Kinsay Nagahimaya sa Diyos Karon?

“Takos ikaw, Jehova, nga among Diyos, nga modawat sa himaya ug sa dungog ug sa gahom.”—PINADAYAG 4:11.

1, 2. (a) Unsang mga pananglitan ang nag-ilustrar sa natad nga gitawag ug biomimetics? (b) Unsang pangutana ang motungha, ug unsay tubag?

 USA ka adlaw niana sa mga tuig sa 1940, gisuroy sa Swekong inhenyero nga si George de Mestral ang iyang iro. Pagpauli nila sa balay, iyang namatikdan nga ang iyang sinina maingon man ang balhibo sa iro napuno sa mga bunga sa madyong. Kay naikag, iyang gisusi ang mga bunga ilalom sa mikroskopyo ug nainteres siya sa gagmayng mga sima nga mokaw-it sa bisan unsa nga makaw-itan. Sa ngadtongadto, iyang naimbento ang usa ka artipisyal nga katumbas niini—ang Velcro. Dili lang kay si de Mestral ra ang nangopya gikan sa kinaiyahan. Sa Tinipong Bansa, ang managsoong Wright nagdisenyo ug ayroplano human maestudyohi ang dagkong mga langgam nga nanaglupad. Ang Pranses nga inhenyero nga si Alexandre-Gustave Eiffel nagdisenyo sa Eiffel Tower sa Paris, ginamit ang paninugdang mga prinsipyo nga nakapaarang sa bukog sa paa sa tawo sa pagsangga sa lawas.

² Kining maong mga pananglitan nag-ilustrar sa gitawag ug biomimetics, ang natad sa siyensiya nga nagkopya sa mga disenyo nga makita diha sa kinaiyahan. a Apan, makataronganong mangutana: Unsa ka subsob nga ang mga imbentor naghatag ug pasidungog ngadto sa Usa nga nagdisenyo sa gagmayng mga bunga sa madyong, sa dagkong mga langgam, sa bukog sa paa sa tawo, ug sa tanang ubang maanindot nga mga linalang nga maoy gibasehan sa daghang imbensiyon sa tawo? Ang makapasubong kamatuoran mao nga sa kalibotan karon, ang Diyos panagsa rang gihatagan sa pasidungog o himaya nga takos kaniya.

3, 4. Unsay kahulogan sa Hebreohanong pulong nga gihubad ug “himaya,” ug sa unsa kini angayng magtumong kon gamiton maylabot kang Jehova?

³ Ang uban tingali matingala, ‘Nganong kinahanglan mang himayaon ang Diyos? Dili ba mahimayaon na man ang Diyos?’ Tinuod, si Jehova mao ang labing mahimayaong Persona sa uniberso, apan wala kana magpasabot nga ang tanang tawo nag-isip kaniyang mahimayaon. Sa Bibliya, ang Hebreohanong pulong nga gihubad ug “himaya” adunay pasukaranang diwa sa “pagkadako.” Kini nagtumong sa bisan unsa nga makapahimo sa usa ka tawo nga dako o importante sa uban. Kon gamiton may kalabotan sa Diyos, kini nagtumong sa bisan unsa nga makapahimo sa Diyos nga dalayegon sa tawo.

⁴ Pipila lamang karon ang nakamatikod kon unsay nakapahimo sa Diyos nga dalayegon. (Salmo 10:4; 14:1) Gani, ang inilang mga tawo sa  katilingban, kon nagtuo man sila sa Diyos, subsob nga nag-impluwensiya sa mga tawo sa dili pagtahod sa mahimayaong Maglalalang sa uniberso. Sa unsang paagi gibuhat nila kana?

“Sila Walay Ikapangatarongan”

5. Sa unsang paagi gipatin-aw sa daghang siyentipiko ang mga kahibulongan sa kalalangan?

⁵ Daghang siyentipiko ang moinsistir nga walay Diyos. Nan, sa unsang paagi nila gipatin-aw ang mga kahibulongan sa kalalangan, lakip na ang tawo? Matod nila ang maong mga kahibulongan mitungha pinaagi sa ebolusyon, o sulagma lamang. Pananglitan, ang ebolusyonista nga si Stephen Jay Gould misulat: “Kita ania dinhi tungod kay ang usa ka lahi nga grupo sa mga isda adunay talagsaong katukoran sa silik nga puwedeng mahimong mga bitiis alang sa mga linalang sa yuta . . . Tingali nangandoy kita ug ‘mas hataas’ nga tubag—apan walay makita.” Sa susama, si Richard E. Leakey ug Roger Lewin misulat: “Tingali ang tawhanong espisye mao lamay dakong sayop sa biolohiya.” Bisan ang pipila ka siyentipiko nga nagdayeg sa katahom ug disenyo sa kinaiyahan wala magpasidungog sa Diyos.

6. Unsay nakapugong sa daghang tawo sa paghatag sa Diyos sa pasidungog nga takos kaniya ingong Maglalalang?

⁶ Sa dihang ang makinaadmanong mga tawo mangangkon nga tinuod ang ebolusyon, ilang gipasabot nga ang mga walay alamag lamang ang dili motuo niana. Unsay reaksiyon sa kadaghanang tawo nianang maong pangangkon? Pipila ka tuig kanhi, ang usa ka tawo nga batid sa ebolusyon nag-interbiyo sa mga tawo nga midawat sa maong teoriya. Siya miingon: “Akong nadiskobrehan nga kadaghanang nagtuo sa ebolusyon nagtuo niana tungod kay sila giingnan nga ang tanang intelihenteng mga tawo nagtuo niana.” Oo, sa dihang ang mga edukado mopahayag sa ilang ateyistikong panglantaw, ang uban mapugngan sa paghatag sa Diyos sa pasidungog nga takos kaniya ingong Maglalalang.—Proverbio 14:15, 18.

7. Sumala sa Roma 1:20, unsa may klarong maila pinaagi sa makitang kalalangan, ug ngano?

⁷ Nahimo ba sa mga siyentipiko ang ilang mga konklusyon nga ang tanang butang mitungha pinaagi sa ebolusyon tungod kay aduna kiniy pamatuod? Wala gayod! Kita gilibotan sa pamatuod nga adunay Maglalalang. Bahin kaniya, si apostol Pablo misulat: “Ang iyang dili-makita nga mga hiyas, nga mao ang iyang walay kataposang gahom ug pagka-Diyos, tin-awng makita sukad sa paglalang sa kalibotan [katawhan] padayon, tungod kay kini sila maila pinaagi sa mga butang nga gihimo, mao nga sila [mga dili-magtutuo] walay ikapangatarongan.” (Roma 1:20) Klaro natong makita ang pamatuod nga adunay Maglalalang diha sa iyang mga buhat. Busa si Pablo nag-ingon nga sukad sa paglungtad sa tawo, posible nga “maila” sa mga tawo ang pamatuod nga naglungtad ang Diyos pinaagi sa makitang kalalangan. Asa kining maong pamatuod?

8. (a) Sa unsang paagi ang pisikal nga kalangitan nagpamatuod sa gahom ug kaalam sa Diyos? (b) Unsay nagpaila nga adunay Unang Nagpahinabo sa uniberso?

⁸ Makita nato ang pamatuod nga adunay Diyos diha sa daghag-bituon nga kalangitan. “Ang kalangitan nagapahayag sa himaya sa Diyos,” miingon ang Salmo 19:1. “Ang kalangitan”—ang adlaw, bulan, ug mga bituon—nagpamatuod sa gahom ug kaalam sa Diyos. Ang pagkadaghan kaayo sa mga bituon makapahingangha kanato. Ug kining tanang langitnong mga linalang nagalihok latas sa kawanangan, dili nga walay direksiyon, kondili sumala sa eksaktong pisikal nga mga balaod. b (Isaias 40:26) Makataronganon ba ang pag-ingon nga ang maong kahapsay mitungha nga sulagma lamang?  Makahuloganon nga daghang siyentipiko ang nag-ingon nga ang uniberso adunay kalit nga sinugdanan. Nagpatin-aw sa kahulogan niini, usa ka propesor misulat: “Ang usa ka uniberso nga naglungtad sa walay kataposan mas dalawaton sa ateyistiko o agnostiko [nga panglantaw]. Sa samang paagi, ang usa ka uniberso nga adunay sinugdanan morag nagkinahanglan ug usa nga nagpahinabo; kay motungha kaha ang maong epekto kon walay nagpahinabo?”

9. Sa unsang paagi ang kaalam ni Jehova makita diha sa mga mananap?

⁹ Makita usab nato sa yuta ang pamatuod nga naglungtad ang Diyos. Ang salmista mipatugbaw: “Pagkadaghan sa imong mga buhat, Oh Jehova! Sa kaalam gibuhat mo silang tanan. Ang yuta napuno sa imong mga binuhat.” (Salmo 104:24) Ang “mga binuhat” ni Jehova, lakip na ang mga mananap, maoy pamatuod sa iyang kaalam. Sa atong namatikdan sa sinugdanan ning artikulo, ang disenyo sa buhing mga butang dekalidad kaayo nga ang mga siyentipiko subsob nga naningkamot sa pagkopya niana. Tagda ang pipila pa ka mga pananglitan. Ginatun-an sa mga tigpanukiduki ang mga sungay sa osa, sa tuyo nga maghimog mas lig-ong mga helmet; ilang ginasusi ang usa ka espisye sa langaw nga adunay hait nga pandungog, sa tuyo nga mapauswag ang mga hearing aid; ug ilang ginasusi ang mga balhibo sa pako sa mga ngiwngiw, sa hunahuna nga pauswagon ang matang sa mga ayroplano nga dili matiktikan sa radar. Apan bisag unsaon sa tawo, dili gayod niya masundog ang hingpit nga mga disenyo diha sa kinaiyahan. Nag-ingon ang librong Biomimicry—Innovation Inspired by Nature: “Ang buhing mga butang nakahimo sa tanang gusto natong buhaton, nga wala mogamit ug daghan kaayong kinaiyanhon nga sugnod, wala maghugaw sa planeta, o magpameligro sa ilang kaugmaon.” Dako gayong kaalam kini!

10. Nganong dili makataronganon ang dili pagtuo nga adunay Dakong Tigdisenyo? Iilustrar.

¹⁰ Mosud-ong ka man sa kalangitan o motan-aw sa linalang dinhi sa yuta, klaro ang pamatuod nga adunay Maglalalang. (Jeremias 10:12) Kinahanglang kinasingkasing kitang mouyon sa langitnong mga linalang nga nanagsinggit: “Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang.” (Pinadayag 4:11) Bisan pa niana, daghang siyentipiko ang wala makakita sa pamatuod pinaagi sa ‘mga mata sa ilang kasingkasing,’ bisan pag nahibulong tingali sila sa disenyo sa mga butang nga ilang nakita pinaagi sa literal nilang mga mata. (Efeso 1:18) Ikailustrar nato kana niining paagiha: Ang pagdayeg sa katahom ug disenyo diha sa kinaiyahan ug dili pagtuo nga adunay Dakong Tigdisenyo, sama ra ka dili makataronganon sa pagdayeg sa maanindot kaayong dibuho ug sa samang higayon dili motuo nga adunay dibuhista nga naghimo sa blangkong lona nga usa ka obra maestra. Mao diay nga kadtong dili motuo sa Diyos giingon nga “walay ikapangatarongan”!

Ang “Buta nga mga Giya” Nagpahisalaag sa Daghan

11, 12. Ang doktrina sa predestinasyon gipasukad sa unsang pagtuo, ug unsay nagpakita nga kining doktrinaha wala maghimaya sa Diyos?

¹¹ Daghang relihiyosong mga tawo ang sinserong nagtuo nga ang ilang matang sa pagsimba magahimaya sa Diyos. (Roma 10:2, 3) Apan, ang relihiyon sa katibuk-an naglangkob ug laing bahin sa tawhanong katilingban nga sa pagkatinuod nagpugong sa milyonmilyon sa paghimaya sa Diyos. Sa unsang paagi? Hisgotan nato ang duha ka paagi.

¹² Una, ang mga relihiyon nagpakaulaw sa Diyos pinaagi sa bakak nga mga pagtulon-an. Tagda pananglitan ang pagtulon-an bahin sa predestinasyon. Kining maong doktrina gipasukad sa pagtuo nga tungod kay ang Diyos adunay gahom sa pagkahibalo sa umaabot, lagmit gayong nahibaloan niya daan ang sangpotanan sa tanang butang. Busa ang predestinasyon nagsugyot nga dugay nang gimbut-an sa Diyos ang kaugmaon—maayo o daotan—sa matag indibiduwal. Sumala niining ideyaha, ang Diyos maoy responsable sa tanang pag-antos ug pagkadaotan sa kalibotan karon. Wala gayod mahimaya ang Diyos kon siya maoy pasanginlan imbes ang iyang pangunang Kaaway, si Satanas, ang usa nga gitawag sa Bibliya ug “magmamando niining kalibotana”!—Juan 14:30; 1 Juan 5:19.

13. Nganong binuang ang paghunahuna nga ang Diyos dili makakontrolar sa iyang katakos sa pagkahibalong daan sa umaabot? Iilustrar.

¹³ Ang predestinasyon maoy dili-kasulatanhong pagtulon-an nga nagpasipala sa Diyos. Tungod niini, dili tin-aw kon unsay iyang mahimo ug kon unsay aktuwal niyang ginahimo. Ang kamatuoran  nga ang Diyos makahibalong daan sa mga panghitabo klarong gisulti diha sa Bibliya. (Isaias 46:9, 10) Apan, dili makataronganon ang paghunahuna nga dili niya makontrolar ang iyang katakos sa pagkahibalo sa umaabot o nga siya ang responsable sa tanang sangpotanan. Sa pag-ilustrar: Ibutang ta nga kusgan kaayo ka. Tungod niana, gusto ba nimong alsahon ang tanang bug-at nga butang nga imong makita? Siyempre dili! Sa susama, ang pagkabaton ug katakos nga mahibalo sa umaabot dili magtukmod sa Diyos sa pagkahibalo daan ug pagbuot daan sa tanang butang. Ang iyang paggamit sa katakos sa pagkahibalong daan maoy mapilion ug sumala sa iyang pagbuot. c Klaro nga ang bakak nga mga pagtulon-an, lakip na ang predestinasyon, wala maghimaya sa Diyos.

14. Sa unsang paagi ang organisadong relihiyon wala magpasidungog sa Diyos?

¹⁴ Ang ikaduhang paagi nga ang organisadong relihiyon wala magpasidungog sa Diyos maoy pinaagi sa panggawi sa mga sumusunod niini. Ang mga Kristohanon gidahom nga mosunod sa mga pagtulon-an ni Jesus. Lakip sa ubang mga butang, gitudloan ni Jesus ang iyang mga sumusunod sa “paghigugma sa usag usa” ug sa pagpabiling “dili bahin sa kalibotan.” (Juan 15:12; 17:14-16) Komosta ang mga membro sa klero sa Kakristiyanohan? Gisunod ba gayod nila kanang maong mga pagtulon-an?

15. (a) Unsay rekord sa mga klero maylabot sa mga gubat sa mga nasod? (b) Unsay epekto sa panggawi sa mga klero nganha sa milyonmilyong tawo?

¹⁵ Tagda ang rekord sa mga klero maylabot sa gubat. Sila nagpaluyo, nagkonsentir, ug nanguna pa gani sa daghang gubat sa kanasoran. Ilang gibendisyonan ang mga sundalo ug gipakamatarong ang pagpamatay. Matukmod kita sa pagpangutana: ‘Wala ba mosantop sa hunahuna sa maong mga klerigo nga ang ilang kaubang mga klerigo diha sa pikas kiliran naghimo usab sa samang butang?’ (Tan-awa ang kahon “Kinsay Gidapigan sa Diyos?”) Ang klero wala maghimaya sa Diyos sa dihang sila nangangkon nga gipaluyohan niya ang dugoong mga gubat; wala usab nila himayaa siya sa dihang gipahayag nila nga ang mga sukdanan sa Bibliya kinaraan na ug gitugotan ang bisan unsang matang sa seksuwal nga imoralidad. Nagpahinumdom gayod sila kanato sa relihiyosong mga lider nga gitawag ni Jesus ug “mga mamumuhat sa kalapasan” ug “buta nga mga giya”! (Mateo 7:15-23; 15:14) Ang panggawi sa klero maoy hinungdan nga mibugnaw ang gugma sa milyonmilyong tawo ngadto sa Diyos.—Mateo 24:12.

Kinsa ang Tinuod nga Nagahimaya sa Diyos?

16. Aron matubag ang pangutana kon kinsa ang tinuod nga nagahimaya sa Diyos, nganong angay natong susihon ang Bibliya?

¹⁶ Kon ang inila ug impluwensiyal nga mga tawo sa kalibotan sa katibuk-an wala magahimaya sa Diyos, nan kinsa man ang tinuod nga nagbuhat niana? Aron matubag kanang pangutanaha, kinahanglang susihon nato ang Bibliya. Makataronganon nga ang Diyos adunay katungod sa pagsulti kon sa unsang paagi siya himayaon, ug siya naghatag ug mga sukdanan diha sa iyang Pulong, ang Bibliya. (Isaias 42:8) Hisgotan nato ang tulo ka paagi sa paghimaya sa Diyos, sa matag kahimtang tubagon ang pangutana kon kinsa karon ang tinuod nga nagabuhat niana.

17. Sa unsang paagi gipakita mismo ni Jehova nga ang paghimaya sa iyang ngalan maoy hinungdanong bahin sa iyang kabubut-on, ug kinsa karon ang nagadayeg sa ngalan sa Diyos sa tibuok yuta?

¹⁷ Una, mahimaya nato ang Diyos pinaagi sa pagdayeg sa iyang ngalan. Madayag diha sa giingon ni Jehova kang Jesus nga ang pagbuhat niana maoy hinungdanong bahin sa kabubut-on sa Diyos. Pipila ka adlaw sa wala pa siya mamatay, si Jesus miampo: “Amahan, himayaa ang imong ngalan.” Dayon usa ka tingog ang mitubag: “Gihimaya ko na kini ug pagahimayaon ko kini pag-usab.” (Juan 12:28) Sa walay duhaduha ang nagsulti mao si Jehova mismo. Gikan sa iyang tubag, klaro nga ang paghimaya sa iyang ngalan hinungdanon kaniya. Nan, kinsa karon ang nagahimaya kang Jehova pinaagi sa pagsangyaw sa iyang ngalan ug pagdayeg niana sa tibuok yuta? Ang mga Saksi ni Jehova, ug ilang ginabuhat kana diha sa 235 ka nasod!—Salmo 86:11, 12.

18. Sa unsang paagi maila nato kadtong nagasimba sa Diyos sa “kamatuoran,” ug unsang grupo ang nagatudlo sa kamatuoran sa Bibliya sulod na sa kapin sa usa ka siglo?

¹⁸ Ikaduha, atong mahimaya ang Diyos pinaagi sa pagtudlo sa kamatuoran bahin kaniya. Si Jesus miingon nga ang matuod nga mga magsisimba “magasimba [sa Diyos] uban sa . . . kamatuoran.” (Juan 4:24) Sa unsang paagi maila nato kadtong nagasimba sa Diyos uban ang “kamatuoran”? Kinahanglang isalikway nila ang mga doktrina nga wala ipasukad sa Bibliya ug sayop nga nagahawas sa Diyos ug sa iyang kabubut-on. Hinunoa, sila kinahanglang magatudlo sa lunsayng mga kamatuoran sa Pulong sa Diyos, lakip na ang mosunod: Si Jehova mao ang Labing Hataas nga Diyos, ug siya lamang ang takos sa himaya niining maong posisyon (Salmo 83:18); si Jesus mao ang Anak sa Diyos ug ang tinudlong Magmamando sa Mesiyanikong Gingharian sa Diyos (1 Corinto 15:27, 28); ang Gingharian sa Diyos magabalaan sa ngalan ni Jehova ug magatuman sa iyang katuyoan niining yutaa ug sa mga tawo (Mateo 6:9, 10); ang maayong balita mahitungod niining maong Gingharian kinahanglang iwali sa tibuok yuta. (Mateo 24:14) Sulod sa kapin sa usa ka siglo, usa lamang ka grupo ang matinumanong nagatudlo nianang bililhong mga kamatuoran—ang mga Saksi ni Jehova!

19, 20. (a) Nganong ang maayong panggawi sa usa ka Kristohanon magahimaya sa Diyos? (b) Unsang mga pangutana ang makatabang kanato sa pagtino kon kinsa karon ang nagahimaya sa Diyos pinaagi sa paghupot ug maayong panggawi?

¹⁹ Ikatulo, mahimaya nato ang Diyos pinaagi sa pagkinabuhi nga kaharmonya sa iyang mga sukdanan. Si apostol Pedro misulat: “Hupti ninyo ang maayong panggawi taliwala sa mga nasod, aron nga, sa butang nga ilang gisulti batok kaninyo ingong mga mamumuhat ug daotan, sila ingong resulta sa inyong maayong mga buhat nga niini sila mga saksing-nakakita maghimaya sa Diyos sa adlaw sa iyang pagsusi.” (1 Pedro 2:12) Ang panggawi sa usa ka Kristohanon magsumbaliksilaw sa iyang pagtuo. Sa dihang ang mga maniniid makamatikod niana—sa ato pa, sa dihang ilang makita nga ang maayong panggawi sa Kristohanon maoy direktang resulta sa iyang pagtuo—kini magahimaya sa Diyos.

²⁰ Kinsa karon ang nagahimaya sa Diyos pinaagi sa paghupot ug maayong panggawi? Aw, unsang relihiyosong grupo ang gidayeg sa daghang gobyerno tungod sa pagkahimong makigdaiton, masinundanon-sa-balaod nga mga molupyo nga nagabayad sa ilang mga buhis? (Roma 13:1, 3, 6, 7) Unsang katawhan ang nailhan sa tibuok kalibotan tungod sa ilang panaghiusa uban sa mga isigkamagtutuo—usa ka panaghiusa nga nagbuntog sa rasanhon, nasodnon, ug etniko nga mga kalainan? (Salmo 133:1; Buhat 10:34, 35) Unsang grupoha ang giila sa tibuok kalibotan tungod sa ilang buluhatong pagpanudlo bahin sa Bibliya nga nagdasig ug pagtahod sa balaod, mga prinsipyo sa pamilya, ug moralidad sa Bibliya? Adunay usa lamang ka grupo kansang maayong panggawi niining bahina ug sa uban pa nagpamatuod niini—ang mga Saksi ni Jehova!

 Nagahimaya Ka ba sa Diyos?

21. Nganong angay natong tagdon kon kita nagahimaya ba kang Jehova?

²¹ Ang matag usa kanato maayong mangutana, ‘Ako ba nagahimaya kang Jehova?’ Sumala sa Salmo 148, kadaghanan sa mga linalang nagahimaya sa Diyos. Ang mga manulonda, ang pisikal nga kalangitan, ang yuta ug ang mga mananap—kining tanan nagadayeg kang Jehova. (Mga bersikulo 1-10) Pagkamakapasubo nga kadaghanang tawo karon wala magahimaya sa Diyos! Pinaagi sa pagkinabuhi sa paagi nga nagahimaya sa Diyos, ikaw nahiusa sa uban pang mga linalang nga nagadayeg kang Jehova. (Mga bersikulo 11-13) Wala nay mas maayo pang paagi sa paggamit sa imong kinabuhi.

22. Pinaagi sa paghimaya kang Jehova, sa unsang mga paagi ikaw gipanalanginan, ug kinahanglang determinado ka nga buhaton ang unsa?

²² Pinaagi sa paghimaya kang Jehova, ikaw gipanalanginan sa daghang paagi. Samtang ikaw nagpasundayag ug pagtuo sa halad lukat ni Kristo, ikaw mapasig-uli sa Diyos ug makatagamtam ug malinawon ug mabungahon nga relasyon uban sa imong langitnong Amahan. (Roma 5:10) Samtang mangita ka ug mga rason sa paghimaya sa Diyos, ikaw mahimong mas positibo, mapasalamaton. (Jeremias 31:12) Unya, makatabang ka sa uban sa pagkinabuhi nga malipayon ug matagbawon, sa ingon makaplagan nimo ang mas dakong kalipay. (Buhat 20:35) Hinaot mahilakip ka niadtong determinado nga magahimaya sa Diyos—karon ug hangtod sa kahangtoran!

[Mga footnote]

 Nahinumdom Ka Ba?

• Nganong makaingon kita nga ang siyentipikanhong komunidad sa katibuk-an wala makatabang sa mga tawo sa paghimaya sa Diyos?

• Sa unsang duha ka paagi nga ang organisadong relihiyon nagpugong sa mga tawo sa paghimaya sa Diyos?

• Sa unsang mga paagi kita makahimaya sa Diyos?

• Nganong angay nimong palandongon kon ikaw nagahimaya ba kang Jehova?

[Mga Pangutana sa Pagtuon]

[Kahon sa panid 12]

“Kinsay Gidapigan sa Diyos?”

Usa ka tawo nga sakop kanhi sa German Air Force panahon sa Gubat sa Kalibotan II apan sa ulahi nahimong usa sa mga Saksi ni Jehova nahinumdom:

“Ang nakapatugaw kanako niadtong katuigan sa gubat . . . mao ang pagkakita sa mga klerigo sa halos tanang denominasyon—Katoliko, Lutherano, Episcopal, ug uban pa—nga nagbendisyon sa mga ayroplano ug sa mga tripulante niini sa dili pa mogikan aron sa pagtuman sa ilang mga misyon sa paghulog sa ilang makamatay nga kargamento. Subsob kong maghunahuna, ‘Kinsay gidapigan sa Diyos?’

“Diha sa belya sa bakos sa Aleman nga mga sundalo nahisulat ang mga pulong Gott mit uns (Ang Diyos nagauban kanato). Apan ako naghunahuna, ‘Nganong ang Diyos dili modapig sa mga sundalo sa pikas kiliran nga samag relihiyon ug nag-ampo sa mao rang Diyos?’”

[Hulagway sa panid 10]

Sa tibuok yuta, ang mga Saksi ni Jehova tinuod nga nagahimaya sa Diyos