Labaw pa kay sa Duladula Lang

ANG mga bata gustong magduladula. Apan “kini dili lang kay walay-pulos o walay-hinungdan nga kalihokan,” nagpatin-aw ang librong The Developing Child. “Ang panglantaw sa bata sa iyang palibot lagmit nga maugmad gumikan niini nga kalihokan.” Pinaagi sa pagdula, ang mga bata makakat-on sa paggamit sa ilang mga sentido, pagsabot sa mga butang alirong nila, ug pagpakiglabot sa uban.

Sugod sa edad nga upat o lima ka tuig, awat-awaton sa mga bata ang buluhaton sa dagkong mga tawo ingong bahin sa ilang mga dula. Dihay higayon nga si Jesus naghisgot bahin sa mga bata nga nagdula. Ang uban gustong magdula nga kunohay aduna silay gikasal, ang uban gusto nga kunohay aduna silay gilubong ug, ingon sa kanunayng mahitabo taliwala sa mga bata, maglalisay sila tungod kay ang uban dili gustong moapil. (Mateo 11:16, 17) Kining matanga sa pagduladula magpatisok sa hinungdanon nga mga buluhaton diha sa hunahuna sa nagtubong bata.

Ang mga bata nga makita sa mga hulagway nagduladula ingong usa kunohay ka magtutudlo sa Bibliya ug usa ka estudyante. Dili tinuod ang ilang panagtuon sa Bibliya, apan ang ideya sa pagpaambit sa mensahe sa Bibliya anaa gayod sa ilang hunahuna. Ug kini nga pagtulon-an hinungdanon, sanglit gisugo ni Jesus ang tanan niyang mga sumusunod sa paghimog mga tinun-an ug sa pagtudlo kanila sa pagtuman sa tanang butang nga iyang gitudlo kanila.—Mateo 28:19, 20.

Ang mga ginikanan kansang mga anak gustong magdula nga konohay nagdumala sila ug mga pagtuon sa Bibliya, naghatag ug pagpakigpulong, o nagsangyaw sa balay-balay angay lang nga mobatig garbo. Siyempre, giawat lang sa mga bata kon unsay ilang nakita nga gihimo sa dagkong mga tawo nga kauban nila. Ang mga dula sa mga bata bahin sa Bibliya nagpaila lang nga sila gimatuto diha “sa matang sa edukasyon ug pahimangno nga giuyonan sa Ginoo.”—Efeso 6:4, Charles B. Williams.

Buot ni Jehova nga ang mga bata makig-ambit sa matuod nga pagsimba. Giingnan niya si Moises nga ilakip “ang mga bata” sa dihang basahon ang Kasugoan. (Deuteronomio 31:12) Kon ang mga bata mobati nga sila apil niana, lagmit nga awat-awaton nila kana diha sa ilang mga dula. Ug ang bata nga magduladula ingong usa kunohay ka ministro sa Diyos naghimo sa unang tikang sa pagkahimong ingon niana.