Mga Pangutana Gikan sa mga Magbabasa

Sa dihang si apostol Juan misulat nga “ang hingpit nga gugma naghingilin sa kahadlok,” unsay iyang buot ipasabot sa “hingpit nga gugma,” ug busa maghingilin sa unsa nga “kahadlok”?

“Walay kahadlok diha sa gugma,” misulat si apostol Juan, “hinunoa ang hingpit nga gugma naghingilin sa kahadlok, tungod kay ang kahadlok nagapugong. Sa pagkatinuod, siya nga may kahadlok wala mahingpit diha sa gugma.”—1 Juan 4:18.

Ang konteksto nagpakita nga si Juan naghisgot dinhi bahin sa kagawasan sa pagsulti—ilabina ang kalangkitan tali sa atong gugma sa Diyos ug sa atong kagawasan sa pagpakigsulti ngadto Kaniya. Mabasa nato kini diha sa bersikulo 17: “Sa ingon niini nahingpit ang gugma diha kanato, aron kita makabaton ug kagawasan sa pagsulti sa adlaw sa paghukom.” Ang giladmon sa gugma sa usa ka Kristohanon ngadto sa Diyos ug sa iyang pagbati nga ang Diyos nahigugma kaniya dunay direktang epekto sa iyang kagawasan—o kawalay-kagawasan—sa pagpakigsulti sa Diyos diha sa pag-ampo.

Ang ekspresyon nga “hingpit nga gugma” makahuloganon. Sumala sa pagkagamit diha sa Bibliya, ang pulong “hingpit” wala kanunay magpasabot ug bug-os nga kahingpitan, sa ato pa, sa kinatas-an nga sukod niini, kondili kini kasagarang nagpasabot ug relatibo nga kahingpitan. Pananglitan, sa iyang Wali sa Bukid, si Jesus miingon: “Kamo kinahanglang magmahingpit, ingon nga ang inyong langitnong Amahan hingpit.” Giingnan ni Jesus ang iyang mga sumusunod nga kon ilang higugmaon lamang kadtong nahigugma kanila, ang ilang gugma dili bug-os, kulang, may depekto. Kinahanglan nilang hingpiton, o himoon gayod nga bug-os, ang ilang gugma pinaagi sa paghigugma bisan sa ilang mga kaaway. Busa, sa samang paagi, sa dihang si Juan misulat bahin sa “hingpit nga gugma,” siya naghisgot bahin sa gugma ngadto sa Diyos nga tibuok kasingkasing, bug-os nga naugmad, ug naglakip sa tanang bahin sa kinabuhi sa usa.—Mateo 5:46-48; 19:20, 21.

Sa dihang moduol sa Diyos diha sa pag-ampo, ang usa ka Kristohanon nahibalo gayod nga siya makasasala ug dili-hingpit. Apan, kon bug-os nga naugmad ang iyang gugma sa Diyos ug gibati gayod niya nga siya gihigugma sa Diyos, dili siya mababagan sa kahadlok nga husgahan o isalikway. Hinunoa, siya libreng makapadayag kon unsay anaa sa iyang kasingkasing ug makapangayog pasaylo pinasukad sa halad lukat, nga mahigugmaong gitagana sa Diyos pinaagi ni Jesu-Kristo. Masaligon siya nga dunggon sa Diyos ang iyang mga pangaliya.

Sa unsang paagi ang usa “mahingpit diha sa gugma” ug sa ingon ‘maghingilin’ sa kahadlok nga husgahan o isalikway? “Si bisan kinsa nga magbantay sa iyang [Diyos] pulong, sa pagkatinuod nahingpit niining tawhana ang gugma sa Diyos,” matod ni apostol Juan. (1 Juan 2:5) Hunahunaa kini: Kon ang Diyos nahigugma kanato samtang kita makasasala pa, dili ba mas higugmaon pa niya kita kon kita tinuod nga mahinulsolon ug masinundanon nga “magbantay sa iyang pulong”? (Roma 5:8; 1 Juan 4:10) Sa pagkatinuod, basta magpabilin kitang matinumanon, mabatonan nato ang samang pasalig nga nabatonan ni apostol Pablo sa dihang siya miingon bahin sa Diyos: “Siya nga wala gani magpalingkawas sa iyang kaugalingong Anak kondili nagtugyan kaniya alang kanatong tanan, dili ba siya usab uban kaniya malulotong maghatag kanato sa tanang ubang butang?”—Roma 8:32.