?
22 Oo, kinahanglan natong isul-ob “ang kompletong armadura gikan sa Diyos.” Sa dihang gisulat ni Pablo ang iyang sulat ngadto sa mga taga-Efeso, siya giguwardiyahan sa usa ka Romanong sundalo, nga tingali magsul-ob usahay ug kompletong armadura. Bisan pa niana, pinaagi sa pag-inspirar sa Diyos nga ang apostol napalihok sa paghisgot sa espirituwal nga armadura nga gikinahanglan pag-ayo sa matag alagad ni Jehova.
23 Kining hinatag-sa-Diyos nga armadura naglakip sa mga hiyas nga kinahanglang mabatonan sa usa ka Kristohanon maingon man sa espirituwal nga mga kahikayan nga gihimo ni Jehova. Sa sunod nga artikulo, atong susihon ang matag bahin sa espirituwal nga armadura. Makapaarang kini kanato sa pagtino kon sa unsang gilapdon kita nasangkapan alang sa atong espirituwal nga pagpakiggubat. Sa samang higayon, atong makita kon sa unsang paagi ang maayong panig-ingnan ni Jesu-Kristo motabang kanato nga molampos sa pagsukol kang Satanas nga Yawa.
Unsaon Nimo Pagtubag?
• Unsang pakigbugno ang giapilan sa tanang Kristohanon?
• Hubita ang pipila sa mga taktika ni Satanas.
• Sa unsang paagi ang tabang sa mga isigkamagtutuo makapalig-on kanato?
• Kang kinsang kusog kita mosalig, ug ngano?
[Mga Pangutana sa Pagtuon]
[Mga hulagway sa panid 11]
Ang mga Kristohanon ‘adunay pakigdumog batok sa daotang mga puwersa nga espirituhanon’
[Hulagway sa panid 12]
Ang mga kabalaka niining sistemaha makatuok sa pulong sa Gingharian
[Hulagway sa panid 13]
Ang mga isigka-Kristohanon mahimong “makapalig-ong tabang”
[Hulagway sa panid 14]
Moampo ka ba sa Diyos alang sa kusog?